१ तीमोथी 6 - ल्होमी1 को़न्ज्योक्की छेल्ल धङ् ङीक्की ॱलोप्सल ॱमो़म्बी़त् युङ्से लम् ॱमीत् ॱङीच्च्येल रङ्मो़ मीप्पे ॱयोक्पु घयेक्की रोरङ्सो़ दक्पुल तो़प्प धङ् घी़स्यप् झ्यीत् गोगेन् बेत्। 2 ॱनी हुगी दक्पु दी छ्य स्योक्केन् हीन्न ॱनी, हुगो ॱयोक्पु दीबे पी़न्ज्या च्यीक्प हीन् ॱनो़ब झ्यीन तो़प्प झ्यीच्च्ये दी नुङ्दु ॱमत् तोङ्ज्यीत्। हुगो छ्य स्योक्केन् धङ् झ्यम्बे मी झ्यीनी, बोर हुल ॱयोक्पु दीबे एल्लाले हरुङ् घो छ्यो़प्पा झ्यीत् गोगेन् बेत्। हीगी ॱलोप्स घयेत् हीगो हुबल गन्दीक्म ज्यप्न टो़च्च्यीत्। लोप्ल ॱस्योर्न दुक्स्यी नोङ्गेन् ३-१० 3 हज्यरङ्गी चोव ज्यीन्दक् येशु ख्रीष्ट्की ॱसुङे धक्पर् च्येम्मे केच्च्य धङ् ङीक्की ॱलप्न टेप्पे को़न्ज्योक् गुव युङे ॱलोप्सल मीत् डीक्केङ्गी ॱलोप्स रङ्स मी ॱसी़ ज्यक्कुक्क 4 हुगी मी हुगो तम्दो़क्की ज्यीङ्ब बोम्बुल ॱसोङ्न घन्ड अक् ॱह मीत् घोगेङ्गी मी बेत्। ॱनी तम् घन्डे ढीक्ल अक् हुन्दुक् झ्यीबे मी छीक्ल छीक् थुक्च्येल ॱनक्केन् बेत्। हुन्दुक् झ्यीब च्यानी ठदोक्, थक्मु, ॱमो़म्बी़त्, ॱसम्ल ङेम्ब ॱनो़गेन् 5 धङ् ॱहेक्री ज्यक्केन् युङ्गेन् बेत्। हुबे ॱनोक्सम् दी ङीन दीम्बे लम्नी छ्यी़ छर युङ्गेन् बेत्। ॱनी यङ् हुबे नोर् ॱसान छ्युक्पुल बको़र्ट्टो ॱनो़बे ख यच्च्येक्की छ्यो़सीम्गी ॱसीम् खुर्केन् बेत्। 6 मी ॱसु को़न्ज्योक्ल धेप्प झ्यीन रोरङ्ल घङ् यो़प्पे ढङ् दील ॱलो दीय झ्यीन दो़क्को़दङ् हुगो नोर्तङ् छ्येत्मीत् गस्सी युङ्गेन् बेत्। 7 घन्ड हीन् सीन्न हज्यरङ् कीये यङ्ल जम्बुलीङ् हील घन्ड खुर्न युङ यो़प्प? ॱनी यङ् ॱस्यीये यङ्ल अक् घन्ड दी खुर्न डो छुगो़त् सीक्केन्? 8 हुगो हीन्न ॱनी, सज्ये थुङ्ज्ये दी धङ् घी़न्ज्ये दी झ्युङ्न ॱनी, हुल ॱलो दीय झ्यीन देप्प गा युङ्गेन् बेत्। 9 ॱनी छ्युक्पुल थो़न्ज्ये ॱनो़गेन् घयेत्ल छो़त्लीन् युङे ॱङेस्स्यो हुगो लोप्की ॱङीङ्ल सीङ्गेन् बेत्। हुनी हुगो ॱनोक्सम् मीप्प डस्सी च्यो़न् युङ्गेङ्गी धेत्मो़ ङेम्ब घयेक्की ॱवङ्ल ॱस्योर्न, हुगी खरप्ल तोङ्गेन् बेत्। 10 हुगो झ्यीनी पयीसक्की लोप् हुगो आक्पागी ढङ् घयेक्की चव खुङ् दी बेत्। मी यरी पयीसक्की लोप्ल ॱस्योर्नी म दीरङ् छ्य स्यक्पे लम् दीनी छ्यी़न ॱसीम्दुक् ॱनजो झ्युङ्न ॱहुवी ॱहुवी ॱस्योर्केन् बेत्। छ्य स्यक्पे लम्ल दुर्न ज्ये छुब ११-१६ 11 रङ् को़न्ज्योक्की मी हीम्ब झ्यीनी, हुन्दुक् झ्यीबे ढङ् घयेत्नी भीन दो़च्च्यीत्। हुनी ढङ्बु, को़न्ज्योक् गुवे छ्यलु, छ्य तेम्बर्, झ्यम्ब, धु धङ् ॱम ॱयुङ्बोक्म झ्यीच्च्ये ॱनो़बे ॱसीम् खुर्च्यीत्। 