२ तीमोथी 3 - ल्होमीस्युक् थमे यङ्गी मी ॱसीम्ब १-९ 1 स्युक् थमल दुक्स्यीगी धी़ आक्सी युङ्गेन् बेत् ॱनो़ब रङ्गी ॱह घोव झ्यीज्यीत्। 2 हुगी धी़ल मी घयेक्की रङ्ज्यी़ झ्यीक्केन्, पयीसक्ल ॱसीम् छ्यासी झ्यीक्केन्, तम्दो़त् ॱस्यो़क्केन्, ज्यीङ्ब बोम्सी झ्यीक्केन्, ॱमो़म्बी़त् तोङ्गेन्, फमे खल मीत् नेङ्गेन्, ढीन् ॱमीत् ॱसम्गेन्, छ्यो़सीम् ॱमीत् ॱसम्गेन्, 3 चीदुङ् मीप्प, डीक्च्या झ्यीबल मीत् नेङ्गेन्, मी ठमु, ॱसीम्बे ॱनो़दोक् झ्यीक्केन्, ॱङीङ्ज्यी मीप्पे ले झ्यीक्केन्, गागी ढङ्ल गुव मीत् झ्यीक्केन्, 4 छ्यीमनङ् झ्यीक्केन्, फोदोरोक्प युङ्गेन्, तम्दो़क्की ज्यीङ्ब बोम्बु झ्यीक्केन् धङ् को़न्ज्योक्ल धेप्प झ्यीच्च्ये स्यक्नी रोरङ्सो़ ॱसीम्ल ग ग युङे धेत्मो़गी ॱवङ्ल मङा तोङ्गेन् बेत्। 5 हुबे छ्यलु दीगी म दी को़न्ज्योक् ॱसम्गेन् हीन्दोक्प झ्यीक्केन्, ॱनी म दी हुगी लेमुल ॱस्यीक् मीप्प हीम्ब ॱसम्गेन् बेत्। हुन्दुक् झ्यीबदङ् रङ् भीन दो़च्च्यीत्। 6-7 ॱनी हुन्दुक् झ्यीबे मी यरी यरी ॱयोङ्गी गोक्केक्ल गीर्न, भुमु धेत्मो़ ङेम्ब ॱनजोगी ॱवङ्ल ॱस्योर्नर दीक्प गज्येन् झ्यीक्केन्, छीगङ् घजो़त् ॱलप्न टेत्न आक्, नम्ल अक् दीम्ब ॱह मीत् घोगेन् हुन्दुक् झ्यीबे ॱसीम् डम्ज्ये मीप्पे भुमु घयेत् ॱयो कोर्न च्युदु डोगेन् बेत्। 8 यान्नेस् धङ् याम्ब्रेस् धङ्बु मोशागी डल लोङ डस्सी हुब अक् दीम्बे केच्च्यल ॱमीत् चीय, लेन् ज्यक्केन् बेत्। हुबे ॱनोक्सम् दी ङीन खुर्नी, हुनी छ्य स्यक्प दी इक् रम्नर बेत्। 9 हुबे ले हुगो धोबा च्यीक्नी ये डोगेन् बेत्। घन्ड हीन् सीन्न यान्नेस् धङ् याम्ब्रेस्ल झ्युङ डस्सी हुबे घुलोक्पे ले हुगो मी कुरीक्की ठस्सली थोङ्गेन् बेत्। छ्य स्यक्पे लम्ल धु गो़गेन् १०-१७ 10 रङ्गी ङे ॱलोप्स, ङे मीजीगी छ्यलु, ॱसम्ल तोङ्लु, छ्य तेम्बर् स्योक्लु, थेक्प रीम्ब, झ्यम्ब, धु धङ् 11 ॱनी ङल एन्टीयोक्, आइकोनीयम् धङ् लीस्तरा सार्तु घन्दुक्मे दुक्प अयेक्प तङ्सोङ, हुगो ङे घन्दुक्मे गुर् थेक्प झ्यीसोङ हुगो कुरीक् रङ्गी थोङ्न ॱस्यो़च्च्ये यो़क्केन् बेत्। ॱनी हुन्दुक्मे दुक्प अयेक्प घयेक्की लक्नी चोव ज्यीन्दक्की ङ छ्यीज्युङ्। 12 ॱनी म दी ख्रीष्ट् येशुदङ् मत् ढेब दो़क्केन्, ढङ्बी़ छ्यलु झ्यीक्केन् घयेत्ल दुक्प अयेक्प घनी इक् तोङ्गेन् बेत्। 13 ॱनी मी ङेम्ब धङ् ॱयोज्यी़ ठम्ज्यी़ ॱस्यो़क्केन् घयेत् हुब रोरङ्सो़ हुगी ङेम्ब धङ् ॱयोज्यी़ ठम्ज्यी़ दील रोरङ्सोरङ् थुम्न हरुङ् दुक्तु डोगेन् बेत्। 14 रङ् हुब डस्सी मेम्ब, रङ्ल ॱलप्न टो़क्केन् दी ॱसु ॱसु बेक्क हुगो रङ्ल ॱस्यो़च्च्ये यो़क्केन् बेत्। हुगो झ्यीनी रङ्गी ॱह घोन देङ् खीन यो़प्पे केच्च्य दील थीरी दो़च्च्यीत्। 15 ॱनी म दी रङ्गी च्युङेत्मुनीरङ् धम्बे ॱसुङ्रप् ॱलप्न ॱस्यीन यो़क्केन् बेत्। धम्बे ॱसुङ्रप्की रङ् झ्यी़रीक् च्येम्मल सो़न ख्रीष्ट् येशुल छ्य स्यक्पे लम्नी छी थर्वल तो़न् छुगेन् बेत्। 16 ॱनी धम्बे ॱसुङ्रप् म दी जेङ् को़न्ज्योक्की थुगी ॱसल्न तो़न्न युङ बेत्। हुगो ॱलोप्स ज्यक्पल, लप्स्य तोङल, ङीब ॱरोङल धङ् छर्की च्येत्न ढङ्बी़ छ्यलु युङल फेन्सी घो छ्यो़क्केन् बेत्। 17 धम्बे ॱसुङ्रप् हुगो को़न्ज्योक्की मी घयेक्की गये लेगी ढङ् घयेत् झ्यीत् छुन फी़न्सुम् छङ युङ्ज्ये यो़प्पे ढीक्ल हुगो ॱनङ्न यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.