२ थीस्सलोनीका 2 - ल्होमीचोव ज्यीन्दक् झ्यो़म्बे यङ्गी केच्च्य १-१२ 1 पी़न्ज्यासो, हज्यरङ्गी चोव ज्यीन्दक् येशु ख्रीष्ट् इगीनी झ्यो़म्बे ढीक्ल धङ् हज्यरङ् घयेत् खोङ् च्येन्दु जोम्गेन् हीम्बे ढीक्ल तम् च्यीक् खीत्रङ्ल गन्दीक्म ॱस्येत्न स्योक्केन्। 2 चोव ज्यीन्दक् झ्यो़म्बे ङीन् दी ॱलीत् छर बेत् सीरल खीत्रङ् ॱसीम्दुक् मत् झ्यीज्यीत्। हुगी केच्च्य हुगो धम्बे थुगी तो़न्न ॱस्येप्प हीन्दोक्परङ् यो़त्, यङ् ङीक्की खनी ॱस्येप्प हीन्दोक्परङ् यो़त्, यङ् ङीक्की यीगील ढीन तङ हीन्दोक्परङ् यो़त्न अक्, हुल खीत्रङ् ओ़न् ॱमत् थोम्ज्यीत्। 3 हीगी ढीक्ल खीत्रङ्ल मी ॱसी़ घन्डरङ् ॱस्येत्न आक्, हुल ॱमत् छ्यी़ज्यीत्। ॱअल एल्ला मी गज्येङ्गी को़न्ज्योक् फोङ्गेन् बेत्। हुनी हस्सो़त् खरप्ल डोगेङ्गी ॱसो़न्ज्यी़त्, छ्यो़डीम् मीप्प हीम्ब ॱसम्गेङ्गी मी दी थो़न्न युङ्नी मेन्द, चोव ज्यीन्दक्की ङीन् हुगो ॱमीत् ॱलीक्केन् बेत्। 4 हुगी मी हुगो मी घयेक्की छ्यक् छ्यो़प्प पुगेङ्गी ॱल्ह धङ् कु घयेक्की डल लोङ्न रोरङ्गी रोरङ् छ्यीस्स्योल तो़क्केन् बेत्। हुनी स्युक्तु हुगो को़न्ज्योक्की छ्यो़गङ्ल आक् स्युन हुदु देत्न, हुगी ङ को़न्ज्योक् हीन् सीन्न कुरीक्ल तो़ङ्गेन् बेत्। 5 ङ खीत्रङ्दङ् दल दो़प्पे यङ्ल ङे हीगो कुरीक् ॱस्येप्पेन् न ॱनी। खीत्रङ्गी ढेङ्गी ॱसो़गो़ट्टो। 6 धी़ ॱलीबे ॱङेस्स्यो हुगी मी हुगो थो़न्न युङ्ज्येल हुन्दो हुगो थो़न्दु ॱमीत् ची़प्प, क च्येत्न यो़क्केन् बेत्। हीगो ओक् खीत्रङ्ल ॱस्यो़च्च्ये यो़क्केन् बेत्। 7 हुगी छ्यो़डीम् मीप्प हीम्बे लुस हुगो हुन्दोनी केत्मीत्ल थो़त्न यो़क्केन् बेत्। ॱनी हुगी मी हुगो थो़न्दु ॱमीत् ची़प्प, क च्यो़क्केन् दील को़न्ज्योक्की ह क ॱमत् च्यो़त् सीन्नी, 8 हुनी हस्सो़त् छ्यो़डीम् मीप्प हीम्बे मी हुगो थो़न्न युङ्गेन् बेत्। ॱनी चोव ज्यीन्दक् इगीनी मल्ल झ्यो़म्बे ओ़च्च्य छ्यीम्मु धङ् खोङ्गी फु सीत्तेम्ब च्यीक्की हुगो ॱसेत्न ॱसीङ् थागी सो़ तोङ्गेन् बेत्। 9 छ्यो़डीम् मीप्प हीम्बे मी हुगो थो़न्न युङ्नी, हुगोल शैतान्गी ॱस्यीक् छ्यीम्मु टेत्न, हुगी यीक् छ्यीम्मी़ ले धङ् यम् छेम्मे ले हीन्दोक्प झ्यीक्केन् बेत्। 10 हुगी झ्यीबे आक्पागी ढङ् घयेक्की ॱयोङ्गोर्ल खरप्ल डोगेङ्गी मी घयेत् छ्यी़ डोगेन् बेत्। घन्ड हीन् सीन्न हुबे रोरङ्सोल छी थर्व युङ्गेन् दीम्बे केच्च्य दील ॱलो दीलरङ् मत् झ्यीब बेत्। 11 हुगो झ्यीनी हुगी ॱएलम ज्यब दीलरङ् हुगी मी घयेत् हुगो छ्य स्यक्न, हुलरङ् छ्यी़ज्ये यो़प्पल छ्यी़दु ची़क्केङ्गी केच्च्य छ्यीम्मु को़न्ज्योक्की तोङ्गेन् बेत्। 12 ॱनी दीम्बल छ्य मीत् स्योक्केन् धङ् आक्पागी ढङ्ल गुव झ्यीक्केन् घयेत् हुबल को़न्ज्योक्की ठीम् च्येत्न छ्येप्प को़ज्ये यो़प्पल हुगो तोङ्गेन् बेत्। को़न्ज्योक्की दम्बे मी घयेत् तेम्बर् दो़त् गोगेन् १३-१७ 13 चोव ज्यीन्दक्की झ्यम्बे पी़न्ज्यासो, खीत्रङ्गी ढीक्ल ङीत् को़न्ज्योक्ल छीगङ् थु छ्यी पु पुब झ्यीक्को़त्। घन्ड हीन् सीन्न खीत्रङ्गी दीम्बल छ्य स्यक्पे लम्नी धम्बे थुगी खीत्रङ् धक्पर्ल सो़न, को़न्ज्योक्की खीत्रङ् गोमनीरङ् थर्वे लम्ल दम्ब बेत्। 14 हज्यरङ्गी चोव ज्यीन्दक् येशु ख्रीष्ट्की तो़त्वङ्गी ओ़च्च्यनी खीत्रङ्ल आक् फक् च्यीक् थोप्च्ये यो़प्पल को़न्ज्योक्की खीत्रङ् ङीक्की ॱस्येप्पे केच्च्य ॱनेम्बी़ लम्नी भो़ब बेत्। 15 हुगो झ्यीनी पी़न्ज्यासो, खीत्रङ्ल ङीक्की खनी ॱलोप्स ज्यबल धङ् यीगील ढीन तङे केच्च्यल थीरी नेन्न तेम्बर् झ्यीन दो़च्च्यीत्। 16 हज्यरङ्गी यप् को़न्ज्योक्की हज्यरङ्ल झ्यम्ब जेत्न खोङ्गी थुज्यीगी फुगी ढीक्ल ॱलोप्स्यीक् धङ् रीगो छ्यीम्मु ॱनङ्न यो़क्केन् बेत्। ॱनी हीगो ॱनङ्गेन् यप् धङ् हज्यरङ्गी चोव ज्यीन्दक् येशु ख्रीष्ट् खोङ् रोरङ् च्यानी 17 खीत्रङ् घयेक्की ॱसीम्ल ॱलोप्स्यीक् ॱङीत्न गये तम् धङ् गये ले ॱनजो खीत्रङ्गी छीगङ् झ्यीत् छुज्ये यो़प्प तोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.