ठीक्नल 10 - ल्होमीकर्नीलीयस्ल थोङ्नङ् तो़म्ब १-८ 1 ॱनी हुगी यङ्ल सीजरीया सार्न मी कर्नीलीयस् सीक्केन् च्यीक् यो़प्प बेत्। हुगो इटालीगी ॱमक्च्यप् सीक्केङ्गी पोङ्ज च्यीक्की ॱमक्पो़न् च्यीक् बेत्। 2 हुगो धङ् हुगी मीजङ्गी को़न्ज्योक्ल धेप्प मो़ब झ्यीन ज्यीब खुर्न दो़क्को़प्प बेत्। हुगो मी दुक्च्या घयेत्ल दगु झ्यीक्केन् धङ् को़न्ज्योक्ल छीगङ् ॱसुव तोप्केङ्गी मी हीङ्गो़प्प बेत्। 3 ॱनी ङीन् च्यीक् ङीम्मु छ्युजो़त् ॱसुम्गी छो़त् च्यीक्ल कर्नीलीयस्की थोङ्नङ् च्यीक् ॱसेसी थोङ बेत्। हुगी थोङ्नङ् दील को़न्ज्योक्की तेङ् यी़गी भङ्ज्येम्ब च्यीक् इगीनी मल्ल भप्न युङ्न, ॱवे कर्नीलीयस् सीन्न झ्यीब बेत्। 4 ॱनी कर्नीलीयस् टक्प सेत्न, हुगी भङ्ज्येम्ब दील फोरी तेन ला, नीज्यरङ् घन्ड ॱसुङ्गो़प्प? सीन्न झ्यीब बेत्। हुल भङ्ज्येम्ब दीगी रङ्गी ॱसुव तब घयेत् दी धङ् दुक्च्यागी मी घयेत्ल रङ्गी दगु झ्यीब घयेत् को़न्ज्योक्की थोङ्न हील थु गुव बेत्। 5 योप्पा सार्ल मी शीमोन् पत्रुस् सीक्केन् च्यीक् यो़क्केन् बेत्। ॱनी हुगो रङ्गी ठीक्तु तोङ्। 6 हुगी पत्रुस् हुगो उन पाबोक् ॱङीक्केङ्गी मी शीमोन् सीक्केन् च्यीक्की खीम्न डोम्बु झ्यीन दो़क्केन् बेत्। हुगी खीम् दी छ्यु ज्यम्जो छ्यीम्मी़ छीगल ॱनेगेन् बेत् सीन्न ॱस्येप्प बेत्। 7 हुनी हुगी तेङ् यी़गी भङ्ज्येम्ब दी टप्न खुर्नी, कर्नीलीयस्की रोरङ्गी ॱयोक्पु ॱङी धङ् रोरङ्ल स्यप्च्यी़ ज्युक्केन् ॱमक्मी च्यीक् भो़ब बेत्। हुगी ॱमक्मी दी को़न्ज्योक्ल धेप्प मो़ब झ्यीक्केङ्गी मी हीङ्गो़प्प बेत्। 8 ॱनी कर्नीलीयस्की रोरङ्ल घङ् झ्युङे केच्च्य दी हुगी मी ॱसुम्बु दील ॱस्येत्न टेत्न योप्पाल पत्रुस् ठीक्तु तङ बेत्। पत्रुस्ल थोङ्नङ् तो़म्ब ९-२३ 9 हुनी नेम्बेत् ङीमे घुङ्ल हुगी भो़त्मीय दीब योप्पा सार्ल ॱलीच्च्येम झ्यीप्पे यङ्ल पत्रुस् रोरङ् दो़स्से खीम् दीगी खङ्दोक्ल ॱसुव तोप्तु जेब बेत्। 10 ॱनी हुदु ढोप्प तोन सम ढेम्ब बेत्। ॱनी तोप्च्ये ज्यप् ॱमत् छरल सम मत् नोङ बेत्। हुनी पत्रुस् हीन्दुक्रङ् ढेम्ब यङ्मीक्म डस्सील ॱसोङ बेत्। 11 हुनी पत्रुस्की इगी तेङ् यी़ भीन युङ थोङ बेत्। हुनी इगीनी मल्ल छ्यर गर्चम डस्सी च्यीक्ल सुर् स्यीबी़ चीत्तोक् दी डान ज्यो़न् ज्यो़ल्ल ॱसल भप्न युङ थोङ बेत्। 12 ॱनी हुगी नङ्ल ॱसीम्ज्येन् कङ्ब स्यी च्येम्म घयेत्, ॱसल ज्युक्केङ्गी ॱसीम्ज्येन् घयेत् धङ् ॱनम्ल फीर्केङ्गी झ्य घयेत् यो़प्प थोङ बेत्। 