१ पत्रुस् 3 - ल्होमीभुमु घयेक्की ढीक्ल १-६ 1-2 खीत्रङ् भुमु घयेत् ॱयोक्पुदङ् छ्येत्मीत् ॱसोस्सोरङ्गी छ्योबी़ ॱवङ्गी होक्ल दो़च्च्यीत्। ॱनी रङ् को़न्ज्योक्ल ज्यीब खुर्न रङ्गी मीजीगी छ्यलु दी गङ्ज्येन् झ्यीप्प रङ्गी छ्योबी़ थोङ्नी, हुनी हुगो ॱसुङ्रप्की केच्च्यल मीत् नेङ्गेर्रङ् हीन्न अक्, रङ्गी छ्यलु दी गस्सी हीम्ब छोर्नी, हुल रङ्गी तम् छीक् च्यीक् इक् ॱमत् ॱस्येत्न आक्, को़न्ज्योक् छ्योल गो घुक्न युङ्गेन् बेत्। 3 ॱनी छ्यील पम्सो तो़न्ज्येल खीत्रङ् गो ॱस्येत्न ॱसीर्की ज्येन्ज्य तान मङ् ढाब सप्न मत् गीर्च्यीत्। 4 बोर ॱसीम्ल ॱयुङ्बोक्म धङ् ॱम तेन्देन् झ्यीज्यीत्। फु तक्पे ॱसीम्गी नोर् दी हुगो बेत्। ॱनी हीगो को़न्ज्योक्की चा छ्यीम्मु हीम्ब ॱसम्गेन् बेत्। 5 ॱनी हुगो डस्सीगी पम्सो च्येम्म, तेम्बोक्म धङ् को़न्ज्योक्ल रीगो झ्यीक्केन् धङ्बी़ भुमु चङ्म घयेक्की रोरङ्सो़ छ्योबी़ ॱवङ्गी होक्ल देत्न युङ बेत्। 6 हुन्दुक् झ्यीन धङ्बु सारागी इक् रोरङ्गी छ्योबुल अब्राहाम्ला सीन्न स्यीस्स झ्यीन छ्योबी़ ॱवङ्गी होक्ल देप्प बेत्। ॱनी हीगो डस्सी खीत्रङ्गी गये ले झ्यीन ज्यीक्टक् मीप्प देत्न ॱनी, खीत्रङ् सारागी भुमु हीम्बल ॱनेगेन् बेत्। छ्योगो घयेक्की ढीक्ल ७ 7 ॱनी छ्योगो घयेस्सो, खीत्रङ् ॱसोस्सोरङ्गी छ्युङ्म हुगो डम्ज्ये मीप्पे ॱनो़च्च्य डस्सी हीम्ब ॱसम्न हुबदङ् खेजो़त् झ्यीन दो़च्च्यीत्। ॱनी हुबल अक् खीत्रङ्दङ् च्यीक्प को़न्ज्योक्की थुज्यीनी छी थोप्न यो़क्केन् झ्यीनी, हुबल थोङ् झ्यीत् गोगेन् बेत्। स्येन् हीन्दुक् मत् झ्येन ॱनी, खीत्रङ्गी ॱसुव तबल थङ्गक् युङ्गेन् बेत्। गय झ्यीप्पे ढीक्ल दुक्प ८-२२ 8 स्युक्ल ह खीत्रङ् नङ्दु ॱसीम् च्यीक् ली़ च्यीक् झ्यीन ॱङीङ्ज्यी, झ्यम्ब, चीदुङ् धङ् ॱनोम्ज्युङ् झ्यीज्यीत्। 9 अयेक्प झ्यीक्केल्ल अयेक्परङ्, ॱमो़म्बी़त् तोङ्गेल्ल ॱमो़म्बी़त्रङ् मेम्ब, बोर हुबे ढीक्ल ॱमेल्लम् स्यी़ज्यीत्। हज्यरङ् भो़च्च्येगी धो़न् दी इक् हीन्दुक् झ्यीबे ढीक्लरङ् बेत्। हुगो डस्सी झ्यीन ॱनी, खीत्रङ्ल ॱमेल्लम् थीप्केन् बेत्। 10 हीगी ढीक्ल ॱसुङ्रप्ल मी ॱसु रोरङ्गी मीजील ॱसीम् कीप्पु युङ्ज्ये यो़प्प धङ् गवे ङीन् घयेत् युङ्ज्ये यो़प्पे ॱसम्ल खुको़र्दङ् हुगी रोरङ्गी खनी ॱएलम धङ् तम् अयेक्प थो़न्दु ॱमत् ची़च्च्यीत्। 11 अयेक्पे ढङ् घयेत् दी फङ्नी हुनी हुगी गये ले झ्यीत् गोगेन् बेत्। हुनी हुगो गन्दीक्म छ्यम्ब डीक्प झ्यीन दो़त् छुब झ्यीत् गोगेन् बेत्। 12 को़न्ज्योक् ङो़गी मी ढङ्बुल चोव ज्यीन्दक्की थुज्यी सीगेन् बेत्। मी ढङ्बी़ ॱसुव तबल खोङ्गी ॱसेङ्गेन् बेत्। ॱनी मी ङेम्बल यङ् खोङ् मीत् गुव हुगी डल लोङ्गेन् बेत्। (ॱसुङ्रप्की गुल्लु ३४:१२-१६) 13 खीत्रङ्गी गस्सीम् देन गये ले झ्यीक्को़त्न ॱनी, हील मी ॱसु दीगी ॱनो़त् च्यो़दु युङ्गेन्? 