१ युहन्ना 5 - ल्होमी1 येशुल मी ॱसी़ को़न्ज्योक्की को़बे च्यप्को़न् ख्रीष्ट् बेत् सीन्न छ्य स्योक्कुक्क हुगो को़न्ज्योक् च्येन्नी छ्येप्पे भीजल डोगेन् बेत्। ॱनी यप्ल झ्यम्ब यो़प्प च्येम्मे मी खोङ् च्यानी छ्येप्पे भीजल अक् झ्यम्ब झ्यीक्केन् बेत्। 2 को़न्ज्योक्ल हज्यरङ्गी झ्यम्ब खुर्न खोङ्गी क धङ् धम्ल चीन युङ्न ॱनी, खोङ्गी भीज घयेत्ल अक् झ्यम्ब झ्यीत् गोगेन् बेत् ॱनो़ब हज्यरङ्गी ॱह घोगेन् बेत्। 3 को़न्ज्योक्की क धङ् धम्ल हज्यरङ्गी चीगो़त्न ॱनी, हस्सो़त् को़न्ज्योक्ल झ्यम्ब झ्यीब दील डोगेन् बेत्। खोङ्गी क घयेत् नन्दक्की घाब मीप्प बेत्। 4 को़न्ज्योक् च्येन्नी छ्येप्पे भीज घयेत् कुरीक् जम्बुलीङ्ले ज्यला थो़न्न युङ्गेन् बेत्। जम्बुलीङ्ले ज्यला थो़न्ज्ये दी हज्यरङ्गी छ्य स्यक्प दीगी थो़न् छुगेन् बेत्। 5 जम्बुलीङ्ले ज्यला थो़ङ्गेन् दी ॱसु हीन् सीन्न, येशुल को़न्ज्योक्की ॱरेबु बेत् सीन्न ॱसी़ छ्य स्योक्कुक्क हस्सो़त् हुगो बेत्। येशु को़न्ज्योक्की ॱरेबु हीम्बे पङ्बु ६-१२ 6 येशु ख्रीष्ट् छ्यु धङ् ठक्की लम्नी झ्यीन युङ बेत्। छ्यु छ्युवक्की लम्नी मेम्ब, छ्यु धङ् ठक् ॱङीक्कर्की लम्नी झ्यीन युङ बेत्। ॱनी हीगो खुङ् हीम्बल धम्बे थुगी पङ्बु जेक्केन् बेत्। धम्बे थु दीम्ब बेत्। 7 हीगी ढीक्ल पङ्बु ॱसुम्गी ॱस्यो़क्केन् बेत्। 8 च्यीक् धम्बे थु, च्यीक् छ्यु, च्यीक् ठक् झ्यीब ॱसुम्गी पङ्बु जेप्प दी डीक्केन् बेत्। 9 कोलीमी पङ्बी़ तम्ल आक् त हज्यरङ्गी खुङ् बेत् सीन्न छ्य स्योक्कुक् सीन्न ॱनी, हीले ॱसुम्ब को़न्ज्योक्की खोङ् रोरङ्गी ॱरेबी़ ढीक्ल पङ्बु जेप्प हुगो गज्येङ्गी ज्यीक्पा युङ्गेन् बेत्। 10 खोङ्गी पङ्बु जेप्पे केच्च्य हीगो को़न्ज्योक्की ॱरेबुल मी ॱसी़ छ्य स्योक्कुक्क हुगी ॱसीम्ल खुङ्देन् हीम्ब ॱह घोगेन् बेत्। ॱनी को़न्ज्योक्की खोङ् रोरङ्गी ॱरेबी़ ढीक्ल पङ्बु जेप्पे केच्च्य हुल मी ॱसी़ छ्य मीत् स्योक्पेक्क हुगी को़न्ज्योक् ॱएजङल सोगेन् बेत्। घन्ड हीन् सीन्न हुगी को़न्ज्योक्ल छ्य मीत् स्योक्केन् बेत्। 11 खोङ्गी रोरङ्गी ॱरेबी़ लम्नी हज्यरङ्ल फु तक्पे छी थोप्च्ये यो़प्पल ॱनङ्न यो़क्केन् बेत्। ॱनी को़न्ज्योक्की पङ्बु जेप्पे केच्च्य हुगो धक्केन् बेत्। 