Biblia Todo Logo
Bìoball air-loidhne

- Sanasan -

१ तीमोथी 3 - ल्होमी


छ्‌यो़ छोगी गोयो़प्‍पे मीजीगी लेमु १-७

1 मी ॱसु छ्‌यो़ छोगी गोयो़प्‍पे ले झ्‍यीक्‍केल्‍ल थो़न्‍ज्‍ये ॱनो़गो़दङ् हुगी ले हुगो गङ्‌ज्‍येन् चा छ्‌यीम्‍मु बेत्। हीगो धक्‍तेन् बेत्।

2 ॱनी हीगो झ्‍यीक्‍केन् दी ङीबे च्‍यो़न् मीप्‍प, छ्‌युङ्‌म च्‍यीगी च्‍यीक् च्‍येम्‍म, ॱसीम्‍ब ॱनो़जो़क्‍की ॱवङ्‌ल ॱमीत् तोङ्‌गेन्, च्‍यङ्‌जो़त् झ्‍यीन दो़क्‍केन्, ॱम तेम्‍बोक्‍म झ्‍यीक्‍केन्, डोम्‍बुल थोङ् झ्‍यीक्‍केन्, ॱसुङ्‌रप्‍की ॱलोप्‍स ज्‍यक् ॱस्‍यीगेन्,

3 च्‍युर्ल ॱनक्‍प मीत् झ्‍यीक्‍केन्, दुङ्‌री मीत् ज्‍यक्‍केन्, घी़न् थेक्‍पोक्‍म झ्‍यीक्‍केन्, डीक्‍पोक्‍म झ्‍यीक्‍केन्, लोप् मीत् झ्‍यीक्‍केन्,

4 रोरङ्‌गी ढोङ्‌ब गन्‍दीक्‍म सुङ् छुगेन्, रोरङ्‌गी भीज घयेत् रोरङ्‌गी ॱवङ्‌गी होक्‍ल स्‍योक् छुगेन्, हुनी भीज दीबे एक् रोरङ् छ्‌यप्‍स्‍यक् च्‍येम्‍मे फम हीम्‍ब ॱह घोदु ची़त् छुगेन् युङ् गोगेन् बेत्।

5 ॱनी रोरङ्‌गी ढोङ्‌ब अक् त गन्‍दीक्‍म सुङ् ॱमीत् छुगेङ्‌गी मी घन्‍दुक् झ्‍यीन को़न्‍ज्‍योक्‍की छ्‌यो़ छोल त छुगेन्?

6 छ्‌य स्‍यक्‍चो़त् च्‍येम्‍मे मी ॱसम्‍बल हीगो मीत् डीक्‍केन् बेत्। स्‍येन् हुगो तम्‍दो़क्‍की ज्‍यीङ्‌ब बोम्‍बुल ॱसोङ्‌न, हुल दी़क्‍की चोल फोक्‍पे छ्‌येप्‍प डस्‍सी फोक्‍केन् बेत्।

7 गोयो़प्‍प हुगो छ्‌यी मी घयेक्‍की इक् गस्‍सी च्‍येम्‍मे मी हीम्‍ब छोर गो़गेन् बेत्। हीगो डस्‍सी मत् युङ्‌न ॱनी, स्‍येन् छ्‌यी मी घयेक्‍की ले ॱल्‍हस्‍सी ङीब कप्‍न, दी़क्‍की चो हुगी ॱङीङ् गुक्‍पल सीन् डोगेन् बेत्।


छ्‌यो़ छोगी छ्‌यो़योक्‍पे मीजीगी लेमु ८-१३

8 ॱनी हुगो डस्‍सी छ्‌यो़ छोगी छ्‌यो़योक्‍प घयेत् एत् ॱम तेम्‍बोक्‍म, ख च्‍यीक्‍नी च्‍यीला ॱङी ॱमीत् तो़ङ्‌गेन्, च्‍युर्ल दङ मीत् झ्‍यीक्‍केन्, नोर्ल लोप् मीत् झ्‍यीक्‍केन् युङ् गोगेन् बेत्।

9 ॱसीम् सङ्‌बु खुर्न ॱनोङ् मीत् युङे लेमु झ्‍यीन छ्‌य स्‍यक्‍पे धो़ङ्‌गी ॱङीङ्‌बु दी ॱसीम्‍बे यीक्‍ल सीन्‍न स्‍योक् छुगेन् गो़गेन् बेत्।