12 छ्य स्यक्पे लम् दील रङ् खेजो़त् झ्यीन दुर्न ज्ये छुब झ्यीज्यीत्। एल्ला रङ्गी मी गज्येङ्गी दोङ्दु दीम्बरङ् छ्य स्योक्केन् हीन् सीन्न केच्च्य गस्सी ॱस्यो़प्पे यङ्ल रङ्ल थोप्न यो़प्पे फु तक्पे छी दी सुङ् सुङ झ्यीज्यीत्। को़न्ज्योक्की भो़च्च्ये दी इक् रङ् हीगी ढीक्लरङ् बेत्। 13 उज्येन्गी ढङ् घयेत् सोगेन् को़न्ज्योक् धङ् पोन्तीयस् पीलातस्की दोङ्दु दीम्बे केच्च्य फो़न्ज्युर् मीप्प ॱस्यो़क्केन् ख्रीष्ट् येशु पङ्दु स्यक्न रङ्ल ङ हीगो ॱङक्केन्। 14 हज्यरङ्गी चोव ज्यीन्दक् येशु ख्रीष्ट् नम् झ्यो़न् झ्यो़न् थुक्ल रङ्ल झ्युङे क दील चीन नक्पी़ जी धङ् च्यो़न् मीत् युङे लेमु झ्यीज्यीत्। 15 धी़जो़त् ॱलीबे ॱङेस्स्यो गय धङ् ॱवङ् की़न् च्येम्मे को़न्ज्योक्की येशु तो़न्न हुगो डुप्तु ची़क्केन् बेत्। खोङ् ज्याबु घयेक्की इक् ज्याबु धङ् चो छ्यीया घयेक्की इक् चोव ज्यीन्दक् बेत्। 16 नम् नम्ल अक् मीत् ढोङ्गेन् दी खोङ् च्यीगी च्यीक्रङ् यो़क्केन् बेत्। खोङ् ॱसु उक् डो ॱमीत् छुगेङ्गी ओ़च्च्यल स्युगेन् बेत्। कोलीमी ॱसी़ इक् थोङ् ॱमत् ॱनोङ, ॱसी़ इक् ॱमीत् थोङ्गेन्, को़न्ज्योक्ल धी़ नम ज्यी़न्दु ॱवङ् धङ् तो़प्प युङ् युङ युङ्ज्ये यो़प्प स्योक्च्यीत्। आमेन्। छ्युक्पुल ॱलोप्स १७-१९ 17 जम्बुलीङ्दु नोर् गज्येन् यो़प्प च्येम्मसो, ज्यीङ्ब बोम्बु मत् झ्यीज्यीत्। फु ॱमीत् तक्केन् हुन्दुक् झ्यीबे नोर्ल ॱलो ॱमत् को़ब, बोर हज्यरङ्ल गस्सी युङल मो़त् ढाब कुरीक् ॱनङ्गेन् को़न्ज्योक्ल ॱलो को़ज्यीत् सीन्न ॱस्यो़त्। 18 हुनी गङ्ज्येन् गये ले मो़त् ढाब झ्यीक्केङ्गी छ्युक्पु युङल धङ् धो़न् ॱयोङ्ल आक् ॱलो यङ्बोक्म झ्यीन टो़त् गोगेन् बेत् सीन्न हुबल ॱलोप्स ज्योप्च्यीत्। 19 हुन्दुक् झ्यीन हुबे रोरङ्सोल धी़ फत्तेम्मे ढीक्ल ॱसप्तेन् गङ्ज्येन् तीङ्न ॱनी, दीम्बरङ्गी छी दी सुङ् छुगेन् बेत्। 20 तीमोथी रङ्गी गेल्ल च्योन स्यक्पे केच्च्य घयेत् दी तोर्तु ॱमत् ची़प्प सुङ्ज्यीत्। मीत् धक्केन् धो़म्मीक्की केच्च्य धङ् ॱएलमे केच्च्य ॱस्येत्न ङीक्की ॱस्यीगो़त् सीन्न लेन् ज्यक्केन् हुब घयेत्तङ् भीन दो़च्च्यीत्। 21 यरी हुन्दुक् झ्यीबल छ्यी़न, रोरङ्सो़ छ्य स्यक्प दी ङीन यो़क्केन् बेत्। खीत्रङ् घयेत्ल थुज्यी थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.