ठीक्नल 16 - ल्होमीपावल्की तीमोथी ठीक्पे तम् १-५ 1 हीनी पावल्सो डर्बी सार् धङ् लीस्तरा सार्ल फीम्ब बेत्। ॱनी लीस्तरा सार्तु येशुगी ॱलोप्टुक्ल स्युन यो़क्केन् तीमोथी सीक्केन् च्यीक् ठेप्प बेत्। हुगी आम दी येशुल छ्य स्योक्केन् यहुदी धङ् पब दी ग्रीक्की मी हीङ्गो़प्प बेत्। 2 लीस्तरा सार् धङ् आइकोनीयम् सार्तु दो़क्केन् पी़न्ज्या घयेत् दीगी तीमोथीगी ढीक्ल हुगो मी गस्सी बेत् सीन्न कुरीक्की सीगो़प्प बेत्। 3 ॱनी पावल्की हुगो कङ्ज्यीक्ल ठीक्च्ये ॱनो़न तीमोथील यहुदीगी दक् ज्यक्तु ची़प्प बेत्। हुगो हुगी लुङ्बे यहुदी घयेक्की ढीक्ल ज्यब बेत्। घन्ड हीन् सीन्न हुगी पब दी ग्रीक्की ज्यी़त् हीम्ब हुगी लुङ्बे यहुदी घयेत्ल ॱस्यो़च्च्ये यो़प्प बेत्। 4 हुनी हुब ॱसुम्बु सार् सार्ल गीर्न एल्ला यरुशलेम्दु ठीक्नल दीब धङ् गोयो़प्प घयेक्की टेप्पे क घयेत् दी छ्य स्योक्केन् घयेत्ल ॱलप्न हुल चीदु ची़प्प बेत्। 5 ॱनी हुगी लुङ्बे छ्यो़ छो घयेक्की मीस्सीर्की छ्य स्यक्प दी डम्दु ॱसोङ्न, हुनी ङीन्दङ् फो़स्स्यी मी ॱसम्ब आक् फीन युङ बेत्। पावल्ल थोङ्नङ्ल तो़म्बे तम् ६-१० 6 हुनी धम्बे थुगी पावल्सोल एशीया लुङ्बदु केच्च्य ॱस्यो़त्तु ॱमत् ची़प्पल हुब फ्रीगीया धङ् गलाती लुङ्बे घुङ्नी फल्ल गीर्न फीम्ब बेत्। 7 ॱनी मैसीया लुङ्बे छीगल ॱलीत्नी, बीथीनीया लुङ्बल स्युक्च्ये ॱनो़न फीम्ब बेत्। ॱनी फीन्नी, येशुगी थुगी डोदु ॱमत् ची़प्प बेत्। 8 हुनी मैसीया लुङ्बे घुङ्नी फल्ल फीन्न त्रोआस् सार्ल ॱलीब बेत्। 9 ॱनी हुदु ॱलीबे गोङ् दी पावल्की थोङ्नङ् च्यीक् थोङ बेत्। हुगी थोङ्नङ् दील मासीडोनीया लुङ्बे मी च्यीक्की रोरङ्ल हीदु ङीत् च्याल युङ्न ङीत्ल दगु झ्यीत्रो झ्यी सीन्न स्युदेन् ज्यक्प थोङ बेत्। 10 ॱनी पावल्की हुगो थोङ्नी, ङीस्सो ॱस्यर्च्यक् मासीडोनीयाल डोज्येम ठोक्क झ्यीबेन्। हुगी थोङ्नङ् दी ङीस्सो हुगी लुङ्बल केच्च्य ॱनेम्बु ॱस्येत्न टोम्दु को़न्ज्योक्की भो़ब बेत् ॱनो़ब ङीक्की ॱह घोज्युङ्। भुमु लीडीयागी छ्य स्यक्न युङे तम् ११-१५ 11 हुनी ङीस्सो त्रोआस् सार् दीनी ढु छ्यीम्मुल स्युन छ्यु ज्यम्जो छ्यीम्मी़ लम्ल फीन्नी सामोथ्रेस् लुङ्बल ॱलीबेन्। हुनी यङ् ढु छ्यीम्मुल स्युन फीन्नी नेम्बेत् दी नीयापोलीस् सार्ल ॱलीबेन्। 12 हुनी ङीत् कङ्ब फीन्नी मासीडोनीया लुङ्बे सार् ॱङो़म फीलीप्पील ॱलीबेन्। उन रोमीया ज्यी़क्की मी गज्येन् युङ्न फुगी देत्न यो़प्प बेत्। ॱनी ङीत् हुदु स्यक्पु धोबा च्यीक् थुक् देप्पेन्। 13 हुनी ङीत्तुवे ङीन् ॱलीत्नी, हुगी सार्की छ्यील चङ्बी़ छीगल यहुदीगी ॱसुव तोप्स च्यीक् यो़ट्टो ॱनो़न ङीत् हुदु फीम्बेन्। फीन्नी हुदु देप्पेन्। ॱनी हुदु जोम्न युङे भुमु घयेत्ल ङीक्की तम् ॱस्येप्पेन्। 