10 ॱनी हीगो डस्‍सी यो़त् मीत् ॱअल हुल एल्‍ला नम् च्‍येत्‍न छो़त् त गोगेन् बेत्। ॱनी हुगो गङ्‌ज्‍येन् हीम्‍ब थोङ्‌न ॱनी, हुनी छ्‌यो़योक्‍पे ले झ्‍यीत्‍तु ची़च्‍च्‍यीत्।

11 ॱनी हुबे छ्‌युङ्‌म दीब अक् छ्‌योबु दीब डस्‍सीरङ् ॱम तेम्‍बोक्‍म झ्‍यीक्‍केन्, फालप् मीत् लप्‍केन्, च्‍युर्ल दङ मीत् झ्‍यीक्‍केन्, धो़न् घन्‍डल अक् तेन्‍देन् झ्‍यीक्‍केन् युङ् गोगेन् बेत्।

12 ॱनी हुगी छ्‌यो़योक्‍प हुगो छ्‌युङ्‌म च्‍यीगी च्‍यीक् च्‍येम्‍म युङ् गोगेन् बेत्। हुगी रोरङ्‌गी ढोङ्‌ब धङ् मीजङ् घयेत् गन्‍दीक्‍म सुङ् छुगेन् युङ् गोगेन् बेत्।

13 ॱनी हुगी छ्‌यो़योक्‍पे ले दी गन्‍दीक्‍म तेन्‍देन् झ्‍यीन युङ्‌न ॱनी, हुल छ्‌यप्‍स्‍यक् छ्‌यीम्‍मु युङ्‌गेन् बेत्। हुनी रोरङ्‌गी येशु ख्रीष्‍ट्‌ल छ्‌य स्‍यक्‍पे ढीक्‍की केच्‍च्‍य दी इक् ॱहब दुब मीप्‍प ॱयोङ्‌माल आक् ॱस्‍यो़त् छुगेन् बेत्।

14 ॱनी म दी ङ रङ् च्‍येल्‍ल ज्‍योक्‍पु युङ्‌ज्‍ये ॱनो़बे रीगो यो़त्। ॱनी हीन्‍न अक्, ङे केच्‍च्‍य घयेत् हीगो एल्‍ला यीगील ढीन तोङ्‌गो़त्।

15 घन्‍ड हीन् सीन्‍न पीन ङ ढीम्‍सी युङ् ॱमत् छुब झ्‍युङ्‌न ॱनी, ॱसोम्‍बु हीम्‍बे को़न्‍ज्‍योक्‍की छ्‌यो़ छो दीम्‍बे का धङ् ॱसप्‍तेन् झ्‍यीनी खोङ्‌गी ढोङ्‌बे मीजङ् घयेक्‍की मीजीगी छ्‌यलु दी घन्‍दुक् झ्‍यीब युङ् गोगेन् बेक्‍क हुगो रङ्‌गी ॱस्‍यीज्‍ये यो़प्‍पल ङे हीगो ढीगो़त्।

16 हज्‍यरङ्‌गी छ्‌यो़लुगी धो़न् हीगो तीङ् सप्‍पोक्‍म ॱह लेसी यो़प्‍प कुरीक्‍की छोर्केन् बेत्। ख्रीष्‍ट् कोलीमील कीन थो़न्‍न युङ बेत्। खोङ् धक्‍पर् हीम्‍ब धम्‍बे थुगी तो़म्‍ब बेत्। खोङ् तेङ् यी़गी भङ्‌ज्‍येम्‍ब घयेक्‍की इक् थोङ बेत्। ज्‍यी़त् ज्‍यी़त् घयेक्‍की घुङ्‌दु खोङ्‌गी ढीक्‍की केच्‍च्‍य घयेत् ॱस्‍येत्‍न टम्‍ब बेत्। जम्‍बुलीङ्‌गी मी गज्‍येङ्‌गी खोङ्‌ल छ्‌य स्‍यक्‍प बेत्। हुनी खोङ् तो़त्‍वङ्‌गी ओ़च्‍च्‍ये ॱसज्‍य इगीनल ठीक्‍नर बेत्।

© 1995 Wycliffe Bible Translators, Inc. and Nepal Bible Society

Wycliffe Bible Translators, Inc.
Lean sinn:



Sanasan