२ कोरीन्थी 5 - ल्होमीहन्देङ्गी सी़ धङ् तीङ्मागी सी़ १-१० 1 ॱस जम्बुलीङ्न यो़प्पे घुर् डस्सी झ्यीबे ङीक्की सी़ हीगो ॱरम्न न ॱनी, इगी तेङ् यी़दु कोलीमी लक्पे मत् सो़ब, फु तक्केङ्गी खीम् को़न्ज्योक्की ङीत्ल ॱनङ्गेन् हीम्ब ङीत्ल ॱस्यो़च्च्ये यो़त्। 2 ॱनी तेङ् यी़गी हुगी खीम् हुगो घो़ घो़म्बदङ् छ्येत्मीत् घो़ङ्गीन् थेप्पे, ङीत् हीगी घुर् हील यो़प्पे यङ्ल ॱहुवी ॱहुवी ॱस्योर्कुक्। 3 ङीक्की हुगो घो़न्नी ॱनी, इगीदु ङीत् सी़मीत् मीत् युङ्गेन् बेत्। 4 हीगी घुर् हील यो़प्पे यङ्ल खेदे चीर डस्सी हज्यरङ् ॱहुवी ॱहुवी ॱस्योर्केन् बेत्। ॱनी हीगो घो़ पीक्प डस्सी हज्यरङ्गी हीगी सी़ हीगो ॱलो़ तङ् तोङ् गो़ न? ॱनो़बे लेमु मेम्ब, हीगी ॱस्यी डोगेङ्गी सी़ हीगो ॱमीत् ॱस्यीगेङ्गी छी तक्पल ज्युर्च्ये यो़प्पल तेङ् यी़गी सी़ हुगो लीङ्गीन् थेप्पे, हीगी सी़ हील यो़स्स्यीङ् भोर्ल ॱहुवी ॱहुवी ॱस्योर्कुक्। 5 हुगी ढीक्ल को़न्ज्योक्की हज्यरङ् सो़न, हुगो ॱङो़न्ने युङ्ज्येल हज्यरङ्ल धम्बे थु बयीनाल ॱनङ्न यो़क्केन् बेत्। 6 हुगो झ्यीनी ङीत् छीगङ् ॱलो दीन्दीक्म झ्यीन दो़क्को़त्। हुन्दो हीगी सी़ हील दो़स्स्यीङ् भोर्ल चोव ज्यीन्दक्तङ् कङ्ज्यीक्ल मीप्प, भीन दो़त् गो़ ॱस्यर्केन् हीम्ब ङीत्ल ॱस्यो़च्च्ये यो़त्। 7 ॱनी हुगो ॱमीक्की थोङ्गेङ्गी लेमुल तेन डोगेन् डस्सी मेम्ब, छ्य स्यक्पे लुनी हज्यरङ् डो गोगेन् बेत्। 8 हील ङीत् ॱलो दीन्दीक्म झ्यीन दो़क्को़त्। ॱनी स्येन् झ्युङ्न, हीगी सी़ हीगोदङ् ढेनी, इगीदु चोव ज्यीन्दक्तङ् कङ्ज्यीक्ल दो़क्कीन् थेप्पा दुक्। 9 ॱनी म दी ङीत् हीगी सी़ हील यो़प्पे यङ्लरङ् हीन्, यङ् हीगोदङ् ढेन, इगीदु यो़प्पलरङ् हीन्न अक्, खोङ् गुवे लेमु झ्यीच्च्ये ॱनो़ब मेन्द, ॱमीत् खुर यो़त्। 10 घन्ड हीन् सीन्न हज्यरङ् कुरीक् ठीम् च्यो़स्सल ख्रीष्ट्की ढुङ्दु ॱलीत् गो़ ॱस्यर्केन् बेत्। ॱनी हीगी सी़ल यो़प्पे कप्ल हज्यरङ् रीदङ् रीगी गा झ्यीबल गागी लेन्, आक्पा झ्यीबल आक्पागी लेन् खोङ्गी ॱनङ्गेन् बेत्। को़न्ज्योक्की डीक्च्या जेप्पे केच्च्य ११-२१ 11 चोव ज्यीन्दक्ल ज्यीब खुर्न दो़त् गोगेन् हीम्ब ङीक्की ॱह घोनी, मी कुरीक्ल छ्य स्योक्तु ची़त् छुब झ्यीक्को़त्। ङीत् घन्दुक् झ्यीब हीम्ब हीगो को़न्ज्योक्ल कुरीक् ॱस्यो़च्च्ये यो़क्केन् बेत्। ॱनी खीत्रङ्गी इक् ॱसीम्बे नङ्ल ॱह घोगो़ट्टो ॱनो़बे रीगो यो़त्। 