ठीक्नल 13 - ल्होमीबार्नाबास् धङ् शावल् दम्न को़बे तम् १-३ 1 एन्टीयोक्की छ्यो़ छोदु कलुङ् ॱस्यो़क्केन् धङ् चयेलम घयेत् यो़प्प बेत्। हुबे मीङ् दील च्यीक्ल बार्नाबास्, च्यीक्ल शीमीयोन् नक्पु सीक्केन्, च्यीक्ल सैरेनीगी लुङ्बे मी लुसीयस्, च्यीक् पो़न् हेरोद्गी एल्लागी छ्यीट्टो मनेन् धङ् च्यीक् शावल् झ्यीनी मीरङ् ॱङ यो़प्प बेत्। 2 ॱनी हुब जोम्न ॱनुक्नेल स्युन चोव ज्यीन्दक्ल ॱसुव तोबे यङ्ल धम्बे थुगी हुबल बार्नाबास् धङ् शावल् ङे ले ॱयोङ्ल दम्बेन्। हुब ॱङीबु हुगी लेल खीत्रङ्गी को़न स्योक् सीन्न ॱङाब बेत्। 3 हुनी हस्सो़त् हुबे बार्नाबास् धङ् शावल्की ढीक्ल ॱनुक्नेल स्युन ॱसुव तप्न हुब ॱङीबुल लक्पे ॱवङ् केन तङ बेत्। बार्नाबास् धङ् शावल् सैप्रस्तु ४-१२ 4 धम्बे थुगी हुन्दुक् झ्यीन तङ्नी, बार्नाबास् धङ् शावल् सीलुसीया सार्ल फीन्न हुनी ढु छ्यीम्मुल स्युन छ्यु ज्यम्जो छ्यीम्मी़ लम्ल फीन्नी सैप्रस्की लुङ्बल ॱलीब बेत्। 5 हुनी थो़न्नी, हुगी लुङ्बे सलामीस् सार्ल ॱलीब बेत्। ॱनी उन यो़क्केन् यहुदीगी छ्यो़गी छोगङ् घयेत्ल गीर्न को़न्ज्योक्की केच्च्य ॱस्येत्न टेप्प बेत्। हुब ॱङीबुल स्यप्च्यी़ ज्युक्केन् दी हुगी यङ्ल युहन्ना मर्कुस् यो़प्प बेत्। 6 हुनी हुगी सैप्रस् लुङ्ब दीगी घुङ्नी फल्ल फीन्नी, पाफोस् सार्ल ॱलीब बेत्। ॱनी हुदु यहुदी जुम्डी़ तो़ङ्गेन्, कलुङ् जी़म ॱस्यो़क्केन् बार्येशु सीक्केन् च्यीक् ठेप्प बेत्। 7 हुगो हुगी लुङ्बे पेम्बु चो छ्यीस्स्यो, ॱस्यीरप् रीक्प च्येम्म सर्गीयस् पौलस् सीक्केन् च्यीक्की दल दो़क्को़प्प बेत्। ॱनी हुगी पेम्बु दीगी को़न्ज्योक्की केच्च्य नेन्ज्ये ॱनो़न बार्नाबास् धङ् शावल् ठीक्तु तङ बेत्। 8 ॱनी बार्नाबास् धङ् शावल्की डल हुगी जुम्डी़ब दी लोङ्न हुगी पेम्बु दी छ्य स्योक्पे लम्ल डोदु ॱमीत् ची़प्प, क च्यो़त् छुब झ्यीब बेत्। हुगी जुम्डी़ब दीगी मीङ् दील ग्रीक्की केच्च्यल एलुमास् सीन्न सीगो़प्प बेत्। 9 ॱनी शावल्ल पावल् सीन्न अक् सीगो़प्प बेत्। ॱनी पावल्ल धम्बे थुगी घेङ्न, हुगी एलुमास् दील फोरी तेन हीन्दुक् झ्यीब बेत्। 10 ॱवे दी़क्की चोबी़ भीज, रङ् गागी ढङ् घयेक्की ड बेत्। ॱयोज्यी़ ठम्ज्यी़ झ्यीक्केन् रङ् ङेम्बे छङ् बेत्। चोव ज्यीन्दक्की दीम्बे लम् दी रङ्गी फीलोक् नङ्लोक् ज्यक्केन् बेत्। 