१ पत्रुस् 1 - ल्होमी1 येशु ख्रीष्ट्की ठीक्नल ङ पत्रुस्की खीत्रङ् पोन्टस्, गलाती, कापाडोसीया, एशीया धङ् बीथीनीया लुङ्ब घयेत्ल ढम्न दो़क्केन् को़न्ज्योक्की दम्बे मी खीत्रङ्सोल हीगी यीगी हीगो ढीन तोङ्गो़त्। 2 खीत्रङ् घयेत् दम्बे धो़न् दी यप् को़न्ज्योक्की थुल यो़प्पल धम्बे थुगी लम्नी धक्पर् हीम्बल सो़न, येशु ख्रीष्ट्की कल चीन युङ्ज्ये यो़प्पल धङ् खोङ्गी ठक्की दीक्प धक्च्ये यो़प्पल बेत्। खीत्रङ्ल खोङ् च्यानी थुज्यी धङ् ॱसीम् दीव दी ज्येबर् युङ्ज्ये यो़प्प स्योक्च्यीत्। छी थर्व युङे ढीक्ल गेस ३-१२ 3 हज्यरङ्गी चोव ज्यीन्दक् येशु ख्रीष्ट्की यप् को़न्ज्योक्ल यस्सो युङ् युङ युङ्ज्ये यो़प्प स्योक्च्यीत्। घन्ड हीन् सीन्न खोङ्गी थुज्यी छ्यीम्मु जेत्न येशु ख्रीष्ट् ढोङ्नरनी ॱसोम्बुल ॱलोङ हीम्बे लम्नी हज्यरङ्ल रीगो ॱङो़न्ने दी थोबल खोङ्गी ॱसीम् ॱसम्ब झ्युङ्दु ची़प्प बेत्। 4 हीगी धो़न् दी तेङ् यी़दु हज्यरङ्गी ढीक्ल स्यक्न यो़प्पे सेच्च्ये मीप्प, येज्ये मीप्प धङ् नक्चक् मीप्पे फक् थोबे ढीक्ल बेत्। 5 स्युक् थमे धी़ल खीत्रङ् हीनी थर् थर् थुक्ल छ्य स्यक्पे लम्नी को़न्ज्योक्की ॱस्यीक्की खीत्रङ् छ्योप्न स्योक्केन् बेत्। ॱनी हीगी थर्व हीगो तो़न्ज्येगी ढीक्ल हुन्दोनीरङ् को़न्ज्योक्की ठोक्क झ्यीन यो़क्केन् बेत्। 6 हीगो झ्यीनी खीत्रङ्ल हुन्दो ॱरीप्चो़त् च्यीक् छो़त्लीन्दङ् छ्येत्मीत् दुक्प ॱनजो नोङ्न अक्, खीत्रङ् गेस छ्यीम्मु झ्यीक्केन् बेत्। 7 ये डोगेङ्गी ॱसीर् त धक्तेन् हीन् धङ् मेन् स्यी़न् तङ्न तगुक् सीन्न ॱनी, खीत्रङ्गी छ्य स्यक्प दी ॱसुम्ब हुले चा छ्यीया बेत्। हुगी छो़त्लीन् तये यङ्ल खीत्रङ्गी छ्य स्यक्प दी धक्तेल्ल थो़न्न ॱनी, ख्रीष्ट् कुरीक्की थोङ्सल झ्यो़न्नी, खोङ् च्यानी खीत्रङ्ल यस्सो, तो़प्प धङ् इगीनी मक्की ओ़च्च्ये तो़प्प छ्यीम्मु थोप्केन् बेत्। 8 खीत्रङ्गी ख्रीष्ट् ॱमीत् थोङ्गो़त्न आक्, खीत्रङ्गी ॱसीम्न खोङ्ल झ्यम्ब यो़क्केन् बेत्। ॱनी हुन्दो ॱमीत् थोङ्गो़त्न आक्, खीत्रङ्गी खोङ्ल ॱलो केन दो़क्केन् बेत्। हुगो झ्यीनी खीत्रङ्गी ॱसीम्ल छीक्टल ज्युर्न ॱस्यो़त् दीरङ् ॱमीत् ॱस्यीगेङ्गी गेस छ्यीम्मु युङ्गेन् बेत्। 