२ थीस्सलोनीका 3 - ल्होमीॱसुव तोबे ढीक्ल स्युदेन् ज्यब १-५ 1 ह स्युक्ल पी़न्ज्यासो, खीत्रङ्गी घुङ्दु चोव ज्यीन्दक्की केच्च्यल तो़प्प झ्युङ डस्सी हरुङ् हीगो घल अक् ढीम्बु धर्न, हरुङ् ज्यीक्तु तो़प्प युङ्ज्ये यो़प्पल ङीक्की ढीक्ल ॱसुव तोप्रो झ्यीज्यीत्। 2 ॱनी मी अयेक्प धङ् ङेम्बे मी घयेक्की लक्नी ङीत् थर्च्ये यो़प्पल अक् ङीक्की ढीक्ल ॱसुव तोप्रो झ्यी। घन्ड हीन् सीन्न मी कुरीक्की छ्य स्यक्न मीत् युङ्गेन् बेत्। 3 चोव ज्यीन्दक् ज्युरुव मीप्प धङ् तेम्बर् यो़क्केन् झ्यीनी, खीत्रङ् थीरी दो़त् छुज्ये यो़प्पल खोङ्गी ॱस्यीक् ॱनङ्न खीत्रङ् दी़त्ङेन् हुगी लक्ल ॱस्योर्तु ॱमीत् ची़प्प छ्योप्केन् बेत्। 4 ङीक्की ॱलोप्सल खीत्रङ्गी हुन्दो ओक्, तीङ्ला आक् नेन्न दो़क्केन् बेत् ॱनो़बल चोव ज्यीन्दक्की लम्नी ङीत्ल देङ् खीज्युङ्। 5 चोव ज्यीन्दक्की खीत्रङ्गी ॱसीम्बे ॱमीक् दी भीदु ची़त्न, को़न्ज्योक्की झ्यम्ब धङ् ख्रीष्ट्की गुर् थेक्पे धु दी खीत्रङ्गी थोङ्न ॱस्यीज्ये यो़प्प तोङ्। गीर्च्यम्ब ॱअर्स्यीय घयेत्ल ॱलोप्स ६-१५ 6 पी़न्ज्यासो, चोव ज्यीन्दक् येशु ख्रीष्ट्की छेन्नी खीत्रङ्ल ङीक्की क हीगो ढीन तोङ्गो़त्। ङीक्की ॱलोप्स ज्यबल मीत् नेङ्गेन्, पी़न्ज्या, उन ॱअर्स्यीय गीर्च्यम् ॱस्यो़क्केन् ॱसु यो़दङ् हुगोदङ् खीत्रङ् भीन दो़च्च्यीत्। 7 हुदु दो़प्पे यङ्ल ङीक्की खीत्रङ्ल घन्दुक् झ्यीबे ॱमीदे तो़न्ज्युङ हुगो खीत्रङ्गी थोङ बेत्। ङीत् गीर्च्यम् ॱस्येस्सोङक् ॱनी? 8 ॱसी़ लक्नी सम सेन अक्, ङीक्की पयीसक् टेत्न मेन्द, नुक्रङ्ल मत् से। ङीक्की खीत्रङ्ल गेन् ॱमत् केब, बोर ङीत्रङ्गीरङ् ङीन् छेन् मीप्प कप्ले च्येत्न ले झ्यीन सेबेन्। 9 स्येन् ङीत्ल ॱहक् त यो़त्। ॱनी हीन्न अक्, खीत्रङ् ङीक्की ॱमीदेल तेन युङ्ज्ये यो़प्पल ङीत् ङीत्रङ्गीरङ् ले झ्यीन सेबेन्। 10 खीत्रङ्गी घुङ्न ले दीरङ् झ्यीक्कीन् ॱमीत् थेक्केन् ॱसु यो़दङ् हुल सम ॱमत् टो़च्च्यीत् सीन्न खीत्रङ् च्येन्दु यो़प्पे यङ्लरङ् खीत्रङ्ल ङीक्की ॱस्येत्न स्यक्पेन्। 11 ङीक्की हीदु ॱह घोवल खीत्रङ्गी उन यरी यरी ले मीत् झ्यीप्प, गीर्च्यम् ॱस्येत्न ॱयोङ्गी लेल घोदो कक्तु डोगुक् सीगुक्। 12 हुन्दुक् झ्यीबे मील चोव ज्यीन्दक् येशु ख्रीष्ट्तङ् मत् ढेबल हुल ङीत् ॱलोप्स ज्यप्न खक्को़ ज्यक्केन्। हुट्ट मीप्प ॱसोस्सोरङ्गी मीजील ॱसोस्सोरङ्गी ले झ्यीन ढोप्प ॱसो़ज्यीत्। 13 ॱनी खीत्रङ् पी़न्ज्यासो, गये ले झ्यीप्पल घाब मत् झ्यीज्यीत्। 14 ङीक्की ॱलोप्स हील मीत् नेङ्गेन् खीत्रङ्गी उन ॱसु दुक्क हुगो ङु छज्ये यो़प्पल खीत्रङ्गी हुगो ङु ॱस्यीब झ्यीन रङ्स स्योक्च्यीत्। 15 ॱनी रङ्स स्यक्नी इक्, हुल यङ् ड हीम्ब डस्सी ॱमत् ॱसम्ब, पी़न् हीम्ब डस्सी ॱसम्न लप्स्य तोङ्ज्यीत्। स्युक् जोबे तम् १६-१८ 16 खीत्रङ्ल गदुक् आक्तुक् घन्ड झ्युङ्न अक्, ॱसीम् दीव ॱनङ्गेङ्गी चोव ज्यीन्दक् खोङ् रोरङ् च्यानी खीत्रङ्ल धी़ ज्यी़न्दु ॱसीम् दीव युङ्ज्ये यो़प्प तोङ्। चोव ज्यीन्दक् खीत्रङ् कुरीक्तङ् दल स्युज्ये यो़प्प स्योक्च्यीत्। 17 खीत्रङ्ल छ्यक्सुम् थेमु हीगो ङ पावल्की ङरङ्गी लक्पे ढीन तोङ्गो़त्। ॱनी ङोस्स्यीन् युङ्ज्येल ङे यीगी घङ्गोल अक् इक्चु हीगो यो़त्। 18 हज्यरङ्गी चोव ज्यीन्दक् येशु ख्रीष्ट्की थुज्यी खीत्रङ् कुरीक्ल थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.