11 तेदे ह रङ्ल चोव ज्यीन्दक्की लक्पे कज्येत् तङ्न, खोङ्गी रङ्गी ढीक्ल स्यक्पे धी़ यो़ यो़ थुक्ल रङ्गी ङीमे ओ़च्च्य अक् थोङ् ॱमीत् छुगेन् स्यर्च्योक्ल डोगेन् बेत् सीन्न झ्यीब बेत्। हुनी ॱस्यरी हुगो ॱनक् झोगी स्यर्च्योक्ल ॱसोङ्नी, लक्टी़त् तोप्केङ्गी मी फल्ल छुल्ल ॱयेङ बेत्। 12 ॱनी हीगो झ्युङ दी हुगी पेम्बु दीगी थोङ्नी, चोव ज्यीन्दक्की लुसे ॱलोप्स दील हुगो ॱह लेन छ्य स्यक्न युङ बेत्। पावल् धङ् बार्नाबास् पीसीडीया लुङ्बे एन्टीयोक्तु १३-५२ 13 हुनी पावल्सो पाफोस् दीनी यङ् ढु छ्यीम्मुल स्युन छ्यु ज्यम्जो छ्यीम्मी़ लम्ल फीन्नी, पम्फीलीया लुङ्बे पर्गा सार्ल ॱलीब बेत्। हुनी युहन्ना मर्कुस् दी घीन यरुशलेम्ल लोक्प बेत्। 14 हुनी पावल्सो फीन्नी यङ् पीसीडीया लुङ्बे एन्टीयोक् सीस्से सार् च्यीक्ल ॱलीब बेत्। ॱनी ङीत्तुवे ङीन् ॱलीत्नी, हुगी यहुदीगी छ्यो़गी छोगङ्ल स्युन हुदु जोम्न युङे मी घयेत्तङ् दल देप्प बेत्। 15 ॱनी हुदु मी च्यीक् लोङ्न हुगी छ्यो़डीम्नी धङ् कलुङ् ॱस्यो़क्केन् घयेक्की ॱसुङ्रप्नी डोन टेप्प बेत्। ॱनी हुगी यहुदीगी छ्यो़ छोगी गोयो़प्प दीबे पावल्सोल खीत् फम पी़न्सोल ॱलोप्स्यीक् टो़च्च्येमे केच्च्य यो़त्न ॱनी, हीगी मी घयेत्ल ॱस्यो़त्तु युङ्रो झ्यी सीन्न सीत्तु तङ बेत्। 16 हुनी पावल् लोङ्न हुगी मी घयेत् दी ॱहरक्प दो़त् सीन्न लाद ज्युर्न ॱवे इस्राएल्की मी घयेत् धङ् को़न्ज्योक्ल ज्यीब खुर्न दो़क्केन्, खीत्रङ् ज्यी़त् ॱयोङ् ॱयोङ्गी मी घयेस्सो ङे तम्ल नेर्रो झ्यी। 17 इस्राएली घयेक्की को़न्ज्योक्की हज्यरङ्गी पुबु ॱमुमु घयेत् दम्न धङ्बु मीस्रे लुङ्बदु छ्योबा झ्यीन दो़प्पे यङ्ल हुब फीदु ची़त्न ज्यीक्पोक्मल सो़ब बेत्। ॱनी मीस्रे लुङ्बनी खोङ्गी ॱस्यीक् छ्यीम्मी़ ॱवङ्गी हुब तो़न्न ठीक्न युङ बेत्। 18 हुनी पक्क झ्यङ्दङ्दु लोङ स्यीप्च्यु थुक् गीरे यङ्ल खोङ्गी हुब घयेत्ल ङङ्रीन् छ्यीम्मु जेप्प बेत्। 19 हुनी कनान्गी लुङ्बन यो़क्केन् ज्यागक् दी़ङ्गी मी घयेत् खोङ्गी खरप्ल सो़न हुगी लुङ्ब दी म दीरङ् खोङ् रोरङ्गी मीस्सीर्की ॱहक्ल ॱनङ बेत्। 20 हीगो डुबल गोमनी झ्यीनी लोङ स्यीप्च्य ॱङप्च्यु थोब हीङ्गो़प्प बेत्। हुनी झ्यीनी खोङ्गी हुब घयेत्ल कलुङ् ॱस्यो़क्केन् शमुएल्की ङोल थुक् ठीम्बो़न् ॱएन्दीङ् ॱस्यीक् ॱस्यीक् को़न ॱनङ बेत्। 