14 ॱनी ङीक्की तम्ल नेङ्गेन् उन भुमु लीडीया सीक्केन् च्यीक् यो़प्प बेत्। हुगी ले दी खुङ् थोन्दीक्मे घुलक् ॱमुक्लोक्प चोङ्गो़प्प बेत्। हुगो को़न्ज्योक्ल धेप्प मो़ब झ्यीक्केन् थीयाटीरा सार्की मी हीङ्गो़प्प बेत्। ॱनी हुगी ॱसीम्बे ॱमीक् दी चोव ज्यीन्दक्की भीदु ची़त्नी, हुनी पावल्की ॱस्येप्पे तम्ल हुगी नेन्न युङ बेत्। 15 हुनी हुगोदङ् हुगी मीजङ् घयेत् दी बप्तीस्ल स्युब बेत्। ॱनी लीडीया दीगी ङीत्ल खीत्रङ्गी ॱनो़बल ङ चोव ज्यीन्दक्ल छ्य स्योक्केन् खुङ्देन् हीम्ब ॱसम्गो़त्न ॱनी, ङे खीम्दु स्युदु झ्यो़र्रो झ्यी सीन्न स्युदेन् गन्दीक्म ज्यप्च्युङ्। ॱनी ङीत् फीम्बेन्। पावल् धङ् सीलास् चो़ल्ल ॱस्योरे तम् १६-४० 16 हुनी ङीन् च्यीक् ङीत् हुगी ॱसुव तोप्स दील डोये यङ्ल मो तोप्केन्, रङ्मो़ मीप्पे ॱयोक्मु च्यीक्तङ् ठेच्च्युङ्। हुल मोमे ॱल्ह स्युन, मो खेसी तप्न रोरङ्गी दक्पु दील पयीसक् गज्येन् ॱसान तीक्को़प्प बेत्। 17 ॱनी हुगी भुमु हुगो पावल् धङ् ङीक्की तीङ्ल युङ्न हुगी मी घयेत्ल हीगी मी हीब इगी थोरी चीदु स्युगेन् को़न्ज्योक्की ॱयोक्पु बेत्। हीबे खीत्रङ् घयेत्ल थर्वे लम् ॱस्येत्न टो़क्केन् बेत् सीन्न केत् ज्यक्कील्ल तीङ्ल ॱलीच्च्युङ्। 18 ॱनी हुगी छीगङ् हुन्दुक् झ्यीन ङीम गज्येन् झ्यीनी, हुनी ङीन् च्यीक् पावल् उ दुनी, लोक्न तेन हुगी मोमे ॱल्ह दील येशु ख्रीष्ट्की छेन्नी ङ रङ्ल खक्को़ ज्यक्केन्। ह रङ् थो़ल्ल ज्युक् सीन्नी, ॱस्यर्च्यक् थो़न्न टप्नर बेत्। 19 ॱनी हुगी भुमु दीगी दक्पु दीबल पयीसक् युङ्से लम् दी येन खुर्नी ॱनी, दक्पु दीबे पावल् धङ् सीलास् सुङ्न ठोम् छुसल पेम्बु घयेत् च्याल ढी़त्न च्येब बेत्। 20 हुन्दुक् झ्यीन ठीम्बो़न् च्याल च्येन हुबे हीगी यहुदी हीबे हज्यरङ्गी सार्ल स्यी छीर ॱलोङ्गुक्। 21 हीबे लेमुल हज्यरङ् नेन्ज्ये मीत् युङ्गेन् बेत्। हज्यरङ्गी रोम्गी ज्यागक्की ठीम्ल मीत् डीक्केङ्गी यो़च्चो़त् मीच्चो़क्की टो घयेत् हीबे ॱस्येत्न टोम्गुक् सीन्न पोला ज्यब बेत्। 22 ॱनी हुदु मी जोम्ब घयेत् दी इक् डल लोङ्ज्युङ्। हुनी हुगी पेम्बु दीबे पावल् धङ् सीलास्की घो़ दी च्येत्न पुर्न डेङ्ज्यक् बेन्दु ची़प्प बेत्। 23 ॱनी गज्येन् बेन्नी, हुनी चो़ल्ल ॱलुक् तङ बेत्। ॱनी हुगी चो़म्बो़न् दील गन्दीक्म तो़ सीन्न खक्को़ ज्यप्न स्यक्प बेत्। 24 ॱनी हुगी चो़म्बो़न् दीगी पावल् धङ् सीलास् चो़ङ्गी नङ्गी कोट्ट नङ्स्युक्म दील ॱलुक्न हुदु गोङ्ल ज्यप्न स्यक्प बेत्। 25 हीनी छेङ्गी घुङ् ॱलीत्नी, पावल् धङ् सीलास् ॱसुव तप्न को़न्ज्योक्ल ॱलु लीन्न पुब बेत्। ॱनी चो़म्बा ॱयोङ्म दीबे एक् हुल नेम्ब बेत्। 26 हुनी थोप्तक् मीक्ल म दीरङ् ॱसेर छ्यीम्मु ज्यप्न चो़ङ्गङ्गी ॱसप्तेन् दीरङ् भीर् भीर् झ्यीन गोच्चेक् घयेत् दी ॱहदङ् मदङ् भीक्नर बेत्। ॱनी चो़म्बा घयेत्ल ज्यबे च्यागोङ् घयेत् दी इक् नुक्रङ् स्यीक्नर बेत्। 