१ युहन्ना 4 - ल्होमीख्रीष्ट्की ड ङो़ धङ् धम्बे थु ङो़गी ॱसीम् १-६ 1 झ्यम्बे दगुसो, यो़च्चो़क्की ॱसीम्नी थो़म्बे केच्च्य कुरीक्ल ढीम्बु छ्य मत् स्योक्च्यीत्। हुगो को़न्ज्योक् ङो़गी ॱसीम्नी युङे केच्च्य हीन् धङ् मेन् नम् च्येत्न तो़ज्यीत्। घन्ड हीन् सीन्न जम्बुलीङ्ल कलुङ् जी़म ॱस्यो़क्केन् गज्येन् थो़न्न यो़क्केन् बेत्। 2 को़न्ज्योक्की थु यो़प्प च्येम्म हीन् धङ् मेन् हीन्दुक् झ्यीन ॱयुव पीक् छुगेन् बेत्। येशु ख्रीष्ट् कोलीमील कीन युङ बेत् सीन्न ॱसी़ सीगुक्क हुगो को़न्ज्योक् ङो़नी युङे ॱसीम् बेत्। 3 ॱनी ॱसी़ यङ् येशुल मेम्बेत् सीन्न सीगुक्क हुगो को़न्ज्योक् ङो़नी युङे ॱसीम् मेम्बेत्। हुगो ख्रीष्ट्की ड ङो़नी युङे ॱसीम् बेत्। हुगी ड हुगो थो़ङ्गेन् बेत् सीर खीत्रङ्ल ॱस्यो़च्च्ये यो़क्केन् बेत्। ॱनी हुगो हुन्दोनीरङ् जम्बुलीङ्ल थो़न् छर बेत्। 4 भीजसो, खीत्रङ् जी़म हुब ङो़गी मेम्ब, को़न्ज्योक् ङो़गी झ्यीनी, हुबले ज्यला थो़न्न यो़क्केन् बेत्। जम्बुलीङ्न यो़क्केन् हुले खीत्रङ्गी नङ्ल स्युन यो़क्केन् खोङ् गज्येङ्गी ज्यीक्पा यो़क्केन् बेत्। 5 हुब जम्बुलीङ् ङो़गी झ्यीनी, हुबे जम्बुलीङ् ङो़गी केच्च्यरङ् ॱस्यो़क्केन् बेत्। ॱनी जम्बुलीङ् ङो़गी मी इक् हुबे तम्ल नेङ्गेन् बेत्। 6 हुगो डस्सी मेम्ब, ङीत् घयेत् को़न्ज्योक् ङो़गी हीन्। हुगो झ्यीनी खोङ् ङु ॱस्यीगेङ्गी मी घयेक्की ङीक्की केच्च्यल नेङ्गेन् बेत्। ॱनी को़न्ज्योक् ङो़गी मेम्बे मी घयेक्की ङीक्की केच्च्यल मीत् नेङ्गेन् बेत्। हुन्दुक् झ्यीन दीम्बे थु यो़प्प च्येम्मे ॱसीम् हीन् धङ् ॱयोङ्गोर् ज्यक्केङ्गी ॱसीम् हीन् हुनी ॱयुव पीक् ॱस्यीगेन् बेत्। झ्यम्ब गो़गेङ्गी ढीक्ल ७-२१ 7 झ्यम्बे दगुसो, झ्यम्बे ढङ् घयेत् को़न्ज्योक् च्येन्नी युङ्गेन् बेत्। हुगो झ्यीनी हज्यरङ्गी च्यीक्तङ् च्यीक्ल झ्यम्ब झ्यीत् गोगेन् बेत्। झ्यम्ब झ्यीक्केन् दी को़न्ज्योक् च्यानी छ्येप्प खोङ् ङु ॱस्यीगेङ्गी मी बेत्। 8 झ्यम्ब ॱङो़म दी को़न्ज्योक् बेत्। हुगो झ्यीनी झ्यम्ब मीत् झ्यीक्केङ्गी मी को़न्ज्योक् ङु ॱमीत् ॱस्यीगेन् बेत्। 9 को़न्ज्योक्की झ्यम्ब दी हज्यरङ्गी ॱह घोवल हज्यरङ् घयेत्ल छी ॱनङ्दु खोङ्गी ॱरेबु च्यीगी च्यीक्पु दी जम्बुलीङ्ल तङ्न युङ बेत्। 10 ॱनी हीगो हज्यरङ्गी एल्ला को़न्ज्योक्ल झ्यम्ब झ्युङ्नी मेम्ब, खोङ्गी एल्ला हज्यरङ्ल झ्यम्ब जेत्न खोङ्गी रोरङ्गी ॱरेबु दीरङ् तङ्न युङ्न हज्यरङ्गी दीक्पे ॱस्याबल ॱरोक् दीरङ् च्येब बेत्। झ्यम्ब खुङ् दी हस्सो़त् हीगो बेत्। 