१ युहन्ना 3 - ल्होमीको़न्ज्योक् ङो़ धङ् दी़त् ङो़गी भीज १-१० 1 तेदे हज्यरङ्ल को़न्ज्योक्की घन्दुक्मे झ्यम्ब छ्यीय जेत्न हज्यरङ् खोङ्गी भीज बेत् सीक्केल्ल सो़न यो़क्केन् बेत्। ॱनी हीगो दीम्बरङ् हज्यरङ् खोङ्गी भीज दीरङ् बेत्। हुगो झ्यीनी जम्बुलीङ्गी मी घयेक्की खोङ् ङु ॱमीत् ॱस्यीबल हुनी हज्यरङ् अङ् घन्दुक् झ्यीब बेक्क हुबल ॱस्यो़च्च्ये मीप्प बेत्। 2 झ्यम्बे दगुसो, हज्यरङ् को़न्ज्योक्की भीज दीरङ् बेत्। ॱनी तीङ्ला हज्यरङ् घन्दुक् झ्यीबल ज्युको़र्दङ् हुगो हुन्दो कुरीक् क ॱस्यो़च्च्ये मीप्प बेत्। ॱनी हुन्दो ॱस्यो़च्च्ये यो़प्प दी ख्रीष्ट् इगीनी मल्ल झ्यो़म्बे यङ्ल खोङ् घन्दुक् झ्यीब यो़दङ् हुगो हज्यरङ्गी ॱङो़सल् थोङ्नी, हुगो डस्सीरङ् हज्यरङ् अङ् झ्युङ् डोगेन् बेत्। 3 ॱनी हील रीगो झ्यीक्केन् ॱसु यो़दङ् हुगो खोङ् चङ्म यो़प्प डस्सी हुगो ओक् ॱसीम् चङ्म युङ झ्यीत् गोगेन् बेत्। 4 मी ॱसी़ दीक्प झ्यीगुक्क हुगो को़न्ज्योक्की छ्यो़डीम्ल ङीब झ्यीबल डोगेन् बेत्। ॱनी दीक्पे ढङ् घङ्गो दीगी इक् छ्यो़डीम् ॱनङ्ज्युङ्ल तोङ्गेन् बेत्। 5 ॱनी म दी दीक्प घयेत् खुर्तु ख्रीष्ट् इगीनी मल्ल झ्यो़म्ब हीम्ब खीत्रङ् कुरीक्ल ॱस्यो़च्च्ये यो़क्केन् बेत्। खोङ्ल दीक्पे ज्यी़त् मीप्प बेत्। 6 ॱनी हीगो झ्यीनी ॱसु खोङ्दङ् मत् ढेब दो़क्कुक्क हुगी दीक्प झ्ये झ्येब मीत् दो़क्केन् बेत्। ॱनी ॱसी़ छीगङ् दीक्प झ्यीगुक्क हुगी खोङ् ङु उक् ॱमीत् ॱस्यीगेन् बेत्। थोङ् ओङ् ॱमत् ॱनोङ बेत्। 7 भीजसो, खीत्रङ् ॱसी़ ॱयोङ्गोर्ल आक् ॱमत् छ्यी़ब दो़च्च्यीत्। मी ॱसी़ को़न्ज्योक् गुव ढङ्बु झ्यीगुक्क हुगो खोङ् डस्सी ढङ्बी़ मी बेत्। 8 ॱनी ॱसी़ दीक्प झ्ये झ्येब दो़क्कुक्क हुगो दी़क्की चो ङो़गी बेत्। दी़क्की चो हुगी गोमनीरङ् दीक्प च्यङ्ज्यङ् झ्यीन युङ बेत्। ॱनी दी़क्की चो हुगी ले घयेत् दी मीत्तल तोङ्दु सीन्न को़न्ज्योक्की ॱरेबु इगीनी मल्ल झ्यो़म्ब बेत्। 9 को़न्ज्योक् च्यानी छ्येप्पे मी ॱसु यो़दङ् हुल को़न्ज्योक्की लेमु डस्सीरङ् थो़त्न यो़क्केन् झ्यीनी, हुगी दीक्प झ्ये झ्येब झ्यीत् ॱमीत् छुगेन् बेत्। को़न्ज्योक् च्यानी छ्येप्पे मी घन्दुक् झ्यीन दीक्प झ्ये झ्येब झ्यीत् छुगेन्? 10 को़न्ज्योक् गुव ढङ्बु मीत् झ्यीक्केन् धङ् पी़न्ज्या नङ्दु झ्यम्ब मीत् झ्यीक्केन् ॱसु हीन्न अक्, हुगो को़न्ज्योक् ङो़गी मी मेम्बेत्। ॱनी को़न्ज्योक् ङो़गी भीज हीन् धङ् दी़क्की चो ङो़गी भीज हीन् दी हुनी ॱयुव पीक् छुगेन् बेत्। च्यीक्तङ् च्यीक्ल झ्यम्ब ११-२४ 11 हज्यरङ्गी च्यीक्तङ् च्यीक्ल झ्यम्ब झ्यीत् गोगेन् बेत्। हीगो खीत्रङ्गी गोमनीरङ् ॱह घोन यो़प्पे केच्च्ये चव दी बेत्। 