१ थीस्सलोनीका 1 - ल्होमी1 ङ पावल्, सीलास् धङ् तीमोथी झ्यीबे खीत्रङ् उन थीस्सलोनीका सार्न यो़क्केन्, यप् को़न्ज्योक् धङ् चोव ज्यीन्दक् येशु ख्रीष्ट्तङ् मत् ढेबे छ्यो़ छोल हीगो ढीन तोङ्गो़त्। खीत्रङ् घयेत्ल इगीनी थुज्यी धङ् ॱसीम् दीव युङ्ज्ये यो़प्प तोङ्। थीस्सलोनीकाबागी ढीक्ल थु छ्यी पुब २-१० 2 ङीक्की ॱसुव तोबे यङ्ल खीत्रङ् ढेन्सो़ झ्यीन खीत्रङ्गी ढीक्ल छीगङ् को़न्ज्योक्ल थु छ्यी पु पुब झ्यीक्को़त्। 3 खीत्रङ् घयेक्की छ्य स्यक्पे लेमुल पीबे ले झ्यीब, कले च्येत्न झ्यम्बे ले झ्यीब धङ् चोव ज्यीन्दक् येशु ख्रीष्ट्ल खीत्रङ्गी रीगो झ्यीन यो़प्पल गुर् थेक्पे धु हुगो ङीक्की छीगङ् हज्यरङ्गी यप् को़न्ज्योक्की ढुङ्दु ढेन्सो़ झ्यीन तो़ङ्गो़त्। 4 को़न्ज्योक्की झ्यम्बे पी़न्ज्यासो, खीत्रङ् घयेत् को़न्ज्योक्की दम्बे लेमु ङीत्ल ॱस्यो़च्च्ये यो़त्। 5 एल्ला ङीक्की खीत्रङ्ल ॱस्येत्न टेप्पे केच्च्य ॱनेम्बु हुगो ङीक्की नुक्रङ्गी केच्च्य मेम्ब, ङीत्ल धम्बे थुगी ॱस्यीक् ॱङीत्न, दीम्बरङ्गी केच्च्य हीन्। हुगी यङ्ल खीत्रङ्ल फेम्ब युङल ङीक्की झ्यीबे छ्यलु दी खीत्रङ्ल ॱस्यो़च्च्ये यो़क्केन् बेत्। 6 हुनी हुगी यङ्ल खीत्रङ्गी ङीत् धङ् चोव ज्यीन्दक्की ॱमीदेल तेन दो़क्को़त्। हुगी यङ्ल खीत्रङ्ल छ्यी मी घयेक्की दुक्प अयेक्प गज्येन् तङ्न आक्, ङीक्की केच्च्य दील छ्यप्स्यक् स्यक्न नेन्न धम्बे थुगी लम्नी खीत्रङ् गेस झ्युङ बेत्। 7 हुगो झ्यीनी खीत्रङ् मासीडोनीया धङ् अखैयागी लुङ्बे छ्य स्योक्केन् घयेत्ल ॱमीदे तो़ङ्गेल्ल झ्युङ्सोङ्। 8 खीत्रङ्गी हुनी चोव ज्यीन्दक्की केच्च्य दी मासीडोनीया धङ् अखैयागी लुङ्बल टम्न ॱस्येप्प छ्युवक् मेम्ब, खीत्रङ्गी को़न्ज्योक्ल छ्य स्यक्न युङे लेमी़ केच्च्य दी इक् घल अक् धर्न खुर्तुक्। हीगी ढीक्ल खीत्रङ्ल ङीक्की तम् ॱयोङ् घन्ड अक् ॱस्यो़त् गो़दोक्प मीन्दुक्। 9 घन्ड हीन् सीन्न मी ॱयोङ् ॱयोङ्गी इक् हीन्दुक् सीन्न च्योर्कुक्। ङीत् खीत्रङ् च्येन्दु दो़प्पे यङ्ल खीत्रङ्गी ॱल्ह धङ् कु घयेत् ॱलो़ तङ्न ॱसोम्बु खुङ् हीम्बे को़न्ज्योक्ल धेप्प झ्यीदुक्। 10 ॱनी स्युक् थमल को़न्ज्योक्की खोङ्डोक्की छ्येप्प को़गेन् हुगी लक्नी छ्यीगेन्, ढोङ्नरनी ॱसोम्बुल खोङ्गी ॱलोङ्न यो़क्केन्, खोङ्गी ॱरेबु येशु तेङ् यी़नी मल्ल झ्यो़म्बल खीत्रङ् गुक्कीन् दो़क्कुक् सीर ॱह घोज्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.