२ कोरीन्थी 4 - ल्होमीजमे नङ्ल यो़प्पे तीर् १-१८ 1 को़न्ज्योक्की थुज्यी ॱनङे लम्नी ङीत् खोङ्गी स्यप्च्यी़ ज्युक्केङ्गी लेल को़ज्युङ्। हुगो झ्यीनी ङीक्की ॱअयु छ्यक्प मीप्प झ्यीक्को़त्। 2 केत्मीक्की ङु छागी ले घयेत्, ॱयोज्यी़ ठम्ज्यी़गी ले धङ् को़न्ज्योक्की ॱसुङ्रप् ॱहेन्ज्योक्प ॱस्यो़क्केङ्गी ले घयेत् ङीक्की फङ्न स्यक्पेन्। बोर को़न्ज्योक्की ढुङ्दु सङ् ङेन् नम् च्यो़त् ॱस्यीगेन्, मी रीदङ् रीगी ङीक्की केच्च्य दी दीम्ब हीम्ब ॱह घो छुज्येल ङीक्की मी घयेत्ल केच्च्येल्ल तो़न्न ॱस्यो़क्को़त्। 3 ङीक्की ॱस्यो़क्केङ्गी केच्च्य ॱनेम्बु हील योले कक्न यो़प्प डस्सी थोङ्गो़त्न ॱनी, हुगो खरप्ल डोगेन् घयेत् दीबेरङ् थोङ्गेन् बेत्। 4 हुन्दुक् झ्यीब छ्य मीत् स्योक्केन् घयेक्की ॱसीम्बे ॱमीक् दी हीगी जम्बुलीङ्गी ॱल्ह सीक्केन् दी़त् हुगी कक्न स्यक्न यो़क्केन् बेत्। हुगो झ्यीनी को़न्ज्योक्तङ् डगेन् ख्रीष्ट्की तो़त्वङ्गी केच्च्य ॱनेम्बी़ मेङ्ग पेक्प दी हुबे ॱमीत् थोङ्गेन् बेत्। 5 ङीक्की ङीत्रङ्गी ढीक्की केच्च्य मेम्ब, चोव ज्यीन्दक् दी ॱनी येशु ख्रीष्ट् बेत् सीर धङ् ङीत् येशुगी ले झ्यीन खीत्रङ्ल स्यप्च्यी़ ज्युक्केन् हीन् सीरे केच्च्य ॱस्यो़क्को़त्। 6 मेन्नक्ल मेङ्ग युङ स्योक्च्यीत् सीन्न को़न्ज्योक्की ॱसुङ बेत्। (छ्यारप् १:३) ॱनी हुन्दुक् ॱसुङ्गेन् खोङ्गी तो़प्पे ओ़त् दी ख्रीष्ट्की स्यारेनी थो़न्न युङ बेत्। ॱनी हुगो ङीक्की ॱसीम्ल आक् ॱसल्च्ये यो़प्पल सीन्न ङीक्की ॱसीम्ल खोङ्गी मेङ्ग पेक्च्युङ्। 7 ङीत् च्यानी थो़न्दोक्पे यम् छेम्मे ॱस्यीक् छ्यीम्मु हुगो ङीत् च्यानी मेम्ब, हुगो को़न्ज्योक् च्यानी थो़म्ब हीम्ब कुरीक्की ॱह घोज्ये यो़प्पल ङीत्ल ॱसल्न युङे तीर् हुगो जमे ॱनो़च्च्ये नङ्ल ॱलुक्न यो़क्केन् बेत्। 8 ख ख ॱसोस्सोनी ङीत्ल च्युर्तु युङ्गुक्। ॱनी हीन्न अक्, ङीत् नम्ल अक् ॱमीत् छ्युर यो़त्। गो थोम्दु युङ्गुक्। ॱनी हीन्न अक्, ॱअयु छ्यक्प मीत् युङ यो़त्। 