१ पत्रुस् 2 - ल्होमीको़न्ज्योक्की दम्बे मीस्सीर् १-१२ 1 आक्पागी ढङ्, ॱएलमे ढङ्, ख यच्च्येक्की लेमु झ्यीक्केङ्गी ढङ्, ठदोक्की ढङ् धङ् ङेन्दम्गी ढङ् हीन्दुक् झ्यीब कुरीक् फोङ्ज्यीत्। 2 भीज च्युङेत्मु आमे नुम ढेन्न थुङ्ज्येल गन्दीक्म ॱयेङ्गेन् डस्सी खीत्रङ् नम् थर्न भी़त् भी़त् थुक्ल खीत्रङ्ल ओङ्बु ॱलीच्च्ये यो़प्पल होम चङ्मदङ् छ्येत्मीक्की ॱसुङ्रप्ल धेस्सीम् झ्यीज्यीत्। 3 चोव ज्यीन्दक् घन्दुक्मे ढीन् छ्यीय दुक्क हुगो खीत्रङ्गी चक्की तेन ढुव छोर्न यो़क्केन् बेत्। 4 खीत्रङ् ख्रीष्ट् च्याल युङ्न यो़क्केन् बेत्। मी घयेक्की खोङ् घो ॱमीत् छ्यो़क्केङ्गी दो डस्सी ॱसम्न पुर् तङ बेत्। ॱनी खोङ् यङ् को़न्ज्योक्की थुनी दम्बे रीम्बुर् छ्यीये दो ॱसोम्बु बेत्। 5 ॱनी हीगो डस्सी खीत्रङ् ॱअङ् दो ॱसोम्बु बेत्। धम्बे थु स्युसे स्युगङ् दी खीत्रङ् घयेत्नी सोगेन् बेत्। खीत्रङ् को़न्ज्योक्की ढीक्ल पी़प्पे छ्यो़प्पो़न् चङ्म दी बेत्। खीत्रङ्गी ॱसीम्नी पुबे छ्यो़प्प दी येशु ख्रीष्ट्की लम्नी को़न्ज्योक्की स्यागी स्यीगेन् बेत्। 6 हीगी ढीक्ल ॱसुङ्रप्ल तेदे ङे दम्बे रीम्बुर् छ्यीये दो हुगो सीयोन्दु सुर्की दो घो छ्यो़स्स्यो ॱनेबल स्योक्केन्। ॱनी खोङ्ल ॱसी़ छ्य स्योक्कुक्क हुल नम्ल अक् ॱने फम्ब मीत् युङ्गेन् बेत् सीर यो़क्केन् बेत्। (यशैया २८:१६) 7 खीत्रङ् छ्य स्योक्केन् घयेक्की खोङ् रीम्बुर् छ्यीये दो हीन् ॱनो़ब झ्यीक्केन् बेत्। ॱनी छ्य मीत् स्योक्केन् घयेक्की ढीक्ल ॱसुङ्रप्ल हीन्दुक् सीन्न थो़ङ्गेन् बेत्। सोबो़न् घयेक्की घो ॱमीत् छ्यो़त्ल ॱसम्न पुर् तङे दो दी यङ् सुर्की दो घो छ्यो़स्स्योल ॱनेनर बेत्। (ॱसुङ्रप्की गुल्लु ११८:२२) 8 ॱनी हरुङ् हीगी ढीक्ल ॱसुङ्रप्ल मी घयेत् हीगी दो हील ॱनत्त दुगेन् बेत्। मी घयेत् हीगी ढक् हील थुक्न दप्केन् बेत् सीर यो़क्केन् बेत्। (यशैया ८:१४) हुब घयेत् ॱसुङ्रप्ल ॱमत् चीये छ्यीत्तु, दुन दप्केन् बेत् ॱनो़ब को़न्ज्योक्की थुल यो़क्केन् बेत्। 9 खीत्रङ् हुब डस्सी मेम्ब, को़न्ज्योक्की दम्बे मीस्सीर्, ख्रीष्ट् ज्याबी़ छ्यो़प्पो़न्, को़न्ज्योक्की खोङ् रोरङ्गी ढीक्ल पी़प्पे ज्यी़त् धङ् खोङ् रोरङ्गी दुङ्ज्यी़त् बेत्। खीत्रङ् खो़च्च्ये दी खीत्रङ् मेन्नक्नी यम् छेम्मे मेङ्गल भो़क्केन् को़न्ज्योक्की जेप्पे ले छ्यीम्मु घयेत् मी कुरीक्ल ॱस्यो़च्च्येगी ढीक्ल बेत्। 10 एल्ला खीत्रङ् को़न्ज्योक्की मीस्सीर्ल मत् युङ बेत्। ॱनी हुन्दो ह झ्युङ्न यो़क्केन् बेत्। एल्ला खीत्रङ्ल को़न्ज्योक्की थुज्यी ॱमत् थोब बेत्। ॱनी हुन्दो थोप्न यो़क्केन् बेत्। 11 झ्यम्बे दगुसो, खीत्रङ्ल ङे ॱलोप्स हीगो यो़दो। जम्बुलीङ्दु खीत्रङ् हुन्दो छ्योबादङ् छ्येत्मीत् यो़प्पे कप्ल खीत्रङ्गी ॱसीम्बे डल युङ्गेन् कोलीमी ङो़गी धेत्मो़ ङेम्बे ढङ्नी खीत्रङ् थप्न भीन दो़च्च्यीत्। 