२ थीस्सलोनीका 1 - ल्होमी1 ङ पावल्, सीलास् धङ् तीमोथी झ्यीबे खीत्रङ् उन थीस्सलोनीका सार्न यो़क्केन्, हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट्तङ् मत् ढेबे छ्यो़ छोल हीगो ढीन तोङ्गो़त्। 2 खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। 3 पी़न्ज्यासो, खीत्रङ्गी छ्य स्यक्प दी डम्दु डम्दु झ्युङ्न युङ दील धङ् च्यीक्तङ् च्यीक्ल झ्यीक्केङ्गी झ्यम्ब दी छ्यीदु छ्यीदु ज्येन युङ दील ङीक्की छीगङ् को़न्ज्योक्ल थु छ्यी पु पुब झ्यीत् गोगो़त्। 4 ॱनी खीत्रङ्ल छ्यी मी घयेक्की दुक्प अयेक्प धङ् दुक्स्यी गज्येन् तङ्न आक्, खीत्रङ् घन्दुक्मे गुर् थेक्पे धु छ्यीय धङ् छ्य स्यक्पे लम्ल थीरी देप्प बेक्क हुगी ढीक्ल ङीक्की को़न्ज्योक्की छ्यो़ छो घदु उक् हीगी ढीक्ल पेगेत् ॱस्यो़त् छुगो़त्। येशु झ्यो़म्बे केच्च्ये ॱलोप्स्यीक् ५-१२ 5 हुगी लम्नी को़न्ज्योक्की ठीम् ढङ्बु च्यो़क्केन् हीम्ब हज्यरङ्गी ॱह घो छुगेन् बेत्। हुगो झ्यीनी को़न्ज्योक्की ज्यागक्की धो़न्दु खीत्रङ्गी दुक्प गुर हुगी तीङ्ला खीत्रङ् को़न्ज्योक्की ज्यागक्ल स्युक्पल ओ़ब यो़प्प खोङ्गी ॱसम्गेन् बेत्। 6 हुगी यङ्ल को़न्ज्योक्की कुरीक्ल ठीम् ढङ्बु च्यो़क्केन् झ्यीनी, खीत्रङ्ल दुक्प तोङ्गेन् हुब घयेत्ल अक् खोङ्गी लेन् च्यो़गेन् बेत्। 7-8 हुनी क खीत्रङ् धङ् ङीत् दुक्पे लक्नी थर्केन् बेत्। हुगी यङ्ल चोव ज्यीन्दक् येशु मीज्ये छ्यीम्मुल भप्न खोङ् रोरङ्गी भङ्ज्येम्ब ज्यीक्पा घयेत्तङ् दल तेङ् यी़नी मल्ल कुरीक्की थोङ्सल झ्यो़ङ्गेन् बेत्। ॱनी हुगी यङ्ल को़न्ज्योक् ॱमीत् ॱसम्गेन् धङ् हज्यरङ्गी चोव ज्यीन्दक् येशुगी केच्च्य ॱनेम्बुल मीत् नेङ्गेन् घयेत्ल खोङ्गी लेन् च्यो़गेन् बेत्। 9 ॱनी हुन्दुक् झ्यीन हुब घयेत्ल ओ़बे छ्येप्प केन हुब चोव ज्यीन्दक्की ढुङ्दु, खोङ् रोरङ्गी तो़त्वङ् छ्यीम्मी़ ओ़च्च्य झ्यीस्सल ॱलीच्च्ये मीप्पल सो़न फुगी ॱस्यीस्सल तोङ्गेन् बेत्। 10 हुगी ङीन् दी येशु खोङ् रोरङ्गी मी चङ्म घयेत् च्यानी तो़प्प लीन्दु धङ् खोङ्ल छ्य स्यक्न यो़क्केन् घयेत् यीक् छ्यीन खोङ्ल तो़प्प पुज्ये यो़प्पल इगीनी मल्ल झ्यो़ङ्गेन् बेत्। ङीक्की गन्दीय दीम्ब बेत् सीरे केच्च्यल खीत्रङ्गी छ्य स्यक्न यो़क्केन् झ्यीनी, हुबे दल खीत्रङ् ॱअङ् युङ्गेन् बेत्। 11 ॱनी हुगो डुप्च्ये यो़प्पल ङीत् छीगङ् खीत्रङ्गी ढीक्ल ॱसुव तप् तब झ्यीक्को़त्। को़न्ज्योक्की ॱस्यीक् ॱङीत्न, खीत्रङ्गी झ्यीच्च्ये ॱनो़बे गये ले घयेत् दी धङ् छ्य स्यक्पे लम्गी ले घयेत् दी कुरीक् डुप्न, हज्यरङ्गी को़न्ज्योक्की खीत्रङ् भो़ब हीम्ब दी ओ़ब युङ्ज्ये यो़प्प तोङ्। 12 हुनी क खीत्रङ्ल हज्यरङ्गी को़न्ज्योक् धङ् चोव ज्यीन्दक् येशु ख्रीष्ट्की थुज्यी ॱनङल पीब हज्यरङ्गी चोव ज्यीन्दक् येशुल खीत्रङ् च्यानी तो़प्प युङ्गेन् बेत्। ॱनी खोङ् च्यानी खीत्रङ्ल आक् युङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.