१ थीस्सलोनीका 5 - ल्होमीयेशु झ्यो़म्बे धी़गी ढीक्ल १-११ 1 पी़न्ज्यासो, हुगी छीरङ् धी़दोक्की ढीक्ल खीत्रङ्ल यीगी ढी मीत् गो़ब यो़त्। 2 घन्ड हीन् सीन्न चोव ज्यीन्दक् झ्यो़म्बे छीरङ् धी़दोक् दी छेम्मु की़न्ज्येन् युङ डस्सी थोप्तक् मीत्ल झ्यो़ङ्गेन् बेत् सीर खीत्रङ्ल ॱस्यो़च्च्ये यो़क्केन् बेत्। 3 मी घयेक्की लुङ्बल स्यीव धङ् दीव दुक् सीरे कप्ल खोङ् झ्यो़ङ्गो़ट्टो ॱनो़ब मीप्प, भुमु भुजीमल कीस्सुक् लङ डस्सी थोप्तक् मीत्ल खोङ् झ्यो़न्न, हुब कुरीक्ल थर्सन मीप्पे ॱस्यीवे छ्येप्प फोक्केन् बेत्। 4 पी़न्ज्यासो, खीत्रङ् हुब डस्सी मेन्नक् ङो़गी मी मेम्बल हुगी यङ्ल हुगी ङीन् थोप्तक् मीत्ल की़न्ज्येन् युङ्न ॱहङ् टक्प डस्सी खीत्रङ्ल मीत् युङ्गेन् बेत्। 5 हज्यरङ् घयेत् छेम्मु मेन्नक् ङो़गी मेम्ब, ङीम्मु मेङ्गे ज्यी़त् बेत्। 6 हुगो झ्यीनी मी ॱयोङ्मा घयेत् ॱङीत्ल ॱसोङ डस्सी मत् झ्यीब, हज्यरङ् ॱसीम् ॱनो़जो़त् घङ्बी़ ॱवङ्ल ॱमत् तङ, ॱसीम् च्यङ्जो़त् झ्यीन दो़त् गोगेन् बेत्। 7 ॱङीत्ल ॱस्योर्नर घयेत् हुब छेम्मु ॱङीत् दीरङ् लोक् लोक्प दो़क्केन् बेत्। च्युर् थुङ्गेन् घयेक्की छेम्मुरङ् थुङ्न सी सीय झ्यीक्केन् बेत्। 8 हुब डस्सी मेम्ब, हज्यरङ् ङीम्मु मेङ्गे छ्योल यो़क्केन् झ्यीनी, ॱसीम् ॱनो़जो़त् घङ्बी़ ॱवङ्ल ॱमत् तङ दो़त् गोगेन् बेत्। हज्यरङ्गी छ्य स्यक्प दी धङ् झ्यम्सीम् दी ॱमक्मीगी ढङ्गोक् छ्योप्केन् च्यागी घो़ घो़म्ब डस्सी युङ् गोगेन् बेत्। ॱनी छी थर्व युङे रीगो दी ॱमक्मीगी गोल छ्योप्केन् च्यागी स्यमुङ् घो़म्ब डस्सी युङ् गोगेन् बेत्। 9 घन्ड हीन् सीन्न हज्यरङ् को़न्ज्योक्की खोङ्डोक्की छ्येप्प फोक्च्येल मेम्ब, चोव ज्यीन्दक् येशु ख्रीष्ट्की लम्नी छी थर्व थोप्च्येल दम्ब बेत्। 10 ख्रीष्ट् हज्यरङ्गी धो़न्दु ढोङ बेत्। ॱनी हुगो तीङ्ला खोङ् झ्यो़म्बे यङ्ल हज्यरङ् ॱमत् ॱस्यीयरङ् यो़त्, यङ् ॱस्यी छररङ् हीन्न अक्, खोङ्दङ् दल ॱसोम्बु दो़च्च्ये यो़प्पे ढीक्ल झ्युङ बेत्। 11 हीगी तम् हीगो खीत्रङ् च्यीक्तङ् च्यीक्ल ॱस्येत्न, ॱसीम्ल फेम्ब युङे ढीक्ल ॱलोप्स्यीक् टो़त्री चीज्यीत्। ॱनी हीम्ब त हुन्दो ओक् नुक् दीरङ् झ्यीक्को़ट्टो। छ्य स्योक्केन् घयेत्ल ॱलोप्स ॱनजो १२-२२ 12 पी़न्ज्यासो, ङ खीत्रङ्ल ॱलोप्स हीगो ज्यक्केनो। खीत्रङ्गी घुङ्दु चोव ज्यीन्दक्की लेगी ढीक्ल गेन् खुर्न कले च्येत्न खीत्रङ्ल ॱलोप्च्य तो़न्ज्य झ्यीक्केन् घयेत्ल खीत्रङ्गी हुबल ढक्पा हीम्ब ॱसम्ज्यीत्। 