13 हुनी केत् च्यीक्ल ॱवे पत्रुस् हुगो रङ् ॱसो़त्ल सो सीर थो़म्ब बेत्। 14 ॱनी पत्रुस्की लेल्ल चोव ज्यीन्दक् हीगो ङ मीत् स। नुक् झ्यीब चङ्ज्ये मीप्पे ढीप्लङ् युङ्गेङ्गी ॱस्य ङ नम्ल अक् मीत् स सीन्न झ्यीब बेत्। 15 ॱनी हुगी केत् दीगी फीच्च्य यङ् को़न्ज्योक्की चङ्बोक्म ढीप्लङ् मीत् युङ्गेल्ल सो़ छरल रङ्गी चङ्ज्ये मीप्प ॱमत् ॱसम् सीन्न झ्यीब बेत्। 16 हुगो लेम्म ॱसुम् थुक् तो़न्न युङ पत्रुस्की थोङ बेत्। हुनी छ्यरदङ् डक्च्यक् युङ घयेत् दी तेङ् यी़ल दोनर बेत्। 17 हुनी पत्रुस्की रोरङ्गी थोङे थोङ्नङ्गी धो़न् दी घन्ड च्यीक् हीम्ब न ॱनो़न ॱनोक्सम् तोङ्गीन् यो़प्पे यङ्ल कर्नीलीयस्की तङे भो़त्मीय दीब चर च्येत्न युङ्न हुगी खीम् दील ॱलीब हीङ्गो़प्प बेत्। 18 ॱनी भो़त्मीय दीबे गोच्च दीदु देत्न ॱनेजङ्सो, हीन शीमोन् पत्रुस् सीक्केन् च्यीक् यो़प्प न? सीन्न ढीब बेत्। 19 ॱनी हुगी यङ्ल पत्रुस् खङ्दोक् दीन हुगी थोङ्नङ्गी धो़न् दीगी ढीक्ल ॱनोक्सम् तोङ्गील्ल यो़प्पे यङ्ल धम्बे थुगी हुल तेदे रङ् ॱयेङ्गेन् मान मीरङ् ॱसुम् ॱलीस्सोङ्। 20 ह रङ् भप्ल ज्युक्। ॱसीम्ल यो़च्चो़त् मीच्चो़त् ॱमत् खुर, रङ् हुबदङ् कङ्ज्यीक्ल ज्युक्। हुब ङे तङे मी हीन् सीन्न ॱसुङ बेत्। 21 हुनी पत्रुस् मल्ल भप्न हुगी भो़त्मीय दीबल खीत्रङ्गी ॱयेङ्गेङ्गी मी दी ॱनी ङ हीन्। खीत् धो़न्दक् घन्ड च्यीक्ल युङ हीम्ब? सीन्न ढीब बेत्। 22 ॱनी हुल भो़त्मीय दीबे पत्रुस्ल कर्नीलीयस् सीक्केन् ॱमक्पो़न् च्यीक्की ङीत् तङ्ज्युङ्। खोङ् ढङ्बु, को़न्ज्योक्ल ज्यीब खुर्न दो़क्केङ्गी मी बेत्। यहुदी घयेत् कुरीक्की खोङ्ल तो़क्केन् बेत्। खोङ्ल तेङ् यी़गी भङ्ज्येम्ब चङ्म च्यीक्की पत्रुस् हुगो ठीक्तु तोङ्। हुगी रङ्ल तम् ॱस्यो़क्केन् बेत् सीन्न ॱङानी, खोङ्गी ङीत् तङ्ज्युङ् सीन्न झ्यीब बेत्। 23 हुनी पत्रुस्की भो़त्मीय दीब नङ्ल ठीक्न हुगी ङीन् दी हुदुरङ् दो़त्तु ची़प्प बेत्। हुनी नेम्बेत् दी पत्रुस् हुगी भो़त्मीय दीबदङ् कङ्ज्यीक्ल सीजरीयाल डोज्येल लम् स्युब बेत्। ॱनी योप्पादु दो़क्केन् पी़न्ज्या यरी इक् कङ्ज्यीक्ल फीम्ब बेत्। पत्रुस्सो कर्नीलीयस्की खीम्दु २४-४८ 24 हुनी ॱनाङ् दी क सीजरीयाल कर्नीलीयस्की खीम्ल ॱलीब बेत्। ॱनी खीम् दीन कर्नीलीयस्की एल्लादु रोरङ्गी ङीया रीङा धङ् दगु घयेत् ठीक्न कुरीक् हुदु पत्रुस्ल गुक्कीन् यो़प्प बेत्। 