9 खीत्रङ्गी छ्य स्यक्पे डेबु दील छी थर्व थोप्न यो़क्केन् बेत्। 10 खीत्रङ्ल को़न्ज्योक्की थुज्यी ॱनङ्गेन् बेत् सीरे ॱङो़स्स्यी दी धङ्बु कलुङ् ॱस्यो़क्केन् घयेक्की ॱस्येप्प बेत्। हुब घयेक्की इक् खीत्रङ्ल छी थर्व थोब हीगी ढीक्ल नम् च्येत्न ॱह घोज्ये ॱनो़ब झ्युङ बेत्। 11 ख्रीष्ट्की थु हुबे ॱसीम्ल स्युन, हुबल च्यप्को़ल्ल को़बे ख्रीष्ट् तीङ्ला झ्यो़न्न, दुक्स्यी ॱनजो नोङ्नी, हुनी खोङ्ल इगीनी मक्की ओ़च्च्ये तो़प्प छ्यीम्मु युङ्गेन् बेत् सीन्न तो़म्ब बेत्। ॱनी हुगो नम्गी धी़ल युङ्गेन्, घन्दुक् झ्यीबे धी़ल युङ्गेन् हीम्ब हीगो हुबे ॱह घोज्ये ॱनो़ब झ्यीब बेत्। 12 ॱनी हुबे ॱस्येप्पे कलुङ् दी रोरङ्सो़ फेन्दोगी ढीक्ल मेम्ब, हुगो दङ् हरीङ् हज्यरङ्गी ढीक्ल धङ्बुदु को़न्ज्योक्की हुबल तो़न्न ॱस्यो़त्तु ची़प्प बेत्। ॱनी हुगो दङ् हरीङ्गी केच्च्य ॱनेम्बु हील डोगेन् बेत्। ॱनी दङ् हरीङ् हीगो ॱस्येत्न टोम्गेन् घयेत्ल तेङ् यी़नी तङे धम्बे थुगी दगु जेत्नी, हुबे खीत्रङ्ल हीगो जेङ् ॱस्येत्न यो़क्केन् बेत्। ॱनी हीगी केच्च्ये धो़न् हील तेङ् यी़गी भङ्ज्येम्ब घयेक्की इक् दो़न्दो़त् तगीन् थेप्प झ्युङ बेत्। ॱसीम् चङ्म खुर् गोगेन् १३-२५ 13 हुगो झ्यीनी खीत्रङ्गी ॱसीम् दी ॱनो़जो़त् घङ्बी़ ॱवङ्ल ॱमत् तङ, ठोक्क झ्यीन दो़च्च्यीत्। येशु ख्रीष्ट् इगीनी मल्ल झ्यो़म्बे यङ्ल खीत्रङ्ल को़न्ज्योक्की थुज्यी ॱनङ्गेन् बेत् ॱनो़बे रीगोल देङ् खीन दो़च्च्यीत्। 14 खीत्रङ्ल एल्ला ॱस्यो़च्च्ये मीप्पे यङ्गी मीजीगी छ्यलु डस्सी धेत्मो़ ङेम्बे ॱसीम्बे ॱवङ्ल ॱमत् तोङ, को़न्ज्योक्की कल चीगेङ्गी भीज हीम्ब डस्सी झ्यीज्यीत्। 15 खीत्रङ् भो़क्केन् को़न्ज्योक् धक्पर् यो़प्प डस्सी खीत्रङ् ॱअङ् खीत्रङ्गी मीजीगी छ्यलुल धक्पर् युङ झ्यीज्यीत्। 