ठीक्नल 12 - ल्होमीहेरोद्गी याकुब् सुङ्न ॱसेप्पे तम् १-५ 1 हुगी धी़गी यङ्ल छ्यो़ छोगी मी यरीबल ज्याबु हेरोद्गी गोम दुक्प अयेक्प तोङ्ज्येमे लेमु झ्यीब बेत्। 2 ॱनी हेरोद् हुगी युहन्नागी पी़न् याकुब् दी सुङ्न ढी पदङ्गी दुम्न ॱसो़त्तु ची़प्प बेत्। 3 ॱनी हुल यहुदी घयेत् गुव बेत्। ॱनी हुब गुव दी हेरोद्गी ॱह घोनी, हुनी यङ् पत्रुस् सुङ बेत्। हीगी यङ्ल यहुदी घयेक्की च्युर् मत् ज्यबे ढोप्ची सगेङ्गी धी़रीम् हीङ्गो़प्प बेत्। 4 हुनी पत्रुस् चो़ल्ल ॱलुक्न हेरोद्गी ॱरुङ्गेन् गोराब मीरङ् स्यी स्यी पालो झ्यीन तगेन्, मीरङ् च्यी़रुक् को़न स्यक्प बेत्। ॱनी हुगी धी़रीम् दी यो़नी, हेरोद्गी पत्रुस् मी घयेक्की थोङ्सल तो़न्न ठीम् च्यो़च्च्ये ॱनो़ब झ्युङ बेत्। पत्रुस् चो़ङ्गी नङ्नी छ्यीबे तम् ६-१९ 5 ॱनी पत्रुस् चो़न्न यो़प्पे यङ्ल हुगी ढीक्ल छ्यो़ छोगी मी घयेत् दीबे ॱसीम्बे यीक्नी को़न्ज्योक्ल ॱसुव तप् तब झ्यीब बेत्। 6 ॱनी हेरोद्गी नेम्बेत् ठीम् च्यो़स्सल च्यो़गेन् सीरे छेम्मु दी पत्रुस् चो़ङ्गङ्दु च्यागोङ् ङीबक् ज्यप्न गोराब ॱङीगी ॱअर्तु नान ॱङीत्ल ॱसोङ्न यो़प्प बेत्। ॱनी गोराब ॱयोङ्म ॱङी गोच्चेक् दीदु दो़क्कीन् यो़प्प बेत्। 7 हीनी हस्सो़त् हुदु पत्रुस् झ्यीस्स दीदु तेङ् यी़गी चोव ज्यीन्दक्की भङ्ज्येम्ब च्यीक् हीन्दुक्रङ्ल थो़न्न युङ बेत्। ॱनी खोङ्गी ओ़क्की म दीरङ् कोट्ट दीरङ् च्यवलीय झ्युङ बेत्। हुनी खोङ्गी पत्रुस्की पुङ्दोक्ल टुन ह ढीम्बु लोङ् सीन्नी, पत्रुस् ॱङीत् सेप्प बेत्। हुनी ॱस्यर्च्यक् पत्रुस्की लक्पल च्यागोङ् ङीबक् ज्यब दी नुक्रङ् या ढेनर बेत्। 8 हीनी हुगी तेङ् यी़गी भङ्ज्येम्ब दीगी पत्रुस्ल ह रङ् घुलक् धङ् जुत्त घो़न् सीन्न ॱङाब बेत्। ॱनी पत्रुस्की हुगो घो़म्ब बेत्। ॱनी भङ्ज्येम्ब दीगी रङ्गी घो़ छ्यी घो़ दी इक् घो़ल्ल ङे तीङ्ल ॱस्योक् झ्यीब बेत्। 9 हुनी पत्रुस् खोङ्गी तीङ्ल चो़ङ्गङ् दीनी छ्यील थो़म्ब बेत्। ॱनी हुदु घङ् झ्युङ घयेत् दी पत्रुस्की ॱङो़सल् मेम्ब, ॱङीनम्ल बक् ॱनो़ब छ्यर बेत्। 10 ॱनी हुब ॱङीबु नङ्गी गोराब दीनी थर्न युङ्, हुनी गोराब भर्मा दीनी इक् थर्न युङ्न छ्यील थो़न्से च्यागी गोच्चेक् दीदु ॱलीब बेत्। ॱनी हुगी गोच्चेक् दी हीन्दुक्रङ्ल भीक्न, हुब ॱङी छ्यील थो़न् छुब बेत्। हुनी ॱसट्टक्ल थो़न्न धोबा च्यीक् थुक् कङ्ज्यीक्ल फीम्ब बेत्। हुनी तेङ् यी़गी भङ्ज्येम्ब दी ॱरीप् घङ्ल हीन्दुक्रङ्ल येनर बेत्। 11 हुनी हस्सो़त् पत्रुस्की ॱसीम्ल हीगो ॱङो़सल् बेत् व। ङल गन्दीय चोव ज्यीन्दक्की खोङ् रोरङ्गी तेङ् यी़गी भङ्ज्येम्ब इगीनी मल्ल तङ्न, ङ हेरोद्गी लक्नी धङ् यहुदी घयेक्की ङल घन्ड युङ्गो़दङ् ॱनो़न गुन दो़क्केन् हुगी लक्नी छ्यीन या टेज्युङ् ॱनो़ब छ्यर बेत्। 12 ॱनी पत्रुस्की हीगो ॱह घोनी, रोरङ् युहन्ना मर्कुस् सीक्केन् च्यीक्की आम मरीयम्गी खीम्ल फीम्ब बेत्। ॱनी उन मी गज्येन् जोम्न ॱसुव तोप्कीन् यो़प्प बेत्। 