25 ॱनी कर्नीलीयस् पत्रुस्की दोङ्ल फीन्न पत्रुस्ल छ्यक् छेब बेत्। 26 ॱनी पत्रुस्की हुल लोङ्। ङ अक् मीरङ् हीन् सीन्न झ्यीब बेत्। 27 हुनी पत्रुस् कर्नीलीयस्तङ् तम्स्यु लप्कील्ल नङ्ल स्युनी, हुगी मी जोम्न यो़प्प घयेत् दीदङ् ठेप्प बेत्। 28 ॱनी पत्रुस्की हुब घयेत्ल ङीत् यहुदी घयेत् ज्यी़त् ॱयोङ्गी मी खीम्ल फीन्न मुल रीन ॱनी, हीगो ङीक्की छ्यो़डीम्ल ङीगेन् बेत्। हीगो खीत्रङ् कुरीक्ल ॱस्यो़च्च्ये यो़ट्टो। ॱनी ह हुगो मेम्ब, मी ॱसु उक् चङ्ज्ये मीप्प, ॱसुल आक् ढीप्लङ् यो़ट्टो ॱनो़ब ॱमत् ॱसम्ज्यीत् सीन्न को़न्ज्योक्की ङल तो़न्ज्युङ्। 29 हुगो झ्यीनी नीज्यरङ्गी ङ ठीक्तु तङ्नी, ङ तोक् युङेन्। ह ॱस्यो़त्रो झ्यी। धो़न्दक् घन्ड च्यीक्ल ठीक्तु तङ? सीन्न ढीब बेत्। 30 हुनी कर्नीलीयस्की हीन्दुक् सीन्न ॱस्येप्प बेत्। स्यक्पु ॱसुम्गी एल्ला ङीम्मु छ्युजो़त् ॱसुम् हीजो़क्की धी़ल ङ हीन ॱसुव तोप्कीन् यो़त्। ॱनी हुगी यङ्ल मी च्यीक् घो़ टक्सी घो़म्ब च्यीक् ङ च्याल नुक्रङ् च्यप् च्यीक्ल थो़न्न ॱलीच्च्युङ्। 31 ॱनी खोङ्गी ङल ॱवे कर्नीलीयस्, रङ्गी ॱसुव तब धङ् दुक्च्यागी मी घयेत्ल रङ्गी दगु झ्यीब घयेत् को़न्ज्योक्की थोङ्न हुल थु गुव बेत्। 32 योप्पा सार्ल मी शीमोन् पत्रुस् सीक्केन् च्यीक् यो़क्केन् बेत्। ॱनी हुगो रङ्गी ठीक्तु तोङ्। हुगो उन पाबोक् ॱङीक्केङ्गी मी शीमोन् सीक्केन् च्यीक्की खीम्न डोम्बु झ्यीन दो़क्केन् बेत्। हुगी खीम् दी छ्यु ज्यम्जो छ्यीम्मी़ छीगल ॱनेगेन् बेत् सीन्न ॱस्येच्च्युङ्। 33 हीनी ङे ॱस्यर्च्यक् नीज्यरङ् ठीक्तु तङेन्। ह नीज्यरङ् झ्यो़न्नी, गाल अक् गा झ्युङ्। ॱनी ङीत् घयेत् को़न्ज्योक्की ढुङ्दु हीदु नेन्दु जोम्न यो़त्। ह नीज्यरङ्ल चोव ज्यीन्दक्की घङ् ॱङाबे केच्च्य दी ङीत्ल ॱस्यो़त्रो झ्यी सीन्न झ्यीब बेत्। 34 हीनी पत्रुस्की हीन्दुक् सीन्न ॱस्येप्प बेत्। को़न्ज्योक्की मी ॱसुल आक् दम्ङीत् मीत् झ्यीक्केन् हीम्ब हस्सो़त् क ङे ॱह घोज्युङ्। 35 ज्यी़त् घन् दीगी मी हीन्न अक्, हुगी को़न्ज्योक्ल ज्यीब खुर्न देत्न ले ढङ्बु झ्यीन युङ्न ॱनी, हुगो खोङ्गी थुल डीक्केन् बेत्। 36 को़न्ज्योक् च्यानी युङे केच्च्य दी हीगो बेत्। इस्राएल्की ज्यी़त् घयेत्ल को़न्ज्योक्की येशु ख्रीष्ट् दीव युङे केच्च्य ॱनेम्बु ॱस्यो़त्तु तङ बेत्। खोङ् छङ्म थम्ज्येक्की चोव ज्यीन्दक् बेत्। 