१ तीमोथी 1 - ल्होमी1 हज्यरङ्गी च्यप्को़न् को़न्ज्योक् धङ् हज्यरङ्गी रीस्स ख्रीष्ट् येशुगी कल यो़प्पल को़न तङे ख्रीष्ट् येशुगी ठीक्नल ङ पावल्की 2 ङे छ्य च्यीक्की भु तीमोथीरङ्ल हीगी यीगी हीगो ढीन तोङ्गो़त्। रङ्ल यप् को़न्ज्योक् धङ् हज्यरङ्गी चोव ज्यीन्दक् ख्रीष्ट् येशु च्यानी थुज्यी, ॱङीङ्ज्यी धङ् ॱसीम् दीव युङ्ज्ये यो़प्प तोङ्। ॱलोप्स जी़म ज्यक्केन् क च्यो़क्केन् ३-११ 3 ङ मासीडोनीयागी लुङ्बल डोये यङ्ल रङ् एफीसस् सार् हुदुरङ् देत्न हुदु ॱलोप्स जी़म ज्यक्केन् घयेत् क च्यो़च्च्यीत् सीन्न झ्यीबेन्। 4 हुनी मीत् दीम्बे केच्च्य घयेक्की ॱवङ्ल धङ् जोज्ये मीप्पे पुबु ॱमुमी़ दुङ्ज्यी़क्की थो स्यङ् स्यक्पे केच्च्य घयेक्की ॱवङ्ल ॱसीम्ब तोङ्दु ॱमत् ची़च्च्यीत् सीन्न ङे रङ्ल एल्ला आक् ॱङाबेन्। ॱनी हुन्दो ओक् ॱङक्केन्। घन्ड हीन् सीन्न हुगो धो़म्मीक्की केच्च्य बेत्। हुगी छ्य स्योक्पे लेमुल धङ् को़न्ज्योक्की लेल फेन्दो घन्ड अक् मीत् युङ्गेन् बेत्। 5 ङीक्की ॱलोप्स हीगो म दी हुब घयेक्की ॱसीम् दी चङ्म खुर्न ॱनोङ् मीत् युङे लेमु झ्यीन ॱसीम्बे यीक्नी छ्य स्यक्न युङे लम्नी झ्यम्ब झ्यीत्री ची छुज्ये यो़प्पे ढीक्ल सीन्न हीन्। 6 हुब हीन्दुक् झ्यीबे लम्नी छ्यी़न धो़म्मीक्की तम् लप्री चीगेन् बेत्। 7 हुब म दी छ्यो़डीम्गी चयेलमल थो़न्ज्ये ॱनो़न हुन्दुक् झ्यीबे केच्च्य ॱलोप्केन् बेत्। ॱनी हीन्न अक्, रोरङ्सो़ घङ् ॱलबे केच्च्य दी घन्डे धो़ङ्गी ढीक्ल बेत् सीन्न ॱस्येत् यो़दङ् हुगो रोरङ्सो़रङ् ॱह मीत् घोगेन् बेत्। 8 छ्यो़डीम् हुगो म दी गङ्ज्येन् हीम्ब हज्यरङ्ल ॱस्यो़च्च्ये यो़क्केन् बेत्। हुगी धो़न् दी गन्दीक्म ॱह घोन लालोक् झ्यीत् ॱस्यीन, हुगो गङ्ज्येन् बेत्। 9 हुगी ढीक्ल हीगो ॱह घोव झ्यीत् गोगेन् बेत्। छ्यो़डीम् हीगो म दी को़न्ज्योक्की मी ढङ्बु घयेक्की ढीक्ल सो़न ॱनङ मेम्बेत्। ठीम्ल ङीगेन्, चीने मीत् झ्यीक्केन्, छ्यो़सीम् मीप्पे मी, दीक्च्येन्, धक्च्ये मीप्प, को़न्ज्योक् ॱमीत् ॱसम्गेन्, पब ॱसो़क्केन्, आम ॱसो़क्केन्, मी ॱसो़क्केन्, 10 छ्ये ज्युक्केन्, छ्योगो ॱनम्बु दयम् झ्यीक्केन्, मी चोङ्गेन्, ॱएलम ज्यक्केन्, ॱएलमे ॱन सगेन् धङ् धक्पर् च्येम्मे ॱलोप्सल मीत् डीक्केङ्गी ले झ्यीक्केन् घयेक्की ढीक्ल ॱनङ बेत्। 