१ तीमोथी 2 - ल्होमीकुरीक्की ढीक्ल ॱसुव तोप् गोगेन् १-४ 1-2 धो़न् घन्डल अक् को़न्ज्योक् गुवे लेमु धङ् खोङ्ल ओ़बे लेमु झ्यीन हज्यरङ्गी मीजीगी लम्ल स्यीव धङ् स्यीज्यम् युङ्ज्ये यो़प्पल ज्याबु, पेम्बु घयेत् धङ् मी कुरीक्की ढीक्ल को़न्ज्योक्ल स्युव ज्यप्न ॱसुव तप्न थु छ्यी पुज्यीत् सीन्न ॱएन्स्युक्ल हीगी ढीक्ल ॱलोप्स ज्यक्केन्। 3 हीन्दुक् झ्यीन ॱनी, हीगो हज्यरङ्गी च्यप्को़न् को़न्ज्योक्की की़न्दी़न्दु गङ्ज्येन् धङ् खोङ् थु गुव युङ्गेन् बेत्। 4 खोङ्गी थुल मी घयेत् कुरीक् छी थर्वल तो़न्न दीम्ब दी ॱह घोदु ची़च्च्ये ॱनो़ब यो़क्केन् बेत्। 5 को़न्ज्योक् च्यीगी च्यीक्रङ् यो़क्केन् बेत्। ॱनी खोङ्दङ् मी घयेत् डीक्च्या जेक्केन् डीक्च्याब दी इक् च्यीगी च्यीक्रङ् कोलीमील कीन युङे ख्रीष्ट् येशु यो़क्केन् बेत्। 6 ॱनी कोलीमी घयेत् ॱलुवे ॱलुरीन् दील खोङ्गी रोरङ्गी ॱरोक् दीरङ् च्येब बेत्। हीन्दुक् झ्यीन धी़जो़त्ल कोलीमी घयेत् छी थर्वल तो़न्ज्येमे को़न्ज्योक्की थुल यो़प्पे ढो़ दी हीनी ॱह घोगेन् बेत्। 7 ॱनी ङ हीगो ॱस्यो़क्केङ्गी ठीक्नल दील को़ज्युङ्। हीगो ॱएलम मेम्ब, दीम्बरङ् बेत्। हीगी दीम्बे केच्च्य हील ज्यी़त् ॱयोङ् ॱयोङ्गी मी घयेक्की छ्य स्योक्च्येल ङ हुबे चयेलमल को़ज्युङ्। भुमु घयेक्की ढीक्ल ॱलोप्स ८-१५ 8 अबी छ्योगो घयेत् घदु जोम्न अक्, खोङ्डोक् धङ् ठुक्प मीप्प, ॱसीम् चङ्म खुर्न लक्प ॱनम्ल छ्यर्न ॱसुव तप्न ॱनी, गस्सी युङेत् ॱनो़गुक्। 9 भुमु घयेत् यङ् गो मङ् ढाब ॱस्येत् ॱस्येप्प झ्यीन सप्न ॱसीर् धङ् मुदीक्की ज्येन्ज्य तान रीन् छ्यीम्मु च्येम्मे घो़ मत् घो़म्ब, अच्च्येत् ङु छा धङ् ॱनोम्ज्युङ् झ्यीन छ्यक्चो़त् देम्बोक्मे घो़ घो़न्न 10 गये ले झ्यीन ॱनी, गस्सी युङेत् ॱनो़गुक्। को़न्ज्योक्ल धेप्प झ्यीक्केन् हीन् सीक्केङ्गी भुमु घयेत्ल पम्सो दी हुन्दुक् झ्यीन क युङ्गेन् बेत्। 11 भुमु धो़न् घन्डल अक् ॱम ॱयुङ्बोक्म झ्यीन ॱसीङ् थागील देत्न नेन्न ॱस्यीब झ्यीत् गोगेन् बेत्। 12 भुमी़ ॱयोङ्माल ॱलोप्से केच्च्य ॱस्यो़च्च्येम धङ् छ्योगो़ थोक्ल ॱवङ् च्योङ्ज्येमे क ङ भुमुल ॱमीत् टो़त्। भुमु ॱसीङ् थागील दो़त् गोगेन् बेत्। 13 घन्ड हीन् सीन्न ॱङो़न् धङ्बु दील आदम् एल्ला सो़ब बेत्। हुनी तीङ्ला क हव्वा सो़ब बेत्। 14 दी़क्की ॱयोङ्गोर्ल छ्यी़न को़न्ज्योक्की कल ङीब झ्यीक्केन् दी आदम् मेम्ब, भुमु हव्वा दी बेत्। 15 म दी भुमी़ मीजील भीज कीगेङ्गी लेमु हुगो युङ्गेन् बेत्। भुमु रोरङ्सो़ छ्य स्यक्प दील तेम्बोक्म झ्यीन, झ्यम्ब धङ् धक्पर् युङल खेजो़त् झ्यीन युङ्न ॱनी, छी थर्वल थो़ङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.