१ तीमोथी 5 - ल्होमी1 गेम्बा घयेत्ल लप्स्य चुप्पोक्म ॱमत् तङ, पब हीम्ब डस्सी ॱसम्न ॱलोप्स्यीक्की केच्च्य ॱस्यो़च्च्यीत्। ॱनी स्यो़म्ब घयेत्ल यङ् मीङ्बु हीम्ब डस्सी ॱसम्न ॱस्यो़च्च्यीत्। 2 गेम्मु घयेत्ल आम हीम्ब डस्सी ॱसम्न ॱस्यो़च्च्यीत्। ॱनी भुमु स्यो़म्बोक्म घयेत्ल यङ् ॱसीम् चङ्म खुर्न नुमु हीम्ब डस्सी ॱसम्न ॱस्यो़च्च्यीत्। मोरेङ्मु घयेक्की ढीक्ल ३-१६ 3 मोरेङ्मु लेन हुल दगु झ्यीक्केन् ॱसु उक् मीत्न ॱनी, हुल घी़स्यप् झ्यीज्यीत्। 4 ॱनी हुल भीज छयीक् छमु यो़त्न ॱनी, हुबे रोरङ्सो़ ढोङ्बे मीजङ्गी ढीक्ल गेन् खुर्न फमल ढील्लेन् च्यो़ गोगो़त् ॱनो़ब ॱह घोन हुबे झ्यीज्यीत्। ॱनी हीन्दुक् झ्यीन ॱनी, हील को़न्ज्योक् ओक् गुगेन् बेत्। 5 मोरेङ्मु लेन हुल दगु ॱसु उक् मीत्न ॱनी, हुगी रोरङ्गी रीगो दी को़न्ज्योक्ल स्यक्न ङीन् छेन् मीप्प ॱसुव तप्न स्युदेन् ज्यक्केन् बेत्। 6 ॱनी यङ् रोरङ् गुवे धेत्मो़गी ॱवङ्ल तोङ्गेङ्गी मोरेङ्मु यो़त्न, हुगो हुन्दो ॱसोम्बु यो़च्च्यङ्, ॱस्यीनरदङ् चय युङ्गेन् बेत्। 7 मोरेङ्मु धङ् हुगी मीजङ् घयेत्ल ङीबे च्यो़न् घन्ड अक् युङ्ज्ये मीप्पे ढीक्ल ङे ॱङाबे ॱलोप्स घयेत् हुगो ॱस्येत्न टो़च्च्यीत्। 8 रोरङ्गी ङीया रीङा धङ् हुले ज्यीक्पा रोरङ्गी ढोङ्बे मीजङ्ल ॱमीत् तगेन् दी ॱसु यो़दङ् हुगी रोरङ्गी छ्य स्यक्पे लेमु दी मीप्पल तोङ्गेन् बेत्। हुनी हुगो छ्य मीत् स्योक्केङ्गी मीले एक् दुक्पा युङ्गेन् बेत्। 9 मोरेङ्मु घयेक्की मीङ् च्येम्मे थो दील हीगो डस्सीगी मोरेङ्मी़ मीङ्रङ् क ढी गोगेन् बेत्। हुगो मोलो ढुक्च्युले गेम्बा ॱलीब धङ् हुगो छ्योबु च्यीगी च्यीक्ल थीरी देप्पे भुमु युङ् गोगेन् बेत्। 10 ॱनी हुगी गय झ्यीबे ले घयेत् दी कुरीक्की ॱह घोव, रोरङ्गी भीज घयेत् गन्दीक्म ॱसो़बे ॱलम्, डोम्बुल थोङ् झ्यीबे ॱलम्, को़न्ज्योक्की मी चङ्म घयेत्ल कङ्ब टी़न टेप्पे ॱलम्, मी दुक्च्या घयेत्ल दगु झ्यीबे ॱलम् धङ् गये ले झ्यीच्च्ये ॱनो़बे ॱवङ्ल छीगङ् तङ्न दो़क्केङ्गी भुमु युङ् गोगेन् बेत्। 11 ॱनी यङ् मोरेङ्मु स्यो़म्बोक्म घयेक्की मीङ् दी थोल मत् ढीज्यीत्। घन्ड हीन् सीन्न हुब स्युक्ला छ्ये लङ्न ॱनमल डोगीन् थेप्पे, ख्रीष्ट्ल यो़प्पे हुबे धेप्प दी फोङ्गेन् बेत्। 12 हुन्दुक् झ्यीनी हुबे रोरङ्सो़ एल्ला ख्रीष्ट्ल धेप्प झ्यीक्केन् सीन्न झ्यीबे छ्यो़त्तुम् दी घो ॱमीत् छ्यो़त्ल तङ्नी ॱनी, हुबल छ्येप्प फोक्केन् बेत्। 13 हुब गीर्च्यम्बल ॱसोङ्न ॱअर्स्यीयल डोगेन् बेत्। ॱनी हीगो छ्युवक् मेम्ब, हुब फालप् लप्केन्, ॱयोङ्गी धो़ङ्गी ढीक्ल यो़च्चो़त् सीक्केन् धङ् मत् ओ़बे तम् लप्केन् युङ्गेन् बेत्। 