16 हीगी ढीक्ल ॱसुङ्रप्ल थो़ङ्गेन् बेत्। ङ धक्पर् च्येम्म यो़त्। हुगो झ्यीनी खीत्रङ् ॱअङ् धक्पर् युङ झ्यीज्यीत्। (लेवी १९:२) 17 मी रीदङ् रीगी मीजील घङ् झ्यीबल पीब दम्ङीत् मीप्प ठीम् च्यो़क्केङ्गी को़न्ज्योक्ल खीत्रङ्गी ॱवे पब सीन्न सीर् छुगेन् बेत्। हुगो झ्यीनी खीत्रङ् हुन्दो हीदु छ्योबादङ् छ्येत्मीत् झ्यीन दो़स्स्यीङ् भोर्ल खीत्रङ् को़न्ज्योक्ल ज्यीब खुर्न दो़च्च्यीत्। 18-19 घन्ड हीन् सीन्न खीत्रङ्गी पुबु ॱमुमी़ च्यानी युङे धो़म्मीक्की टो घयेत्नी खीत्रङ् को़न्ज्योक्की ॱली़ब बेत्। ॱनी हीगी ॱलुरीन् दील फु ॱमीत् तक्केङ्गी ढङ् ॱसीर् धङ् ॱङु मेम्ब, नक्पी़ जी च्यो़न् मीप्पे लुक्टुक् ख्रीष्ट्की ठक् रीम्बुर् छ्यी दी बेत्। हीगो खीत्रङ्ल ॱस्यो़च्च्ये यो़क्केन् बेत्। 20 ख्रीष्ट्की धो़ङ्गी ढो़ हीगो ॱस धङ् ॱनम् छ्यादु ची़प्पले एक् एल्लानी को़न्ज्योक्की थुल यो़क्केन् बेत्। ॱनी हीन्न अक्, हीगो दङ् हरीङ् थमे धी़गी यङ्ल क हज्यरङ्गी धो़ल्ल खोङ्गी कुरीक्की थोङ्सल डुब बेत्। 21 ख्रीष्ट् ढोङ्नरनी ॱसोम्बुल ॱलोङ्न ख्रीष्ट्ल तो़त्वङ् ॱनङ्गेङ्गी को़न्ज्योक्ल खीत्रङ् ख्रीष्ट्की लम्नी ॱलो खीन यो़क्केन् बेत्। हीन्दुक् झ्यीन को़न्ज्योक्ल खीत्रङ्गी ॱलो केन रीगो झ्यीक्केन् बेत्। 22 खीत्रङ् पी़न्ज्या नङ्जोदु धक्तेङ्गी झ्यम्ब युङे ढीक्ल खीत्रङ् दीम्बे कल चीन युङ्नी, खीत्रङ्गी ॱसीम् दी चङ्मल ॱसोङ्न यो़क्केन् बेत्। हुगो झ्यीनी खीत्रङ् ॱसीम् चङ्म खुर्न च्यीक्तङ् च्यीक्ल ॱसीम्बे यीक्नी झ्यम्ब झ्यीज्यीत्। 23 हज्यरङ्ल फीच्च्य ॱसीम् ॱसम्ब कीन युङ हीगो फु ॱमीत् तक्केङ्गी ॱसो़न् तप्न कीब मेम्ब, फु तक्केन्, धी़ ज्यी़न्दु दो़क्केन्, को़न्ज्योक्की ॱसुङ्रप् ॱसोम्बुनी कीब बेत्। 24 घन्ड हीन् सीन्न ॱसुङ्रप्ल कोलीमी घयेत् कुरीक् ॱङोमक्तङ् छ्येत्मीत् बेत्। ॱनी कोलीमील युङे पम्सो दी ॱङोमक्की मीन्दोक्तङ् छ्येत्मीत् बेत्। ॱङोमक् दी कम्नी, हुगी मीन्दोक् दी इक् घोक्न ये डोगेन् बेत्। 25 चोव ज्यीन्दक्की ॱसुङ्रप् दी हुगो डस्सी मेम्ब, धी़ ज्यी़न्दु दो़क्केन् बेत् सीर यो़क्केन् बेत्। (यशैया ४०:६-८) ॱनी हस्सो़त् हीगी ॱसुङ्रप्की केच्च्य हीगो क खीत्रङ्ल ॱस्येत्न यो़क्केङ्गी केच्च्य ॱनेम्बु हुगो बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.