१ थीस्सलोनीका 4 - ल्होमीको़न्ज्योक् गुवे मीजी १-१२ 1 हरुङ् पी़न्ज्यासो, को़न्ज्योक् गुवे मीजीगी लेमु खीत्रङ्गी ङीत् च्यानी ॱस्यीगेन् बेत्। ॱनी हुगो डस्सी दीरङ् खीत्रङ्गी झ्यीक्को़प्पेत्। ॱनी हरुङ् मङ्दु मङ्दु झ्यीज्यीत् सीन्न ङीत् चोव ज्यीन्दक् येशुगी छेन्नी ॱलोप्स ज्यक्केन् हीनो। 2 चोव ज्यीन्दक् येशुगी ॱवङ्नी ङीक्की खीत्रङ्ल हुदु टेप्पे क घयेत् खीत्रङ्ल ॱस्यो़च्च्ये यो़क्केन् बेत्। 3 को़न्ज्योक्की थुल डीक्पल खीत्रङ्गी मीजीगी लेमु दी धक्पर् युङ झ्यीज्यीत्। छ्येगी ढङ्नी भीन दो़च्च्यीत्। 4-5 को़न्ज्योक् ॱस्यो़च्च्ये मीप्पे मी ॱयोङ्म घयेत् डस्सी छ्येलङ्ल ॱमत् ॱस्योर, खीत्रङ् धक्पर् धङ् ओ़ब युङ्ज्येल ॱसोस्सोरङ्गी सी़गी छ्येलङ् ॱनो़न् ॱस्यीब झ्यीज्यीत्। 6 हीगी ढीक्ल खीत्रङ् पी़न्ज्या नङ्जोदु रङ् रङ् ॱसोस्सो़ युङ्ज्यी़गी लेमुल तेन ङीब मत् झ्यीज्यीत्। हीगी लेन् चोव ज्यीन्दक्की च्यो़गेन् बेगो। एल्लादु उक् हीगो खीत्रङ्ल गन्दीक्म ॱस्येत्न स्यक्पेन्। 7 को़न्ज्योक्की हज्यरङ् हुन्दुक् झ्यीबे चङ्ज्ये मीप्पे लेमु झ्यीच्च्येल भो़ब मेम्ब, धक्पर् हीम्ब युङ्ज्येल भो़ब बेत्। 8 हील मी ॱसी़ मेम्बेत् सीगुक्क हुगी तम् हुगो मील सीक्केन् मेम्ब, खीत्रङ्ल धम्बे थु ॱनङ्गेन् को़न्ज्योक्ल लेन् ज्यबल डोगेन् बेत्। 9 खीत्रङ् पी़न्ज्या नङ्दु युङ् गोगेङ्गी झ्यम्बे ढीक्ल को़न्ज्योक्कीरङ् खीत्रङ्ल तो़न्न ॱलप्तुक्। ङीक्की हुगी ढीक्ल घन्ड अक् ढीन तोङ् गो़दोक्प मीन्दुक्। 10 ॱनी गन्दीय खीत्रङ्गी मासीडोनीयागी लुङ्ब की़ल्ल यो़क्केन्, पी़न्ज्या घयेत्ल झ्यम्ब झ्यीक्कुक्। ॱनी पी़न्ज्यासो, हुगो खीत्रङ्गी हरुङ् ज्यीक्तु ज्यीक्तु झ्यीज्यीत् सीन्न ङीत् ॱलोप्स ज्यक्केन् हीनो। 11 ङीक्की एल्ला ॱलोप्स ज्यब दील पीब खीत्रङ् ॱयोङ्गी लेल लेदम् च्योक्तु मत् डोव, हुट्ट मीप्प ॱसोस्सोरङ्गी ले झ्यीज्यीत्। ॱयोङ्ल ढोप्प ॱमत् केब, ॱसोस्सोरङ्गी लक्पे ले झ्यीन ॱसोज्यीत्। 12 हुनी क छ्यी मी घयेक्की खीत्रङ् गस्सी हीम्ब छोर्केन् बेत्। ॱनी खीत्रङ्ल गो़बे खोज्येत् घयेक्की ढीक्ल अक् ॱसुल आक् गेन् को़ मीत् गो़ब युङ्गेन् बेत्। छ्य स्योक्केन् ॱस्यीनर घयेक्की ढीक्ल १३-१८ 13 पी़न्ज्यासो, खीत्रङ्ल गन्दीक्म ॱस्यो़च्च्ये मीप्पे केच्च्य च्यीक् मी ॱस्यीन खुर घयेत्ल घन्दुक् झ्यीब युङ्गेन् बेक्क हुगो तो़ङ्गेन् हीनो। स्येन् रीगो मीप्पे मी ॱयोङ्मा डस्सीगी नङेन् खीत्रङ्ल आक् युङ्गेन् बेत्। 14 येशु ढोङ्नी, यङ् ॱसोम्बुल लोङ बेत् सीक्केल्ल हज्यरङ्गी छ्य स्यक्न यो़क्केन् बेत्। ॱनी हुगो झ्यीनी छ्य स्योक्केन् ॱस्यीनर घयेत् येशु झ्यो़म्बे यङ्ल खोङ्दङ् दल युङ्ज्येल को़न्ज्योक्की ॱलोङ्न ठीक्केन् बेत्। 15 चोव ज्यीन्दक्की ॱसुङे केच्च्य हीगो खीत्रङ्ल ङे ॱस्येत् योङ्। चोव ज्यीन्दक् फीच्च्य झ्यो़न् झ्यो़न् थुक्ल हज्यरङ् ॱमत् ॱस्यीय दो़क्को़ट्टो। ॱनी हुगी यङ्ल ॱस्यीनर घयेत् हुबले हज्यरङ् एल्ला थो़न् ॱमीत् छुगेन् बेत्। 16 घन्ड हीन् सीन्न को़न्ज्योक्की तेङ् यी़गी भङ्ज्येम्ब चो छ्यीम्मु च्यीक्ल स्यागो़त् ॱनङ्न, हुगी केत् छ्यीम्मु तो़न्न, को़न्ज्योक्की कङ्लीङ्गी केत् छ्यीम्मु थो़म्बे यङ्ल चोव ज्यीन्दक् खोङ् इगीनी मल्ल झ्यो़ङ्गेन् बेत्। ॱनी ख्रीष्ट्ल छ्य स्योक्केन् एल्ला ॱस्यीनर घयेत् दी हुगी यङ्ल ॱएन्स्युक्ल ॱसोम्बुल लोङ्गेन् बेत्। 17 हुनी हुगी यङ्ल हस्सो़त् हज्यरङ् ॱमत् ॱस्यीय यो़क्केन् घयेत् दी इक् चोव ज्यीन्दक् ठेत्तु ॱनम्ल ॱमुबे दल हुबदङ् कङ्ज्यीक्ल ॱरीप् घङ्ल तो़ङ्गेन् बेत्। हुनी फुगी चोव ज्यीन्दक्तङ् दल दो़च्च्ये ॱनोङ्गेन् बेत्। 18 हीगी तम् हीगो खीत्रङ् च्यीक्तङ् च्यीक्ल ॱस्येत्न ॱलोप्स्यीक् टो़त्री चीज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.