१ थीस्सलोनीका 3 - ल्होमीॱलोप्स्यीक् टो़त्तु तीमोथी तङे तम् १-५ 1 ङीत् हुनी घीन युङ्नी, एथेन्स् सार्तु दो़प्पे यङ्ल खीत्रङ्सो ढेन्सी झ्युङ दी गुर् ॱमत् छुबल तीमोथी खीत्रङ् च्येल्ल तङेन्। ॱनी ङीत् ॱयोङ्म घयेत् हुदुरङ् देप्पेन्। 2-3 ख्रीष्ट्की ढीक्की केच्च्य ॱनेम्बु टोम्गेन् को़न्ज्योक्की ले झ्यीक्केन् ङीक्की छ्यीट्टो हज्यरङ्गी पी़न्ज्या तीमोथी तोङ्ज्ये दी खीत्रङ्ल नोङे दुक्प हुल खीत्रङ् योक् ठी़त् मीप्प दो़त् छुज्ये यो़प्पे ढीक्ल, खीत्रङ्गी छ्य स्यक्प दी डम्दु सोदु धङ् ॱलोप्स्यीक् टो़त्तु सीन्न तङेन्। म दी हज्यरङ् हुन्दुक् झ्यीबे दुक्प नोङ्ज्येगी ढीक्ल अक् खो़प्प बेत्। हीगो खीत्रङ्ल ॱस्यो़च्च्ये यो़क्केन् बेत्। 4 हुदु दो़प्पे यङ्ल ङीक्की खीत्रङ्ल हज्यरङ् घयेत्ल छ्यी मी घयेक्की दुक्प अयेक्प तोङ्गेन् बेत् सीन्न ॱस्येप्प दी खीत्रङ्ल ॱस्यो़च्च्ये यो़क्केन् बेत्। ॱनी ह हुगो झ्युङ्सोङङ् ॱनी। 5 हुगो झ्यीनी ङ गुर् ॱमत् छुबल खीत्रङ्गी छ्य स्यक्प दी डम्लो़त् यो़त् तदु तीमोथी तोङ् गो़ ॱस्यर्च्युङ्। दीक्पल च्युगेन् दी़त् हुगी खीत्रङ् छ्यी़दु ची़त्न, ङीक्की कप्ले च्येप्प घयेत् दी धो़म्मीत्ल ॱसोङ हीम्ब न ॱनो़न ङ ॱसीम्दुक् लङ्ज्युङ्। तीमोथीगी लो़न् खुर्न युङ ६-१३ 6 ॱनी तीमोथी खीत्रङ् च्येन्नी युङ्नी, खीत्रङ्गी छ्य स्यक्न युङे लेमी़ तम् धङ् झ्यम्बे ढीक्की तम् ॱनेन्सी ॱस्येच्च्युङ्। ॱनी खीत्रङ्गी ङीत् दो़न्दो़त् ढेम्ब झ्यीन ङीक्की खीत्रङ् ठेक्कीन् थेप्प डस्सी खीत्रङ्गी इक् ङीत् ठेक्कीन् थेप्प झ्यीगुक् सीर ॱह घोज्युङ्। 7 पी़न्ज्यासो, खीत्रङ्गी छ्य स्यक्प दी डम्सी दुक् सीर ॱह घोनी, ङीत्ल नोङे दुक्ङा धङ् दुक्प हील ॱलोप्स्यीक् ॱङीच्च्युङ्। 8 खीत्रङ् चोव ज्यीन्दक्तङ् मत् ढेब थीरी दो़क्कुक् सीर ॱह घोनी, ङीक्की ॱसीम्दुक् दी येन ॱसीम्ब लो दीय झ्युङ्। 9 खीत्रङ्गी ढीक्नी को़न्ज्योक्की ढुङ्दु ङीत्ल गेस छ्यीम्मु झ्युङे लेल्ल खोङ्ल ङीक्की घजो़त् थु छ्यी पुन आक्, खोङ्गी ढीन् ॱमीत् छ्यो़ब यो़त्। 10 खीत्रङ् ठेत्तु धङ् खीत्रङ्गी छ्य स्यक्पे लेमु घयेत् छङ युङल ङीत् हुदु युङ् छुज्ये यो़प्पल सीन्न को़न्ज्योक्ल ङीक्की ङीन् छेन् मीप्प स्युदेन् ज्यक्को़त्। 11 हज्यरङ्गी यप् को़न्ज्योक् खोङ् रोरङ् धङ् चोव ज्यीन्दक् येशुगी ङीत् खीत्रङ् च्याल युङ् छुज्ये यो़प्पल लम् ॱसेज्ये यो़प्प तोङ्। 12 ङीक्की खीत्रङ्ल झ्यम्ब यो़प्प डस्सी खीत्रङ्गी च्यीक्तङ् च्यीक्ल धङ् मी कुरीक्ल झ्यम्ब झ्यीक्केङ्गी झ्यम्सीम् दी चोव ज्यीन्दक्की हरुङ् छ्यीदु डोदु ची़च्च्ये यो़प्प तोङ्। 13 हज्यरङ्गी चोव ज्यीन्दक् येशु खोङ् रोरङ्गी मी चङ्म घयेत्तङ् दल इगीनी मल्ल झ्यो़म्बे यङ्ल हज्यरङ्गी यप् को़न्ज्योक्की ढुङ्दु खीत्रङ् धक्पर् हीम्ब धङ् ङीबे ज्यी़त् मीप्प थो़न् छुज्ये यो़प्पल खीत्रङ्गी ॱसीम् दी चोव ज्यीन्दक्की तेम्बोक्म सोज्ये यो़प्प तोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.