ठीक्नल 11 - ल्होमीकर्नीलीयस्की केच्च्य पत्रुस्की यरुशलेम्दु ॱस्येप्प १-१८ 1 हीनी ज्यी़त् ॱयोङ् ॱयोङ्गी मी घयेक्की इक् को़न्ज्योक्की केच्च्यल नेन्न युङ बेत् सीर ठीक्नल दीब धङ् यहुदीयान यो़प्पे पी़न्ज्या घयेक्की ॱह घोव बेत्। 2 ॱनी पत्रुस् यरुशलेम्ल लोक्न युङ्नी, हुगी यहुदी छ्य स्योक्केन् घयेत् दीगी पत्रुस्ल गज्ये ॱमत् छोर, पत्रुस्ल हीन्दुक् झ्यीब बेत्। 3 नीज्यरङ्गी नुक् झ्यीबे यहुदीगी दक् मत् ज्यबे मीदङ् दल देत्तुक्। ॱनी नीज्यरङ्गी हुबे लक्नी सम अक् सेदुक् सीन्न लप्स्य तङ बेत्। 4 हीनी हुब घयेत्ल पत्रुस्की गोनी घङ् झ्युङ घयेत् दी कुरीक् हीन्दुक् झ्यीन ॱस्येत्न टेप्प बेत्। 5 ङ खच्चङ् योप्पादु दो़प्पे यङ्ल ङीम्मु ङ ॱसुव तोप्कीन् यो़त्। ॱनी ङ हीन्दुक्रङ् ढेम्ब यङ्मीक्म डस्सील फीन्न थोङ्नङ् च्यीक् थोङ्ज्युङ्। इगी तेङ् यी़नी मल्ल छ्यर गर्चम डस्सी च्यीक्ल सुर् स्यीबी़ चीत्तोक् दी डान ङे दोङ्नी मल्ल ज्यो़न् ज्यो़ल्ल भप्न युङ ङे थोङ्ज्युङ्। 6 ॱनी हुल ङे तेनी, उन जम्बुलीङ्गी ॱसीम्ज्येन् कङ्ब स्यी च्येम्म घयेत्, रीगे ॱसीम्ज्येन् ॱनजो, ॱसल ज्युक्केङ्गी ॱसीम्ज्येन् घयेत् धङ् ॱनम्ल फीर्केङ्गी झ्य घयेत् हुगी नङ्न दुक्। 7 हुनी केत् च्यीक्ल ॱवे पत्रुस्, हुगो रङ् ॱसो़त्ल सो सीर ङे ॱह घोज्युङ्। 8 ॱनी ङे हुल चोव ज्यीन्दक् हीगो ङ मीत् स। नुक् झ्यीबे चङ्ज्ये मीप्प, ढीप्लङ् युङ्गेङ्गी ॱस्य ङे खल नम्ल अक् ॱमत् ॱलुक् झ्यीबेन्। 9 ॱनी हुगी केत् दीगी फीच्च्य यङ् को़न्ज्योक्की चङ्बोक्म ढीप्लङ् मीत् युङ्गेल्ल सो़ छरल रङ्गी चङ्ज्ये मीप्प हीम्ब ॱमत् ॱसम् सीन्न ॱस्येच्च्युङ्। 10 ॱनी हुगो लेम्म ॱसुम् थुक् ङल तो़न्ज्युङ्। हुनी हुगी छ्यरदङ् डक्च्यक् युङ घयेत् दी यङ् तेङ् यी़ल दोसोङ्। 11 ॱनी ॱस्यरी हुगी यङ्ल सीजरीयानी ङ ठीक्तु भो़त्मीय मीरङ् ॱसुम् ङ दो़स्से खीम्गी दोङ्ल ॱलीत्न दुक्। 12 ॱनी धम्बे थुगी ङल ॱसीम्ल यो़च्चो़त् मीच्चो़त् ॱमत् खुर, रङ् हुबदङ् कङ्ज्यीक्ल ज्युक् सीन्न ॱङाज्युङ्। ॱनी ङदङ् पी़न्ज्या ढुक्पु हीब अक् कङ्ज्यीक्ल फीन्न कर्नीलीयस्की खीम्ल ङीत् स्युन देप्पेन्। 13 ॱनी हुगी कर्नीलीयस्ल तेङ् यी़गी भङ्ज्येम्ब च्यीक् रोगी खीम्दु थो़न्न हुगी रोल रङ् योप्पा सार्ल मी शीमोन् पत्रुस् सीक्केन् च्यीक् ठीक्तु तोङ्। 14 ॱनी हुगी रङ् धङ् रङ्गी मीजङ् घयेत्ल थर्वे केच्च्य ॱस्येत्न टो़क्केन् बेत् सीन्न ॱस्येत्तुक्। 15 हुनी ङे हुगी मी घयेत् दील तम् ॱस्येप्पेन्। ॱनी ङे गोम ॱस्यो़प्पे यङ्ल एल्ला हज्यरङ् घयेत्ल घप्न युङ डस्सी धम्बे थु हुब घयेत्ल अक् घप्सोङ्। 16 हुनी क चोव ज्यीन्दक्की हज्यरङ्ल एल्ला ॱसुङे केच्च्य हीगो ङे ढेङ्गी ॱसो़ज्युङ्। युहन्ना बप्तीस्की छ्यी़ बप्तीस्लरङ् ॱलुक्प बेत्। ॱनी खीत्रङ् घयेत्ल धम्बे थुगी बप्तीस्ल को़न्ज्योक्की ॱलुक्केन् बेत्। 