२ कोरीन्थी 12 - ल्होमी1 फेन्दो मीत्न अक्, ङे ॱस्येप्पे तम्दो़त् हीगो ॱस्यो़त् गो़ झ्युङ्। ॱनी ह हीनी झ्यीनी चोव ज्यीन्दक्की ङल तो़न्न, ङे थोङे थोङ्नङ् धङ् ङल ॱसल्न तो़म्बे केच्च्य घयेत् ॱस्यो़क्केन्। 2 हीगी केच्च्य हीगो झ्युङ्नी, लोङ च्युप्स्यी ॱसोङ्। हुगी यङ्ल ङे ङु ॱस्यीगेन् ख्रीष्ट्तङ् मत् ढेबे मी च्यीक् इगी तेङ् यी़ल थोक्क ॱसुम्बल ठीक्च्युङ्। ॱनी हुगी यङ्ल ङ सी़ दी इक् डक्च्यक् ॱलीब हीम्ब न मेम्ब हुगो ङल ॱस्यो़च्च्ये गन्दीक्म मीत्। को़न्ज्योक्ल ॱस्यो़च्च्ये यो़क्केन् बेत्। 3-4 ॱनी म दी हीगी मी हीगो तेङ् यी़गी ॱस्यीङ्ना झ्यीस्से ॱसज्यल दीम्बरङ् ठीक्न ॱलीब हीम्ब ङल ॱस्यो़च्च्ये यो़त्। ॱनी सी़ दी इक् डक्च्यक् ॱलीब हीम्ब न मेम्ब हुगो ङल ॱस्यो़च्च्ये गन्दीक्म मीत्। को़न्ज्योक्ल ॱस्यो़च्च्ये यो़क्केन् बेत्। ॱनी हीगी मी हीगी इगीदु कोलीमीगी तम्गी छीक्टल ॱस्यो़त् दीरङ् ॱमीत् ॱस्यीगेन्, ॱस्यो़च्च्ये दी इक् मीत् युङ्गेङ्गी केच्च्य ॱह घोव बेत्। 5 ङे ॱस्यो़क्केङ्गी तम्दो़त् दी हीगी मी हीगी ढीक्ल ॱस्यो़क्केन् हीन्। ॱनी ङरङ्गी ढीक्ल ॱस्यो़क्केङ्गी तम्दो़त् हुगो ङ ज्यीक्च्ये मीप्प हीम्बे ढीक्ल मेन्द, ॱयोङ्गी ढीक्ल ॱमीत् ॱस्यो़त्। 6 ॱनी म दी ङे तम्दो़त् ॱस्येत्न आक्, ङ ॱलीम्ब त मेन्। घन्ड हीन् सीन्न हुगो दीम्बरङ्गी केच्च्य बेत्। ॱनी हीन्न अक्, मी ॱसी़ ङ घन्दुक् झ्यीबे मी हीम्ब थोङ्गो़दङ्, ङे घन्दुक् झ्यीबे केच्च्य ॱस्येप्प ॱह घोगो़दङ् उजो़त् च्यीक्रङ् मेन्द, हुले ॱल्हक्मा ङ ॱसी़ इक् ॱसम्ज्ये मीप्पे ढीक्ल ह ङ तम्दो़त् ॱमीत् ॱस्यो़त्। 7 ङल नुक्मे ज्यीक्पे केच्च्य ॱसल्तु ची़त्नी, हुनी ङ तम्दो़त् लङ्ज्ये मीप्पे ढीक्ल ङे सी़ल चङ् चुब डस्सीगी दुक्स्यी तोङ्दु शैतान्गी लेङेन् च्यीक् को़न्ज्योक्की तङ्ज्युङ्। 8 हीगी ढीक्ल चोव ज्यीन्दक्ल ङे लेम्म ॱसुम् हीगो ङ च्यानी या टो़रो झ्यी सीन्न स्युदेन् ज्यबेन्। 9 ॱनी हीगी लेल्ल खोङ्गी ङल रङ्ल घङ् गो़बे थुज्यी ङे टो़क्को़त्। घन्ड हीन् सीन्न रङ् ज्यीक्च्ये मीप्पल डोये यङ्ल रङ्गी लम्नी ङे ॱस्यीक्की ले गज्येन् डुप्केन् बेत् सीन्न ॱसुङ्ज्युङ्। हीगो झ्यीनी छीगङ् ङल ख्रीष्ट्की ॱस्यीक् दी युङ्ज्ये यो़प्पल बोर ङ ज्यीक्च्ये मीप्प झ्युङ घयेक्की ढीक्ल ङ गव झ्यीन तम्दो़त् ॱस्यो़क्केन्। 10 हुगो झ्यीनी ख्रीष्ट्की धो़ङ्गी ढीक्ल ङ ज्यीक्च्ये मीप्प युङल, ॱम पप्न युङल, दुक्स्यी नोङल, ड घयेक्की दुक्प अयेक्प तङल, खम्द घाबोक्म युङल गव झ्यीन दो़क्को़त्। घन्ड हीन् सीन्न हीगो डस्सी ज्यीक्च्ये मीप्पे कप्ल ङ ज्यीक्पोक्मल थो़ङ्गो़त्। 11 स्येन् हीगी ढीक्ल खीत्रङ्गी ङल तो़त् ओ़ब यो़क्केन् बेत्। ॱनी तो़च्च्ये त फा स्यक्नी, ङ ॱलीम्ब हीम्बल झ्युङ् गो़ ॱस्यर्च्युङ्। ॱनी घन्डरङ् मेन्न अक्, म दी ङ ठीक्नल ज्यीक्तोक्प च्येम्म हुबले च्युङा त ङ धो़न् घन्दुक्ल अक् ॱमीत् ॱनेब यो़त्। 