२ कोरीन्थी 8 - ल्होमीकोरीन्थीयाल चेन्ड दी़प्पे ढीक्ल १-२४ 1 पी़न्ज्या घयेस्सो, मासीडोनीयागी लुङ्बे छ्यो़ छो घयेत्ल को़न्ज्योक्की घन्दुक्मे थुज्यीगी छ्यीय ॱनङ बेक्क हुगो खीत्रङ्ल ॱस्यो़क्केन् हीनो। 2 उन यो़प्पे छ्यो़ छो घयेत्ल दुक्प अयेक्प नोङ्न, हुन्दुक्मे छो़त्लीन् छ्यीय झ्युङ्न अक्, रोसो गेस छ्यीम्मु झ्यीब बेत्। हीगो झ्यीनी हुब घयेत् म दीरङ् टङ्बु दुक्सी यो़त्न अक्, तीच्च्येगी छ्योल गस्सी फो़त्न, गज्येन् टेप्प बेत्। 3 हुबे रोरङ्सो़ घजो़त् च्यीक् तीत् छुगुक्क उजो़त् च्यीक् टेप्प बेत्। ॱनी हुले एक् ॱल्हक्मा टेत्न यो़क्केन् बेत्। हीगी ढीक्ल ङ पङ्बु झ्यीत् छुगो़त्। रोसो़ हुगो ॱलो़नी ॱसीम्नी फो़त्न टेप्प बेत्। 4 को़न्ज्योक्की मी चङ्म घयेत्ल दगु झ्यीच्च्येल हुबे रोसो च्याल आक् युङ्न चेन्ड दी़त्रो झ्यी सीन्न ङीत्ल स्युदेन् गन्दीक्म ज्यप्च्युङ्। 5 ॱनी ङीक्की ॱनो़बले एक् ॱल्हक्मा हुबे को़न्ज्योक्की थुल डीक्पल गोम दी हुबे रोरङ्सो़ ली़सीम् दीरङ् छङ्म चोव ज्यीन्दक्की ॱवङ्गी होक्ल युङ्ज्ये यो़प्पल च्योसोङ्। हुनी ङीक्की ॱवङ्गी होक्ल अक् युङ्ज्ये यो़प्पल ॱलीच्च्युङ्। 6 ॱनी खीत्रङ्गी घुङ्दु तीतस्की एल्लानी झ्यीन युङे गये लेगी ढीक्ल दी़च्च्येम दी जेङ् डुब झ्यीज्यीत् सीन्न तीतस् रोरङ्ल ॱङान तङेन्। 7 ॱनी म दी खीत्रङ् कुरीक् छ्य गन्दीक्म स्योक्केल्ल, तम् खेसी ॱस्यो़क्केल्ल, धो़न् ॱह घोगेल्ल, धेप्पे स्यीदङ् लङ्गेल्ल, ङीत्ल झ्यम्ब झ्यीक्केल्ल धङ् हुन्दुक् झ्यीब कुरीक्ल खीत्रङ् गस्सी झ्यीक्केल्ल ॱसोङ्दुक्। ॱनी हीगो डस्सीरङ् हुगी टो़च्च्येमे गये ले हुल अक् गस्सी झ्यीक्केल्ल थो़न् छुब झ्यीज्यीत्। 8 ॱनी हीगो म दी झ्यीत् गोज्येन् हीन् सीन्न ङे खक्को़ तोङ्गेन् मेन्। खीत्रङ्गी झ्यम्ब दी ॱङो़न्ने हीन् धङ् मेन् छो़त् तज्येगी ढीक्ल मासीडोनीयागी लुङ्बे छ्यो़ छो घयेत्न यो़प्पे धेप्प मो़बे पी दी तो़म्बेन्। 9 हज्यरङ्गी चोव ज्यीन्दक् येशु ख्रीष्ट्की थुज्यी खीत्रङ्ल ॱस्यो़च्च्ये यो़ट्टो। खोङ् एल्ला छ्युक्पु हीन्ज्यङ्, यङ् टङ्बुल झ्युङ्न युङ बेत्। हुन्दुक् झ्यीन खोङ् टङ्बुल झ्युङ्न युङे लम्नी खीत्रङ् छ्युक्पुल सो़ब बेत्। 10 हुगी ले हुगी ढीक्ल खीत्रङ्ल ठीक्क डीक्केङ्गी ढो़ च्यीक् टो़क्केन्। ननीङ् खीत्रङ्गी तीच्च्येल गोम झ्यीन युङे ले हुगो स्येन् ॱयोङ्म घयेत्ले एल्ला झ्युङ बेत्। ॱनी तीच्च्ये ॱनो़बे ॱसम्ल दी इक् एल्लारङ् झ्युङ बेत्। 11 खीत्रङ्गी एल्लानी ॱनो़न यो़प्पे ॱसम्ल हुल पीब खीत्रङ्गी घन्दुक् झ्यीन डुप् छुगो़दङ् हुन्दुक् दीरङ् झ्यीन हुगी ढो़ दी डुप् छुब झ्यीज्यीत्। 12 रङ्ल घङ् यो़प्पल पीब रङ्गी ॱसीम्नी धेप्प मो़बे फो़त्न टेप्पे लेमुल को़न्ज्योक् गुगेन् बेत्। ॱनी टो़च्च्ये मीत्न ॱनी, हुल खेरक् मीत् युङ्गेन् बेत्। 