१ पत्रुस् 4 - ल्होमीदीक्प फोङ् गोगेन् १-६ 1 ख्रीष्ट्की खोङ् रोरङ्गी सी़ल दुक्स्यी गुर डस्सी खीत्रङ् ॱअङ् दुक्स्यी गुर्च्ये ॱनो़बे ॱसीम् खुर्न दो़च्च्यीत्। ॱनी सी़ल दुक्स्यी गुर् छरे मी दीक्प मीत् झ्यीक्केन् बेत्। 2 हुगी रोरङ्गी मीजी भोर्ल ॱसीम्बे धेत्मो़ ङेम्बे कोलीमी लेमु मीत् झ्यीप्प, को़न्ज्योक्की थुल यो़प्पे लेमुल डीक्प झ्यीन दो़क्केन् बेत्। 3 एल्ला खीत्रङ्गी इक् को़न्ज्योक् ॱस्यो़च्च्ये मीप्पे मी ॱयोङ्म डस्सी छ्येल ॱनक्सी झ्यीक्केन्, धेत्मो़ ङेम्बे ॱवङ्ल तोङ्गेन्, च्युक्कोङ, छ्यङ्दुङ् तोमल जोम्न ॱमम्बी ॱलोङ्गेन्, ॱल्ह धङ् कुल छ्यक् छ्यो़प्प पुगेन् स्यीलोक्सीगी ले झ्यीक्केन् यो़क्केन् बेत्। 4 ॱनी यङ् हुन्दो खीत्रङ् हुगो डस्सी ॱनोक्सम् मीप्पे लेमु अयेक्प मीत् झ्यीप्प दी खीत्रङ्गी दगु ॱएम्मा दीबे थोङ्नी, घन्डे मी ब अक् ॱनो़न हुबे खीत्रङ्ल खङेन् डस्सोक् झ्यीक्केन् बेत्। 5 ॱसोम्बु धङ् ॱस्यीनर ॱङीक्कर्ल ठीम् च्यो़च्च्येम ठोक्क झ्यीन यो़क्केन् को़न्ज्योक्ल हुबे झ्यीबे लेगी चीस्यी घयेत् दी ॱस्यो़त् गो़ ॱस्यर्केन् बेत्। 6 हुगी ॱस्यीनर घयेत् हुल केच्च्य ॱनेम्बु ॱस्यो़च्च्येगी धो़न् दी हुब कोलीमी झ्यीनी, हुबल ॱस्यी गो़ ॱस्यरे छ्येप्प फोक्न ॱस्यस्सी़ दी ॱस्यीय हीन्न अक्, ॱसीम् दी यङ् ॱसोम्बु को़न्ज्योक् डस्सी युङ्ज्ये यो़प्पल बेत्। को़न्ज्योक्की कबप् खो़लु ७-११ 7 ह छङ्म थम्ज्येत् कुरीक्ल थमे धी़ ॱस्यच्चल ॱलीत् छर बेत्। हीगो झ्यीनी खीत्रङ्सो ॱसुव तप् तब झ्यीत् छुज्ये यो़प्पल च्यङ्जो़त् झ्यीन खीत्रङ्गी ॱसीम् दी ॱनो़जो़त् घङ्बी़ ॱवङ्ल ॱमत् तङ दो़च्च्यीत्। 8 ॱनी गो़स्योल खीत्रङ् नङ्जोदु च्यीक्तङ् च्यीक्ल ॱसीम्बे यीक्नी झ्यम्ब झ्यीत् गोगेन् बेत्। झ्यम्ब झ्युङ्न ॱनी, घन्दुक्मे दीक्परङ् यो़त्न अक्, हुगो ये डोगेन् बेत्। 9 खीत्रङ् च्याल च्यीक्तङ् च्यीक् डोम्बु युङल छीर धङ् मक्का मत् झ्यीप्प, हुल ॱनेजङ् ॱयोर्च्यीत्। 10 खीत्रङ् रीदङ् रील को़न्ज्योक् च्यानी थोबे थुज्यीगी कबप् दी च्यीक्तङ् च्यीक्ल फेन्दो युङे ढीक्ल झ्यीज्यीत्। खीत्रङ्ल को़न्ज्योक्की कबप् ॱनजो ॱनङ दी खीत्रङ्गी गन्दीक्म झ्यीन खो़न युङ् गोगेन् बेत्। 