२ कोरीन्थी 2 - ल्होमी1 ङ हुदु युङ्न, खीत्रङ् फीच्च्य यङ् ॱसीम्ब न डोगो़ट्टो ॱनो़ज्युङ्। हुगो झ्यीनी बोर ङ मत् युङ गा युङेत् ॱनो़बे ॱसम्ल तङेन्। 2 ङे खीत्रङ्गी ॱसीम्ब नदु ची़त्न ॱनी, हुनी ङल ॱसीम्ब गदु ची़क्केन् दी यङ् ङे नदु ची़प्प खीत्रङ् मेन्द, ॱयोङ् ङल ॱसु दी यो़प्प ॱनी? 3 हुगो झ्यीनी ङ मत् युङ, ङे छप्पुल एल्ला हुगी यीगी हुगो ढीन तङेन्। ङल ॱसीम् गदु ची़क्केन् खीत्रङ् च्याल ङ युङ्न ॱनी, हुगी यङ्ल खीत्रङ्गी ङे ॱसीम् नदु ची़क्को़ट्टो ॱनो़नी, ङ मत् युङ देप्पेन्। ङल घन्डे गेस युङ्गो़दङ् हुगोल खीत्रङ् ॱअङ् गेस युङ्गेन् बेत् ॱनो़बे देङ्जो़त् यो़त्। 4 ङे एल्ला तङे यीगी हुगो ङ ॱसीम् च्योय धङ् ॱसीम् दुक्पे ॱमीक्च्यु फीक्कीन् फीक्कील्ल ढीन तङेन्। हुगो ङे खीत्रङ्गी ॱसीम्ब नदु ची़च्च्येल ढीब मेम्ब, ङे खीत्रङ्ल घन्दुक्मे झ्यम्ब छ्यीय यो़प्प बेक्क हुगो ॱह घोज्ये यो़प्पल सीन्न ढीब हीन्। ङीब धक्तु ची़प्पे ढीक्ल ५-११ 5 खीत्रङ्गी उन ॱसीम्ब नदु ची़क्केङ्गी केच्च्य हुगी ङल छ्युवक् मेम्ब, खीत्रङ् ॱअङ् अच्च्येत् न यो़ट्टो। ॱनी हीन्न अक्, हीले ॱल्हक्मा ङ मीत् सीर्। 6 ॱनी खीत्रङ् गज्येङ्गी म दी हुगोल छ्येप्प केब बेत्। ह हुले ॱल्हक्मा ॱमत् को़ज्यीत्। 7 बोर हुगोल धक्तु ची़त्न हुल ॱलोप्स्यीक् टो़च्च्यीत्। स्येन् हुगो ॱसीम्ब नये दुक्पल भीङ्गेन् बेत्। 8 हुगो झ्यीनी खीत्रङ्गी हुल यो़प्पे झ्यम्ब दी हुगी ॱह घो छुज्येल झ्यम्ब झ्यीज्यीत् सीन्न ॱलोप्स ज्यक्केन् हीनो। 9 खीत्रङ् घयेक्की ङे ॱङाबे केच्च्य घयेत् दील नेङ्गो़दङ् मीत् नेङ्गो़दङ् ॱनो़न नम्लीङ् तज्येगी ढीक्ल ङे यीगी हुगो ढीन तङेन्। 10 खीत्रङ्गी ॱसुल धक्तु ची़क्को़दङ् ॱनी हुल ङे एक् धक्तु ची़त् छुबेत्। धक्तु ची़च्च्येमे ढङ् घयेत् ङे धक्तु ची़त् छरेन्। हुगो खीत्रङ्ल फेन्ज्येल धङ् 11 शैतान् हुल लाजीन् ॱङीच्च्ये मीप्पे ढीक्ल ख्रीष्ट्की ढुङ्दु ङे धक्तु ची़प्पेन्। घन्ड हीन् सीन्न शैतान्गी झ्यी़ घयेत् ङीत्ल ॱस्यो़च्च्ये यो़त्। ॱस्यीवे ढीम धङ् छीवे ढीम १२-१७ 12 ख्रीष्ट्की ढीक्की केच्च्य ॱनेम्बु ॱस्यो़त्तु ङ त्रोआस् सार्ल फीम्बेन्। ॱनी हुदु ॱस्यो़त् छुज्ये यो़प्पल ङल चोव ज्यीन्दक्की गोच्च पीक्न स्यक्तुक्। 13 ॱनी हीन्न अक्, हुदु ङे पी़न्ज्या तीतस् ॱमत् ठेप्पल ङल ॱसीम् कीप्च्ये मीप्प झ्युङ्। हुनी ङे उन यो़प्पे मी घयेत्ल खीत्रङ्सो दो़त्। ङ ह डोगेन् सीन्न मासीडोनीयागी लुङ्बल फीम्बेन्। 14 को़न्ज्योक्ल थु छ्यी। घन्ड हीन् सीन्न ॱमक् थुक्सनी ॱमक्मी घयेत् ज्येन युङदङ् छ्येत्मीत् ख्रीष्ट्तङ् मत् ढेबल ङीत् ज्यला थो़म्ब दी कुरीक्की ॱह घोज्ये यो़प्पल को़न्ज्योक्की ङीत् छीगङ् ठीक्कुक्। ङीक्की खोङ् ङु ॱस्यीबे केच्च्य हुगो ढीम स्यीम्बो़त्म ॱहीक्केन्दङ् छ्येत्मीत् ङीत् च्यानी घल अक् धर्च्ये यो़प्पल खोङ्गी टोम्गेन् बेत्। 15 घन्ड हीन् सीन्न थर्वे लम्ल युङ्गेन् घयेत् धङ् खरप्ल डोगेन् घयेक्की घुङ्दु को़न्ज्योक्ल ख्रीष्ट्की पुगेङ्गी पो़गर्की पो़ डस्सी ङीत् हीन्। 16 हीगो खरप्ल डोगेन् घयेत्ल ॱनी ॱस्यीवल तोङ्गेङ्गी री़रीगी ढीमल धङ् यङ् थर्वे लम्ल डोगेन् घयेत्ल ॱनी छी थोप्केङ्गी छीवे ढीम स्यीम्बोक्म हीम्बल डोगेन् बेत्। ॱनी हीगी ले हीगो झ्यीक्केल्ल ओ़ब ॱसु यो़दङ्? 17 को़न्ज्योक्की ढीक्ल मी गज्येङ्गी छोङ् डस्सी झ्यीन रोरङ्सो़ युङ्ज्यी़ तेन तम् ॱस्यो़क्केन् बेत्। ॱनी ङीत् हुब डस्सी मेम्ब, को़न्ज्योक्की को़बे मी झ्यीनी, खोङ्गी ढुङ्दु ङीक्की ॱसीम् चङ्म खुर्न ख्रीष्ट्की ॱयोक्पु झ्यीन ॱस्यो़क्केन् हीन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.