12 को़न्ज्योक् ॱस्यो़च्च्ये मीप्पे मी ॱयोङ्म घयेक्की घुङ्दु खीत्रङ्गी मीजीगी छ्यलु दी गङ्ज्येन् युङ झ्यीज्यीत्। हुनी खीत्रङ्गी गङ्ज्येन् झ्यीप्प दी खीत्रङ्ल नक् कोप्केन् छ्यी मी घयेक्की थोङ्नी येशु झ्यो़म्बे ङीङ्गी यङ्ल हुबे को़न्ज्योक्ल तो़प्प पुगेन् बेत्। ॱवङ् च्येम्म घयेक्की होक्ल दो़च्च्यीत् १३-२० 13-14 खीत्रङ्गी थोक्ल यो़क्केन्, मी ॱवङ् च्येम्म घयेक्की होक्ल खीत्रङ् दो़च्च्यीत्। छ्यीस्स्यो सीजर् ज्याबुरङ् हीन्, यङ् सीजर् ज्याबी़ को़न तङे पेम्बुरङ् हीन्न अक्, हुबे ॱवङ्गी होक्तु दो़च्च्यीत्। हीगो चोव ज्यीन्दक्की थुल डीक्केन् बेत्। ॱनी हुगी पेम्बु हुब नक्पो़न् घयेत्ल छ्येप्प को़दु धङ् ढङ्बु झ्यीक्केन् घयेत्ल तो़प्प टो़त्तु को़न यो़क्केन् बेत्। 15 ॱस्यो़च्च्ये मीप्पे मी, नम् च्यो़त् ॱमीत् ॱस्यीगेन्, नक् कोप्केन् घयेत् हुबे खल खीत्रङ्गी गये ले झ्यीन दक्क ज्यक् गोगेन् बेत्। हीगो को़न्ज्योक्की थुल यो़क्केन् बेत्। 16 खीत्रङ् रङ्मो़ च्येम्म हीम्ब झ्यीज्यीत्। ॱनी खीत्रङ्ल रङ्मो़ यो़त् ॱनो़नी रङ्मो़ दी ङेम्बे छ्योल ॱमत् तोङ, को़न्ज्योक्की ॱयोक्पु हीम्ब डस्सी झ्यीज्यीत्। 17 मी कुरीक्ल तो़प्प झ्यीन पी़न्ज्या घयेत्ल झ्यम्ब धङ् को़न्ज्योक्ल ज्यीब खुर्न दो़च्च्यीत्। ॱनी सीजर् ज्याबुल तो़प्प झ्यीज्यीत्। 18 ॱयोक्पु घयेस्सो, खीत्रङ् रङ् रङ् ॱसोस्सो़ ज्यीन्दक्ल तो़प्प झ्यीन हुबे खल नेन्ज्यीत्। ज्यीन्दक् गङ्ज्येङ्गी खल छ्युवक् मेम्ब, ज्यीन्दक् अयेक्पे खल आक् नेन्ज्यीत्। 19 ॱनी हीन्न अक्, रङ्ल मत् ओ़बे दुक्प नोङ्न ॱनी, हीगो को़न्ज्योक्की थुल यो़प्प हीन्डो ॱनो़ब ॱसम्न गुर् थेक्प झ्यीन ॱनी, हील को़न्ज्योक् गुगेन् बेत्। 20 खीत्रङ्गी ङीब झ्यीबे ढीक्ल खीत्रङ्ल दुङ्दक् नोङ्न ॱनी, हुगो खीत्रङ्गी गुर् थेक्परङ् झ्यीन अक्, हुगी खीत्रङ्ल घन्डे तो़प्प दी युङ्गेन्? ॱनी यङ् खीत्रङ्गी गा झ्यीन गा झ्यीबे ढीक्ल दुक्प नोङ्न, हुगो खीत्रङ्गी गुर् थेक्प झ्यीन ॱनी, हील को़न्ज्योक् गुगेन् बेत्। 21 हज्यरङ् भो़बे धो़न् दी इक् हुन्दुक् झ्यीबे ढीक्लरङ् बेत्। ख्रीष्ट्की इक् हज्यरङ्गी ढीक्ल दुक्स्यी गुर्न खोङ्गी तीङ्ल कङ्ज्ये दीत्न युङ्ज्ये यो़प्पल हज्यरङ्ल ॱमीदे तो़न्न स्यक्न यो़क्केन् बेत्। ख्रीष्ट्की ॱमीदेल त गोगेन् २१-२५ 22 खोङ्गी दीक्पे ज्यी़त् मत् झ्यीब बेत्। खोङ्गी खनी ॱएलमे तम् छीक् च्यीक् इक् मत् लब बेत्। (यशैया ५३:९) 23 खोङ्ल ॱमो़म्बी़त् तोङ्गेल्ल खोङ्गी ङेल्लेन् ॱमत् ॱलोक्प बेत्। खोङ्ल दुक्स्यी तोङ्गेन् घयेत्ल खोङ्गी तच्च्यीक् सीन्न ङेङ्गु मत् स्यक्प, ठीम् ढङ्बु च्यो़क्केन् को़न्ज्योक्की छ्यक्ल च्योन स्यक्प बेत्। 24 हज्यरङ् दीक्प ङो़नी ॱस्यीनरदङ् छ्येत्मीत् ढेन को़न्ज्योक् ङो़गी ढङ्बी़ लम्ल डोज्ये यो़प्पल हज्यरङ् घयेक्की दीक्पे छ्येप्प दी खोङ् रोरङ्गी कुस्सी़ल ॱनम्न कुरुस्ल ढोङ बेत्। खोङ् हुदु ढोङे यङ्ल च्येप्पे ॱम घयेत् दीगी हज्यरङ् ॱसो़ब बेत्। 25 एल्ला खीत्रङ् लुक् भत्त छ्यर्नर डस्सी झ्युङ्न यो़क्केन् बेत्। ॱनी ह हुन्दो खीत्रङ्ल तगेन् ॱसीम्गी लुक्चीब ख्रीष्ट् च्याल लोक्न यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.