२ कोरीन्थी 7 - ल्होमीकोरीन्थीया घयेत् ॱसीम् ज्युरल पावल् गेस २-१६ 1 ङे झ्यम्बे मी घयेस्सो, को़न्ज्योक्की हज्यरङ्ल हुन्दुक्मे छ्यो़त्तुम्गी केच्च्य ॱनङ्नी, हुनी हज्यरङ्गी ली़ धङ् ॱसीम्ल यो़प्पे चङ्ज्ये मीप्पे ढङ् घयेत् दी फङ्न को़न्ज्योक्ल ज्यीब खुर्न देत्न छ्यलु छङ्म धक्पर् युङ झ्यीदोङ्ज्यीत्। 2 ङीक्की ढीक्ल यो़प्पे खीत्रङ्गी झ्यम्ब दी छ्यीदु डोज्ये यो़प्प झ्यीज्यीत्। घन्ड हीन् सीन्न ङीक्की खीत्रङ् ॱसुल आक् मत् ओ़ब घन्ड अक् मत् झ्ये। ॱसुल आक् च्यो़न् ॱमत् तङ्। ॱसुल आक् ङीक्की स्येन्दोङ्गी ले घन्ड अक् मत् झ्ये। 3 हीगो खीत्रङ्ल ॱनोङ् लङ्दु ची़च्च्येल ङे सीक्केन् मेन्। घन्ड हीन् सीन्न ङीत् खीत्रङ्दङ् दल ॱस्यी गो़रङ् झ्युङ्, यङ् दो़त् गो़रङ् झ्युङ्न अक्, ङीक्की ॱसीम्ल यो़प्पे च्यीब झ्यम्ब दी ज्युरुव मीप्प यो़त् सीन्न एल्लादु उक् ॱस्येप्पेन्। 4 खीत्रङ्ल ङ ॱलो खीज्युङ्। ॱनी खीत्रङ्गी ढीक्ल यङ् ङल ङोम्ज्येत् एत् यो़त्। ॱलोप्स्यीक् इक् छ्यीम्मु ॱङीच्च्युङ्। दुक्प ॱनजोरङ् नोङ्न अक्, ङ गेसक्की फीको़र्त्। 5 ङीत् मासीडोनीयागी लुङ्बल ॱलीत्नी, ङीत्ल ख ख ॱसोस्सोनी दुक्प गज्येन् नोङ्न ॱमत् कीप्सी झ्युङ्। छ्यील थुक्री धङ् ॱसीम्ल खीत्रङ्गी ढीक्ल ॱसीम्दुक् झ्युङ्। 6 ॱने ॱमन्दीक्म यो़प्प च्येम्म घयेत्ल ॱलोप्स्यीक् ॱनङ्गेन् को़न्ज्योक्की ङीत्ल तीतस् युङे लम्नी ॱलोप्स्यीक् ॱनङ्ज्युङ्। 7 ॱनी तीतस् युङे हुगी ॱलोप्स्यीक् हुगो छ्युवक् मेम्ब, रोल खीत्रङ् च्यानी थोबे ॱलोप्स्यीक् दी घोनी, हुगी इक् ङीत्ल गस्सी फेन्ज्युङ्। खीत्रङ्गी ङ दो़न्दो़त् ढेम्ब झ्यीगुक् सीर, हुनी ज्यो़प्प लङ्न ॱसीम्दुक् झ्यीगुक् सीर धङ् ॱनी ङ ङो़ल गन्दीक्म छ्योरी झ्यीगुक् सीर ॱस्येत्नी, हुनी ॱसुम्ब गेस गन्दीक्म झ्युङ्। 8 ङे एल्ला ढीन तङे यीगी हुगी खीत्रङ्ल ज्यो़प्प धङ् ॱसीम्दुक् लङ्दुक्। ॱनी लङ्न अक्, ङे ॱसीम्ल हुगो ॱमत् तङ गा युङ्गो़ट्टो ॱनो़बे ॱसम्ल ॱमीत् छ्यरेत्। ङे यीगी हुगी कप्तोक् च्यीक् खीत्रङ्ल ज्यो़प्प धङ् ॱसीम्दुक् लङ ङे घोनी, हुनी ङल अक् ॱरीप्चो़त् च्यीक् ॱसीम्दुक् लङ्ज्युङ्। 