२ पत्रुस् 3 - ल्होमी1 झ्यम्बे दगुसो, खीत्रङ्ल ङे हीगो यीगी ॱङीब ढीगेन् हीनो। ॱनी ङे यीगी ॱङीब हीगो ढीज्येगी धो़न् दी ॱएङ्गी केच्च्य दी ढेन्सो़ ॱलङ्न, खीत्रङ्गी ॱसीम्ल ॱनो़रीक् चङ्म छ्यर्च्ये यो़प्पल ढीब हीन्। 2 धङ्बु कलुङ् ॱस्यो़क्केन् चङ्म घयेक्की ॱस्येप्पे केच्च्य घयेत् धङ् खीत्रङ् च्याल युङे ठीक्नल घयेक्की लम् ज्यी़त्नी खीत्रङ्ल थोबे हज्यरङ्गी च्यप्को़न् चोव ज्यीन्दक्की ॱनङे क दी खीत्रङ्गी ॱसीम्ल सुङ्न स्योक्। 3 गो़स्योल हीगो ॱह घोव झ्यीज्यीत्। स्युक् थमे धी़ल धेच्च्यो ङेम्बे ॱवङ्ल डोगेङ्गी मी यरीगी हीन्दुक् सीन्न छ्यगेन् बेत्। 4 ख्रीष्ट् फीच्च्य युङ्गेन् बेत् धङ् युङ्गेन् बेत् सीक्केन् दी घन ॱनी? ॱङो़न् धङ्बु छङ्म थम्ज्येत् छ्यादु ची़प्पनी झ्यीनी घङ् यो़प्प हीगो पुबु ॱमुमी़ ङोनी हीन्दुक् दीरङ् मत् ज्युर दुक् न ॱनी सीन्न सीक्केन् बेत्। 5 ॱङो़न् धङ्बु तेङ् यी़ धङ् ॱस जम्बुलीङ् को़न्ज्योक्की ॱसुङे ॱसुङ्स्येक्की छ्यादु ची़प्प बेत्। ॱस जम्लीङ् छ्यी़ लम्नी छ्युनी सो़ब बेत्। ॱनी हुबल हीगी केच्च्य हीगो ॱस्यो़च्च्ये यो़त्न अक्, ॱस्यो़च्च्ये मीत्तोक्प झ्यीक्केन् बेत्। 6 हुनी यङ् को़न्ज्योक्की जम्बुलीङ् हील छ्युरोक् छ्यीम्मु तङ्न छ्यी़रङ् ॱसीङ् थागी सो़ तङ बेत्। 7 ॱनी हुन्दो इगीन घङ् यो़प्प घयेत् धङ् हीगी ॱस जम्बुलीङ् हीगो को़न्ज्योक्की ॱसुङे ॱसुङ्स्येक्की मील ॱहेक्च्येल ठोक्क झ्यीन स्यक्न यो़क्केन् बेत्। हीगो को़न्ज्योक् ॱमीत् ॱसम्गेन् घयेत्ल ठीम् च्येत्न खरप्ल तोङे ङीन् ॱलीब थुक्की ढीक्ल स्यक्न यो़क्केन् बेत्। 8 झ्यम्बे दगुसो, चोव ज्यीन्दक्ल लोङ तोङ्डक् च्यीक् ङीन् च्यीक् डस्सील अक् डो छुगेन् बेत्। ॱनी यङ् ङीन् च्यीक् लोङ तोङ्डक् च्यीक् डस्सील अक् डो छुगेन् बेत्। हीगो टोक् मत् ज्यीब, ॱसीम्ल सुङ्न स्योक्च्यीत्। 9 चोव ज्यीन्दक्की ङ ॱलीत् योङ् सीन्न ॱस्येप्प दी डुबल मी यरीगी गज्येन् थोगुक् ॱनो़ब ॱसम्गेन् बेत्। हुगो मेम्ब, खोङ् थोज्येगी धो़न् दी खीत्रङ्गी ढीक्ल धु च्यङ्न, मी च्यीगी च्यीक् इक् खरप्ल डोज्ये मीप्प कुरीक् ॱसीम् ज्युर्न लोक्न युङ्न अक्, ॱनो़बे गोङ्ब जेक्केन् बेत्। 