13 हुबे झ्यीबे लेगी ढीक्ल खीत्रङ् ॱयोङ्म घयेक्की हुबल तो़प्प धङ् झ्यम्ब छ्यीम्मु झ्यीज्यीत्। खीत्रङ् नङ्दु छ्यम्ब डीक्प झ्यीन दो़च्च्यीत्। 14 ॱनी पी़न्ज्यासो, खीत्रङ्ल हरुङ् ॱलोप्स ज्यक्केन् हीनो। खीत्रङ् नङ्दु ॱअर्स्यीय गीर्च्यम् ॱस्यो़क्केन् घयेत्ल लप्स्य तोङ्ज्यीत्। ॱङीङ् च्युङेत्मु च्येम्म घयेत्ल ॱलोप्स्यीक् टो़च्च्यीत्। ॱलोप्स्यीक् मीप्पे मी योक् योक्म घयेत्ल रोरम् झ्यीज्यीत्। मी कुरीक्तङ् ङङ्रीन् झ्यीज्यीत्। 15 ॱनी खीत्रङ्गी ॱसुल आक् ङेल्लेन् ॱमत् च्यो़ब, मी छ्यीनङ्मीत् कुरीक्ल छीगङ् गय झ्यीच्च्ये ॱनो़बे ॱसीम्ब खुर्च्यीत्। 16 खीत्रङ् ज्यी़न्दु ॱसीम् गव झ्यीज्यीत्। 17 ज्यी़न्दु ॱसुव तप् तब झ्यीज्यीत्। 18 खीत्रङ् ख्रीष्ट् येशुदङ् मत् ढेब यो़क्केन् घयेत्ल गदुक् घन्ड झ्युङ्न अक्, को़न्ज्योक्की थुल डीक्पल छीगङ् खोङ्ल थु छ्यी पु पुब झ्यीज्यीत्। 19 मी बरदङ् छ्येत्मीक्की धम्बे थुगी ले क ॱमत् च्यो़च्च्यीत्। 20 कबप् च्येम्मे कलुङ् ॱस्येप्पे केच्च्यल मक्का मत् झ्यीज्यीत्। 21 कुरीक् घन्डल अक् नम् च्येत्न तेन गागी ढङ् घयेत् दी च्यग झ्यीज्यीत्। 22 ङेम्बे ढङ् घयेत्नी भीन दो़च्च्यीत्। स्युक् जोबे तम् २३-२८ 23 खीत्रङ् रीदङ् री स्यीव दीव ॱनङ्गेङ्गी को़न्ज्योक् खोङ् रोरङ्गी धक्पर् जेङ् सो़न, हज्यरङ्गी चोव ज्यीन्दक् येशु ख्रीष्ट् फीच्च्य झ्यो़न् झ्यो़न् थुक्ल खीत्रङ्गी ली़सीम् छङ्मल ङीबे ज्यी़त् मीप्प दो़त् छुज्ये यो़प्प तोङ्। 24 खीत्रङ् भो़क्केङ्गी को़न्ज्योक् ज्युरुव मीप्प, तेम्बर् यो़क्केन् झ्यीनी, खोङ्गी हीगो डुप्केन् बेत्। 25 पी़न्ज्यासो, ङीक्की ढीक्ल अक् खीत्रङ्गी ॱसुव तोप्रो झ्यीज्यीत्। 26 खीत्रङ् पी़न्ज्या घयेक्की ङे छ्यक्सुम् थेमु हील ॱसीम् चङ्मे च्युप् झ्यीत्री चीज्यीत्। 27 हीगी यीगी हीगो खीत्रङ्गी पी़न्ज्या कुरीक्ल डोन बीन्ज्यीत् सीन्न ङे चोव ज्यीन्दक् पङ्दु स्यक्न यो़दो। 28 हज्यरङ्गी चोव ज्यीन्दक् येशु ख्रीष्ट्की थुज्यी खीत्रङ् घयेत्ल थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.