14 हीगो झ्यीनी मोरेङ्मु स्यो़म्बो़त्म घयेत् ङे ॱनो़बल ॱनमल फीन्न, भीज की, ॱसो़, ढोङ्ब सुङ्न देप्प गा युङेत् ॱनो़गुक्। हुनी क हस्सो़त् ड घयेत्ल छ्यस्सी़त् ज्यक्पे लम् ॱमीत् ॱङीब युङ्गेन् बेत्। 15 घन्ड हीन् सीन्न उन मोरेङ्मु यरी शैतान् छ्योल ॱसोङ् छर्न यो़क्केन् बेत्। 16 छ्य स्योक्केन् भुमु ॱसी़ खीम्न मोरेङ्मु स्यक्न यो़दङ् ॱनी हुबल हुगी छ्य स्योक्केन् भुमु दीगी तो़ज्यीत्। हुन्दुक् झ्यीन ॱनी, हुगी ढीक्ल छ्यो़ छोल गेन् मीप्प युङ्गेन् बेत्। हुनी दगु झ्यीक्केन् ॱसु उक् मीप्पे मोरेङ्मु ॱयोङ्म घयेत्ल त छुबा युङ्गेन् बेत्। छ्यो़ छोगी गोयो़प्प घयेत्ल ओ़बे लेमु १७-२२ 17 छ्यो़ छो खेबोक्म च्योङ्गेन् गोयो़प्प घयेत्ल तो़प्प ङीबक् झ्यीप्पल ओ़ब युङ्गेन् बेत्। ॱनी हरुङ्द कले च्येत्न ॱसुङ्रप्की केच्च्य ॱस्यो़क्केन् धङ् ॱसुङ्रप्की ॱलोप्स ज्यक्केन् घयेत्ल ज्यीक्पा झ्यीत् गोगेन् बेत्। 18 घन्ड हीन् सीन्न ॱसुङ्रप्ल थो़ङ्गेन् बेत्। ॱलङ्ल ॱङीम ॱमुर्तु ची़प्पे यङ्ल खच्ची ॱमत् को़न्ज्यीत् सीर धङ् (ठीम्लु २५:४) ले झ्यीक्केन् लेमीयल ॱल थोप् ओ़ब युङ्गेन् बेत् सीर यो़क्केन् बेत्। 19 गोयो़प्पल मी ॱसी़ ङीब कोप्कुक्क हुल पङ्बु ॱङीजो़त् ॱसुम्जो़त् च्यीक् मीप्पल छ्य मत् स्योक्च्यीत्। 20 ॱनी हुगी गन्दीय दीक्प दीरङ् झ्यीन यो़त्न ॱनी, ॱयोङ्म घयेत्ल अक् ज्यीब लङ्ज्येल कुरीक्की थोङ्सल हुल लप्स्य तोङ्ज्यीत्। 21 को़न्ज्योक्, ख्रीष्ट् येशु धङ् तेङ् यी़गी भङ्ज्येम्ब दम्बा घयेत् पङ्दु स्यक्न रङ्ल ङ हीगो ॱङक्केन्। रङ्गी मी खल तेन दम्ङीत् मत् झ्येब, ङे घङ् ॱङाब घयेत्ल नेन्न झ्यीक्केल्ल सो़ज्यीत्। 22 मी ॱसुल आक् नम् ॱमत् च्येप्पल लक्पे ॱवङ् ॱमत् को़ज्यीत्। ॱयोङ्मागी दीक्प धङ् मुज्यीक् दज्यीक् मत् झ्यीज्यीत्। रङ् धक्पर् युङ झ्यीज्यीत्। 23 रङ् एल्लागी लेक्मु छ्यु ॱस्यीदा ॱमत् थुङ, रङ्गी ढोप्प न नय झ्यीक्केन् दील फेन्ज्येल गोङ्ज्यङ् अच्च्येत् री थुङ्ज्यीत्। 24 मी यरीगी झ्यीबे दीक्प घयेत् कुरीक्की ठवङी थोङ्गेन् बेत्। हुनी हुगी दीक्पे ढीक्ल ठीम् दी इक् एल्लारङ् च्येत्न छ्येप्प को़गेन् बेत्। ॱनी यङ् यरीगी झ्यीबे दीक्प घयेत् दी तीङ्ला क थो़न्नी, हुल ठीम् दी इक् तीङ्लारङ् च्येत्न छ्येप्प को़गेन् बेत्। 25 ॱनी हीगो डस्सी यङ् यरीगी गये ले झ्यीब घयेत् दी इक् कुरीक्की ठवङी थोङ्गेन् बेत्। ॱनी ॱमत् थोङल झ्यीब घयेत् दी इक् स्युक्ला थोङ्सल थो़ङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.