२ पत्रुस् 2 - ल्होमी1 धङ्बु इस्राएल्की घुङ्दु कलुङ् जी़म ॱस्यो़क्केन् गज्येन् थो़न्न युङ बेत्। ॱनी हीगो डस्सी हुन्दो खीत्रङ्गी घुङ्न अक् चयेलम जी़म गज्येन् थो़न्न यो़क्केन् बेत्। हुबे गोङ्दामुल मीत्तल भुजुक् तोङ्ज्येमे ॱलोप्स जी़म ज्यप्नी, रोरङ्सो ओक् दीक्पनी ॱलुगेङ्गी चोव ज्यीन्दक् हुबे मेम्बल तोङ्गेन् बेत्। ॱनी हुन्दुक् झ्यीन रोरङ्सो ज्योक्पु खरप्ल डोये ले झ्यीक्केन् बेत्। 2 छ्येल ॱस्योर्नर हुबे तीङ्ल मी गज्येन् डोगेन् बेत्। हुबे झ्यीत् झ्यीक्की दीम्बे लम्ल ॱमेस्येत् तोङ्गेल्ल सोगेन् बेत्। 3 हुब लोप्की ॱवङ्ल ॱस्योर्न, नोर् ॱसक्च्येल हुबे ॱएलम ज्यप्न खीत्रङ् ॱयो कोर्केन् बेत्। हुबल हुन्दुक् झ्यीबे ढीक्ल फोक्केङ्गी छ्येप्प दी एल्लानी ठोक्क झ्यीन यो़क्केन् बेत्। हुब खरप्ल डोवल हीगो मत् ज्युर फोक्केन् बेत्। 4 इगीन तेङ् यी़गी भङ्ज्येम्ब दीक्प झ्यीक्केन् घयेत् एत् त को़न्ज्योक्की ॱमत् तङ, ठीम्ज्यो़क्की ङीन् थुक्ल कीङ्न हुब मेन्नक् ॱनक् थीङीय ॱनलन च्युर्न स्यक्न यो़क्केन् बेत्। 5 धङ्बु उक् खोङ् ॱमीत् ॱसम्गेन्, दीक्च्येन् कोलीमी घयेत् थर्तु ॱमत् ची़प्प, म दीरङ् छ्युरोक् छ्यीम्मु जम्लीङ् की़ल्ल तङ् तङ बेत्। ॱनी ढङ्बी़ लम्गी केच्च्य ॱस्यो़क्केन् नुह धङ् नुहे मीजङ् मीरङ् ज्येत्रङ् क थर्न ॱसो़ब बेत्। 6 सदोम् धङ् गमोरा सार् ॱङीबु हुल अक् खोङ्गी छ्येप्प केन ॱहेन घोदाल तङ् तङ बेत्। हीगो को़न्ज्योक् ॱमीत् ॱसम्गेन् दीक्च्येन् घयेत्ल घन्दुक् झ्यीब युङ्गेन् बेक्क हुगो ॱमीदेल युङ खोङ्गी सो़ब बेत्। 7 मी ढङ्बु लोत्रङ् क हुनी थर्तु ची़प्प बेत्। उन मी ङेम्ब घयेक्की छ्येल ॱनक्केङ्गी लेमु घयेत् दी थोङ्नी, लोत् घङ् झ्यीबे च्यीरक् झ्युङ बेत्। 8 लोत् हुबे घुङ्दु दो़प्पे यङ्ल हुबे ङीन् रीम फो़स्स्यी ङेम्बे ले झ्यीप्प दी यरी थोङ बेत्। यङ् यरी ॱह घोव बेत्। लोत् ॱसीम् ढङ्बु झ्यीनी, हुगो गुर् ॱमत् थेक्प झ्युङ बेत्। 9 हुगोदङ् छ्येत्मीत् चोव ज्यीन्दक्ल धेप्प मो़ब झ्यीक्केङ्गी मी छो़त्लीङ्गी दुक्पे लक्नी खोङ्गी थर्तु ची़त् छुगेन् बेत्। ॱनी ढङ्ज्ये मीप्पे मील ठीम्ज्यो़क्की ङीन् छ्यीम्मी़ यङ्ल छ्येप्प को़ज्येमे ढीक्ल कज्येत् तोङ्गेन् बेत्। 10 कोलीमीगी धेत्मो़ ङेम्ब स्यीलोक्सीगी लेमुल ॱस्योर्न ॱवङ् च्येम्म घयेत्ल छ्यगेन् हुबल ओ़स्यो दी हीगो यो़क्केन् बेत्। हुगी चयेलम जी़म हुब ॱहम्जा छ्यीस्सी झ्यीनी, इगीगी ओ़च्च्य च्येम्म घयेत्ल ॱमो़म्बी़त् तोङल आक् ज्यीब मीत् झ्यीक्केन् बेत्। 11 ॱनी हुबले त तेङ् यी़गी भङ्ज्येम्ब घयेत् ज्यीक्पा ॱवङ् छ्यीया यो़त्न अक्, चोव ज्यीन्दक्की ढुङ्दु हुगी भङ्ज्येम्ब हुबे इगीगी ओ़च्च्य च्येम्म हुबल ॱमो़म्बी़त् ॱमीत् तोङ्गेन् बेत्। ङीब अक् ॱमीत् कोप्केन् बेत्। 