21 हुनी मीस्सीर् घयेत् दीबे ज्याबु ॱनङ्रो झ्यी सीन्न स्यी़नी, को़न्ज्योक्की बेन्यामीन्गी दुङ्ज्यी़त्ल कीबे कीश्की भु शावल् ज्याबुल ॱनङ्न को़ब बेत्। ॱनी हुगी लोङ स्यीप्च्यु थुक् ज्यागक् च्यङ बेत्। 22 हुनी को़न्ज्योक्की हुगो ठीनी पुर्न हुगी ठी दील दाऊद् जेक्तु ची़प्प बेत्। ॱनी दाऊद्गी ढीक्ल को़न्ज्योक्की हीन्दुक् ॱसुङ बेत्। हुगी यीशैगी भु दाऊद् हुगो ङे थुल डीक्केङ्गी मी बेत्। ङे थुल घङ् यो़प्प घयेत् दी हुगी झ्यीन डुप्केन् बेत्। (१ सामुएल् १३:१४) 23 धङ्बु को़न्ज्योक्की इस्राएली घयेत्ल च्यप्को़न् ॱनङ् योङ् सीरे छ्यो़त्तुम् झ्यीब दी डुप्च्येल खोङ्गी च्यप्को़न् येशु तङ बेत्। ॱनी खोङ् दाऊद्ल छ्येप्पे दुङ्ज्यी़त्ल कीब बेत्। 24 ॱनी खोङ्ले एल्ला युहन्ना थो़न्न इस्राएली घयेत्ल खीत्रङ् घयेत् ॱएङ्गी लम्नी ॱसीम् ज्युर्न छ्यी़ बप्तीस्ल स्यु सीन्न ॱस्येप्प बेत्। 25 ॱनी युहन्नागी रोरङ्गी ले दी ढुबे कप्ल मी घयेत् दील खीक्की ङ ॱसु ब अक् ॱनो़गुक्क? ङ ॱनी हुगो मेन्। हुगो ङे तीङ्जो़त्ल ह युङ्गेन् बेत्। ङ त हुगी जुत्ते लेस् ॱस्यीक्केल्ल आक् ओ़ब मीत् सीन्न ॱस्येप्प बेत्। 26 अब्राहाम्गी ज्यी़त् ङे फम पी़न् धङ् खीत्रङ् को़न्ज्योक्ल ज्यीब खुर्न दो़क्केन् ज्यी़त् ॱयोङ् ॱयोङ्गी मी घयेस्सो, तेदे थर्वे लम्गी केच्च्य दी हज्यरङ् घयेत्लरङ् ॱनङ बेत्। 27 यरुशलेम्गी मीस्सीर् घयेत् धङ् हुगी ॱवङ् च्येम्म चो छ्यीया घयेक्की येशु च्यप्को़न् हीम्ब ङु ॱमत् ॱस्यीब बेत्। ॱनी हुब घयेक्की खोङ्ल छ्येप्प केब बेत्। ॱनी हुबे हुन्दुक् झ्यीन ङीत्तुवे ङीङ्गी यङ्ल छीगङ् डोन टेप्पे कलुङ् ॱस्यो़क्केन् घयेक्की केच्च्य घयेत् दी डुब बेत्। 28 ॱसो़च्च्येमे छ्येप्प को़ज्येमे नक् घन्ड अक् ॱमत् ॱङीत्न आक्, हुब घयेक्की ॱसो़त् गोगेन् बेत् सीन्न पीलातस्ल स्युव ज्यब बेत्। 29 ॱनी हुब घयेक्की हुन्दुक् झ्यीनी, खोङ्गी ढीक्ल ॱसुङ्रप्ल ढीन यो़प्प घयेत् दी डुब बेत्। हुनी खोङ्गी कुबुर् दी कुरुस्नी या टेन रो बेक्सल ॱलुक्न स्यक्प बेत्। 30 ॱनी यङ् को़न्ज्योक्की खोङ् ॱसोम्बुल ॱलोङ बेत्। 31 ॱलोङ्नी एल्ला खोङ्दङ् दल गालीलानी यरुशलेम्ल युङे मी घयेत्ल स्यक्पु गज्येङ्गी नङ्ल खोङ् लेम्म गज्येन् थो़न्न ठेप्प बेत्। हुन्दुक् झ्यीन ठेत्नी, इस्राएली घयेत्ल हुगी केच्च्य दी ॱस्यो़त् छुगेङ्गी पङ्बुल हुब घयेत् थो़न्न यो़क्केन् बेत्। 