11 ॱनी हीगो गय च्येम्मे को़न्ज्योक्की ङल ॱलो टेत्न ॱनङे तो़त् ओ़बे केच्च्य ॱनेम्बुल आक् डीक्केन् बेत्। पावल्ल ॱङीङ्ज्यी जेप्पे केच्च्य ११-१७ 12 ले झ्यीप्पल ङल ॱस्यीक् ॱनङ्गेन्, ख्रीष्ट् येशु हज्यरङ्गी चोव ज्यीन्दक्की ङल छ्यप्स्यक् स्यक्न खोङ्गी स्यप्च्यी़गी ले झ्यीक्केल्ल ङ को़ज्युङ्। हीगी ढीक्ल थु छ्यी पुगेन् हीन्। 13 एल्ला ङे खोङ्ल ॱमो़म्बी़त् तङेन्। ङे खेरक्सी झ्यीन खोङ्गी मी घयेत्ल दुक्प अयेक्प तङेन्। ॱनी हीन्न अक्, खोङ्गी ङल ॱङीङ्ज्यी जेच्च्युङ्। घन्ड हीन् सीन्न हुगो म दी ङे एल्ला छ्य मत् स्यक्पे यङ्ल ॱस्यो़च्च्ये मीप्पल झ्यीबेन्। 14 हज्यरङ्गी चोव ज्यीन्दक्की ङल थुज्यी छ्यीम्मु ॱनङ्न युङ्नी, खोङ्गी लम्नी ङ झ्यम्ब झ्यीत् छुगेल्ल धङ् खोङ्ल छ्य स्योक् छुगेल्ल झ्युङ्। 15 ख्रीष्ट् येशु दीक्च्येन् घयेत् छी थर्वल तो़न्दु जम्बुलीङ्ल झ्यो़म्ब हीम्बे केच्च्य हीगो धक्तेन् बेत्। हीगो नेम्बल ओ़ब यो़क्केन् बेत्। ॱनी म दी दीक्च्येन् घयेक्की चो दी ङ हीन्। 16 ॱनी हीन्न अक्, खोङ् घन्दुक्मे ङङ्रीन् छ्यीय यो़प्प बेक्क हुगी ॱमीदे दी ङे मीजीनी तो़न्ज्ये यो़प्पल खोङ्गी ङल हुन्दुक्मे ॱङीङ्ज्यी जेच्च्युङ्। हीगो खोङ्ल छ्य स्यक्न, फु तक्पे छी थोप्केन् तीङ्मा घयेक्की इक् थोङ्ज्ये यो़प्पल बेत्। 17 धी़ नम ज्यी़न्दु स्युगेङ्गी ज्याबु, कोलीमीगी ॱमीक्की ॱमीत् थोङ्गेन् धङ् छील थ मीप्पे को़न्ज्योक् च्यीगी च्यीक्ल तो़प्प धङ् तो़त्वङ् धी़ ज्यी़न्दु युङ् युङ युङ्ज्ये यो़प्प स्योक्च्यीत्। आमेन्। 18-19 ङे भु तीमोथी, रङ्गी ढीक्ल एल्ला युङे ॱङो़स्स्यीगी केच्च्य दी ढेन्सो़ झ्यीज्यीत्। हुल डीक्पे क च्यीक् रङ्ल हरुङ्द टो़क्केन्। रङ्गी छ्य स्यक्प दी तेम्बोक्म झ्यीन ॱसीम् सङ्बु खुर्न ॱनोङ् मीत् युङे लेमु झ्यीज्यीत्। हुन्दुक् झ्यीबे लम्नी खेजो़त् झ्यीन ॱमक् थुक्केन्दङ् छ्येत्मीत् थुक्च्यीत्। मी यरीगी ॱसीम् सङ्बु ॱमत् खुरल हुबे छ्य स्यक्प दी मीत्तल ॱसोङ बेत्। 20 हुब च्यीक् हैमेनीयस् धङ् च्यीक् अलेक्जेन्डर् बेत्। हुब ॱङीबी़ को़न्ज्योक्ल ॱमो़म्बी़त् तोङ्ज्ये मीप्पे ढीक्ल छर्की च्यो़च्च्येल हुब ॱङीबु शैतान्गी लक्ल ङे ची ज्यबेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.