२ युहन्ना 1 - ल्होमी1 ङ छ्यो़ छोगी गोयो़प्पे हीगो को़न्ज्योक्की दम्बे भुमु नीज्यरङ् धङ् नीज्यरङ्गी भीज घयेत्ल ढीन तोङ्गो़दो। खीत्रङ् घयेत्ल ङे दीम्बरङ्गी झ्यम्ब यो़दो। ॱनी हीगो ङ छ्युवक्की मेम्ब, दीम्ब ॱस्यो़च्च्ये यो़क्केन् घयेत् कुरीक्की झ्यम्ब यो़क्केन् बेत्। 2 ॱनी ङीक्की झ्यम्ब युङ्ज्ये दी ङीत्तङ् दल दीम्ब मत् ढेब धी़ ज्यी़न्दु यो़क्केन् झ्यीनी, हुगी लम्नी युङ्गेन् बेत्। 3 हज्यरङ् दीम्ब धङ् झ्यम्बल मत् ढेब यो़क्केन् घयेत्ल यप् को़न्ज्योक् धङ् ॱरेबु येशु ख्रीष्ट् च्यानी थुज्यी, ॱङीङ्ज्यी धङ् ॱसीम् दीव युङ्ज्ये यो़प्प तोङ्। 4 ङीत्ल यप्की ॱनङे कल यो़प्पल नीज्यरङ्गी भीज यरी दीम्बे लम्ल डोव थोङ्नी, हुल ङ दो़न्दो़त् गुव झ्युङ्। 5 भुमु नीज्यरङ्ल क ॱसम्ब ङ ढीन ॱमीत् तोङ्। गोमनीरङ् नीज्यरङ्गी ॱह घोवे क दीरङ् पी़न्ज्या नङ्दु झ्यम्ब झ्यीत्री चीज्यीत् सीन्न ॱलोप्स ज्यक्केन् हीनो। 6 हीगो गोमनीरङ् खीत्रङ्गी ॱह घोन युङे झ्यम्बे ढीक्की केच्च्य दीरङ् बेत्। हीगो हस्सो़त् को़न्ज्योक्की क धङ् धम्ल चीन युङ दील डोगेन् दी बेत्। 7 येशु ख्रीष्ट् कोलीमील कीन युङ मेम्बेत् सीन्न ॱयोङ्गोर् ज्यप्न च्युगेन् गज्येन् थो़न्न जम्बुलीङ्न यो़क्केन् बेत्। हुन्दुक् झ्यीन ॱयोङ्गोर् ज्यप्न च्युगेन् हुगो ख्रीष्ट्की ड बेत्। 8 खीत्रङ्गी घुङ्दु ङीक्की झ्यीबे ले दी धो़म्मीत्ल डोज्ये मीप्प धङ् खीत्रङ्ल थोप्केङ्गी ॱल दी को़न्ज्योक् च्यानी छङ थोप्च्ये यो़प्पल ॱसीम् च्यङ्जो़त् झ्यीन दो़च्च्यीत्। 9 ख्रीष्ट्की ॱलोप्सल मीत् नेम्ब, हुल ॱनो़म्ब ज्यक्केन् ॱसु यो़दङ् हुगोदङ् दल को़न्ज्योक् मीत् स्युगेन् बेत्। ॱनी यङ् ख्रीष्ट्की ॱलोप्से नङ्गोर्ल ॱसु थीरी दो़क्कुक्क हुगोदङ् दल यप् धङ् ॱरेबु ॱङीक्कर् स्युगेन् बेत्। 10 ख्रीष्ट्की ॱलोप्सल मीत् डीक्केङ्गी ॱलोप्स ॱयोङ्म ज्यक्केन् खीत्रङ् च्याल ॱसु युङ्गुक्क हुगो खीम्ल ठीक्न ॱनेलीन् मत् झ्यीज्यीत्। हुल ॱसुमी़ इक् मत् झ्यीज्यीत्। 11 हुल ॱसी़ ॱसुमी़ झ्यीगुक्क हुगो हुगी ङेम्बे ले दीदङ् छ्य झ्यीबल डोगेन् बेत्। 12 खीत्रङ्ल ढीन तोङ्ज्येमे केच्च्य ॱयोङ्म गज्येन् यो़त्। ॱनी यो़त्न अक्, हीगो ॱस्युगुल ॱनक्चागी झ्यीन ढीन ॱमीत् तोङ्। हज्यरङ्ल गव छ्यीम्मु युङ्ज्ये यो़प्पल ङ हुदुरङ् युङ्न खनी लप्च्ये ॱनो़बे रीगो यो़त्। 13 दम्बे भुमु नीज्यरङ्गी भीज घयेक्की हीनी नीज्यरङ्ल छ्यक्सुम् थेमु यो़दो सीन्न तोङ्गुक्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.