२ कोरीन्थी 10 - ल्होमीड घयेत्ल पावल्की तम्गी गुन्द ॱसो़गेन् १-१८ 1 खीत्रङ् यरीगी ङे ढीक्ल हुगो हीदु हज्यरङ्गी घुङ्दु दो़प्पे यङ्ल ज्यीदोब झ्यीक्कुक्। ॱनी यङ् लुङ्ब ॱयोङ्नी यीगील ज्यीक्टक्रङ् मीत्तोक्प झ्यीक्कुक् सीर ङे ॱह घोज्युङ्। हीगी ढीक्ल ख्रीष्ट् ॱनोम्ज्युङ् धङ् ॱम ॱयुङ्बोक्म यो़प्प हीम्बे लम्नी ङ पावल्की खीत्रङ्ल गन्दीक्म सीक्केन् हीनो। 2 ॱनी खीत्रङ् यरीगी ङीत्ल कोलीमीगी ॱसीम्बे रङ्नङ्गी लेमु डस्सी झ्यीक्कुक् सीगुक्। ॱनी हुन्दुक् सीक्केल्ल ङ हन्देन् हुदु युङे यङ्ल हुबल ज्यीक्टक् मीप्प, झ्योङ् तङ्न ॱस्यो़च्च्ये ॱनो़ब यो़त्। ॱनी झ्युङ्न, म दी ङे हीगो ॱस्यो़त् मीत् गो़ब युङ खीत्रङ्गी झ्यीच्च्ये यो़प्पल सीन्न सीक्केन् हीनो। 3 ङीत् कोलीमी हीन्न अक्, ङीक्की कोलीमीगी रङ्नङ्गी लेमु डस्सी झ्यीन ॱमक् ॱमीत् थुक्प यो़त्। 4 ङीक्की ॱमक् थुक्च्येमे छो़न्ज्य दी कोलीमीगी रङ्नङ्गी लुसे लेमु डस्सी मेम्बेत्। दी़क्की पो़ङ्गङ् घयेत् ॱरुम् छुगेन्, स्युक् छ्यीम्मु, को़न्ज्योक्की छो़न्ज्य बेत्। 5 को़न्ज्योक्की ढीक्ल ॱह घोदु ॱमीत् ची़क्केन्, भर्च्येत् तोङ्गेन् ॱनोक्सम् अयेक्प घयेत् धङ् तम्दो़त् लङ्गेङ्गी लेमु घयेत् ङीक्की मीत्तल तङ्न हुगी ॱनोक्सम् घयेत् दी कुरीक् सुङ्न ख्रीष्ट्की ॱवङ्गी होक्ल दो़क्केल्ल सो़न स्योक्को़त्। 6 खीत्रङ् ङीक्की झ्यीजो़त् घङ्बुल नेन्न युङ्गेल्ल झ्युङ्नी, हुनी हस्सो़त् उन ङीक्की खल मीत् नेङ्गेन् ॱयोङ्म घयेत्ल छ्येप्प को़गेन्। 7 खीत्रङ्गी ॱमीक्की थोङ्गेन् घयेत् दीलरङ् तगेन् बेत्। ॱनी उन ॱसु रोरङ् ख्रीष्ट्की मी ढक्पा हीन् ॱनो़ब खुर्कुक्क ॱनी हुगो ख्रीष्ट्की हीम्ब डस्सी ङीत् इत् ख्रीष्ट्की मी ॱङो़न्ने हीम्ब हुगी ॱह घोव झ्यीज्यीत्। 8 ङे हीगो खीत्रङ् मीत्तल तोङ्ज्येल सीन्न मेम्ब, खीत्रङ्गी छ्य स्यक्प दी गदु युङ्ज्ये यो़प्पल चोव ज्यीन्दक्की ङल ॱवङ् ॱनङल ङे ङोम्ज्येत् अच्च्येत् मङ् ढाब झ्युङ्न अक्, हील ङ ङु छ मीत् गो़ब यो़त्। 9 ङे तङे यीगी घयेत् हीगो खीत्रङ्गी म दी ज्यीक्टक् ॱलोङ्गेङ्गी यीगी ब अक् ॱनो़गो़ट्टो। हुगो मेम्बेत्। 10 घन्ड हीन् सीन्न ङे ढीक्ल उन यरीगी पावल् हुगी यीगी दील चुप्पोक्म धङ् ज्यीक्पोक्म ढीन तोङ्गुक्। ॱनी हुगो रोरङ् हीदु यो़प्पे यङ्ल ज्यीक्च्ये मीप्प धङ् हुगी तम् दी इक् खेज्ये मीप्प ॱस्यो़क्कुक् सीगुक्। 