३ युहन्ना 1 - ल्होमी1 ङ छ्यो़ छोगी गोयो़प्पे हीगो ङे झ्यम्बे दगु गायस्रङ्ल ढीन तोङ्गो़दो। रङ्ल ङे दीम्बरङ्गी झ्यम्ब यो़दो। 2 झ्यम्बे दगु रङ्ल धो़न् घन्डल अक् गङ्ज्येन् युङ्ज्ये यो़प्प धङ्, ॱनी रङ् ॱसीम् कीप्पु यो़प्प दी डस्सी रङ्गी ली़ दी इक् थङ्बोक्म युङ्ज्ये यो़प्प तोङ् सीन्न ॱसुव तोप्को़त्। 3 रङ् च्येन्नी हीदु युङ्न यो़प्पे पी़न्ज्या यरीगी रङ् दीम्बे केच्च्यल चीन घन्दुक् झ्यीन दीम्बे लम्ल डोगुक्क हुगो ॱस्येत्न टेत्नी, ङल गेस छ्यीम्मु झ्युङ्। 4 ॱनी हीगो डस्सी ॱसु ङे भीज दीम्बे लम्ल डोगुक् सीर ॱह घोगुक्क हुले ज्यीक्पागी गेस ङल ॱयोङ् घन्ड दी यो़प्प? 5 झ्यम्बे दगु रङ्गी छ्यो़ छो ॱयोङ्नी युङे पी़न्ज्या घयेत्ल ङु ॱस्यीबल आक्, ॱमत् ॱस्यीबल आक् दगु गस्सी ज्युरुव मीप्प झ्यीगुक् सीगुक्। 6 ॱनी रङ्गी झ्यम्ब झ्यीबे केच्च्य घयेत् छ्यो़ छोदु हुबे ॱस्येच्च्युङ्। रङ्गी हरुङ्द हुब घयेत्ल लम्ल गो़बे खोज्येत् घयेत् बीन्न को़न्ज्योक्की ॱयोक्पुल ओ़ब झ्यील तोङ्ज्यीत् सीन्न स्युव ज्यक्केन्। 7 घन्ड हीन् सीन्न हुब खोङ्गी छेङ्गी धो़न्दु गीर्न फीन्न, हुब को़न्ज्योक् ॱस्यो़च्च्ये मीप्पे मी ॱयोङ्म घयेत् च्येन्नी घन्ड अक् मत् लीम्ब डोगेन् बेत्। 8 हुगो झ्यीनी हज्यरङ्गी हुन्दुक् झ्यीबल दगु थेब झ्यीत् गोगेन् बेत्। हुनी क हज्यरङ् अङ् हुबदङ् दीम्बे ढीक्ल ले झ्यीत्रो झ्यीबल डोगेन् बेत्। 9 हीगोले एल्ला हुगी छ्यो़ छो हुल ङे यीगी च्यीक् ढीन तङेन्। ॱनी म दी खीत्रङ्गी उन गोयो़प्पल थो़न्ज्ये ॱनो़ब झ्यीक्केन् डीयोत्रीफस्की ङीक्की केच्च्य दील ॱअप्स्यी़त् दीरङ् मीत् झ्यीप्पेत्। 10 हुगो झ्यीनी ङ हुदु युङ्नी हुगी ङीक्की ढीक्ल फालप् लबे केच्च्य घयेत् दी तो़न्न ङ हुल लप्स्य तोङ्गेन्। ॱनी हुगी उजो़त् च्यीक्की ॱमीत् छ्येप्प, हुदु ॱयोङ्नी युङे पी़न्ज्या घयेत् हुगी रोरङ्गी इक् ॱनेजङ् ॱमीत् ॱयोर्, ॱयोङ्मागी ॱनेजङ् ॱयरल आक् क च्येत्न हरुङ् ॱनेजङ् ॱयोर्केन् दीब अक् छ्यो़ छोनी तो़न्न दीक्केन् बेत्। 11 झ्यम्बे दगु रङ् ॱमीदे आक्पाल मेम्ब, गागी ॱमीदेल तो़ज्यीत्। गा झ्यीक्केन् दी को़न्ज्योक् ङो़गी बेत्। ॱनी आक्पा झ्यीक्केन् दी को़न्ज्योक्तङ् ङोस्स्यीन् मत् युङे मी बेत्। 12 मी कुरीक्की डेमेत्रीयस् हुगो गङ्ज्येन् बेत् सीन्न सीगुक्। ॱनी हीगो डस्सी दीम्बे एक् हुन्दुक् दीरङ् ॱसुङ्गेन् बेत्। ॱनी ङीक्की इक् सीक्को़त्। ङीक्की ॱस्येप्पे केच्च्य खुङ्देन् हीम्ब रङ्ल ॱस्यो़च्च्ये यो़क्केन् बेत्। 13 रङ्ल ढीन तोङ्ज्येमे केच्च्य ॱयोङ्म गज्येन् यो़त्। ॱनी यो़त्न अक्, हीगो ॱनुगु धङ् ॱनक्चागी झ्यीन ढीन ॱमीत् तोङ्। 14 रङ् ठेत्तु ङ ज्योक्पु युङ्गेन्। हुनी खनी लप्न टो़च्च्ये ॱनो़बे रीगो यो़त्। 15 रङ्ल ॱसीम् दीव युङ् युङ युङ्ज्ये यो़प्प स्योक्च्यीत्। हीगी दगु घयेक्की रङ्ल छ्यक्सुम् थेमु यो़दो सीन्न तोङ्गुक्। उन यो़प्पे दगु घयेत् रीदङ् रील ङे छ्यक्सुम् थेमु यो़दो सीन्न ॱस्यो़च्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.