२ तीमोथी 1 - ल्होमी1 ख्रीष्ट् येशुदङ् मत् ढेबल युङे छीये केच्च्ये छ्यो़त्तुम्ल पीब, को़न्ज्योक्की थुल यो़प्पल ख्रीष्ट् येशुगी ठीक्नल ङ पावल्की हीगो 2 ङे झ्यम्बे भु तीमोथीरङ्ल ढीन तोङ्गो़त्। रङ्ल यप् को़न्ज्योक् धङ् ख्रीष्ट् येशु हज्यरङ्गी चोव ज्यीन्दक् च्यानी थुज्यी, ॱङीङ्ज्यी धङ् ॱसीम् दीव युङ्ज्ये यो़प्प तोङ्। तीमोथील ॱलोप्स्यीक् टेप्प ३-८ 3 एल्ला ङे पुबु ॱमुमी़ झ्यीन युङ डस्सी ङे एक् ॱसीम् सङ्बु खुर्न ॱनोङ् मीत् युङे लेमु झ्यीन को़न्ज्योक्ल धेप्प झ्यीक्को़त्। हुनी ङे ङीन् छेन् मीप्प छीगङ् ॱसुव तोबे यङ्ल रङ् ढेन्सो़ झ्यीन, रङ्गी ढीक्ल को़न्ज्योक्ल थु छ्यी पु पुब झ्यीक्को़त्। 4 एल्ला रङ्गी ॱमीक्च्यु तोङ दी ढेन्सो़ लङ्गुक्। ॱनी रङ्दङ् ठेच्च्ये झ्युङ्न ॱनी, ङल गेस छ्यीम्मु युङेत् ॱनो़न ढेङ्गुक्। 5 रङ्गी ॱसीम्बे यीक्नी छ्य तेम्बर् स्यक्न यो़प्प दी ढेम्ब ॱसो़गुक्। एल्ला रङ्गी अबी लोइस् धङ् रङ्गी आम युनीस्की छ्य स्यक्न युङ दी डस्सी रङ्गी इक् स्योक्कुक्। हुल ङ ॱलो खीज्युङ्। 6 हीगो झ्यीनी ङे एल्ला रङ्ल लक्पे ॱवङ् केन, को़न्ज्योक्की रङ्ल ॱनङे कबप् दी मी बर तबु युङ्ज्ये यो़प्पल भी़ भी़ब झ्यीज्यीत् सीन्न ढेन्सो़ ॱलोङ्गेनो। 7 घन्ड हीन् सीन्न को़न्ज्योक्की हज्यरङ्ल धम्बे थु ॱनङे धो़न् दी ॱङीङ् च्युङेत्मु युङ्ज्येल मेम्ब, ॱलोप्स्यीक् ॱङीच्च्येल, झ्यम्ब धङ् ॱसीम् खेजो़त् च्यङ्जो़त् झ्यीन युङ् छुबे ढीक्ल सीन्न ॱनङ बेत्। 8 हुगो झ्यीनी हज्यरङ्गी चोव ज्यीन्दक्की ढीक्की केच्च्य ॱस्येत्न टो़प्पल ङु छय मत् झ्यीज्यीत्। खोङ्गी ढीक्ल चो़ल्ल ॱस्योर्न यो़क्केन् ङे ढीक्ल अक् ङु छय मत् झ्यीज्यीत्। बोर केच्च्य ॱनेम्बी़ ढीक्ल नोङे दुक्प रङ्गी इक् गुर्च्यीत्। हुल पीबे ॱस्यीक् को़न्ज्योक्की ॱनङ्गेन् बेत्। छी थर्वे धो़ङ्गी केच्च्य ९-१२ 9 को़न्ज्योक्की हज्यरङ् थर्वल तो़न्न हज्यरङ् धक्पर् युङे लेमुल भो़ब बेत्। हीगो हज्यरङ्गी झ्यीबे लेगी मेम्ब, खोङ् रोरङ्गी थुल ॱनो़बे थुज्यीगी लम्नी युङ बेत्। ॱनी हीगो ख्रीष्ट् येशुगी लम्नी युङ्ज्ये यो़प्पल ॱङो़न् धङ्बी़ धी़ले एक् एल्लानी यो़क्केन् बेत्। 10 ॱनी हीगो दङ् हरीङ्गी धी़ल क हज्यरङ्गी च्यप्को़न् ख्रीष्ट् येशु झ्यो़न्नी, हुगो तो़न्न युङ बेत्। हुनी ॱस्यीव हुगो खोङ्गी तुन, म दीरङ् नम्ल अक् मीत् सेक्केङ्गी छी दी केच्च्य ॱनेम्बी़ लम्नी ॱसल्न युङ बेत्। 11 ॱनी हीगी केच्च्य ॱनेम्बु हीगो ॱस्येत्न टोम्गेल्ल, ठीक्नलल धङ् चयेलमल ङ को़ज्युङ्। 12 हुगो झ्यीनी ङल हीगो डस्सीगी दुक्प छीगङ् नोङ्गुक्। ॱनी हीन्न अक्, हीगी ढीक्ल ङ ङु छय मीत् झ्यीत्। घन्ड हीन् सीन्न ङे ॱसुल छ्य स्यक्तुक्क हुगो ङे ङु ॱस्यीगो़त्। ङे गेल्ल खोङ्गी घङ् स्यक्न यो़प्प दी खोङ् रोरङ् झ्यो़म्बे ङीन् थुक्ल खोङ्गी छ्योप्न स्योक् छुगेन् हीम्बल ङ ॱलो खीन यो़त्। 13 ख्रीष्ट् येशुदङ् या मत् ढेब यो़प्पल छ्य स्यक्प दी धङ् झ्यम्ब दी ॱसीम्बे यीक्ल सुङ्न ङ च्यानी एल्ला रङ्गी ॱह घोवे धक्पर् च्येम्मे केच्च्य घयेत् दील डीक्पे लेमु झ्यीज्यीत्। 14 रङ्गी गेल्ल स्यक्न यो़प्पे हुगी गवे केच्च्य हुगो हज्यरङ्गी ॱसीम्ल स्युन यो़क्केन् धम्बे थु दगुल डेन्न तोर्तु ॱमत् ची़प्प सुङ्ज्यीत्। 15 एशीया लुङ्बदु कुरीक्की ङ ॱलो़ तङ्न स्यक्च्युङ्। फैगेलस् धङ् हर्मोगेनस्की इक् ॱलो़ तङ्ज्युङ्। हीगो रङ्ल ॱस्यो़च्च्ये यो़ट्टो। 16 ङल च्यागोङ् ज्यप्न यो़प्पे कप्ल ओनेसीफरस् ङु छय मीप्प, लेम्म गज्येन् युङ्न रोगी ङल ॱलोप्स्यीक् टेच्च्युङ्। खोङ्जो़ मीजङ् घयेत्ल चोव ज्यीन्दक्की थुज्यी सीज्ये यो़प्प स्योक्च्यीत्। 17 रोम् सार्तु खोङ्जो ॱलीत्नी रोगी गन्दीक्म ङ चर च्येत्न ङु छय मीप्प, ॱयेङ्न ॱलीच्च्युङ्। 18 ङ हुदु एफीसस्तु यो़प्पे यङ्ल रोगी ङल घन्दुक्मे दगु गा झ्यीब बेक्क हुगो रङ्ल अक् कुरीक् ॱस्यो़च्च्ये यो़क्केन् बेत्। चोव ज्यीन्दक् झ्यो़म्बे ङीङ्गी यङ्ल खोङ्जोल थुज्यी थोप्च्ये यो़प्प तोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.