11 ॱनी हुन्दुक् सीक्केङ्गी मी हुबे ङीक्की लुङ्ब ॱयोङ्नी तङे यीगील घन्दुक् झ्यीब ढी यो़दङ् ॱनी हुन्दुक् दीरङ् ङीत् हुदु युङ्नी इक्, झ्यीक्केन् हीन् हीगो हुबे ॱह घोव झ्यीज्यीत्। 12 रोरङ्सो़ रोरङ्ल तो़क्केन् हुब घयेत् डस्सी ङीक्की मीत् झ्यीप्प यो़त्। ङीत् धङ् हुब ॱसु गय यो़प्प बेक्क हुगी ढीक्ल ङीत् नम् च्येत्न ॱमीत् त। घन्डे घुवे मी हुब रोरङ्सो़ रोरङ्सोल डीक्पे ॱनो़च्च्य सो़न ॱस्योक्क ज्यप्न हुबे रोरङ्सो गलो़त् यो़त्, रोरङ्सो़रङ् तेन नम् च्यो़क्केन् बेत्। 13 ङीक्की हुब डस्सीगी तम्दो़त् मङा घल अक् ॱमीत् ॱस्यो़प्प यो़त्। ङीत् को़न्ज्योक्की घजो़त् च्यीक्की ॱसज्यल को़ यो़दङ् हुगी नङ्गोर्ल यो़प्प घयेक्की ढीक्लरङ् क तम्दो़त् ॱस्यो़क्को़त्। ॱनी खीत्रङ् ॱअङ् हीगी नङ्गोर्ल यो़क्केन् बेत्। 14 खीत्रङ् च्येल्ल गोम ॱएन्स्युक्म युङ्गेन् दी ङीत् मेन्न ॱनी, ङीक्की तम्दो़त् ॱस्येप्प हुगो खीत्रङ्ल मीत् डोगेन् बेत्। ॱनी हुगो मेम्ब, खीत्रङ्ल ख्रीष्ट्की केच्च्य ॱनेम्बु ॱस्यो़क्केन् दी ङीत् हीन्न ॱनी, ङीक्की तम्दो़त् ॱस्येप्प हीगो खीत्रङ्ल डीक्केन् बेत्। 15 को़न्ज्योक्की ङीत् घजो़त् च्यीक्की ॱसज्यल को़ यो़दङ् उजो़त् च्यीक्ल मेन्द, हुनी भी़त्न, ॱयोङ्गी झ्यीबे लेगी ढीक्ल ङीक्की तम्दो़त् ॱमीत् ॱस्यो़प्प यो़त्। खीत्रङ्गी छ्य स्यक्प दी डम्दु ॱसोङ्नी, हुनी हस्सो़त् ङीत्ल अक् को़न्ज्योक्की ॱनङे ॱसज्य हुगी नङ्गोर्ल ङीक्की ॱस्युक् दी खीत्रङ्गी छीक्तु हरुङ् ज्यीक्तु डोगो़ट्टो ॱनो़बे रीगो यो़त्। 16 हीनी क हस्सो़त् खीत्रङ् च्येन्नी फल्ल आक् ॱसज्य ॱयोङ्ल केच्च्य ॱनेम्बु ॱस्यो़त्तु ङीत् डो छुबेत्। हुनी को़न्ज्योक्की ॱयोङ्माल ॱनङे ॱसज्यल ॱयोङ्गी झ्यीबे लेगी ढीक्ल मेम्ब, तम्दो़त् दी ॱस्यो़त् गो़ झ्युङ्न, ङीत्रङ्गी झ्यीबे लेगी ढीक्ल ॱस्यो़त् छुबेत्। 17 ॱसुङ्रप्ल थो़ङ्गेन् बेत्। मी ॱसी़ तम्दो़त् ॱस्यो़क्को़दङ् हुगी चोव ज्यीन्दक्की ढीक्ल ॱस्यो़त् गोगेन् बेत्। (यर्मीया ९:२४) 18 रोरङ्गी रोरङ्ल तो़प्प झ्यीक्को़त्न, हुगो हुल ओ़ब मीत् युङ्गेन् बेत्। ॱनी चोव ज्यीन्दक् च्येन्नी तो़प्प थोबे मी दीरङ् खोङ्गी थोङल ओ़ब युङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.