२ कोरीन्थी 11 - ल्होमी1 ङे घुलोक् थबे तम् अच्च्येत् च्यीक्ल त खीत्रङ् गुर् थेक्को़ट्टो ॱनो़बे रीगो यो़त्। ॱनी गुर् थेक्प दी इक् झ्यीज्यीत्। 2 खीत्रङ्गी ढीक्ल ङ अक् को़न्ज्योक्की लेक्मु ॱमीसीर् लङ्गुक्। खीत्रङ् घयेत् मक्प च्यीगी च्यीक् ख्रीष्ट्की ॱनमल युङ्ज्येल ङे धर् तान स्यक्पेन्। हुगो झ्यीनी नज्युङ्म धक्पर् हीम्ब डस्सी खोङ्गी ढुङ्दु ङे खीत्रङ् च्यो़ छुब झ्यीक्को़त्। 3 हव्वाल डी़गी छ्योम्डी़ ॱस्येत्न ॱयोङ्गोर् ज्यबल हव्वा छ्यी़ब डस्सी ख्रीष्ट्ल खीत्रङ्गी ॱसीम्बे यीक्नी खुरे ॱसीम् चङ्मे धेप्प दी इक् छ्यी़ डोगो़दङ् ॱनो़न ङ च्युगा लङ्गुक्। 4 घन्ड हीन् सीन्न ङीक्की खीत्रङ्ल ॱस्येप्पे येशुगी केच्च्यल मेम्ब, मी ॱयोङ्म युङ्न हुबे येशु ॱयोङ्मागी ढीक्ल ॱस्येप्पे केच्च्य धङ् खीत्रङ्ल एल्ला थोबे धम्बे थु दी मेम्ब, थु ॱयोङ्मा थोप्केङ्गी ढीक्ल ॱस्येप्पे केच्च्य धङ्, ॱनी खीत्रङ्गी एल्ला घोवे केच्च्य ॱनेम्बु दी मेम्ब, केच्च्य ॱयोङ्मा हुबे ॱस्येप्प घयेत् दी खीत्रङ्गी फी़न ॱमीत् तोङ, हरुङ् क हुल नेङ्गेन् बेत्। 5 ठीक्नल ज्यीक्तोक्प हुबले ङ च्युङा त धो़न् घन् दील अक् ॱमीत् ॱनेब यो़त्। 6 तम् ॱस्यो़प्पल ङ खेज्ये मीप्प यो़त्। ॱनी हीन्न अक्, ॱस्यीबल तङ्न, ङे गज्येन् ॱस्यीगो़त्। हीगो खीत्रङ्ल ङीक्की केच्च्य ॱनेम्बी़ धो़न् दी केच्च्य ॱनम्ब गज्येल्ल तो़न्न ॱह घोदु ची़प्पेन्। 7 खीत्रङ् छ्यीयाल थो़न्ज्ये यो़प्पल ङ च्युङ्दु फीन्न, खीत्रङ्ल ङे को़न्ज्योक्की केच्च्य ॱनेम्बु बुल मत् लीम्बल हीन्दुक्रङ्ल ॱस्येप्पेन्। ॱनी हुगो दीक्प बेत् सीक्केन् ॱनी? 8 ङे खीत्रङ्गी घुङ्दु स्यप्च्यी़गी ले झ्यीप्पे यङ्ल ङल गो़बे खोज्येत् घयेत् छ्यो़ छो ॱयोङ्मा घयेत्ल चीर्न, हुनी ङे ॱलङ्न सेबेन्। 9 ङ हुदु खीत्रङ्दङ् दल दो़प्पे यङ्ल ङल गो़बे खोज्येत् घयेक्की ढीक्ल ङे खीत्रङ् ॱसुल आक् गेन् ॱमत् के। ङल मीत् स्यङ घङ् यो़प्प घयेत् मासीडोनीयागी लुङ्बनी युङे पी़न्ज्या घयेक्की बीन्ज्युङ्। ॱनी हुन्दुक् झ्यीन खीत्रङ्ल ङे घन्डे ढीक्ल अक् गेन् ॱमीत् को़ ॱनो़न तोक्स्यीप् झ्यीन देप्पेन्। ॱनी हरुङ् तीङ्ला आक् हुन्दुक् दीरङ् झ्यीच्च्ये ॱनो़ब यो़त्। 10 ख्रीष्ट्की दीम्ब ॱस्येप्प हीम्ब डस्सी ङे एक् दीम्बरङ् ॱस्यो़क्को़त्। ङे तम्दो़त् ॱस्येप्प हुल अखैया लुङ्ब जेङ्गी मी ॱसी़ इक् ङे खल दक्क ज्यक् ॱमीत् छुब यो़त्। 