१ तीमोथी 4 - ल्होमीॱलोप्स जी़म ज्यक्केन् घयेत् १-५ 1 स्युक् थमे धी़ल मी यरीगी रोरङ्गी छ्य स्यक्प दी फङ्न ॱनो़प्प अयेक्प घयेक्की ॱलोप्सल नेन्न दी़क्की लेङेन् घयेक्की ॱयोङ्गोर्ल छ्यी़ डोगेन् बेत् सीन्न धम्बे थुगी घो धक्पोक्म ॱस्यो़क्कुक्। 2 ॱनी हुन्दुक् झ्यीबे ॱलोप्स छ्यीलेल नङ् मत् लेब, ॱएलम ज्यक्केन्, ॱसीम्ब मी छीक्नर डस्सी सङ् ङेन् च्यो़त् ॱमीत् ॱस्यीगेङ्गी मी घयेक्की ॱस्यो़क्केन् बेत्। 3 हुब घयेक्की ॱनम ठीक्च्ये मीत् युङ्गेन् बेत्। सम यरी सज्ये मीत् युङ्गेन् बेत् सीक्केन् बेत्। समे ढङ् घयेत् हुगो मील सज्येगी ढीक्ल को़न्ज्योक्की सो़ब बेत्। ॱनी दीम्ब ॱस्यो़च्च्ये च्येम्म छ्य स्योक्केन् घयेक्की को़न्ज्योक्ल थु छ्यी पुन हुगो स छुगेन् बेत्। 4 को़न्ज्योक्की घङ् जेप्पे ढङ् घयेत् कुरीक् गङ्ज्येन् च्यङ्ज्यङ् बेत्। हुगो यरी सज्ये मीत् युङ्गेन् मेम्बेत्। खोङ्ल थु छ्यी पुन ॱनी, हुगो कुरीक् लीन्न सज्ये युङ्गेन् बेत्। 5 घन्ड हीन् सीन्न को़न्ज्योक्की ॱसुङ्रप् धङ् खोङ्ल ॱसुव तब दीगी समे ढङ् कुरीक् सज्ये युङ्गेन् चङ्मल डोगेन् बेत्। तीमोथीगी मीजील गो़बे छ्यलु ६-१६ 6 ङे ॱस्येप्पे केच्च्य घयेत् हीगो रङ्गी उन यो़प्पे पी़न्ज्या घयेत्ल ॱस्येत्न बीन्न ॱनी, रङ् ख्रीष्ट् येशुगी स्यप्च्यी़ब गङ्ज्येन् हीम्ब युङ्गेन् बेत्। हुनी रङ्गी छ्य स्यक्पे लेमी़ केच्च्ये लम् दीनी धङ् रङ्गी चीन युङे दीम्बे ॱलोप्स दीनी रङ्गी ॱसीम्ल आक् खङ्गी डुप्केन् बेत्। 7 धक्च्ये मीप्पे तम् धङ् गेम्मु घयेक्की मीत् दीम्बे यो़च्चो़क्की केच्च्य घयेत्नी जीम्न दो़च्च्यीत्। बोर को़न्ज्योक् गुव युङल धेप्प दील ज्योङ्दर् झ्यीज्यीत्। 8 सी़ज्योङ् ज्यबे लेगी फेन्दो गक् मीत् युङ्गेन् बेत्। को़न्ज्योक् गुव युङे छ्यलु दी झ्युङ्न ॱनी, हुगी घन्डल अक् फेन् थोगेन् बेत्। ॱनी हुगी हीगी छी हीदु धङ् छी फत्तेम्मे ढीक्ल अक् रीगो छ्यीम्मु युङ्गेन् बेत्। 9 हीगी केच्च्य हीगो धक्तेन् बेत्। हीगो नेम्बल ओ़ब यो़क्केन् बेत्। 10 हीगी ढीक्ल क ङीत् कले च्येत्न दुको़र्त्। घन्ड हीन् सीन्न हज्यरङ्गी रीगो दी ॱसोम्बु हीम्बे को़न्ज्योक्ल झ्यीक्केन् बेत्। खोङ्, मी कुरीक्की, हुनी मङ्स्योल छ्य स्योक्केन् घयेक्की च्यप्को़न् बेत्। 11 ङे क टेप्प हुगो डस्सीगी ॱलोप्स ज्योप्च्यीत्। 12 रङ् हुन्दो स्यो़म्ब हीम्बल ॱयोङ्मा ॱसी़ इक् रङ् ॱनङ्ज्युङ्ल तङ्न, घन्ड अक् मेम्बल ॱसम्ज्ये मीप्प स्योक्च्यीत्। तम्स्यु लबल, मीजीगी छ्यलुल, झ्यम्ब झ्यीप्पल, छ्य तेम्बर् युङ्लुल धङ् ॱसीम् चङ्म युङल छ्य स्योक्केन् कुरीक्की ढीक्ल रङ् ॱमीदेल युङ झ्यीज्यीत्। 13 ङ युङ् युङ् थुक्ल रङ्गी हुदु तेम्बोक्म झ्यीन ॱसुङ्रप् डोन टेत् टेप्प, ॱलोप्स्यीक् टेत् टेप्प धङ् ॱलोप्स ज्यप् ज्यब झ्यीज्यीत्। 14 रङ्ल एल्ला छ्यो़ छोगी गोयो़प्प घयेक्की लक्पे ॱवङ् केन, रङ्गी ढीक्ल कलुङ् ॱस्येप्पे यङ्ल थोबे थुज्यीगी कबप् दी ॱनङ्ज्युङ्ल ॱमत् तोङ्ज्यीत्। 15 ॱनी हुन्दुक् झ्यीन हुगी लेमु घयेत् हुगो रङ्गी मीजीनी गदु झ्यीन युङ दी कुरीक्की थोङ्ज्ये यो़प्पल हुगी ॱवङ्ल तङ्न धुरेत् झ्यीज्यीत्। 16 रङ्गी मीजीगी छ्यलु दी धङ् ॱलोप्स ज्यक्लु दी च्यङ्जो़त् झ्यीन खेजो़त् झ्यीज्यीत्। हुन्दुक् झ्यीन ॱनी, रङ् धङ् रङ्गी तम्ल नेङ्गेन् घयेत् दीब छी थर्वल थो़न् छुगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.