२ कोरीन्थी 6 - ल्होमी1 को़न्ज्योक् धङ् ङीत् ले च्यीक्की छ्यीट्टो झ्यीनी, खीत्रङ्ल खोङ्गी ॱनङे थुज्यी खीत्रङ्गी घो ॱमीत् छ्यो़त्ल ॱमत् तोङ्ज्यीत् सीन्न ङीत् ॱलोप्स ज्यक्केनो। 2 हीगी ढीक्ल खोङ्गी हीन्दुक् ॱसुङ्गेन् बेत्। थुज्यीगी धी़गी यङ्ल रङ्ल ङे रङ्गी तम्ल लेम्बु ॱलोक्पेन्। थर्वे धी़गी यङ्ल ङे रङ्ल दगु झ्यीबेन् सीर यो़क्केन् बेत्। (यशैया ४९:८) ॱनी तेदे को़न्ज्योक्की थुज्यीगी धी़ धङ् छी थर्वे ङीन् दी ह हुन्दो बेत्। पावल्की मीजील झ्युङे दुक्प घयेत् ३-१० 3 ङीक्की स्यप्च्यी़गी लेल मी ॱसी़ इक् ङीब कोप् छुज्ये मीप्पल ङीक्की मी ॱयोङ्गी लम्ल भर्च्येत् ॱमीत् तोङ यो़त्। 4 घन्डरङ् झ्युङ्न अक्, ङीत् को़न्ज्योक्की ॱयोक्पु ॱङो़न्ने हीम्बल थो़ङ्गो़त्। गुर् थेक्पल, छ्यी मी दुक्प अयेक्प तङल, दुक्स्यी नोङल, घाबे कप्ल, 5 दुङे यङ्ल, चो़ल्ल ॱस्योरल, ड लोङ्न हुट्ट युङल, कले च्यो़प्पल, ॱङीत्मीत्ल दो़प्पल, तोबल, 6 ॱसीम् चङ्म खुरल, धो़न् ॱस्यीबल, ङङ्रीन् झ्यीप्पल, गये ले झ्यीप्पल, धम्बे थुदङ् मत् ढेब युङल, ॱसीम्बे यीक्नी युङ् गोगेङ्गी झ्यम्बल, 7 दीम्बे केच्च्य ॱस्यो़प्पल, को़न्ज्योक्की ॱस्यीक् युङल, लक्प ॱये धङ् ॱयेल्ल ढङ्बु हीम्बे छो़न्ज्य ज्येम्बल धङ् हुन्दुक् झ्यीब ॱनजो गुजो घन्दुक् झ्यीबलरङ् हीन्न अक्, ङीत् को़न्ज्योक्की ॱयोक्पु ॱङो़न्ने हीम्बल थो़ङ्गो़त्। 8 ॱनी हीगो छ्युवक् मेम्ब, यरीगी ङीत्ल तो़क्केन् बेत्। यरीगी ॱमो़त्मु ज्यक्केन् बेत्। यरीगी तम् ॱनेम्बा लप्केन् बेत्। ॱनी यरीगी तम् ॱमत् ॱनेम्बा लप्केन् बेत्। ङीत् म दी दीम्बे मी हीन्। ॱनी हीन्ज्यङ्, ङीत्ल ॱयोङ्गोर् ज्यक्केङ्गी मी हीम्ब ॱसम्गेन् बेत्। 9 यङ् यरीगी ङीत्ल थोङ् छ्यीम्मु ॱसम्गेन् बेत्। यङ् यरीगी ङीत्ल घन्ड अक् मेम्ब हीम्ब ॱसम्गेन् बेत्। ॱस्यीवल छीगङ् थुक्च्युङ्। ॱनी हीन्न अक्, ङीत् ॱसो़ज्युङ्। को़न्ज्योक्की छर्की च्येच्च्युङ्। ॱनी हीन्न अक्, ॱसो़च्च्ये दी ॱसेत्मोङ्। 10 ॱसीम्ल दुक्ङा झ्युङ्। ॱनी हीन्न अक्, छीगङ् गेस झ्यीक्को़त्। ङीत् टङ्बु हीन्न अक्, ङीक्की ॱयोङ्मा छ्युक्पुल सोगो़त्। ङीत्ल घन्ड अक् मीप्प डस्सी यो़त्न अक्, ङीत्ल म दी कुरीक् यो़त्। 11 कोरीन्थीया घयेस्सो, खीत्रङ्ल ङीक्की ॱसङ्सोङ् मीप्प, ङीक्की ॱसीम्ल घङ् यो़प्पे केच्च्य घयेत् कुरीक् तो़न्न ॱस्येप्पेन्। 12 ङीक्की खीत्रङ्ल ॱसीम्बे यीक्नीरङ् च्यीब झ्यम्ब खुर्न आक्, खीत्रङ्गी ङीत्ल हुगो डस्सीगी ॱसीम् ॱमीत् खुरेत्। 13 पबे भीजल झ्यीब डस्सी ङे खीत्रङ्ल हीगो सीक्को़त्। ङीक्की झ्यम्बे लेन् दील खीक्की ङीत्ल घन्ड दी यो़प्प? ॱनेक्स्यीङ् च्यीक्की होक्ल १४-१८ 14 छ्य मीत् स्योक्केन्दङ् दल मुज्यीक् दज्यीक् झ्यीन खीत्रङ् ॱनेक्स्यीङ् च्यीक्की होक्ल मत् स्युक्च्यीत्। घन्ड हीन् सीन्न ढङ्बु झ्यीक्केन्दङ् ङीब झ्यीक्केन् डगो़प्प बेक्कक् ॱनी? मेङ्ग धङ् मेन्नक् छुङ्गो़प्प बेक्कक् ॱनी? 15 ख्रीष्ट्तङ् दी़त् बेलीयाल् थी़ङ्गो़प्पेक्कक् ॱनी? छ्य स्योक्केन्दङ् छ्य मीत् स्योक्केन् डीक्को़प्प बेक्कक् ॱनी? 16 को़न्ज्योक् स्युसे छ्यो़गङ्दङ् कु घयेत् घन्दुक् दी झ्यीन डीक् छुगेन्? घन्ड हीन् सीन्न हज्यरङ्गी सी़ हीगो ॱसोम्बु हीम्बे को़न्ज्योक् स्युसे छ्यो़गङ् बेत्। हीगी ढीक्ल को़न्ज्योक्की हीन्दुक् ॱसुङ थो़ङ्गेन् बेत्। ङ हीगी मी हीबे घुङ्दु देत्न हीबदङ् मुल डोगेन्। ङ ॱनी हीबे को़न्ज्योक् धङ् हीब ङे मीस्सीर्ल युङ्गो़त्। (लेवी २६:१२) 17 हीगो झ्यीनी चोव ज्यीन्दक्की हीन्दुक् ॱसुङ्गेन् बेत्। छ्यी मी हुन्दुक् झ्यीब घयेत्तङ् ढेन भीन दो़च्च्यीत्। चङ्ज्ये मीप्पे ढङ् घयेत्नी भीन दो़च्च्यीत्। हुनी ङ च्याल युङल ॱसुमी़ थोप्केन् बेत्। 18 हुनी खीत्रङ्गी यप् दी ङ हीम्ब धङ् खीत्रङ् ङे भु भुमु हीम्बल युङ्गेन् बेत् सीन्न ॱवङ् की़न् च्येम्मे चोव ज्यीन्दक्की ॱसुङ्गुक्। (यशैया ५२:११) |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.