10 चोव ज्यीन्दक् झ्यो़म्बे ङीन् दी थोप्तक् मीत्ल की़न्नक्प युङ डस्सी युङ्गेन् बेत्। हुगी यङ्ल हुरुरु हुर्ल इगी ॱनम्न घङ् यो़प्पे ढङ् घयेत् जेङ् ये डोगेन् बेत्। ॱस धङ् ॱसल यो़प्पे ढङ् घयेत् मी छीक्न खरप्ल डोगेन् बेत्। ॱनी ॱस धङ् ॱसदु घङ् सो़ब घयेत् दी खोरोप् छीक् डोगेन् बेत्। 11-12 हुन्दुक् झ्यीन म दीरङ् कुरीक् खरप्ल टप् डोगेन् झ्यीनी, हुनी खीत्रङ् घन्दुक् झ्यीब युङ् गोगेन् बेक्क? को़न्ज्योक्की हुगी ङीन् युङ हुल ॱसम्न ज्योक्सी युङ्दु ची़क्केन् खीत्रङ्सो धेस्सीम् छ्यीम्मु धङ् छ्यलु चङ्म युङ झ्यीत् गोगेन् बेत्। ॱनी हीगी ङीङ्गी यङ्ल इगी ॱनम्न घङ् यो़प्प घयेत् मी छीक्न खरप्ल डोगेन् बेत्। ॱसल यो़प्पे ढङ् घयेत् ढो़क्की स्यु डोगेन् बेत्। 13 ॱनी हीन्न अक्, को़न्ज्योक्की ॱनङे छ्यो़त्तुम्ल यो़प्पे ढङ्बु च्येङ्गी ॱसज्य इगी तेङ् यी़ ॱसम्ब धङ् ॱस जम्बुलीङ् ॱसम्ब दी युङल हज्यरङ् गुक्कीन् दो़क्केन् बेत्। 14 झ्यम्बे दगुसो, खीत्रङ् हुगोल गुक्केन् झ्यीनी, खीत्रङ् खोङ्गी ढुङ्दु नक्पी़ जी ङीबे ज्यी़त् मीप्प खोङ्दङ् धम्जीक् चङ्बोक्म युङल थो़न् छुब झ्यीज्यीत्। 15 ॱनी हीगो ॱह घोव झ्यीज्यीत्। हज्यरङ्गी चोव ज्यीन्दक् ङङ्रीन् छ्यीम्मु झ्यीन स्युज्येगी धो़न् दी कुरीक् थर्न युङ्ज्येगी ढीक्ल बेत्। हीगी ढीक्ल हज्यरङ्गी झ्यम्बे पी़न्ज्या पावल्की इक् रोरङ्ल को़न्ज्योक्की ॱनङे धो़र्रीक्की केच्च्य खीत्रङ् घयेत्ल ढीन तङ्दुक्। 16 पावल्की ढीबे यीगी घयेत् कुरीक्ल हीगी केच्च्य हीगी धो़न् दी डस्सी डस्सी ढीन यो़क्केन् बेत्। ॱनी म दी पावल्की ढीबे यीगी घयेत्ल केच्च्य यरी यरी ॱह घोव घासी दुक्। ॱनी धो़न् गन्दीक्म ॱस्यो़च्च्ये मीप्पे मी धङ् ॱसीम् तेन्ज्ये मीप्पे मी घयेक्की हीगी धो़न् दी फीलोक्प ॱस्यो़क्केन् बेत्। हुनी ॱसुङ्रप्की धो़न् ॱयोङ्म आक् ज्युर्न फीलोक्प ॱलोप्केन् बेत्। हीगो हुब खरप्ल डोज्येमे ले बेत्। 17 झ्यम्बे दगुसो, हीगो खीत्रङ्ल एल्लानी ॱस्यो़च्च्ये यो़क्केन् झ्यीनी, ङेन्सीम् च्येम्म हुबे ॱयोङ्गोर्ल खीत्रङ् छ्यी़ज्ये मीप्प धङ् खीत्रङ्गी छ्य स्यक्पे ॱसप्तेन् दी भोक्च्ये मीप्पल च्यङ्जो़त् झ्यीन दो़च्च्यीत्। 18 हज्यरङ्गी च्यप्को़न् चोव ज्यीन्दक् येशु ख्रीष्ट्की थुज्यीगी धो़र्रीक् खीत्रङ्ल ज्येबर् युङ्ज्ये यो़प्प धङ् खोङ्गी धो़र्रीक् खीत्रङ्गी गदु ॱस्यीज्ये यो़प्प झ्यीज्यीत्। खोङ्ल हुन्दो धङ् धी़ ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.