11 ङे खीत्रङ् च्यानी घन्ड अक् मीत् लीन् सीक्केन् हुगो खीत्ल ङे च्यीब मीत् झ्यीक्केन् बेत् ॱनो़गुक्क? हीगो मेम्बेत्। ङे खीत्रङ्ल च्यीब झ्यीप्प मीत् झ्यीप्प को़न्ज्योक्ल ॱस्यो़च्च्ये यो़क्केन् बेत्। 12 हुगी मी हुबल पावल्सो़ झ्यीबे लेमु डस्सी ङीक्की इक् झ्यीक्को़त् सीन्न तम्दो़त् ॱस्यो़प्पे लम् ॱमीत् ॱङीच्च्येल ङे हुन्दुक् झ्यीक्को़त्। 13 हुगी मी हुब ख्रीष्ट्की ठीक्नल हीन्दोक्पल म दी हुब ठीक्नल जी़म ॱयोज्यी़ ठम्ज्यी़ ॱस्यो़क्केङ्गी मी बेत्। 14 हुन्दुक् झ्यीबल खीत्रङ् ॱह लेब मत् झ्यीत्। घन्ड हीन् सीन्न शैतान्गी इक् रोरङ् तेङ् यी़गी भङ्ज्येम्ब हीन्दोक्प ओ़च्च्य च्येम्मे छ्यलुल ज्युर्न तो़ङ्गेन् बेत्। 15 हुगो झ्यीनी हुगी लेङेन् घयेक्की इक् रोरङ्सो ढङ्बु ङो़गी ॱयोक्पु हीन्दोक्प झ्यीन तो़ङ्गेन् बेत्। हुगो नन्दक्की ॱह लेब मेम्बेत्। स्युक् थदु हुबे लेल पीबे लेन् टो़क्केन् बेत्। पावल्ल नोङे दुक्पे ढीक्ल ङोम्ज्येत् १६-३३ 16 खीत्रङ् ॱसी़ इक् ङ ॱलीम्ब हीम्ब ॱनो़ब ॱमत् ॱसम्ज्यीत् सीन्न हरुङ्द फीच्च्य सीक्केन् हीनो। ॱनी ॱसम्गो़त्न ॱनी, ॱलीम्बे केच्च्य नेन्न गुर डस्सी ङे तम्दो़त् अच्च्येत् च्यीक् ॱस्येप्प हीगो गुर्च्यीत्। 17 ङे तम्दो़क्की केच्च्य हीगो चोव ज्यीन्दक्की ॱनङे केच्च्य मेम्ब, ॱलीम्ब हीम्ब डस्सी ङरङ्गी ॱसीम्नी ॱस्यो़क्को़त्। 18 खीत्रङ् च्येन्दु कोलीमीगी ॱसीम्बे रङ्नङ्गी लेमु डस्सी मी ॱयोङ्म गज्येङ्गी तम्दो़त् ॱस्येत्नी, हुनी ङ अक् ॱस्यो़क्केन्। 19 खीत्रङ्गी खीत्रङ् खेसी हीन् ॱनो़ब ॱसम्न ॱलीम्बे केच्च्य ॱस्येप्पल गुस्सी झ्यीन नेङ्गेन् बेत्। 20 ॱयोङ्नी युङे मी ॱसी़ खीत्रङ् ॱयोक्ल कुगुक्क, ॱसी़ खीत्रङ्ल स्येन्दोङ् झ्यीगुक्क, ॱसी़ खीत्रङ्ल ॱयोङ्गोर् ज्यक्कुक्क, ॱसी़ रोरङ् छ्यीया हीन् ॱनो़ब झ्यीक्कुक्क, ॱसी़ खीत्रङ्ल डम्ज्यक् बेङ्गुक्क हुगो खीत्रङ्गी कुरीक् गुर्केन् बेत्। 21 ङीत् ॱनी म दीरङ् हुब डस्सी ज्यीक्सी हीन्दोक्प झ्यीक्केङ्गी मी मेम्बल ङु छगुक्। मी ॱसी़ ज्यीक्टक् मीप्प, घन्डे तम्दो़त् ॱस्यो़क्कुक्क ॱनी ङ अक् हुगो डस्सीरङ् ॱलीम्बे केच्च्य लप्केर्रङ् हीन्न अक्, तम्दो़त् ॱस्यो़क्केन्। 22 हुबे रोरङ्सो हीब्रु हीन् सीगुक्। ॱनी ङ अक् हीब्रुरङ् हीन्। हुबे रोरङ्सो इस्राएली हीन् सीगुक्। ॱनी ङ अक् इस्राएलीरङ् हीन्। हुबे रोरङ्सो अब्राहाम्गी ज्यी़त् हीन् सीगुक्। ॱनी ङ अक् हीन्। 