32 ङीक्की खीत्रङ्ल हीन्दुक् झ्यीन केच्च्य ॱनेम्बु ॱस्येत्न बीन् योङ्। धङ्बु हज्यरङ्गी पुबु ॱमुमु घयेत्ल को़न्ज्योक्की ॱनङे छ्यो़त्तुम् जेप्प दी 33 येशु ॱसोम्बुल ॱलोङे लम्नी हज्यरङ्गी ङोल ॱनङ्न डुबल डोगेन् बेत्। हीगी ढीक्ल ॱसुङ्रप्की गुल्लु लेवु ॱङीबल आक् को़न्ज्योक्की ॱसुङ ढीन यो़क्केन् बेत्। रङ् ङे ॱरेबु हीन्। हरीङ्नी रङ्गी यप् दी ङ झ्युङ बेत्। (ॱसुङ्रप्की गुल्लु २:७) 34 खोङ् ढोङ्नरे ॱसनेनी ॱसोम्बुल ॱलोङ्न नम् नम्ल अक् मीत् ढोङ्गेन् इप्रीक् ॱमीत् छ्येक्केल्ल सो़ब बेत्। हीगी ढीक्ल को़न्ज्योक्की ॱसुङ्न यो़क्केन् बेत्। दाऊद्दङ् धम्जीक् चङ्मे छ्यो़त्तुम् जेप्प दी खीत्रङ्ल टो़क्केन्। (यशैया ५५:३) 35 ॱनी हीगी ढीक्ल ॱसुङ्रप्ल हरुङ् थो़ङ्गेन् बेत्। धक्पर् हीम्बे नीज्यरङ्गी ॱयोक्पी़ सी़बुल इप्रीक् छ्येत्तु ॱमीत् ची़क्केन् बेत् सीर यो़क्केन् बेत्। (ॱसुङ्रप्की गुल्लु १६:१०) 36 को़न्ज्योक्की थुल घङ् यो़प्पे ले घयेत् दी दाऊद्गी रोरङ्गी मीजील झ्यीन युङ्न, हुनी रोरङ् ॱस्यीनर बेत्। ॱनी हुगी रो दी रोरङ्गी पुबु ॱमुमु घयेक्की रो बेक्सल ॱलुक्न स्यक्नी, हुदु इप्रीक् छ्येत्नर बेत्। 37 ॱनी को़न्ज्योक्की ॱसोम्बुल ॱलोङे खोङ्गी ॱरेबुल इप्रीक् ॱमत् छ्येप्प बेत्। 38 हुगो झ्यीनी ङे फम पी़न्सो, हीगो ॱह घोव झ्यीज्यीत्। हुगी येशु हुगी लम्नीरङ् क दीक्प धक्केन् बेत् सीन्न ङीक्की खीत्रङ्ल ॱस्यो़क्को़त्। 39 मोशागी छ्यो़डीम्ल घन्दुक्मरङ् ॱसम्न आक्, ॱनम्बर् धक्पल थो़न् ॱमीत् छुगेन् बेत्। ॱनी येशुल ॱसी़ छ्य स्यक्न युङ्गुक्क हुगो खोङ्गी लम्नी ॱनम्बर् धक्पल थो़ङ्गेन् बेत्। 40 खीत्रङ् च्यङ्जो़त् झ्यीन दो़च्च्यीत्। स्येन् धङ्बु कलुङ् ॱस्यो़क्केन् घयेक्की ॱसुङ्रप्ल थो़ङ्गेन् को़न्ज्योक्की ॱसुङे केच्च्य हीगो डस्सी खीत्रङ् युङ्गेन् बेत्। 41 तेदे खीत्रङ् छ्यस्सी़त् ज्यक्केन् घयेत् ॱह लेब झ्यीज्यीत्। खीत्रङ् ॱस्यील ज्युक्च्यीत्। घन्ड हीन् सीन्न खीत्रङ्गी ङोल छ्य स्योक् ॱमीत् छुगेङ्गी ले च्यीक् ङ झ्यीक्केन्। ॱनी हुगी धो़न् ॱस्येत्न आक्, खीत्रङ्गी छ्य स्योक् ॱमीत् छुगेन् बेत्। (हबकुक् १:५) 42 हुनी पावल् धङ् बार्नाबास् हुगी छोगङ् दीनी छ्यील थो़न्न डोये यङ्ल हुगी मी जोम्ब घयेत् दीगी तीङ्मागी ङीत्तुवल अक् युङ्न हुगो डस्सीगी तम् फीच्च्य ङीत्ल ॱस्यो़त्रो झ्यी सीन्न हुब ॱङीबुल स्युदेन् पुब बेत्। 