13 ॱनी पत्रुस् हुदु ॱलीत्नी छ्यीनी धोक् धोक् झ्यीन गोच्चल बेङ्गीन् देप्प बेत्। ॱनी नङ् दीनी मल्ल रोदा सीक्केन् ॱयोक्मु च्यीक् गोच्च पीक्तु युङ बेत्। 14 ॱनी ॱयोक्मु दीगी पत्रुस्की केत् दी ङु ॱस्यीनी, रोरङ् गेसक्की म दीरङ् गोच्च पीक्च्ये दी च्यम् स्यक्नी यल्ल ज्युन नङ्गी मी घयेत् दील छ्यी मी हुगो पत्रुस् बेत् सीन्न ॱस्येप्प बेत्। 15 ॱनी हुगी मी घयेत् दीगी हुल हीगी ॱनोमु डस्सीगी तम् ॱस्यो़क्कुक् सीन्न छ्य मत् स्यक्प बेत्। ॱनी भुमु दीगी गन्दीयरङ् बेत् व झ्यीब बेत्। ॱनी हुगी मी घयेत् दीगी हुगो पत्रुस्ल तगेन्, तेङ् यी़गी भङ्ज्येम्ब च्यीक् हीन्डो सीन्न झ्यीब बेत्। 16 ॱनी हुन्दुक् झ्यीप्पे यङ्ल पत्रुस् छ्यी दीदुरङ् धोक् धोक् झ्यीन बेङ्गीन् यो़प्प बेत्। हुनी हस्सो़त् नङ्नी गोच्च दी पीक्न तेनी, वक् पत्रुस्रङ् बेत् व सीन्न हुगी मी घयेत् दी ॱह पट्टक् लेब बेत्। 17 हुनी पत्रुस्की हुगी मी घयेत् दील ॱहरक्प दो़त् सीन्न लाद ज्युर्न चोव ज्यीन्दक्की रोरङ् चो़ङ्गङ्नी घन्दुक् झ्यीन तो़म्ब बेक्क हुगो कुरीक् ॱस्येत्न टेप्प बेत्। हीगी तम् हीगो याकुब् धङ् पी़न्ज्या ॱयोङ्म घयेत्ल ॱस्यो़त्ल टो़त् सीन्न ॱङान स्यक्नी, हुनी पत्रुस् ॱयोङ्ल टप्नर बेत्। 18 हुनी ॱङेट्टो दी चो़ङ्गङ्न पत्रुस् मीप्प गोराब दीबे ॱह घोनी, हुबे घन्ड झ्युङ ब अक् ॱनो़न ओ़न् थोम्नर बेत्। 19 हीनी हेरोद्गी पत्रुस् घल अक् ॱयेङ्दु तङ्न आक्, ॱमत् ॱङीब बेत्। ॱनी ॱमत् ॱङीबल गोराब दीबल तम् च्युर बेत्। हुनी हुबल छ्येप्प केन ॱसो़त्तु ची़प्प बेत्। हुनी हेरोद् यहुदीयानी सीजरीया सार्ल फीन्न देप्प बेत्। हेरोद् ॱस्यीये तम् २०-२३ 20 टायर् धङ् सीदोन्गी मी घयेत् एल्ला हेरोद्दङ् ठुक्प ॱस्योर हीङ्गो़प्प बेत्। ॱनी हीगी यङ्ल हुब घयेक्की हेरोद्गी ज्यागङ्गी पेम्बु चो छ्यीस्स्यो बलस्तस् सीक्केन् दी लक्ल लीन्न हुब ॱसीम् च्यीक् झ्यीन डीक्च्येल हेरोद्ल ॱस्याब झ्यीत्तु तङ बेत्। हुबे लुङ्बल ॱअन्न दी हेरोद्गी लुङ्बनी नो़न स गो़गो़प्प बेत्। 21 ॱनी हेरोद्गी स्यक्पे धी़दोक् दी ॱलीत्नी, रोरङ् ज्याबी़ घो़ घो़न्न ॱवङ् च्येम्मे स्युडील देत्न हुगी ॱस्याब झ्यीत्तु युङे मी घयेत् दील तम् ॱस्येप्प बेत्। 22 ॱस्येत्नी, हुगी मी नेङ्गेन् घयेत् दीगी हुगो मी मेम्ब, ॱल्ह बेत् सीन्न केत् ज्यब बेत्। 23 ॱनी हेरोद्गी को़न्ज्योक्ल तो़प्प ॱमत् पुबल ॱस्यर्च्यक् तेङ् यी़नी चोव ज्यीन्दक्की भङ्ज्येम्ब च्यीक्की हुल नज तङ्न, हुगी सी़बुल बु छ्येत्न ॱस्यीनर बेत्। 24 ॱनी को़न्ज्योक्की केच्च्य दी घल अक् धर्न हरुङ् मङ्दु चव छुन युङ बेत्। 25 ॱनी बार्नाबास् धङ् शावल्की हुगी चेन्ड दी यरुशलेम्ल च्येनी, हुब ॱङीबु युहन्ना मर्कुस् सीक्केन् दी ठीक्न एन्टीयोक्ल लोक्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.