ठीक्नल 14 - ल्होमीपावल् धङ् बार्नाबास् आइकोनीयम्दु १-५ 1 हीनी आइकोनीयम्दु उक् पावल् धङ् बार्नाबास् ॱएङ्गी लेक्मु हुगी यहुदीगी छ्यो़गी छोगङ्ल स्युब बेत्। ॱनी हुदु उक् हुब ॱङीबी़ केच्च्य ॱस्येत्नी, यहुदी धङ् ज्यी़त् ॱयोङ् ॱयोङ्गी मी गज्येन् छ्य स्यक्पे लम्ल युङ बेत्। 2 ॱनी हीन्न अक्, मेम्बेत् सीन्न छ्य मीत् स्योक्केन् यहुदी यरीबे टुक् ज्यप्न हुगी सार्की ज्यी़त् ॱयोङ् ॱयोङ्गी मी घयेत् एत् पी़न्ज्या घयेक्की डल ॱलोङ बेत्। 3 ॱनी हीन्न अक्, पावल्सो हुदु चोव ज्यीन्दक्की ढीक्की केच्च्य ज्यीक्टक् मीप्प ॱस्येत्न स्यक्पु गज्येन् देप्प बेत्। चोव ज्यीन्दक्की थुज्यीगी ढीक्की केच्च्य दी खुङ्देन् हीम्ब ॱह घोज्येल यीक् छ्यीम्मी़ लेगी ता धङ् यम् छेम्मे ले घयेत् हुब ॱङीबी़ लम्नी खोङ्गी जेप्प बेत्। 4 हीनी हुगी सार्की मी घयेत् दी गो ॱङील भीन, गो च्यीक् हुगी ड झ्यीक्केन् यहुदी ङो़ल धङ् गो च्यीक् ठीक्नल दीब छ्योल देप्प बेत्। 5 हीनी ज्यी़त् ॱयोङ् ॱयोङ्गी मी, यहुदी घयेत् धङ् सार्की चो छ्यीया घयेत् दीब छ्य झ्यीन हुगी पावल् हुगो धङ् बार्नाबास्ल दोर्तुङ् बेन्न ॱम पप्तोङ् सीन्न ढो़ झ्यीब बेत्। 6 ॱनी हुगी ढो़ दी ॱह घोनी पावल्सो लैकाओनीया लुङ्बल ढो़नर बेत्। ॱनी उन यो़क्केन् लीस्तरा धङ् डर्बी सार् ॱङील धङ् हुगी छीग ॱनमुल गीर्न 7 केच्च्य ॱनेम्बु दी ॱस्येत्न टेप्प बेत्। पावल् धङ् बार्नाबास् लीस्तरा सार्तु ८-२० 8 ॱनी लीस्तरा सार् दीन मी कङ्ब घोङ्रीय च्यीक् यो़प्प बेत्। हुगो कीजो़त्नीरङ् घोङ्रीय कीनी, हुगो नम्ल अक् लोङ्न छ्यम् ॱमत् छुब हीङ्गो़प्प बेत्। 9 ॱनी पावल्की केच्च्य ॱस्यो़प्पे यङ्ल हुगी मी दी उन नेङ्गीन् यो़प्प बेत्। ॱनी पावल्की हुल फोरील तेनी हुगी मी दीगी रोरङ् ढक्केन् बेत् ॱनो़न छ्य स्यक्प दी पावल्की थोङ्नी, 10 हुल ॱवे रङ् कङ्ब चुल ॱहोक् लोङ् सीन्न केत् ज्यब बेत्। हुनी हुगो ॱहोक् लोङ्न छ्यम्ब बेत्। 11 ॱनी हुगी मी जोम्ब घयेत् दीगी पावल्की ले झ्यीप्प हुगो थोङ्नी, हुब कुरीक्की लैकाओनीयागी केच्च्योक्ल ॱल्ह घयेत् मील टी़न हज्यरङ् च्येल्ल भप्न ॱलीत्तुक् सीन्न केत् ज्यब बेत्। 12 बार्नाबास्ल जीउस् सीन्न रोरङ्सो़ ॱल्हे मीङ् ताब बेत्। ॱनी पावल्की तम् मङा ॱस्यो़क्केन् झ्यीनी, हुल हर्मेस् सीक्केङ्गी ॱल्हे मीङ् ताब बेत्। 13 ॱनी हुगी जीउस् सीक्केङ्गी ॱल्ह दीगी ॱल्हगङ् दी सार्की छ्यील यो़प्प बेत्। ॱनी हुगी छ्यो़प्पो़न् दी धङ् हुगी मी घयेत् दीगी ॱरोक्ल ॱलङ् गज्येन् ठीक्न मीन्दोक्की कीलुङ् गज्येन् खुर्न पावल् धङ् बार्नाबास्ल छ्यो़प्प पुदु सीन्न गोच्चेक्तु ॱलीब बेत्। 14 ॱनी हुगो ॱह घोनी ठीक्नल दीब च्युगा लङ्नी, रोरङ्सो़ घो़ दी बरक् च्येत्न छ्यील हुगी मी घयेत् दी च्याल ज्युन फीन्न 15 ॱवे खीत्रङ्सो, घन्डल हीन्दुक् झ्यीक्केन्। ङीत् इत् खीत्रङ् डस्सीगी मीरङ् हीन्। हीन्दुक् झ्यीब घो ॱमीत् छ्यो़क्की ले च्यम् स्योक्। तेङ् यी़, जम्बुलीङ्, छ्यु ज्यम्जो छ्यीम्मु धङ् घङ् यो़प्प घयेत् छ्यादु ची़क्केन् ॱसोम्बु हीम्बे को़न्ज्योक् च्याल लोक् छुज्ये यो़प्पल खीत्रङ्ल केच्च्य ॱनेम्बु ॱस्यो़त्तु ङीत् युङ हीन्। 