२ कोरीन्थी 13 - ल्होमी1 खीत्रङ् च्याल ङ हन्देन् एन् युङ्गेन् हीगोदङ् लेम्म ॱसुम् छीगो़त्। ङीब झ्यीब धङ् मत् झ्यीब धक्पर् हीम्ब ॱह घोज्येल ठीम्सदु पङ्बु ॱङीदङ् झ्युङ्न हुले ॱल्हक्मा गो़गेन् बेत् सीर ॱसुङ्रप्ल थो़ङ्गेन् बेत्। (ठीम्लु १९:१५) 2 खीत्रङ् च्येन्दु थङ्म तीङ्मा युङ्न दो़प्पे यङ्ल ङे ॱस्येत्न स्यक्पेन्। ॱनी हुन्दो ओक् हीगोरङ् ॱस्यो़क्केन्। हन्देन् ङ खीत्रङ् च्याल युङ्नी, उन एल्लानी दीक्प झ्यीन युङ्गेन् घयेत् धङ् उन ॱयोङ्म घयेत्ल थम्ज्येत् झ्योङ् तोङ्गेन्। 3 घन्ड हीन् सीन्न खीत्रङ्गी ङे लम्नी ख्रीष्ट्की केच्च्य ॱस्यो़क्को़दङ् न ॱमीत् ॱस्यो़क्को़दङ्? सीन्न सीगुक्। हुगी यङ्ल हुदु खीत्रङ् च्येन्दु खोङ् ज्यीक्च्ये मीप्प डस्सील मेम्ब, ज्यीक्पोक्म यो़प्प हीम्ब खोङ्गी ङे लम्नी तो़ङ्गेन् बेत्। 4 खोङ् ज्यीक्च्ये मीप्प यो़प्पे कप्ल खोङ् कुरुस्ल ताब बेत्। ॱनी हीन्न अक्, को़न्ज्योक्की ॱस्यीक्की यङ् खोङ् ॱसोम्बुल ॱलोङ्न यो़क्केन् बेत्। हुगो डस्सी खोङ्दङ् मत् ढेब यो़क्केन् झ्यीनी, ङीत् इत् ज्यीक्च्ये मीप्प यो़त्। ॱनी हीन्न अक्, खीत्रङ्गी घुङ्दु स्यप्च्यी़गी ले झ्यीप्पल ङीत् इत् को़न्ज्योक्की ॱस्यीक्की ख्रीष्ट्तङ् कङ्ज्यीक्ल ॱसोम्बुल सो़न यो़क्केन् बेत्। 5 खीत्रङ् दीम्बरङ् छ्य स्योक्केन् हीन् धङ् मेन् रङ्गी रङ्ल नम् च्येत्न छो़त् तो़। ख्रीष्ट् येशु खीत्रङ्गी नङ्न युङ्न यो़प्प हीम्ब खीत्रङ्गी ॱह घो यो़ट्टो। स्येन् हुगो ॱह मत् घोन ॱनी, हुल खीत्रङ् फम् छुगेन् बेत्। 6 ङीत्ल घङ् झ्युङे छो़त्लीन् घयेत्ल ङीत् ज्यला थो़म्ब हीम्ब खीत्रङ्गी ॱह घो यो़ट्टो ॱनो़बे रीगो ङल यो़त्। 7 खीत्रङ्गी मत् ओ़बे ढङ् घन्ड अक् झ्यीच्च्ये मीप्पे ढीक्ल ङीक्की को़न्ज्योक्ल ॱसुव तोप्को़त्। हीगो ङीत्ल झ्युङे छो़त्लीन् घयेत्ल ङीत् ज्यला थो़म्ब हीम्ब कुरीक्की ॱह घोज्येल मेम्बेत्। बोर ङीत् हुगी छो़त्लीन् हुल फम्नर डस्सी झ्युङ्न अक् झ्युङ्। म दी गो़स्योल खीत्रङ्गी ढङ्बी़ ले झ्यीच्च्ये यो़प्पे ढीक्ल हीन्। 8 दीम्बे केच्च्यल बोर ङीक्की दगु झ्यीत् छुगेन् बेत्। थङ्गक् झ्यीत् ॱमीत् छुगेन् बेत्। 9 ङीत् ज्यीक्च्ये मीप्प यो़त्न अक्, खीत्रङ् ज्यीक्पोक्म थो़न्न ॱनी, ङीत्ल गव युङ्गुक्। ॱनी खीत्रङ् ओङ्बु छङ्देन् ॱलीच्च्ये यो़प्पल ङीक्की ॱसुव तप् तब झ्यीक्को़त्। 10 चोव ज्यीन्दक्की ङल ॱवङ् ॱनङ्न यो़त्। ॱनी हीगो खीत्रङ् घयेत् मीत्तल तोङ्ज्येल मेम्ब, सोगो़त् तोङ्ज्येगी ढीक्ल बेत्। ॱनी ङ हुदु युङ्नी, खीत्रङ्ल ङे हीगी ॱवङ् हीगो झ्योङ्बोक्म तोङ् मीत् गो़बल हीगी यीगी हीगो एल्ला ढीन तोङ्गो़त्। 11 ह स्युक् थदु पी़न्ज्यासो गेस झ्यीज्यीत्। ओङ्बु छङ्देन् ॱलीब झ्यीज्यीत्। च्यीक्तङ् च्यीक्ल ॱलोप्स्यीक् टो़त्री चीज्यीत्। ॱसीम् च्यीक् ली़ च्यीक् झ्यीन दो़च्च्यीत्। छ्यम्बोक्म झ्यीन दो़च्च्यीत्। हीनी क झ्यम्ब धङ् स्यीव ॱनङ्गेङ्गी को़न्ज्योक् खीत्रङ्दङ् दल स्युगेन् बेत्। 12 च्यीक्तङ् च्यीक्ल ॱसीम् चङ्म खुर्न च्युप् झ्यीत्री चीज्यीत्। 13 हीन यो़प्पे को़न्ज्योक्की मी चङ्म घयेक्की खीत्रङ्ल छ्यक्सुम् थेमु यो़दो सीगुक्। 14 चोव ज्यीन्दक् येशु ख्रीष्ट्की थुज्यी, को़न्ज्योक्की झ्यम्ब धङ् धम्बे थु खीत्रङ्दङ् दल युङ् युङ युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.