11 हीन्दुक् झ्यीन मी ॱसी़ को़न्ज्योक् ङो़गी केच्च्य ॱस्यो़क्को़दङ् हुगी को़न्ज्योक्की ॱनङे ॱसुङ्स्येत् ॱस्यो़क्केन् हीम्ब डस्सी ॱस्यो़त् गोगेन् बेत्। ॱनी यङ् मी ॱसी़ ॱयोङ्ल फेम्बे ले झ्यीक्को़दङ् हुगी को़न्ज्योक्की ॱनङे ॱस्यीक्की झ्यीत् गोगेन् बेत्। हुन्दुक् झ्यीन क, हस्सो़त् येशु ख्रीष्ट्की लम्नी झ्यीबे लेमु घन् दीनी इक् को़न्ज्योक्ल तो़प्प युङ्गेन् बेत्। खोङ्ल तो़त्वङ् धङ् ॱवङ्ग धी़ नम ज्यी़न्दु युङ् युङ युङ्ज्ये यो़प्प स्योक्च्यीत्। आमेन्। दुक्प नोङल गेस १२-१९ 12 ङे झ्यम्बे मीसो, खीत्रङ्ल छो़त्लीन्दङ् छ्येत्मीत् दुक्प आक्सी युङल ॱह लेब मत् झ्यीज्यीत्। हुल घन्ड ब अक् ॱनो़ब ॱमत् ॱसम्ब, 13 बोर ख्रीष्ट्ल नोङे दुक्स्यीगी फक् च्यीक् ङल अक् नोङ्ज्युङ् ॱनो़ब ॱसम्न हुल गेस झ्यीज्यीत्। तीङ्ला ख्रीष्ट् तो़त्वङ्गी ओ़च्च्यल इगीनी मल्ल कुरीक्की थोङ्सल झ्यो़म्बे यङ्ल खीत्रङ्ल आक् गेस छ्यीम्मु युङ्गेन् बेत्। 14 छ्यी मी घयेक्की खीत्रङ्ल ख्रीष्ट्की छेङ्गी ढीक्ल ङेन्दम् लप्च्युङ्न ॱनी, खीत्रङ् ॱसोदी च्येम्मल ॱनेगेन् बेगो। घन्ड हीन् सीन्न तो़त्वङ्गी ओ़च्च्य छ्यीम्मु च्येम्मे को़न्ज्योक्की थु खीत्रङ्ल स्युन यो़क्केन् बेत्। 15 खीत्रङ् ॱसुल आक् मीस्सेन्, की़न्ज्येन्, ङीब झ्यीक्केन् धङ् गीर्च्यम्बल फोक्केङ्गी दुक्प डस्सी युङे ले मत् झ्यीज्यीत्। 16 खीत्रङ् ख्रीष्ट्यान् हीम्बे ढीक्ल खीत्रङ्ल दुक्प नोङल ॱसु उक् ङु छय मत् झ्यीप्प, बोर हुगी मीङ्गी ढीक्ल को़न्ज्योक्ल तो़प्प पुज्यीत्। 17 ह को़न्ज्योक्की ठीम् च्येत्न छ्येप्प को़बे धी़ ॱलीत् छर बेत्। खोङ्गी ठीम् दी गोम रोरङ्गी मीजङ्नी झ्यीन च्यो़क्केन् बेत्। ॱनी खोङ्गी ठीम् दी हज्यरङ्नी एल्ला झ्यीन च्यो़क्को़त्न ॱनी, को़न्ज्योक्की ॱसुङ्रप् ॱनेम्बुल मीत् नेङ्गेन् घयेत्ल ॱसुम्ब तीङ्ला घन्दुक् झ्यीबे गोल ॱलीक्को़दङ्? 18 ॱनी को़न्ज्योक् ङो़गी मी ढङ्बु उक् त नुक्मे छी थर घाब युङ्गुक् सीन्न को़न्ज्योक् ॱमीत् ॱसम्गेन् दीक्च्येन् हुब ॱसुम्ब घन्दुक् झ्यीब युङ्गो़दङ्? सीन्न ॱसुङ्रप्ल यो़क्केन् बेत्। (पीस्येत् ११:३१) 19 हीगो झ्यीनी को़न्ज्योक्की थुल यो़प्पल दुक्प नोङ्गेन् घयेक्की गये ले दीरङ् झ्यीन युङ्न छङ्म थम्ज्येत् छ्यादु ची़क्केन् ज्युरुव मीप्प तेम्बर् च्येम्मे को़न्ज्योक्ल ॱसोस्सोरङ्गी ली़सीम्गी गेन् दी को़ज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.