9 ॱनी हुन्दो ङल गेस यो़त्। ॱनी हीगो खीत्रङ्ल ॱसीम्दुक् झ्युङ्नी, ङल गेस लङ मेम्बेत्। खीत्रङ्ल ज्यो़प्प लङ्न, हुगी ॱसीम्दुक्की खीत्रङ् ॱएङ्गी लम्नी ॱसीम् ज्युर्न युङे ढीक्ल झ्युङ्। खीत्रङ्गी ॱसीम्दुक् हुगो को़न्ज्योक्की थुल डीक्प यो़क्केन् झ्यीनी, ङीत् च्यानी खीत्रङ्ल च्यो़न् घन्ड अक् मत् युङ बेत्। 10 घन्ड हीन् सीन्न को़न्ज्योक्की थुल डीक्पे ॱसीम्दुक्की थर्वे लम्ल ॱलोक्केन् बेत्। ॱनी ॱसीम्ब ज्युर्न युङे लेमु हुगो गज्ये मेम्बेत् ॱनो़ब ॱमीत् छ्यर्केन् बेत्। ॱनी यङ् जम्बुलीङ् ङो़गी लुसे ॱसीम्दुक्की ॱस्यीवे लम्ल तोङ्गेन् बेत्। 11 को़न्ज्योक्की थुल डीक्पे ॱसीम्दुक् झ्युङ हुगी खीत्रङ्ल घन्दुक् झ्यीबे डेबु छ्याब बेक्क हुल तो़। घन्दुक्मे धेप्प छ्यीयल झ्युङ बेक्क। हुगी ङीब हुल खीत्रङ्गी मेङ्गी मेन् सीक्केल्ल झ्युङ बेत्। हुगी ङीबे ढीक्ल खीत्रङ् ॱयोङ्म घयेत् घन्दुक्मे खोङ्डोक् झ्युङ बेक्क। घन्दुक्मे ज्यीब झ्यीक्को़प्प। ङल घन्दुक्मे ढेम्ब झ्यीगो़प्प। ङ ङो़ल हुन्दुक्मे छ्योरीगी ज्यीक्प झ्युङ्न, हुल म दीरङ् छ्येप्प को़ज्ये ॱनो़ब झ्यीक्केन् बेत्। हुन्दुक् झ्यीन हुगी ढीक्ल खीत्रङ् घन्डल अक् धक्पर् झ्यीन नक्चक् मीप्पल थो़न्दुक्। 12 ङे ढीन तङे यीगी हुगो ङल ङीब झ्यीक्केन् हुबे ढीक्ल ढीब मेन्। ॱनी यङ् ङल ङीब झ्यीज्युङ् सीन्न ङे हुगी ढीक्ल ढीब अक् मेन्। ङीत्तङ् खीत्रङ्गी धेप्प धम्जीक् दी को़न्ज्योक्की ढुङ्दु खीत्रङ्गी ॱह घोज्ये यो़प्पल सीन्न ङे ढीन तङेन्। 13 ॱनी हुगी लम्नी ङीत्ल ॱलोप्स्यीक् ॱङीच्च्युङ्। ॱनी हीगो च्यीक्पी़ ॱमीत् छेप्प, तीतस्ल यो़प्पे ॱसीम्दुक् दी हुदु खीत्रङ्गी दीदु तङ्न गेस लङ्न युङ थोङ्नी, ङीत्ल अक् गेस झ्युङ्। 14 खीत्रङ्गी ढीक्ल ङे एल्ला तीतस्ल ङोम्ज्येत् ॱस्येप्पल पीब ङल हुन्दो ङु छय मीप्प झ्युङ्। ङीक्की खीत्रङ्ल ॱस्येप्पे केच्च्य घयेत् दीम्ब डस्सी ङीक्की तीतस्ल ॱस्येप्पे ङोम्ज्येत् हुगो ओक् दीम्बल झ्युङ बेत्। 15 तीतस् हुदु ॱलीबे यङ्ल खीत्रङ् घयेत् ज्यीबे, दर्कीन् दर्कील्ल घन्दुक् झ्यीन तीतस्ल थोङ् झ्यीब बेक्क, घन्दुक् झ्यीन खीत्रङ् घयेत् हुगी खल नेन्न युङ बेक्क हुगो ढेन्सो़ झ्यीन रोगी खीत्रङ्ल दो़न्दो़त् चीदुङ् छ्यीया झ्यीगुक्। 16 खीत्रङ्ल ङ ॱलो खीज्युङ्। हील ङल ॱसीम् गव यो़त्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.