12 ङीक्की फीच्च्य यङ् तम्दो़त् ॱस्यो़क्केन् मेम्ब, ङीक्की ढीक्ल खीत्रङ्ल ङोम्ज्येत् युङे ढीक्ल हीन्। खीत्रङ्ल ङोम्ज्येत् हुगो झ्युङ्न ॱनी, ॱसीम्ल ॱमीत् तगेन् छ्यी छ्यलुल तेन, तम्दो़त् ॱस्यो़क्केङ्गी मी घयेत् हुबल खीत्रङ्गी लेम्बु ॱलोक् ॱस्यीगेन् बेत्। 13 ॱनी ङीत् ॱनोनर डस्सी थोङ्गो़त्न ॱनी, हुगो को़न्ज्योक्की ढीक्ल ॱनोय बेत्। ॱनी यङ् ङीत् ढेम्ब ॱसाबोक्म च्येम्म हीन्न ॱनी, हुगो खीत्रङ्गी ढीक्ल बेत्। 14 मीरङ् च्यीक् मी छङ्म थम्ज्येक्की ढीक्ल ढोङ हीम्बे लम्नी मी कुरीक् ॱस्यी छर डस्सील ॱसोङ बेत्। हीगो ॱङो़न्ने हीम्ब ङीक्की ॱह घोन, देङ् खीन यो़त्। हीगो झ्यीनी ङीत् ख्रीष्ट्की झ्यम्बे ॱवङ्गी होक्ल देत्न ले झ्यीक्को़त्। 15 खोङ् कुरीक्की ढीक्ल ढोङ्ज्येगी धो़न् दी मी ॱसु ॱसुल छी थोप्न, ॱसोम्बुल झ्युङ् यो़दङ् हुब घयेक्की मीजी दी रोरङ्सो़ युङ्ज्यी़गी लेमुल मेम्ब, रोरङ्सो़ धो़ल्ल ढोङ्न हुनी यङ् को़न्ज्योक्की ॱसोम्बुल ॱलोङ्न यो़क्केन्, खोङ्गी ढीक्ल घो छ्यो़प्प झ्यीन युङ् गोगेन् बेत्। 16 ह ङीक्की कोलीमीगी लेमु डस्सी झ्यीन मी ॱसुल आक् गस्स्येङ् तेन नम् ॱमीत् च्यो़प्प यो़त्। एल्ला त ङीक्की ख्रीष्ट्ल आक् कोलीमीगी लेमु डस्सी झ्यीन गस्स्येङ् तेन नम् च्येप्पेन्। ॱनी ह हुगो डस्सी नम् ॱमीत् च्यो़प्प यो़त्। 17 मी ॱसु ख्रीष्ट्तङ् मत् ढेब दो़क्कुक्क हुगो मी ॱसम्ब छ्यादु ची़प्प डस्सी बेत्। हुगी ॱएम्मागी मी ॱङीङ्ब दी येन खुर्नी हुगो ॱसम्बल झ्युङ्न युङ्गेन् बेत्। 18 हीगो कुरीक् को़न्ज्योक् च्यानी झ्युङ बेत्। खोङ्गी हज्यरङ् घयेत् ख्रीष्ट्की लम्नी खोङ् रोरङ्दङ् डीक्च्या जेत्न यो़क्केन् बेत्। ॱनी हस्सो़त् हीगी डीक्च्यागी स्यप्च्यी़गी लेल ङीत् को़ज्युङ्। 19 हीगी धो़न् दी कोलीमी घयेक्की ङीबे चीस्यी तङ्न, हुल खोङ्गी लेन् ॱमत् च्येब, बोर डीक्च्ये यो़प्पल खोङ् रोरङ्गीरङ् ख्रीष्ट्की लम्नी डीक्च्या जेत्न युङ बेत्। हीगी डीक्च्या जेप्पे केच्च्य ॱस्यो़क्केन् दील क ङीत् को़ज्युङ्। 20 ङीत् ख्रीष्ट्की छप्पुल को़न यो़त्। को़न्ज्योक्की ङीक्की लम् ज्यी़त्नी मी घयेत्ल ॱस्यो़क्केन् बेत्। खीत्रङ् को़न्ज्योक्तङ् छ्यम्बोक्म डीक्च्ये यो़प्प झ्यी सीन्न ख्रीष्ट्की छप्पुल ङीत् ॱलोप्स हीगो ज्यक्केनो। 21 को़न्ज्योक् च्येन्नी युङे ॱनम्बर् धक्प दील हज्यरङ् ख्रीष्ट्की लम्नी थो़न्ज्ये यो़प्पल ख्रीष्ट्ल दीक्पे ज्यी़त् मीत्न अक्, खोङ् हज्यरङ्गी छप्पुल दीक्च्येन् हीम्बल सो़ब बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.