27 हीनी हुगी चो़म्बो़न् दी ॱङीत् सेत्नी, गोच्च घयेत् दी ॱहदङ् मदङ् भीक्नर थोङ्नी, चो़म्बा घयेत् दीब कुरीक् ढो़नर डयेत् ॱनो़न रोरङ्गी रोरङ् ॱसो़च्च्येमल ढी पदङ् पीक्प बेत्। 28 ॱनी हुल पावल्की केत् छ्यीम्मु तो़न्न ॱवे नीज्यरङ्गी नीज्यरङ्ल च्यो़न् तोङ्रो मत् झ्यी। ङीत् मत् ढो़ब, कुरीक् हीन यो़त् सीन्न झ्यीब बेत्। 29 ॱनी चो़म्बो़न् दीगी बत्ती खुर्लेत् सीन्न लीन्न ज्योक्पु नङ्ल स्युन पावल् धङ् सीलास्की दोङ्दु दर्कीन् दर्कीन् छ्यक् छेब बेत्। 30 हुनी हुब ॱङीबु छ्यील तो़न्न चो़म्बो़न् दीगी नीज्यरङ्सो ङल छी थर्व युङल घन्ड झ्यीत् गोगेन् बेक्क? सीन्न ढीब बेत्। 31 ॱनी हुब ॱङीबी़ लेम्बुल चोव ज्यीन्दक् येशुल छ्य स्यक्न युङ्न, रङ् धङ् रङ्गी मीजङ् घयेत्ल छी थर्व युङ्गेन् बेत्। 32 हुनी हुगी चो़म्बो़न् दीगी मीजङ् घयेत् दील अक् पावल् धङ् सीलास्की चोव ज्यीन्दक्की केच्च्य ॱस्येत्न टेप्प बेत्। 33 ॱनी हुगी छेम्मु दीरङ् चो़म्बो़न् दीगी पावल् धङ् सीलास्की ॱम घयेत् दी टी़न बीम्ब बेत्। हुनी हुगी यङ्लरङ् हुगोदङ् हुगी मीजङ् घयेत् दी कुरीक् बप्तीस्ल स्युब बेत्। 34 हुनी पावल् धङ् सीलास् हुगी चोबो़न् दीगी रोरङ्गी खीम्ल ठीक्न सम टेप्प बेत्। को़न्ज्योक्ल छ्य स्यक्न युङ्नी, हुगी चो़म्बो़न् दीदङ् हुगी मीजङ् घयेत् दील गेस झ्युङ बेत्। 35 हुनी ॱङेट्टो नम् लोङ्नी, हुगी पेम्बु दीबे दङ् चो़ल्ल ॱलुक्पे मीरङ् ॱङीबु दी तोङ्लोङ् सीन्न चो़म्बो़न् दील ॱसा टो़क्केन् पेम्बी़ स्यप्च्यी़ब तङ्न युङ बेत्। 36 हुनी हुगी चो़म्बो़न् दीगी पावल्ल नीज्यरङ्सो ॱङीबु तोङ्लोङ् सीन्न पेम्बुसो़ ॱसा तङ्ज्युङ्। ह नीज्यरङ्सो ॱसीम् दीव झ्यीन झ्यो़न् सीन्न तङ बेत्। 37 हीनी पावल्की हुगी ॱसा टो़क्केन् स्यप्च्यी़ब दीबल ङीत् रोम्गी ज्यागक्की मीस्सीर् हीन्। ॱनी हीन्न अक्, ठीम् ॱमत् च्येप्पल कुरीक्की थोङ्सल डेङ्ज्यक् बेन्न चो़ल्ल ॱलुक्च्युङ्। ह ङीत् तोङे यङ्ल यङ् ॱसोप्ल तोङ्गेन् सीक्केन्? ङीत् मीत् डो। हुगी पेम्बु दीब युङ्न तो़न्न मेन्द, ङीत् मीत् डो सीन्न झ्यीब बेत्। 38 ॱनी हुगी स्यप्च्यी़ब दीब लोक्न हीगी तम् हीगो पेम्बु दीबल ॱस्येत्न टेत्नी, रोम्गी ज्यागक्की मीस्सीर् बेत् सीर ॱह घोनी, हुब ज्यीनर बेत्। 39 हुनी हुब चो़ङ्गङ्ल युङ्न पावल् धङ् सीलास् चो़ङ्गङ्नी तो़न्न तम् ॱनेम्बोक्म लप्न बीन्न नीज्यरङ्सो हीगी सार् हीनी डोरो झ्यी सीन्न स्युव ज्यब बेत्। 40 हुनी पावल् धङ् सीलास् लीडीयागी खीम् दील फीन्नी, हुदु पी़न्ज्या घयेत् ठेप्प बेत्। ॱनी हुब घयेत्ल ॱलोप्स्यीक् टेत्न स्यक्नी ॱयोङ्ल टप्नर बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.