२ तीमोथी 2 - ल्होमीदुक्प गुरल धु गो़गेन् १-१३ 1 ङे भु रङ्ल ख्रीष्ट् येशुगी थुज्यीगी ॱस्यीक् ॱङीच्च्ये यो़प्प तोङ्। 2 मी गज्येङ्गी दोङ्दु रङ्गी ङ च्यानी घङ् ॱह घोवे केच्च्य दी ॱयोङ्ल ॱलप्न टो़त् ॱस्यीगेन्, छ्यप्स्यक् च्येम्मे मी घयेत्ल रङ्गी ॱलप्न टेत्न हुबे गेल्ल स्योक्च्यीत्। 3 ख्रीष्ट् येशुगी ॱमक्मी धक्तेन् हीम्ब डस्सी झ्यीन रङ्ल घङ् नोङे दुक्प रङ्गी इक् गुर्च्यीत्। 4 ॱमक्मील स्युनी, ॱमक्मी घन् दीगी इक् रोरङ्गी ॱमक्पो़न् गुवे ले झ्यीप्पल मेन्द, धो़न् ॱयोङ्गी लेल ॱमीत् तगेन् बेत्। 5 ॱनी हीगो डस्सी यङ् ज्युक्री चीगेङ्गी मी इक् हुगी ठीम् दील मत् नेन्न ॱनी, ज्येन अक्, ज्ये ॱमीत् थोप्केन् बेत्। 6 ॱनी यङ् कले च्येत्न ॱसप्ले ज्यक्केङ्गी मील अक् रोगी तो़न्दोक् दी ॱएन्स्युक्ल रोलरङ् थोप् गोगेन् बेत् 7 ङे घन्ड सीगुक्क हील ॱनोक्सम् तोङ्ज्यीत्। चोव ज्यीन्दक्की रङ्ल धो़र्रीक् छङ्म थोज्ये यो़प्पे ॱसीम् ॱनङ्गेन् बेत्। 8 ङे ॱस्येप्पे केच्च्य ॱनेम्बुल पीब दाऊद्गी ज्यी़त् येशु ख्रीष्ट् ढोङ्नरे ॱसनेनी को़न्ज्योक्की ॱसोम्बुल ॱलोङ बेत्। ॱनी हीगो रङ्गी ढेम्ब ॱसो़ ॱसो़ब झ्यीज्यीत्। 9 हीगी केच्च्य हीगो ॱस्येप्पे ढीक्ल ङ दुक्प गुर्कीन् यो़त्। नक्पो़न् डस्सी च्यागोङ् ज्यप्न चो़ल्ल ॱलुक्च्युङ्। ॱनी हीन्न अक्, यङ् को़न्ज्योक्की केच्च्य दी ॱमत् कीङ यो़क्केन् बेत्। 10 हीगो झ्यीनी को़न्ज्योक्की दम्बे मी घयेत् एत् ख्रीष्ट् येशुगी लम्नी छी थर्वल थो़न्न, मीत् येगेङ्गी तो़त्वङ्गी ओ़च्च्यल ॱलीत् छुज्ये यो़प्पल ङल नोङे दुक्प घयेत् ङे गुर् थेक्प झ्यीक्को़त्। 11 धक्तेङ्गी केच्च्यल हीन्दुक् सीर यो़क्केन् बेत्। हज्यरङ् खोङ्दङ् कङ्ज्यीक्पल ॱस्यीय हीन्न ॱनी, यङ् खोङ्दङ् कङ्ज्यीक्पलरङ् ॱसोम्बुल आक् युङ्गेन् बेत्। 12 हज्यरङ् धु च्यङ्न देत्न ॱनी, यङ् खोङ्दङ् कङ्ज्यीक्ल ॱवङ् च्योङ्ज्ये एक् ॱनोङ्गेन् बेत्। हज्यरङ्गी ङ खोङ्गी मी मेन् सीन्न ॱनी, हुनी यङ् खोङ्गी इक् हज्यरङ्ल हुगो ङे मी मेन् सीन्न ॱसुङ्गेन् बेत्। 13 हज्यरङ् तेन्ज्ये मत् युङ्न अक्, खोङ् तेम्बर् यो़क्केन् बेत्। घन्ड हीन् सीन्न खोङ्गी रोरङ्गी थु तेन्ज्ये मीप्पल ज्युर् ॱमीत् छुगेन् बेत्। छ्यी़नरे ॱलोप्स क च्यो़त् गोगेन् १४-२६ 14 हीगी केच्च्य घयेत् हीगो हुदु मी घयेत्ल ॱस्येत्न ढेन्सो़ ॱलोङ्ज्यीत्। हुदु केच्च्ये छीक्टल थुक्री चीगेन् घयेत्ल थुक्री ॱमत् ची सीन्न को़न्ज्योक्की ढुङ्दु ज्यीब ॱलङ्न लप्स्य तोङ्ज्यीत्। हुगो घो ॱमीत् छ्यो़त् बेत्। हुगी ॱयोङ्म नेङ्गीन् यो़प्पे ॱसीम्ब आक् मीत्तल तोङ्गेन् बेत्। 