१ थीस्सलोनीका 2 - ल्होमीथीस्सलोनीकादु पावल्की झ्यीबे ले १-१६ 1 पी़न्ज्यासो, ङीत् हुदु खीत्रङ्गी घुङ्दु देप्प दी धो़म्मीत्ल ॱमत् ॱसोङ हीम्ब खीत्रङ्ल ॱस्यो़च्च्ये यो़क्केन् बेत्। 2 ॱनी हुले एल्ला फीलीप्पी सार्तु ङीत्ल मी घयेक्की घन्दुक्मे दुक्प तङ्न ॱम पब बेक्क हुगो ओक् खीत्रङ्ल ॱस्यो़च्च्ये यो़क्केन् बेत्। ॱनी खीत्रङ् च्येल्ल ॱलीत्नी, हुदु उक् ङीक्की डल मी गज्येन् लोङ्ज्युङ्। ॱनी हीन्न अक्, हज्यरङ्गी को़न्ज्योक्की दगु जेत्नी, खोङ्गी केच्च्य ॱनेम्बु ज्यीक्टक् मीप्प, ङीक्की खीत्रङ्ल ॱस्यो़त् छुज्युङ्। 3 खीत्रङ्ल ङीक्की ॱस्येप्पे केच्च्य हुगो ॱयोज्यी़ ठम्ज्यी़गी केच्च्य मेन्। ॱसीम् चङ्ज्ये मीप्प खुर्न ॱस्येप्प आक् मेन्। गो़गोर् तोङ्गेङ्गी केच्च्य आक् मेन्। 4 को़न्ज्योक्की केच्च्य ॱनेम्बु ॱस्यो़क्केल्ल ङीत् ओ़ब थोङ्नी खोङ्गी को़न ॱस्यो़त्तु तङ्ज्युङ्। हीगो ङीक्की मी गुदोप्ल मेम्ब, ॱसीम्ल तगेङ्गी को़न्ज्योक् गुवे तम् ॱस्यो़क्को़त्। 5 ॱनी हीगो ओक् खीत्रङ्ल ॱस्यो़च्च्ये यो़क्केन् बेत्। हुदु ङीक्की खीत्रङ्ल तो़च्च्य की़च्च्येगी ढीक्ल अक् मत् झ्ये। घन्ड थोप् योङ ॱनो़न लोप् ओप् मत् झ्ये। हील को़न्ज्योक् पङ्बु यो़क्केन् बेत्। 6 ॱनी खीत्रङ् धङ् मी ॱयोङ् ॱसी़ च्यानी इक् ङीत्ल तो़प्प युङ्गो़दङ् ॱनो़न ॱयेङ मेन्। 7 हीम्ब त ङीत् ख्रीष्ट्की ठीक्नल हीन्। ङीत्ल खीत्रङ्गी तो़प्प झ्यीत् ओ़ब त यो़त्। ॱनी यो़त्न अक्, हुगो ङीक्की ॱमत् ॱयेङ, बोर भीज भीरुक्ल च्यीब झ्यीक्केङ्गी आमदङ् छ्येत्मीत् झ्यीन देप्पेन्। 8 खीत्रङ्ल ङीक्की च्यीब झ्यम्ब झ्यीक्कीन् थेच्च्युङ्। हुगो झ्यीनी खीत्रङ्ल को़न्ज्योक्की केच्च्य ॱनेम्बु दी ॱसीम् गव झ्यीन ॱस्यो़च्च्ये ॱनो़ब छ्युवक् मेम्ब, ङीक्की ली़सीम् दीरङ् जेङ् खीत्रङ्ल टो़त् गो़ ॱस्यर्न आक्, टो़त् छुबे ॱसीम् झ्युङ्। घन्ड हीन् सीन्न खीत्रङ् ङीक्की झ्यम्बे मील झ्युङ बेत्। 9 पी़न्ज्यासो, खीत्रङ्ल हुदु को़न्ज्योक्की केच्च्य ॱनेम्बु ॱस्यो़प्पे यङ्ल ङीक्की ॱसुल आक् गेन् ॱमत् केब, ङीत् ङीत्रङ्गीरङ् ङीन् छेन् मीप्प, कप्ले च्येत्न दुक्स्यी गुर्न सेबेन्। हुगो खीत्रङ्गी ढेङ्गी ॱसो़गो़ट्टो। 10 खीत्रङ् छ्य स्योक्केन् घयेक्की घुङ्दु ङीक्की ॱसीम् चङ्म खुर्न ङीबे ज्यी़त् घन्ड अक् मत् झ्यीब, ढङ्बु झ्यीन देप्पेन्। हील खीत्रङ् धङ् को़न्ज्योक् पङ्बु यो़क्केन् बेत्। 