14 ॱनी हीन्न अक्, ढङ्बु झ्यीबे ढीक्ल दुक्प नोङ्ज्युङ्न ॱनी, खीत्रङ् ॱसोदी च्येम्म युङ्गेन् बेगो। दुक्प तोङ्गेन् हुबल खीत्रङ् ज्यीब धङ् ज्यीक्टक् मत् झ्यीज्यीत्। (यशैया ८:१२) 15 बोर खीत्रङ्गी ॱसीम्बे यीक्नी ख्रीष्ट् चोव ज्यीन्दक् हीन् ॱनो़ब ॱसम्ज्यीत्। ॱनी खीत्रङ्ल यो़प्पे रीगोगी धो़न् दी मी ॱसी़ नम् ढीदु युङ्न अक्, हुगोल खीत्रङ् ॱस्यो़त् छ्योक् झ्यीन दो़च्च्यीत्। 16 ॱनी तम् ॱस्यो़प्पे यङ्ल ॱम ॱयुङ्बोक्म झ्यीन को़न्ज्योक्ल ज्यीब खुर्न, ॱनोङ् लङ् मीत् गो़गेङ्गी लेमु झ्यीन ॱस्यो़त् गोगेन् बेत्। हुनी खीत्रङ् ख्रीष्ट्की लम्ल युङे छ्यलु गङ्ज्येन् झ्यीप्प दी खीत्रङ्ल ङीब कोप्केन् हुबे थोङ्नी, हुबे रोरङ्सो़ तम् अयेक्प लब घयेत् दी मत् धक्प ॱह घोनी, हुब ङु छ डोगेन् बेत्। 17 अयेक्प झ्यीन दुक्प गुरले त बोर को़न्ज्योक्की थुल यो़प्पल गय झ्यीबे ढीक्ल दुक्प गुर गज्येङ्गी गा युङ्गेन् बेत्। 18 हुगो डस्सी ख्रीष्ट्की इक् दुक्स्यी गुर्न, हज्यरङ् मी घयेक्की दीक्पे ढीक्ल धङ् हज्यरङ्ल फु काब तोङ्ल फेम्ब युङे ढीक्ल खोङ् लेन् च्यीक् ढोङ बेत्। हीगो हज्यरङ् को़न्ज्योक् च्याल ठीक् छुज्ये यो़प्पल खोङ् ढङ्बु हीन्ज्यङ्, हज्यरङ् मत् ढङा घयेक्की छप्पुल ढोङ बेत्। खोङ् ॱस्यस्सी़ल यो़प्पे यङ्ल मी घयेक्की ॱसेत्न आक्, यङ् धम्बे थुगी खोङ् ॱसोम्बुल ॱलोङ बेत्। 19 हीनी धम्बे थुगी लम्नी खोङ् यङ् चो़ल्ल यो़क्केन् सी़ मीप्पे ॱसीम् घयेत्ल केच्च्य ॱस्यो़त्तु फीम्ब बेत्। 20 हुगी ॱसीम् घयेत् हुगो धङ्बु नुहे ढु छ्यीम्मु सोये यङ्ल को़न्ज्योक्की खोङ् रोरङ् ङो़ल लोक्न युङ्गो़ट्टो ॱनो़न धु च्यङ्न गुबे को़न्ज्योक्की कल ॱमीत् चीगेङ्गी मी ॱसीम् घयेत् दी बेत्। हुगी यङ्ल ढु छ्यीम्मी़ नङ्ल मीरङ् ज्येत्रङ् छ्यी़ खल खुर्न थर बेत्। 21 ॱनी हीगी छ्यी़ लम्नी थर हीगो हज्यरङ् बप्तीस्ल स्युबे लम्नी थरदङ् छ्येत्मीत् बेत्। हीगी बप्तीस्की लेमु हीगो सी़बी़ ढीनक् टी़न धक्च्येल मेम्ब, ॱनोङ् मीप्पे ॱसीम् सङ्बु खुर् छुज्ये यो़प्प तोङ् सीन्न को़न्ज्योक्ल स्युव पुज्येगी ढीक्ल बेत्। ॱनी छी थर्व हीगो खुङ् दी येशु ख्रीष्ट् ॱसोम्बुल लोङे लम्नी युङ बेत्। 22 येशु तेङ् यी़ल झ्यो़न्न को़न्ज्योक्की ॱये छ्योदु स्युन, खोङ्ल ॱवङ् की़न् झ्युङ्न यो़क्केन् बेत्। हुनी खोङ्गी ॱवङ्गी होक्ल तेङ् यी़गी भङ्ज्येम्ब घयेत् धङ् इगीन यो़प्पे ॱस्यीक् धङ् ॱवङ् च्येम्म घयेत् कुरीक् यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.