37 युहन्नागी केच्च्य ॱस्येत्न बप्तीस्ल ॱलुक्पनी झ्यीनी, गोम गालीलादु घङ् झ्युङे लेमु, हुनी यहुदीया घल अक् घङ् झ्युङे लेमु घयेत् कुरीक् खीत्रङ्ल ॱस्यो़च्च्ये यो़ट्टो। 38 नासरत्की येशु हुगो को़न्ज्योक्की धम्बे थु धङ् ॱस्यीक् ॱनङ्न को़न तङ बेत्। ॱनी खोङ्गी दगुल को़न्ज्योक् झ्यीनी, खोङ्गी म दीरङ् गये ले गज्येन् झ्यीन दी़क्की चो हुगी ॱवङ्यो़त्ल ॱस्योर्नर घयेत् ढक्तु ची़त्न घल अक् गीर बेत्। हीगो ओक् कुरीक् खीत्रङ्ल ॱस्यो़च्च्ये यो़ट्टो। 39 यरुशलेम्दु धङ् यहुदीगी लुङ्ब जेङ्ल खोङ्गी घङ् जेप्प घयेक्की पङ्बु दी ङीत् हीन्। स्युक्ल यहुदी घयेक्की खोङ् कुरुस्ल तान ॱसेस्सोङ्। 40 ॱनी ॱसेत्न आक्, स्यक्पु ॱसुम् ॱसोङे ङीन् दी को़न्ज्योक्की खोङ् ॱसोम्बुल ॱलोङ्न थो़न्दु ची़प्प बेत्। 41 ॱनी मी कुरीक्ल ॱमत् थो़म्ब, को़न्ज्योक्की एल्ला पङ्बुल को़ब ङीत् घयेत् च्यालरङ् थो़न्दु ची़च्च्युङ्। खोङ् ढोङ्नरे ॱसनेनी ॱसोम्बुल लोङ्नी, म दीरङ् ङीक्की खोङ्दङ् दल से थुङ् झ्यीबेन्। 42 हुनी खोङ्गी ङीत्ल मी ॱसोम्बु धङ् ॱस्यीनर घयेक्की थोक्ल को़बे ठीम्बो़न् दी ङ हीन्। हीगी केच्च्ये पङ्बु झ्यीन खीत्रङ्गी मी कुरीक्ल हीगो ॱस्येत्न टोम्लेत् सीन्न खोङ्गी ङीत्ल कगो़त् ॱनङ्ज्युङ्। 43 मी ॱसु येशुल छ्य स्यक्न युङ्गुक्क हुगी दीक्प घयेत् खोङ्गी छेङ्गी लम्नी धक्केन् बेत् सीन्न धङ्बु कलुङ् ॱस्यो़क्केन् घयेक्की इक् ॱस्येत्न यो़क्केन् बेत्। 44 ॱनी पत्रुस्की तम् हीगो मत् जोबलरङ् हीगो नेङ्गेन् घयेत् दीबल धम्बे थु घप्न युङ बेत्। 45 ज्यी़त् ॱयोङ् ॱयोङ्गी मी घयेत्ल अक् ॱनङ्ज्येत् धम्बे थु ॱनङ हीम्ब ॱह घोनी, पत्रुस्तङ् दल युङे यहुदी छ्य स्योक्केन् दीब ॱह लेब बेत्। 46 हुगी मी दीबे केच्च्योक् ॱमीत् च्यीक्पल तम् ॱस्येप्प धङ् को़न्ज्योक्ल तो़प्प पुब पत्रुस्की दगु दीबे ॱह घोव बेत्। 47 हुनी पत्रुस्की हज्यरङ्ल थोब डस्सी ह हीगी मी घयेत् हीबल अक् धम्बे थु थोप्सोङ्। ह हीब घयेत् छ्यी़ बप्तीस्ल ॱलुक्पल मीत् युङ्गेन् बेत् सीन्न ॱसी़ इक् क च्यो़त् ॱमीत् छुगो़ट्टो सीन्न झ्यीब बेत्। 48 ॱनी पत्रुस्की ह हीब घयेत् येशु ख्रीष्ट्की छेन्नी छ्यी़ बप्तीस्ल ॱलुक् सीन्न क टेप्प बेत्। हुनी हुगी मी घयेत् दीगी पत्रुस्ल धोबा च्यीक् थुक् हीदु स्युरो झ्यी सीन्न स्युव ज्यब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.