11-12 ङीक्की खीत्रङ् रीदङ् रील पबे भीजल तेबे लेमु डस्सी झ्यीबेन्। को़न्ज्योक्की खोङ् रोरङ्गी ज्यागक् धङ् तो़त्वङ्गी ओ़च्च्य च्येम्मे ॱसज्यल खीत्रङ् भो़ब बेत्। हुगो झ्यीनी खोङ् थु गुवे लम्ल खीत्रङ् डोवल ओ़ब युङे लेमु झ्यीन युङ्ज्ये यो़प्पल ङीक्की छीगङ् खीत्रङ्ल ॱलोप्स ज्यप्न ॱलोप्स्यीक् टेप्पेन्। ॱनी हीगो कुरीक् खीत्रङ्लरङ् ॱस्यो़च्च्ये यो़क्केन् बेत्। 13 ङीक्की हुदु ॱस्येप्पे केच्च्य दील खीत्रङ्गी हीगो मी केच्च्य मेम्ब, को़न्ज्योक्की ॱसुङ्स्येत् बेत् ॱनो़ब ॱसम्न नेन्सोङ्। ॱनी हुगो खुङ्देन् को़न्ज्योक्की ॱसुङ्स्येत् दीरङ् बेत्। ॱनी हीगी खीत्रङ् छ्य स्योक्केन् घयेक्की ॱसीम्ल फेन् थोगेङ्गी ले डुप्केन् बेत्। हीगी ढीक्ल अक् ङीक्की को़न्ज्योक्ल छीगङ् थु छ्यी पु पुब झ्यीक्को़त्। 14 ख्रीष्ट् येशुदङ् मत् ढेब यो़क्केन् यहुदीया लुङ्बे को़न्ज्योक्की छ्यो़ छो घयेत्ल झ्युङ डस्सी खीत्रङ् पी़न्ज्यासोल आक् झ्युङ बेत्। हुब घयेत्ल यहुदी घयेक्की दुक्प तङ डस्सी खीत्रङ्ल आक् खीत्रङ्गी लुङ्बे मी घयेक्की दुक्प तङ बेत्। 15 यहुदी घयेत् हुबे चोव ज्यीन्दक् येशु उक् ॱसेत् तङ बेत्। धङ्बु कलुङ् ॱस्यो़क्केन् घयेत् एत् थो़न्न युङ् रीम्बे हुबे ॱसेप्प बेत्। ॱनी ङीत्ल अक् दुक्प तङ्न दीच्च्युङ्। हुगो को़न्ज्योक् मीत् गुवे ले धङ् मी कुरीक्की डल लोङल डोगेन् बेत्। 16 यहुदी घयेत् हुबे ङीत्ल थर्वे लम्गी केच्च्य दी ज्यी़त् ॱयोङ् ॱयोङ्गी मी घयेत्ल ॱस्यो़त्तु ॱमीत् ची़प्प, हुबे क च्यो़त् छुब झ्यीक्केन् बेत्। हुन्दुक् झ्यीन हुबे गोमनी दीक्प ॱसान युङ दी ह छङ् डोगेन् बेत्। हुनी हुब घयेत्ल ह को़न्ज्योक्की खोङ्डोक्की छ्येप्प फोक्केन् बेत्। थीस्सलोनीका सार्ल पावल् डोगीन् थेप्प १७-२० 17 पी़न्ज्यासो, खीत्रङ्दङ् ङीत् धोबा च्यीक्की ढीक्ल घी गो़ ॱस्यर्नी, घीन युङेन्। ॱनी हीन्न अक्, ॱसीम् दी खीत्रङ्दङ् ॱल्हङील दुक्। खीत्रङ् ढेन्सी दुक्। हुगो झ्यीनी ङीत् ठेत्तु युङ्ज्येल चम्बेन्। 18 ङीत् खीत्रङ् ठेत्तु युङ्ज्ये ॱनो़गुक्। ङ पावल्की लेम्म गज्येन् चम्न युङ्ज्ये ॱनो़ब झ्यीबेन्। ॱनी शैतान्गी क च्येत्नी, ङीत् युङ् छुमोङ्। 19 चोव ज्यीन्दक् येशु झ्यो़न्नी, खोङ्गी ढुङ्दु हज्यरङ् ॱलीत्न, हुदु ङीक्की रीगो, गेस धङ् ज्येल थोप्केन् थोप् छ्यीम्मी़ स्यमुङ्गी ङोम्ज्येत् दी खीत्रङ्सो युङ्गेन् बेत्। 20 ॱनी ङीत्ल तो़प्प धङ् गेस युङे खुङ् चव दी खीत्रङ्सो बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.