23 हुबे रोरङ्सो ख्रीष्ट्की ॱयोक्पु हीन् सीगुक्। ॱनी ङ ॱनोबु डस्सी झ्यीक्केन् हीनो। ङ ॱसुम्ब हुले ज्येबा यो़त्। हुबले ज्यीक्पागी कले ङे च्येप्पेन्। हुबले मङा ङ चो़ल्ल ॱस्योर्च्युङ्। हुबले ज्यीक्पा ङल डेङ्ज्यक् बेन्ज्युङ्। लेम्म गज्येन् ङ ॱस्यीयल थुक्च्युङ्। 24 यहुदी घयेक्की ङल डेङ्ज्यक् लेम्म ॱसुम्ज्यु ॱसोर्कु झ्यीब थङ्म ॱङ बेन्ज्युङ्। 25 थङ्म ॱसुम् ज्युक्पे दुङ्ज्युङ्। थङ्म च्यीक् दोरुप् ज्यप्च्युङ्। थङ्म ॱसुम् ङ छ्यु ज्यम्जो छ्यीम्मी़ लम्ल ढुल स्युन डोये यङ्गी ढु दी मीत्तल बुरुक् फीन्ज्युङ्। ॱनी छेङ्गङ् च्यीक् धङ् ङीङ्गङ् च्यीक् ङ छ्यु ज्यम्जो छ्यीम्मी़ नङ्दु लेज्युङ्। 26 ॱनी छीगङ् ङ घल अक् गीर् गो़ ॱस्यर्च्युङ्। चङ्बु घयेत्ल गेक्पे यङ्ल ॱस्यी योङ् ॱनो़ज्युङ्। झ्यक्पा घयेक्की ॱसेत् योङ् ॱनो़ज्युङ्। ङीत्रङ् यहुदीगी ज्यी़त् घयेक्की ॱसो़क्को़ट्टो ॱनो़ज्युङ्। ज्यी़त् ॱयोङ् ॱयोङ्गी मी घयेक्की ॱसो़क्को़ट्टो ॱनो़ज्युङ्। सार्ल यो़प्पे यङ्ल सार्की मी घयेक्की ॱसेत् योङ् ॱनो़ज्युङ्। मी मीस्से लुङ्बदु यो़प्पे यङ्ल ॱस्यीगो़ट्टो ॱनो़ज्युङ्। छ्यु ज्यम्जो छ्यीम्मी़ लम्ल ढुल डोये यङ्ल ॱस्यीगो़ट्टो ॱनो़ज्युङ्। पी़न्ज्या जी़म घयेक्की ॱसेत् योङ् ॱनो़ज्युङ्। 27 कले च्यो़प्प धङ् दुक्स्यी गज्येन् झ्युङ्। लेम्म गज्येन् ॱङीत्मीत्ल, तोबल धङ् कोम्बल लेज्युङ्। सम मत् सेबल लेम्म गज्येन् दो़त् गो़ ॱस्यर्च्युङ्। घो़ मीप्पल छ्याबल लेम्म गज्येन् लेज्युङ्। 28 ॱनी हरुङ् हुगो डस्सी ॱयोङ्म आक् गज्येन् झ्युङ्। ॱनी हुगो छ्युवक् मेम्ब, ङीन् रीम फो़स्स्यी छ्यो़ छो घयेक्की ढीक्ल च्युगा धङ् ॱसीम्दुक् झ्युङ्। 29 ॱनी ॱसु योक्तु ॱसोङ्दुक्क ॱनी ङ अक् योक्पोक्म हीन् ॱनो़ब झ्यीक्केन्। ॱसु दीक्पल ॱस्योर्कुक्क हुल ङ ॱसीम् च्योय युङ्गुक्। 30 ङे ङोम्ज्येत् ॱस्यो़त् गो़ झ्युङ्न, हुगो ङ ज्यीक्च्ये मीप्प हीम्बे ढीक्ल ॱस्यो़क्केन् हीन्। 31 ङे केच्च्य हीगो ॱएलम मेम्ब हीम्ब धी़ ज्यी़न्दु तो़त् ओ़ब यो़क्केन् चोव ज्यीन्दक् येशुगी यप् को़न्ज्योक्ल ॱस्यो़च्च्ये यो़क्केन् बेत्। 32 ङ दमस्कस्तु यो़प्पे यङ्ल ङ सुङ्ज्येल ज्याबु अरीतस्की होक्की पेम्बु च्यीक्की हुगी सार्की च्यारीगी गोच्च घयेत्ल गोराब को़न स्यक्तुक्। 33 ॱनी हुगो झ्यीनी ङे दगु घयेक्की ङ ढाबेक्ल ॱलुक्न च्यारीगी ज्येगोर् च्यीक्नी फल्ल छ्यील तो़न्न ज्यो़न् ज्यो़ल्ल तङ्न ॱसल पप्च्युङ्। ॱनी हुन्दुक् झ्यीन हुगी लक्नी इक् ङ थर्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.