13 हीगो थोप्केन् हुबल कीप्पा युङ्ज्येल धङ् खीत्रङ् टो़क्केन् घयेत्ल दुक्पा युङे ढीक्ल मेम्बेत्। हुब धङ् खीत्रङ् च्यीनम् च्यीक् युङ्ज्ये यो़प्पल सीन्न बेत्। 14 खीत्रङ्ल हुन्दो गज्येन् यो़प्प दीगी हुबे गो़बल फेम्ब धङ् तीङ्ला हुबल यङ् गज्येन् झ्युङ दीगी खीत्रङ्गी गो़बल फेम्ब झ्युङ्न, हुनी हस्सो़त् च्यीनम् च्यीक् युङ्गेन् बेत्। 15 हील डीक्केन् ॱसुङ्रप्ल धङ्बु मन्न दी़बे ढीक्ल थो़ङ्गेन् बेत्। ॱसी़ मङा दी़दुक्क हुल ॱल्हक्मु मत् लेब बेत्। ॱसी़ नुङा दी़दुक्क हुल नुङ् मत् ढाब बेत्। (थो़म्ब १६:१८) 16 खीत्रङ्ल फेन्ज्येगी ढीक्ल ङे ॱसीम्ल स्यीदङ् लङ डस्सी तीतस्ल आक् को़न्ज्योक्की हुन्दुक् दीरङ् ॱनङ्दुक्। खोङ्ल थु छ्यी छ्यी। 17 तीतस् खीत्रङ् च्याल डोवल ङीक्की स्युव ज्यबल थी़म्ब छ्युवक् मेम्ब, तीतस् रोरङ्लरङ् मो़सी झ्युङ्न ॱलो़लङ्गी डोगेन् सीगुक्। 18 ॱनी तीतस्तङ् दल हीनी पी़न्ज्या ॱयोङ्म च्यीक् तोङ्गेन्। ॱनी हीगी पी़न्ज्या हीगी केच्च्य ॱनेम्बु ॱस्यो़प्पे लेल छ्यो़ छो कुरीक्की हुल गस्सी छोर्केन् बेत्। 19 हीगो छ्युवक् मेम्ब, चोव ज्यीन्दक्ल तो़प्प युङ्ज्ये यो़प्पल धङ् ङीक्की दगु झ्यीच्च्ये ॱनो़ब यो़प्पे ॱसीम् दी कुरीक्की ॱह घोज्ये यो़प्पे ढीक्ल हीगी झ्यम्बे चेन्ड दी च्यो़दु ङीत्तङ् दल दगुल डोज्येल छ्यो़ छो कुरीक्की हीगी पी़न्ज्या हीगो दम्न यो़क्केन् बेत्। 20 ॱनी ङीक्की हीन्दुक् झ्यीन चेन्ड गज्येन् दी़न च्यो़गेङ्गी लेल मी ॱसी़ इक् ङीब कोप् ॱमीत् छुबे ढीक्ल ङीक्की तेन्देन् झ्यीक्को़त्। 21 हीगो ङीक्की चोव ज्यीन्दक्की थोङ्सल छ्युवक् मेम्ब, मी घयेक्की थोङ्सल आक् च्यो़न् मीप्प, ॱसीम् सङ्बु युङे लेमु झ्यीक्को़त्। 22 ॱनी हुब ॱङीबुदङ् दल हीनी हज्यरङ्गी पी़न्ज्या ॱयोङ्म च्यीक् इक् तोङ्गेन्। ॱनी हीगोल ङीक्की गज्येन् नम् च्येत्न तेबेन्। हुनी हीगी धो़न् घन्डे ले झ्यीन अक्, हुल रोगी ॱसीम्नी मो़ब झ्युङ्न झ्यीक्केन् हीम्ब ङीक्की थोङ्ज्युङ्। खीत्रङ्ल हुन्दो रो ॱलो खीन यो़क्केन् झ्यीनी, हुनी ॱसुम्ब हुदु चेन्ड दी़च्च्येगी लेल मो़ब छ्यीम्मु झ्यीक्कुक्। 23 ॱनी तीतस् ङे छ्य च्यीक्की मी धङ् खीत्रङ्गी ढीक्ल खो़प्पे ङे ले च्यीक्की छ्यीट्टो बेत्। पी़न्ज्या ॱयोङ्म हुब ॱङीबु छ्यो़ छो घयेक्की छप्पुल को़न तङे मी बेत्। ॱनी हुब च्यानी ख्रीष्ट्ल तो़प्प युङ्गेन् बेत्। 24 ॱनी खीत्रङ्गी ॱसीम्ल यो़प्पे झ्यम्ब दी धङ् हुनी खीत्रङ्गी ढीक्ल ङीक्की ॱस्येप्पे तम्दो़क्की केच्च्य दी दीम्बरङ् हीम्ब छ्यो़ छो कुरीक्की ॱह घोज्येल हुल डीक्पे लेमु हीबल खीत्रङ्गी झ्यीज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.