12 ॱसुदङ् दल ॱरेबु यो़दङ् हुल छी दी यो़क्केन् बेत्। ॱनी यङ् ॱसुदङ् को़न्ज्योक्की ॱरेबु मीन्दुक्क हुल छी दी इक् मीप्प युङ्गेन् बेत्। 13 को़न्ज्योक्की ॱरेबी़ छेन् डेन्न खोङ्ल छ्य स्योक्केन् खीत्रङ् घयेत्ल फु तक्पे छी दी थोप् छर हीन् ॱनो़ब ॱह घोज्येगी ढीक्ल ङे हीगो ढीब हीन्। 14 को़न्ज्योक्की थुल डीक्पे स्युदेन् हज्यरङ्गी ज्यप्न ॱनी, घन्ड स्यी़न अक्, हुगो खोङ्गी ॱसेङ्गो़त् ॱनो़बे देङ्जो़त् हज्यरङ्ल युङ्गेन् बेत्। 15 हज्यरङ्गी स्युदेन् ज्यब घयेत् दी खोङ्गी ॱसेङ्गो़त् ॱनो़ब दी ॱह घोन ॱनी, हुनी हज्यरङ्गी घन्ड स्यी़न अक्, हुगो थोप्केन् बेत् ॱनो़ब ॱह घो छुगेन् बेत्। 16 पी़न्ज्या नङ्गी मी फुगी ॱस्यीस्सल ॱमीत् च्यो़गेङ्गी दीक्प झ्यीप्प हज्यरङ् ॱसी़ थोङ्गुक्क हुगी ढीक्ल ॱसुव तोप्च्यीत्। हुनी को़न्ज्योक्की हुगो छीये लम्ल ॱलोक्केन् बेत्। ङे हीगो फुगी ॱस्यीस्सल ॱमीत् च्यो़गेङ्गी दीक्प झ्यीक्केन् घयेक्की ढीक्ल सीक्को़त्। ॱनी फुगी ॱस्यीस्सल च्यो़गेङ्गी दीक्प अक् युङ्गेन् बेत्। हुन्दुक् झ्यीबे दीक्प झ्यीक्केङ्गी ढीक्ल ङ ॱसुव तोप् मीत् सीर्। 17 ढङ्ज्ये मीप्प घयेत् कुरीक् दीक्प बेत्। ॱनी फुगी ॱस्यीस्सल ॱमीत् च्यो़गेङ्गी दीक्प अक् युङ्गेन् बेत्। येशु दीम्बरङ्गी को़न्ज्योक् धङ् फु तक्पे छी १८-२१ 18 को़न्ज्योक् च्यानी छ्येप्पे मी ॱसी़ इक् दीक्प झ्ये झ्येब मीत् दो़क्केन् हीम्ब हज्यरङ्ल ॱस्यो़च्च्ये यो़क्केन् बेत्। को़न्ज्योक् च्यानी छ्येप्प घयेत्ल खोङ्गी छ्योप्केन् झ्यीनी, हुगी दी़त्ङेन् हुगी हुल च्यो़न् घन्ड अक् तोङ् ॱमीत् छुगेन् बेत्। 19 ॱनी म दी जम्बुलीङ् हीगो जेङ् दी़त्ङेन् हुगी होक्ल ॱस्योर्न यो़क्केन् बेत्। ॱनी हीन्न अक्, हज्यरङ् यङ् को़न्ज्योक् ङो़गी बेत्। हीगो हज्यरङ्ल ॱस्यो़च्च्ये यो़क्केन् बेत्। 20 को़न्ज्योक्की ॱरेबु झ्यो़न्नी क, हस्सो़त् हज्यरङ्ल दीम्बरङ्गी को़न्ज्योक् ङु ॱस्यीज्ये यो़प्पे ॱसीम् ॱनङ हीम्ब हज्यरङ्ल ॱस्यो़च्च्ये यो़क्केन् बेत्। हज्यरङ् दीम्ब ङो़ल खोङ्गी ॱरेबु येशु ख्रीष्ट्तङ् मत् ढेब यो़क्केन् बेत्। ॱनी खोङ् क दीम्बरङ्गी को़न्ज्योक् दी धङ् फु तक्पे छी दी बेत्। 21 भीजसो, ॱल्ह धङ् कु घयेत् च्यानी भीन दो़च्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.