11 झ्यम्बे दगुसो, को़न्ज्योक्की हज्यरङ्ल हीन्दुक्मे झ्यम्ब छ्यीय जेत्नी ॱनी, हुनी हीगी ढीन् खुर्न हज्यरङ्गी इक् च्यीक्तङ् च्यीक्ल झ्यम्ब झ्यीत् गोगेन् बेत्। 12 ॱनी म दी मी सी़ इक् को़न्ज्योक् नम्ल अक् थोङ् ॱमत् ॱनोङ बेत्। ॱनी हीन्न अक्, हज्यरङ्गी च्यीक्तङ् च्यीक्ल झ्यम्ब दी झ्यीन ॱनी, खोङ् हज्यरङ्दङ् मत् ढेब स्युन, हुनी खोङ्गी ॱनङे झ्यम्ब दी इक् हज्यरङ्ल छङ्गेन् बेत्। 13 हज्यरङ् खोङ्दङ् मत् ढेब यो़प्प दी धङ् खोङ् हज्यरङ्दङ् मत् ढेब यो़प्प दी खोङ्गी ॱनङे धम्बे थुगी लम्नी हज्यरङ्गी ॱह घो छुगेन् बेत्। 14 यप्की खोङ् रोरङ्गी ॱरेबु कोलीमी घयेक्की च्यप्को़ल्ल तङ्न युङ हीम्ब ङीक्की थोङ्ज्युङ्। ॱनी हीगी पङ्बु दी ङीक्की झ्यीन ॱस्यो़क्को़त्। 15 मी ॱसी़ येशु को़न्ज्योक्की ॱरेबु दीरङ् बेत् सीन्न सीगुक्क हुगो को़न्ज्योक्तङ् मत् ढेब दो़क्केन् बेत्। ॱनी को़न्ज्योक् हुगोदङ् मत् ढेब स्युगेन् बेत्। 16 को़न्ज्योक्की हज्यरङ् घयेत्ल झ्यम्ब जेप्प दी हज्यरङ्गी ॱह घोनी, हुल हज्यरङ् ॱलो खीगेन् बेत्। ॱनी झ्यम्ब ॱङो़म दी को़न्ज्योक् बेत्। ॱनी मी ॱसी़ झ्यम्ब झ्ये झ्येब दो़क्कुक्क हुगो को़न्ज्योक्तङ् मत् ढेब दो़क्केन् बेत्। ॱनी को़न्ज्योक् हुगोदङ् मत् ढेब स्युगेन् बेत्। 17 हुन्दो हज्यरङ् हीदु येशु जम्बुलीङ्दु देप्पे लेमु डस्सी दो़क्केन् बेत्। हुगो झ्यीनी हज्यरङ्गी झ्यम्ब दी छङ्देन् झ्युङ्न ॱनी, हस्सो़त् ठीम्ज्यो़क्की ङीङ्गी यङ्ल हज्यरङ् ज्यीब मीप्प दो़त् छुब युङ्गेन् बेत्। 18 हज्यरङ्गी ॱसीम्ल झ्यम्ब यो़त्न ॱनी, ज्यी मीत् गो़गेन् बेत्। झ्यम्ब दी छङ्देन् झ्युङ्न ॱनी, ज्यीब म दीरङ् ये डोगेन् बेत्। ॱनी ज्यीब झ्यीक्केङ्गी मी छ्येप्प के योङ् ॱनो़गेन् बेत्। हुन्दुक् झ्यीबल झ्यम्ब छङ्देन् मत् झ्युङ बेत्। 19 को़न्ज्योक्की एल्ला हज्यरङ्ल झ्यम्ज्योङ् जेत्न युङ्नी क, हज्यरङ्गी ॱसीम्नी इक् खोङ्ल झ्यम्ब झ्युङ बेत्। 20 मी ॱसी़ ख दीगी ङे ॱसीम्नी को़न्ज्योक्ल झ्यम्ब यो़त् सीगुक्क ॱनी हुगी यङ् नङ्गी पी़न्ज्याल ड झ्यीक्को़त्न ॱनी, हुगो ॱएजङल डोगेन् बेत्। ॱमीक्की थोङ्गेन् पी़न्ज्या नङ्गी मील त हुगी झ्यम्ब मीत् झ्यीप्पे, ॱमीक्की ॱमत् थोङे को़न्ज्योक्ल ॱसुम्ब हुगी घन्दुक् झ्यीन झ्यम्ब युङ् छुगेन्? 21 हीगो झ्यीनी मी ॱसी़ ॱसीम्नी को़न्ज्योक्ल झ्यम्ब युङ्गो़दङ् हुगी पी़न्ज्या नङ्दु उक् झ्यम्ब झ्यीत् गोगेन् बेत् सीरे क खोङ्गी ङीत्ल ॱनङ्न यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.