12 हीगो डस्सी मेम्ब, हुबे रोरङ्सोल ॱस्यो़च्च्ये मीप्पे ढङ् घयेत्ल ॱमो़म्बी़त् तोङ्गेन् बेत्। हुब ॱनोक्सम् मीप्पे ॱसीम्ज्येन् डस्सी ॱनो़जो़त् घङ्बु झ्यीक्केन् सुङ्न ॱसो़च्च्येमल कीबे रीदादङ् छ्येत्मीत् बेत्। ॱनी हुबल रीदाल ॱस्यीप्सेन् फोक्प डस्सी फोक्केन् बेत्। 13 हुबे ङीब झ्यीबे ङेल्लेन् दी हुबल नोङ्गेन् बेत्। हुब ङीम्मु उक् जोम्न छ्यङ्दुङ्गी लोङ्ज्यो़त् झ्यीन ग ग ढो़त् ढो़त् झ्यीक्केन् बेत्। ॱनी धेच्च्यो ङेम्बल ॱस्योर्न, ग ग झ्यीक्केन् हुब खीत्रङ्दङ् मुल जोम्न सये यङ्ल हुब ङु छ मीप्पे मी रङ्स स्यीलोक्सी थोङ्गेन् बेत्। 14 हुबे छ्ये लङे ॱमीक् तगेन् बेत्। दीक्पे ॱवङ्ल ॱस्योर्न, हुब छी़न्ज्ये मीप्पे दीक्प झ्यीक्केन् बेत्। छ्य स्यक्नी, चव छु ॱमत् छुबे मी घयेत् दी हुबे ॱङीङ्ल सीन् डोगेन् बेत्। लोप् झ्यीप्पल हुब खेसी थो़न्न यो़क्केन् बेत्। हुबल को़न्ज्योक्की छ्येप्प फोक्केन् बेत्। 15 ढङ्बी़ लम् फङ्न स्यक्नी, बओर्की भु बालाम्गी लम्ल छ्यी़न डोगेङ्गी मी डस्सी हुब बेत्। धङ्बु बालाम् हुगो ङीब झ्यीन थोप्केङ्गी ॱलल ॱसीम्ब ॱस्योर्नी, ङीबे ले हीम्ब ॱस्यो़च्च्ये यो़त्न अक्, हुल छ्यी़ब बेत्। 16 बालाम्गी हीगी घुवे ले डस्सी ङीब झ्यीच्च्ये ॱनो़ब हीगो क च्यो़च्च्येल कलुङ् ॱस्यो़क्केन् बालाम् रोरङ्ल केच्च्य लप् ॱमीत् ॱस्यीगेन् भोङ्गी़ खनी कोलीमीगी केत्ल तम् ॱस्येप्प बेत्। 17 हुगी मी हुब छ्यु कम्नरे छ्युग डस्सी धङ् ॱलुङ्बी़ दीत्न ये डोगेङ्गी ॱमुब डस्सी बेत्। हुब घयेत् ॱलुक्च्येगी ढीक्ल मेन्नक् ॱनक् थीङीय को़न्ज्योक्की ठोक्क झ्यीन स्यक्न यो़क्केन् बेत्। 18 हुब तम्दो़त् ॱस्येत्न धो़म्मीक्की तम् लप्केन् कोलीमीगी ॱसीम्बे धेच्च्यो ङेम्बल ॱस्योर्नरे मी बेत्। ॱनी ॱएङ्गी छ्यलु ङीबे लम्नी थर्च्येम ॱयेङ्गेन् घयेत् छ्येल ॱनक्सी झ्यीक्केल्ल हुबे च्युगेन् बेत्। 19 हुबे ॱयोङ्ल रङ्मो़ युङ्गेन् बेत् सीन्न ॱस्यो़क्केन्, म दी रोरङ्सो ॱस्यीवल डोगेङ्गी लेमु घयेक्की ॱयोक्ल ॱस्योर्न यो़क्केन् बेत्। घन्ड हीन् सीन्न मी घन्डे लेमी़ ॱवङ्ल ॱस्योको़र्दङ् हुगी ॱयोक्ल ॱस्योर्केन् बेत्। 20 स्येन् हुबे एल्ला हज्यरङ्गी च्यप्को़न् चोव ज्यीन्दक् येशु ख्रीष्ट् ङु ॱस्यीन जम्बुलीङ्गी स्यीलोक्सीगी ङीब घयेत्नी थर्न युङ बेत्। ॱनी हुब यङ् हुगी ॱङीङ् दीलरङ् सीन्न हुगी ॱवङ्ल ॱसोङ्नी, हुब एल्लाले हरुङ् दुक्तु डोगेन् बेत्। 21 हुबल ढङ्बी़ लम् ॱस्यो़च्च्ये झ्युङ्नी इक्, हुन्दुक् झ्यीन रोरङ्सोल ॱस्येप्पे धम्बे कल तक् तो़म्बले त बोर हीगो ॱस्यो़च्च्ये दीरङ् मीप्प झ्युङ्न ढक्पा युङ्गो़ट्टो। 22 ॱसुङ्रप्ल थो़ङ्गेन् बेत्। की रोरङ्गी एल्ला च्युब च्यु स्यक्पल लोक्केन् बेत्। फक्प टी़न आक्, यङ् हुगो ज्यक् दीलरङ् रुत्ता चीगेन् बेत्। (पीस्येत् २६:११) ॱनी पी हीगोदङ् छ्येत्मीक्की मी हुब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.