१ पत्रुस् 5 - ल्होमीगोयो़प्प घयेत्ल ॱलोप्स १-४ 1 खीत्रङ् छ्यो़ छोगी गोयो़प्प घयेस्सो, ङ अक् खीत्रङ्दङ् ले च्यीक्की छ्यीट्टो, ख्रीष्ट्ल दुक्स्यी नोङ थोङ्गेङ्गी पङ्बु धङ् ॱनी तीङ्ला खोङ् इगीनी मल्ल झ्यो़म्बे यङ्ल तो़त्वङ्गी फक् थोप्केन् च्यीक् हीन्। खीत्रङ्ल ङ ॱलोप्स हीगो ज्यक्केनो। 2 खीत्रङ्गी गेल्ल यो़प्पे को़न्ज्योक्की लुक् घयेत् ॱसो़ज्यीत्। हीगो खेरक्की झ्यीत् गोगो़त् ॱनो़ब मेम्ब, को़न्ज्योक्की थुल यो़प्पल ॱसम्न ॱलो़लङ्गी झ्यीज्यीत्। लोप् झ्यीन पयीसक् ॱसक्च्ये ॱनो़बे ढीक्ल मेम्ब, ॱसीम्बे यीक्नी झ्यीच्च्ये ॱनो़ब ॱसम्न झ्यीज्यीत्। 3 खीत्रङ्गी हुबल ॱवङ्यो़त् तङ्न मेम्ब, हुबल ॱमीदे तो़न्न लम्बा झ्यीज्यीत्। 4 तीङ्ला लुक्चीब चो छ्यीस्स्यो इगीनी मल्ल झ्यो़म्बे यङ्ल खीत्रङ्ल तो़प्प च्येम्मे फु तक्पे थोप् छ्यीम्मी़ स्यमुङ् थोप्केन् बेत्। ॱवङ्गी होक्ल दो़त् गोगेन् ५-७ 5 हीनी यङ् स्यो़म्बसो, खीत्रङ् छ्यो़ छोगी गोयो़प्प घयेक्की होक्ल दो़च्च्यीत्। ॱनी म दी खीत्रङ् कुरीक् च्यीक्तङ् च्यीक्ल ॱनोम्ज्युङ् झ्यीत्री चीज्यीत्। हीगी ढीक्ल ॱसुङ्रप्ल ज्यीङ्ब बोम्सी झ्यीक्केल्ल को़न्ज्योक्की ड झ्यीक्केन् बेत्। ॱनी ॱनोम्ज्युङ् झ्यीक्केल्ल यङ् थुज्यी ॱनङ्गेन् बेत् सीर थो़ङ्गेन् बेत्। (पीस्येत् ३:३४) 6 हुगो झ्यीनी खीत्रङ् को़न्ज्योक्की ॱस्यीक् छ्यीम्मी़ छ्यक्की ॱवङ्गी होक्ल रङ्स्यीगी घुक्न ॱनोम्ज्युङ् युङ झ्यीज्यीत्। हुनी खोङ्गी धी़जो़त् दी ॱलीत्नी, खीत्रङ् छ्यीयाल तो़त्न स्योक्केन् बेत्। 7 खीत्रङ्गी च्युगा गेन् घयेत् खोङ्ल को़ज्यीत्। खोङ्गी खीत्रङ्ल थुज्यी सीगेन् बेत्। शैतान्दङ् थुक्न थीरी दो़त् गोगेन् ८-११ 8 खीत्रङ्गी ॱसीम् दी ॱनो़जो़त् घङ्बी़ ॱवङ्ल ॱमत् तोङ, च्यङ्जो़त् झ्यीन दो़च्च्यीत्। खीत्रङ्गी ड दी़क्की चो हुगी खीत्रङ् ॱसु रीमीक् ज्यक्च्ये ब अक् ॱनो़न ॱसेङ्गी ङर्न गीर डस्सी झ्यीक्केन् बेत्। 9 जम्बुलीङ् घल अक् खीत्रङ्गी छ्य च्यीक्की पी़न्ज्या घयेत्ल खीत्रङ्ल नोङे दुक्प डस्सीरङ् गुर् गो़ ॱस्यर्केन् बेत् ॱनो़ब खुर्न खीत्रङ्गी छ्य दी डम्बोक्म स्यक्न शैतान् हुगी डल लोङ्न थुक् थुक्प झ्यीज्यीत्। 10 थुज्यी छ्यीम्मु च्येम्मे को़न्ज्योक्की ख्रीष्ट्तङ् मत् ढेबल खीत्रङ् खोङ् रोरङ् झ्यीस्स, फुस तक्पे तो़त्वङ्गी ओ़च्च्य च्येम्मे ॱसज्यल भो़न यो़क्केन् बेत्। खीत्रङ्ल हुन्दो ॱरीप्चो़त् च्यीक् दुक्प नोङ हुगो गुर्नी, हुनी खोङ्गी खीत्रङ्ल ॱलोप्स्यीक् ॱनङ्न चव छुदु ची़त्न डम्बोक्मल सोगेन् बेत्। 11 खोङ्गी ॱवङ्ग धी़ नम ज्यी़न्दु युङ् युङ युङ्ज्ये यो़प्प स्योक्च्यीत्। आमेन्। स्युक् जोबे तम् १२-१४ 12 ङे यीगी च्युङ्ज्युङ् हीगो ढीन तोङल ङे ॱलो खीबे पी़न्ज्या सीलास्की दगु झ्यीज्युङ्। हीगो खीत्रङ्ल ॱलोप्स्यीक् टो़च्च्येल धङ् को़न्ज्योक्की थुज्यी हज्यरङ्ल ॱनङ दी खुङ् हीम्ब धक्च्येल हीन्। ॱनी हीगी थुज्यीगी लम्ल खीत्रङ् थीरी दो़च्च्यीत्। 13 बेबीलोन् सार्न यो़प्पे खीत्रङ्दङ् च्यीक्प दम्बे छ्यो़ छोगी मी घयेत् धङ् ङे भु डस्सी मर्कुस्की इक् खीत्रङ्ल छ्यक्सुम् थेमु सीगुगो। 14 खीत्रङ् नङ्दु च्यीक्तङ् च्यीक्ल झ्यम्बे च्युप् झ्यीत्री चीज्यीत्। ख्रीष्ट्तङ् मत् ढेबल खीत्रङ् घयेत्ल ॱसीम् दीव युङ् युङ युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.