12 ङ ठीक्नल गन्दीय हीम्ब खीत्रङ्गी ॱह घोज्ये यो़प्पल खीत्रङ्गी घुङ्दु ङे धु च्यङ्न ले झ्यीप्पे यङ्ल यीक् छ्यीम्मी़ लेगी ता, यम् छेम्मे ले धङ् ॱस्यीक् छ्यीम्मी़ ले घयेत् ङ च्यानी को़न्ज्योक्की जेप्प बेत्। 13 ॱनी हुगी यङ्ल खीत्रङ्ल बुल मीत् लीन्ज्ये दी खीत्रङ्ल ङे गेन् ॱमीत् को़ सीन्न बेत्। बुल लीम्मोङ् सीन्नी, छ्यो़ छो ॱयोङ्म घयेत्ले खीत्ल मत् दम्बा झ्यीगुक् सीक्केन्? ॱनी हुगो ङीबल ॱसोङ्न ॱनी, धक्तु ची़त्रो झ्यी। 14 ङ हन्देन् एन् खीत्रङ् च्याल युङ् छ्योक् यो़त्। हन्देन् युङ्न, लेम्म ॱसुम् छीगो़त्। ॱनी हन्देन् युङ्नी इक्, खीत्रङ्ल गेन् घन्ड अक् ॱमीत् को़। घन्ड हीन् सीन्न ङ खीत्रङ्गी नोर् लीन्दु युङ्गेन् मेम्ब, खीत्रङ् चर च्यो़त्तु युङ्गेन् हीन्। हीगी लेमु हीगो फमे धो़ल्ल भीजे नोर् ॱसक् गोगेन् मेम्ब, भीजे धो़ल्ल क फमे ॱसान स्योक् गोगेङ्गी लेमुदङ् डीक्केन् बेत्। 15 खीत्रङ्गी ॱसीम्ल फेन् थोब झ्युङ्न, बोर ङल यो़प्पे नोर् दीरङ् हीन्, ङरङ्गी ली़बु छङ्म दीरङ् हीन्न अक्, खीत्रङ्गी ढीक्ल टो़प्पल ङल गव यो़त्। ङे खीत्रङ्ल नुक्मे झ्यम्ब छ्यीय झ्यीक्को़त्न अक्, खीत्रङ्गी झ्यम्ब दी ङल हरुङ् को़न्दु को़न्दु डोगेन् बेत्। 16 ङे खीत्रङ्ल गेन् घन्ड अक् ॱमत् के झ्यीबल त डीक्को़ट्टो। ॱनी हीन्न अक्, ङल उन यरीगी छ्योम्डी़ ॱस्येत्न ॱयोज्यी़ ठम्ज्यी़ झ्यीदुक् सीगो़ट्टो। 17 ङे खीत्रङ् च्याल दगु यरी तङेन्। ॱनी हुब लोक्न युङ्नी, हुबे लम् ज्यी़त्नी इक् खीत्रङ् च्येन्नी ङे घन्ड अक् मत् लीन्। 18 खीत्रङ् च्याल ङे तीतस्ल डोरो झ्यी झ्यीबेन्। हुनी तीतस्की दगुल रोरङ्दङ् कङ्ज्यीक्ल युङे पी़न्ज्या हुगो ओक् तङेन्। ॱनी तीतस्की रोरङ्ल फेन् थोब खीत् च्यानी घन्ड ॱलङ्सोङ? ङीत् ॱङीगी ॱसीम् खुर्तङ् धङ् ङीक्की झ्यीत्लु ज्युङ्लु दी च्यीक्प मीन्दुक्क ॱनी? 19 ॱनी ङे हजो़त् थुक् ढीबे केच्च्य हीगो खीक्की ॱनो़ल ङीक्की ङीब झ्यीब फी़गेन् ब अक् ॱनो़ज्युङ? मेम्बेत्। ङीत् ख्रीष्ट्की ॱयोक्पु हीम्ब झ्यीनी, हुनी हीगो को़न्ज्योक्की ढुङ्दु ॱस्यो़क्केन् हीन्। झ्यम्बे दगुसो, ङीक्की घङ् ढीब हुगो कुरीक् खीत्रङ्ल फेन् थोबे ढीक्ल हीन्। 20 ङ हुदु युङ्नी, खीत्रङ्गी ढीक्ल ङे ॱसीम्ल ॱनो़बे रीगो दी डस्सी खीत्रङ् ॱमीत् ठेक्को़ट्टो ॱनो़ब धङ् ङे ढीक्ल खीत्रङ्गी ॱसीम्ल ॱनो़बे रीगो दी डस्सी ङ अक् ॱमीत् ठेक्को़ट्टो ॱनो़न ङल च्युगा लङ्गुक्। घन्ड हीन् सीन्न खीत्रङ्गी छीक्न थक्मु, सीगुक्, खोङ्डोक्, रङ्ज्यी़, च्योम, फालप्, ज्यीम्गेत् धङ् स्यीव डीक्प मीप्पे लेमु यो़प्प ठेत् योङ् ॱनो़ब दुक्। 21 ङ हुदु युङ्नी, खीत्रङ्गी हुन्दुक् झ्यीबे लेमी़ झ्यीत् झ्यीक्की ङे को़न्ज्योक्की ङ ङु छदु ची़त् योङ् ॱनो़बे च्युगा दुक्। घन्ड हीन् सीन्न खीत्रङ्गी उन चङ्ज्ये मीप्प, दयम्, छ्येल ॱनक्सी झ्यीक्केन्, दीक्प झ्यीक्केन् धङ् हुन्दुक् झ्यीब घयेक्की ॱसीम् दी मत् ज्युर ठेत्न ॱसीम्दुक् लङ् योङ् ॱनो़गुक्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.