16 को़न्ज्योक्की धङ्बुनी झ्यीनी हजो़त् थुक्ल जम्बुलीङ्गी ज्यी़त् ज्यी़त् घयेत् हीगो रोरङ्सो़ ॱनो़बागी ॱवङ्गल स्यक् तङ बेत्। 17 ॱनी स्यक्न अक्, को़न्ज्योक् घन्दुक्मे गय यो़प्प बेक्क हुगो कुरीक्ल ॱह घोदु ची़च्च्येल खोङ्गी छीगङ् गङ्ज्येन् झ्यीक्केन् बेत्। ॱनम्नी ॱसल छ्येप्प ज्यक्तु ची़क्केन्, ॱअन्न घयेत् धी़दोक्ल कीदु ची़क्केन्, हज्यरङ्गी ढोप्प डङ्दु ची़क्केन्, ॱसीम् गव युङ्दु ची़क्केन् बेत् सीन्न ॱस्येप्प बेत्। 18 हुन्दुक् सीन्न ॱस्येत्न पावल्सोल छ्यो़प्प पुदु युङ दी क च्यो़त् ॱमीत् छु मेन्नक् झ्यीन च्येप्प बेत्। 19 हुनी एन्टीयोक् धङ् आइकोनीयम् सार् ॱङीक्कर्नी यहुदी यरीब हुदु युङ्न हुगी सार्की मी घयेत् दी ॱयो कोर्न तेक्न डल ॱलोङ बेत्। हुनी कुरीक् डल लोङ्नी, पावल्ल रुप्न दोरुप् ज्यब बेत्। हुनी ॱस्यीसोङ् ॱनो़ब छ्यर्नी, पावल् सार्की छ्यील ढी़त्न पुर् तङ बेत्। 20 हुनी हुगी येशुगी ॱलोप्टुक्ल स्युन यो़प्प घयेत् दी पावल्की छीग ॱनमुल रोङील ॱलीत्नी, हुनी यङ् पावल् लोङ बेत्। हुनी कङ्ज्यीक्ल सार् दील लोक्न युङ बेत्। हीनी नेम्बेत् दी पावल् धङ् बार्नाबास् डर्बी सार् दील टप्नर बेत्। पावल् धङ् बार्नाबास् एन्टीयोक्ल लोक्पे तम् २१-२८ 21 हीनी हुब ॱङीबी़ हुगी डर्बी सार् दीदु केच्च्य ॱनेम्बु ॱस्येत्नी, हुगी मी गज्येन् ॱलोप्टुक्ल स्युन युङ बेत्। हुनी हुब ॱङीबु लम् स्युन लीस्तरानी झ्यीनी आइकोनीयम्ल झ्यीन पीसीडीयागी एन्टीयोक्ल लोक्न युङ बेत्। 22 हुगी सार् ॱसुम्बु दीन येशुगी ॱलोप्टुक्ल स्युन यो़प्प घयेत्ल पावल्सो़ ॱलोप्स्यीक् टेत्न छ्य स्यक्पे लम्ल थीरी दो़च्च्यीत् सीन्न ॱस्येप्प बेत्। को़न्ज्योक्की ज्यागक्ल स्युक्पल हज्यरङ्ल दुक्स्यी गज्येन् नोङ्गेन् बेत्। ॱनी हुगी दुक्स्यी हुगो गुर्न डो गोगेन् बेत् सीन्न ॱस्येत्न स्यक्प बेत्। 23 ॱनी छ्यो़ छो रीदङ् रील हुब ॱङीबी़ गोयो़प्प घयेत् को़न स्यक्न हुनी ॱनुक्नेल स्युन ॱसुव तप्न हुब घयेत् रोरङ्सो़ छ्य स्यक्पे चोव ज्यीन्दक्ल च्योन स्यक्प बेत्। 24 हुनी हुब ॱङीबु हुगी पीसीडीया दीनी लोक्नी पम्फीलीयागी लुङ्बल फीम्ब बेत्। 25 ॱनी हुगी लुङ्बे पर्गा सार् दीदु केच्च्य ॱस्येत्न टेत्नी, पावल् धङ् बार्नाबास् अटालीया सार्ल भप्न युङ बेत्। 26 हुनी ढु छ्यीम्मुल स्युन छ्यु ज्यम्जो छ्यीम्मी़ लम्ल युङ्नी एन्टीयोक्ल लोक्न युङ बेत्। हुदु एल्ला पावल् धङ् बार्नाबास् को़न्ज्योक्की थुज्यीगी लक्ल च्योन हुब ॱङीबुल को़न तङे ले दी हीगी यङ्ल क ढुब बेत्। 27 हुनी हुगी छ्यो़ छोगी मीस्सीर् घयेत् जोम्दु ची़त्नी, पावल् धङ् बार्नाबास्की रोरङ्सोल को़न्ज्योक्की दगु जेत्न, रोरङ्सो़ घङ् झ्यीब घयेत् दी धङ् ज्यी़त् ॱयोङ् ॱयोङ्गी मी घयेत्ल अक् छी थर्व युङ्ज्येल घन्दुक् झ्यीन छ्य स्यक्पे लम् दी को़न्ज्योक्की तो़म्ब बेक्क हुगो कुरीक् ॱस्येत्न टेप्प बेत्। 28 ॱनी हुब ॱङीबु हुदु येशुगी ॱलोप्टुक्ल स्युन यो़प्प घयेत् दीदङ् दल गज्येन् देप्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.