9 मी ॱयोङ्गी दुक्प अयेक्प घजो़त् तङ्न आक्, को़न्ज्योक्की ङीत् नम्ल अक् ॱलो़ ॱमीत् तोङ यो़त्। दुङ्न टीन आक्, ॱस्यीय त ङीत् ॱस्यीमोङ्। 10 येशु ढोङ डस्सी ङीत् इत् घल फीन्न आक्, ह त ॱसो़क्को़ट्टो ॱनो़ब छ्यर्न डोगो़त्। ॱनी हीगो येशु ॱसोम्बु यो़प्प हीम्ब कुरीक्की ॱह घोज्येल ङीत् ॱमत् ॱस्यीय हीगी तो़ङ्गो़त्। 11 ॱस्यी डोगेङ्गी ङीक्की सी़ हीनी येशु ॱसोम्बु यो़प्प हीम्ब कुरीक्की ॱह घोज्येल येशुगी ढीक्ल ङीत् हुन्दो ॱसोम्बु यो़च्च्यङ्, ॱस्यीवे खल टेत्न यो़त्। 12 हीगो झ्यीनी ङीक्की घुङ्दु ॱस्यीवे ले युङ्गेन् बेत्। हुनी खीत्रङ्गी घुङ्दु छीवे ले डुप्न युङ्गेन् बेत्। 13 ॱसुङ्रप्ल ढीब थो़ङ्गेन् बेत्। छ्य स्यक्पे लम्नी ङे केच्च्य ॱस्येप्पेन्। (ॱसुङ्रप्की गुल्लु ११६:१०) ॱनी ङीक्की छ्य स्यक्प दी इक् हुगो डस्सीरङ् झ्यीनी, ङीक्की केच्च्य ॱस्यो़क्को़त्। 14 घन्ड हीन् सीन्न चोव ज्यीन्दक् येशु ढोङ्नरनी ॱसोम्बुल ॱलोङ्गेन् को़न्ज्योक्की ङीत् इत् खोङ्दङ् कङ्ज्यीक्ल येशु डस्सीरङ् ॱसोम्बुल ॱलोङ्न खीत्रङ्दङ् कङ्ज्यीक्ल खोङ् झ्यीस्सल ठीक्केन् बेत्। हीगो ङीत्ल गन्दीय ॱस्यो़च्च्ये यो़त्। 15 ङीक्की मीजील घङ् झ्युङ हुगो कुरीक् खीत्रङ्ल फेन् थोज्येगी ढीक्ल बेत्। मी मङाल को़न्ज्योक्की थुज्यी दी इक् मङारङ् ॱनङ्नी, को़न्ज्योक्ल तो़प्प युङ्ज्येल यस्सो कुट्टीन् दी इक् हरुङ् मङ्दु पुगेन् बेत्। 16 हुगो झ्यीनी ङीत्ल ॱअयु ॱमीत् छ्यक्प यो़त्। ङीक्की सी़बु दी घी़त्न योक्तु योक्तु ॱसोङ्न आक्, ॱसीम्ल यङ् ङीन् रीम फो़स्स्यी ॱस्यीक् ॱङीत्न गदु डोगुक्। 17 हुन्दो ॱरीप्चो़त् च्यीक्की ढीक्ल नोङे दुक्प घयेत् हीगो नन्दक्की छ्यीय मेम्बेत्। ॱनी हीगो ङीक्की गुर्न युङ्न ॱनी, तीङ्ला फुगी ढीक्ल थोप्केङ्गी तो़प्प दी हुले गज्येङ्गी ज्येबा युङ्गेन् बेत्। 18 ङीक्की हुन्दो थोङ्गेङ्गी ढे घयेत्ल मेम्ब, ॱमीत् थोङ्गेङ्गी ढे घयेत्ल ॱसीम्बे तगीन् यो़त्। घन्ड हीन् सीन्न हीगी थोङ्गेङ्गी ढे घयेत् हीगो फु ॱमीत् तक्केन् बेत्। ॱमीत् थोङ्गेङ्गी ढे घयेत् हुगो फु तक्प युङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.