17 गोम हज्यरङ्गी चोव ज्यीन्दक् येशु ख्रीष्ट्ल छ्य स्यक्नी, हज्यरङ्ल ॱनङे ॱनङ्ज्येत् दी डस्सीरङ् हुब घयेत्ल अक् को़न्ज्योक्की हुन्दुक् झ्यीन ॱनङ्नी ॱनी, ङे हुगो घन्दुक् झ्यीन खोङ्गी ले क च्यो़त् छुगेन् सीन्न पत्रुस्की ॱस्येप्प बेत्। 18 ॱनी हीगो ॱह घोनी, दगु छ्यीट्टो घयेत् दी हील हस्सो़त् ॱलो दीन ज्यी़त् ॱयोङ् ॱयोङ्गी मी घयेत् एत् ॱएङ्गी लम्नी ॱसीम् ज्युर्न युङ्न ॱनी, को़न्ज्योक्की हुब घयेत्ल अक् छीये लम् तो़ङ्गुक् व सीन्न हुबे को़न्ज्योक्ल तो़प्प पुब बेत्। एन्टीयोक्की छ्यो़ छोदु झ्युङे तम् १९-३० 19 इस्तीफनस् ॱसेत्नी झ्यीब दी, यरुशलेम्दु छ्य स्योक्केन् घयेत्ल दुक्प अयेक्प नोङ्नी, हुब घयेत् घल अक् थोर्न, यरी फोनीसीयागी लुङ्बल, यरी सैप्रस्की लुङ्बल, यरी एन्टीयोक्की सार्ल ते थोर्न युङ बेत्। ॱनी घल फीन्न आक्, हुबे को़न्ज्योक्की केच्च्य दी यहुदी घयेत्लरङ् क ॱस्येत्न टम्ब बेत्। 20 ॱनी हीन्न अक्, हुबे छीक्नी सैप्रस् धङ् सैरेनीगी लुङ्बे मी यरी एन्टीयोक्ल युङ्न हुदु दो़क्केन् ग्रीक्की ज्यी़क्की मी घयेत्ल अक् चोव ज्यीन्दक् येशुगी ढीक्की केच्च्य ॱनेम्बु ॱस्येत्न टेप्प बेत्। 21 ॱनी हुबल चोव ज्यीन्दक्की छ्यक्की दगु जेत्नी, मी गज्येङ्गी चोव ज्यीन्दक्ल छ्य स्यक्न खोङ्गी छ्यल युङ बेत्। 22 ॱनी एन्टीयोक्तु झ्युङे केच्च्य हीगो यरुशलेम्गी छ्यो़ छोल धर्न युङ्नी, हुबे बार्नाबास् दी हुदु तङ बेत्। 23 ॱनी बार्नाबास् एन्टीयोक्ल ॱलीत्न हुदु गन्दीय को़न्ज्योक्की थुज्यी ॱनङ थोङ्नी, हुगो गेस लङ्न हुब घयेत्ल खीत्रङ् घयेत् ॱसीम्बे यीक्नी चोव ज्यीन्दक्ल छ्य तेम्बोक्म स्यक्न दो़च्च्यीत् सीन्न ॱलोप्स्यीक् टेप्प बेत्। 24 बार्नाबास् म दीरङ् छ्य डम्बोक्म स्योक्केन्, धम्बे थुगी घेङे मी गङ्ज्येन् च्यीक् बेत्। ॱनी हुदु मी ॱसम्ब गज्येङ्गी चोव ज्यीन्दक्ल छ्य स्यक्न फीन युङ बेत्। 25 हुनी बार्नाबास् टार्सस् सार्ल शावल् ॱयेङ्दु फीम्ब बेत्। 26 ॱनी हुदु शावल् ठेत्नी, हुगो एन्टीयोक्ल ठीक्न युङ बेत्। हुनी हुब ॱङीक्कर् हुदु लो च्यीक् थुक् देत्न हुगी छ्यो़ छोदु मी गज्येल्ल ॱलोप्स ज्यप्न टेप्प बेत्। हुगी यङ्ल क एन्टीयोक्तु गोम ॱएन्स्युक्ल येशुगी ॱलोप्टुक्ल स्युन यो़प्प घयेत्ल ख्रीष्ट्यान् सीन्न मीङ् ताब हीङ्गो़प्प बेत्। 27 हुनी हुगी यङ्ल यरुशलेम्नी एन्टीयोक्ल को़न्ज्योक्की कलुङ् ॱस्यो़क्केन् यरी युङ बेत्। 28 ॱनी हुबे छीक्नी अगाबस् सीक्केन् च्यीक्की जम्लीङ् की़ल्ल तोरी छ्यीम्मु ॱस्योको़र्त् सीन्न धम्बे थुगी झ्यीन ॱङो़स्स्यी ॱस्येप्प बेत्। ॱनी तीङ्ला सीजर् ज्याबु कलौडीयस्की पालोल हुगी ॱङो़स्स्यी दी ताब बेत्। 29 ॱनी एन्टीयोक्तु येशुगी ॱलोप्टुक्ल स्युब घयेत् दीबे यहुदीयान यो़क्केन् पी़न्ज्या घयेत्ल दगु झ्यीच्च्येल ढो़ झ्यीब बेत्। हुनी हुबे रोरङ्सो नङ्दु चेन्ड घङ् टेप्प दी़न 30 छ्यो़ छोगी गोयो़प्प घयेत्ल टो़त् सीन्न बार्नाबास् धङ् शावल्की लक्ल हुगी चेन्ड दी तङ बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.