15 को़न्ज्योक्की तेबल रङ् छ्यप्स्यक् च्येम्मल झ्युङ्न ङु छ मीत् गो़गेङ्गी लेमीय धङ् दीम्बे केच्च्य डीक्पोक्म ॱस्यो़त् ॱस्यीगेल्ल युङ कले च्येत्न थो़न् छुब झ्यीज्यीत्। 16 मीत् डीक्केन् धो़म्मीक्की ज्यलप् लप्केन् घयेत्तङ् भीन दो़च्च्यीत्। हुन्दुक् झ्यीबे ज्यलप् लप्केन् घयेत् हुबे को़न्ज्योक् मीत् गुवे ले दी हरुङ् मङ्दु मङ्दु झ्यीक्केन् बेत्। 17 हुबे ज्यलप् हुगो ॱम ॱमी़न घल अक् ॱनेन् थोर्केन्दङ् छ्येत्मीत् धर्केन् बेत्। हुबे छीक्नी च्यीक् हैमेनीयस् धङ् च्यीक् फीलेतस् बेत्। 18 हुब ॱङीबु दीम्बे लम्नी छ्यी़न, मी ॱस्यीनर घयेत् ॱसोम्बुल लोङ्गेन् बेत् सीक्केन् दी तान झ्युङ् छर बेत् सीन्न ॱस्यो़क्केन् बेत्। हुन्दुक् झ्यीन मी यरीगी छ्य स्यक्प दी हुबे मीत्तल तोङ्गेन् बेत्। 19 ॱनी हीन्न अक्, को़न्ज्योक्की ॱसप्तेन् तीङ दी तेम्बोक्म यो़क्केन् बेत्। हुल हीन्दुक् झ्यीबे इक्टी़ पर् थो़त्न यो़क्केन् बेत्। खोङ् रोरङ्गी मी दी ॱसु ॱसु हीन्दङ् हुगो चोव ज्यीन्दक्की ङु ॱस्यीगेन् बेत् सीर धङ् (ढङ्ज्युक् १६:५) चोव ज्यीन्दक्की छेन् डेन् ज्यक्केन् दी ॱसु दुक्क हुगी मत् ढङागी ढङ् घयेत् फोङ्ज्यीत् सीर यो़क्केन् बेत्। 20 ढोङ्ब छ्यीम्मु च्येम्म घदु उक् ॱसीर् धङ् ॱङुगी ॱनो़च्च्य छ्युवक् मेम्ब, ॱस्यीङ् धङ् जमे ॱनो़च्च्य आक् युङ्गेन् बेत्। यरी पम्दङ् जील खो़ज्येम धङ् यरी पम्सोल मेम्ब, छीगङ् खो़ज्येम आक् युङ्गेन् बेत्। 21 ॱनी मत् ढङागी ढङ् घयेत् फङ्न धक्पर् युङल थो़न्न युङ्गेङ्गी मी हुगो हस्सो़त् पम्दङ् जील खो़ज्येमे ॱनो़च्च्य हुगो डस्सी बेत्। हुगो दक्पुल घो छ्यो़क्केन् गये ले घन्डल अक् खो़ छ्योक् युङ्गेन् बेत्। 22 स्यो़म्बल ॱसीम्ल लङ्गेङ्गी धेत्मो़ आक्पागी ढङ् घयेत् रङ्गी फोङ्ज्यीत्। हुनी ॱसीम् चङ्म खुर्न चोव ज्यीन्दक् डेन् ज्यक्केन् घयेत्तङ् दल ढङ्बु युङल, छ्य तेम्बर् स्योक्पल, झ्यम्ब झ्यीप्पल धङ् स्यीव सोवल थो़न् छुब झ्यीज्यीत्। 23 धो़म्मीत्ल थुक्री चीगेन् ॱलीम्ब घयेत्नी भीन दो़च्च्यीत्। हुन्दुक् झ्यीबनी ठुक्प ॱस्योर्केन् बेत् ॱनो़ब रङ्ल ॱस्यो़च्च्ये यो़क्केन् बेत्। 24 चोव ज्यीन्दक्की ॱयोक्पी़ ठुक्प ज्यक्च्ये मीत् युङ्गेन् बेत्। कुरीक्तङ् जन्दीक्म झ्यीक्केन्, ॱलोप्स खेसी ज्यक् ॱस्यीगेन्, ङङ्रीन् च्येम्म धङ् 25 ॱमीत् थी़ङ्गेङ्गी केच्च्य लप्केन् घयेत्ल ॱम ॱयुङ्बोक्म झ्यीन केच्च्य ॱस्येत्न ॱरोङ् छुगेन् युङ् गोगेन् बेत्। को़न्ज्योक्की हुबे ॱसीम् दी ज्युर्च्ये यो़प्प धङ् दीम्ब ॱह घोज्ये यो़प्प सो़न ॱनी, 26 दी़क्की चो हुगी रोरङ्गी लेल कुज्येल ॱङीङ् गुक्पल सीम्ब दीनी थर्न हुबल ॱनोक्सम् ॱलीक्को़ट्टो। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.