43 ॱनी हुगी मी जोम्ब घयेत् दी छोगङ् दीनी पीद तङ्नी, हुनी यहुदी यरी धङ् यहुदीगी छ्यो़लुल स्युन यो़क्केन् ज्यी़त् ॱयोङ् ॱयोङ्गी मी यरीब पावल् धङ् बार्नाबास्ल तीङ् दीत्न युङ बेत्। ॱनी युङ्गेन् घयेत् दीबल हुब ॱङीबी़ खीत्रङ् को़न्ज्योक्की थुज्यीगी लम्ल तेन्देन् दो़च्च्यीत् सीन्न गन्दीक्म ॱङान स्यक्प बेत्। 44 हीनी तीङ्मागी ङीत्तुवे ङीन् दी हुगी छोगङ् दीदु चोव ज्यीन्दक्की केच्च्य नेन्दु सीन्न हुगी सार्की मी घयेत् दी छेत्मीत् जोम्न युङ बेत्। 45 ॱनी मी छेत्मीत् जोम्न युङ थोङ्नी हुगी यहुदी घयेत् दीब सीगुक् लङ्न पावल्की तम् ॱस्येप्पल मेम्बेत् सीन्न हुल ॱमो़म्बी़त् तङ बेत्। 46 हुनी पावल् धङ् बार्नाबास्की ज्यीक्टक् मीप्प, लेम्बु ॱलोक्न यहुदी घयेत् दील को़न्ज्योक्की केच्च्य हीगो गोम ॱएन्स्युक्ल खीत्रङ् यहुदी घयेत्ल ॱस्यो़त् गो़ ॱस्यर्च्युङ्। ॱनी खीत्रङ्गी हील मेम्बेत् सीन्न फु तक्पे छी थोबल खीत्रङ्गी खीत्रङ् मीत् ओ़बल सो़सोङ्। तेदे, ह ङीत् ॱनी ज्यी़त् ॱयोङ् ॱयोङ्गी मी घयेत्ल ॱस्यो़त्तु डोगेन्। 47 चोव ज्यीन्दक्की ॱसुङे केच्च्ये कगो़त् हीगो ङीत्ल ॱनङ्ज्युङ्। जम्बुलीङ्गी थदक्ल ते थर्वे केच्च्य टोम्ज्येल ज्यी़त् ज्यी़त् घयेत्ल मेङ्ग पेक्केल्ल रङ् ङे को़न स्यक्पेन्। (यशैया ४९:६) 48 ॱनी उन यो़प्पे ज्यी़त् ॱयोङ् ॱयोङ्गी मी घयेत् दीबे गेस झ्यीन चोव ज्यीन्दक्की केच्च्य दील तो़प्प बेत्। ॱनी फु तक्पे छी थोबल खो़त्न यो़प्प घयेत् दी छ्य स्यक्पे लम्ल युङ बेत्। 49 हुनी चोव ज्यीन्दक्की केच्च्य दी हुगी लुङ्ब घल अक् धर्न खुर बेत्। 50 हीनी हुगी यहुदी घयेत् दीबे हुगी सार्की मी चो छ्यीया घयेत् धङ् को़न्ज्योक्ल धेप्प मो़ब झ्यीक्केन् भुमु ढक्पा घयेत् दीब पावल् धङ् बार्नाबास्की डल ॱलोङ बेत्। हुनी पावल् धङ् बार्नाबास्ल दुक्प अयेक्प तङ्न हुब ॱङीबु हुगी लुङ्ब दीनी दीत् तङ बेत्। 51 ॱनी पावल्सो़ जुत्तल ज्यरे थल दी हुब घयेत्ल छ्येप्प फोक्केन् हीम्बे ढीक्ल दप्न स्यक्न आइकोनीयम् सार्ल टप्नर बेत्। 52 ॱनी ॱसोङ्न आक्, हुदु येशुगी ॱलोप्टुक्ल स्युन यो़प्प घयेत् दी गेस झ्यीन धम्बे थुगी घेङ्न यो़प्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.