12 धङ्बी़ कयीन् डस्सी हज्यरङ् मेम्बेत्। कयीन् हुगो दी़त्ङेन् ङो़गी झ्यीनी, हुगी रोरङ्गी पी़न् दी ॱसेत् तङ बेत्। घन्डल ॱसेप्प बेत् सीन्न, हुगी म दीरङ् ले ङेम्ब च्यङ्ज्यङ् झ्यीन युङ बेत्। ॱनी पी़न् दीगी ले दी ढङ्बु च्यङ्ज्यङ् झ्यीन युङ्नी, कयीन्गी हुगो ॱसेत् तङ बेत्। 13 हुगो झ्यीनी ङे पी़न्ज्यासो, जम्बुलीङ्गी मी घयेत् खीत्रङ्गी डल लोङ्न युङल हुल ॱह लेब मत् झ्यीज्यीत्। 14 हज्यरङ् ॱस्यीवे लम्नी छीये लम्ल थो़न् छर बेत्। ॱनी हीगो हीम्ब हज्यरङ्गी पी़न्ज्या नङ्गी झ्यम्ब दीगी ॱह घोगेन् बेत्। ॱनी झ्यम्ब मीप्पे मी दी हुन्दो ओक् ॱस्यीवे लम् दीलरङ् डोगेन् बेत्। 15 मी ॱसी़ रोरङ्गी पी़न्ज्याल ड झ्यीगुक्क हुगो मी ॱसो़क्केन् मीस्सेन् हीम्बल डोगेन् बेत्। ॱनी मीस्सेन् ॱसुल आक् फु तक्पे छी ॱमीत् ॱनेगेन् हीम्ब खीत्रङ्ल ॱस्यो़च्च्ये यो़क्केन् बेत्। 16 येशु ख्रीष्ट्की हज्यरङ्गी ढीक्ल खोङ् रोरङ्गी ॱरोक् दीरङ् च्येब बेत्। हुल तेनी क, दीम्बरङ्गी झ्यम्ब दी घन्दुक् झ्यीब युङ्गेन् बेक्क हुगो हज्यरङ्गी ॱह घो छुगेन् बेत्। ॱनी हीगो डस्सीगी झ्यम्ब दी क हज्यरङ्गी इक् पी़न्ज्या नङ्गी पी़ङ्गी ढीक्ल ॱरोक्रङ् ॱसोङ्न आक्, च्यो़ छुब युङ् गोगेन् बेत्। 17 नोर् यो़प्प च्येम्मे मी रोरङ्गी नङ्गी पी़न्ज्याल गो़बे खोज्येत् यो़प्प थोङ्न आक्, हुल हुगी ॱङीङ्ज्यी मीत् झ्यीक्को़त्न ॱनी, को़न्ज्योक्ल ॱसुम्ब हुगी घन्दुक् झ्यीन झ्यम्ब यो़त् सीर् छुगेन्? 18 भीजसो, हज्यरङ्गी झ्यम्ब दी ख यच्च्येक्की छ्युवक् मेम्ब, दीम्बरङ् लेगी झ्यीत् गोगेन् बेत्। 19-20 हीनी क हज्यरङ् दीम्ब ङो़गी मी हीम्ब ॱह घोगेन् बेत्। हुनी हज्यरङ्गी ॱसीम्ल ॱसीम् मत् दीय, ङीबे ॱनोङ् घन्ड युङ्गो़दङ् हुगो को़न्ज्योक्की ढुङ्दु दीन्दीक्मल सो छुगेन् बेत्। हज्यरङ्गी ॱसीम्बे ॱनोक्सम्ले को़न्ज्योक् गज्येङ्गी छ्यीया यो़क्केन् झ्यीनी, खोङ्ल कुरीक् हुन्दुक् झ्यीब घयेत् थुज्यी युङ्गेन् बेत्। 21 झ्यम्बे दगुसो, हज्यरङ्गी ॱसीम्ल ङीबे ॱनोङ् मीत्न ॱनी, हीदु को़न्ज्योक्की ढुङ्दु हज्यरङ् ज्यीक्टक् मीप्प डो छुगेन् बेत्। 22 हुनी हज्यरङ्गी खोङ्ल घङ् लीम्ब घयेत् थोप्केन् बेत्। घन्ड हीन् सीन्न खोङ्गी क धङ् धम्ल चीन हज्यरङ्गी खोङ् गुवे लेमु झ्यीक्केन् बेत्। 23 खोङ्गी ॱनङे क दी हीगो बेत्। खोङ्गी ॱरेबु येशु ख्रीष्ट्की छेन् डेन्न खोङ्ल छ्य स्योक् गोगेन् धङ् ख्रीष्ट्की ॱनङे कल यो़प्पल च्यीक्तङ् च्यीक्ल झ्यम्ब झ्यीत् गोगेन् बेत्। 24 को़न्ज्योक्की क धङ् धम्ल चीन युङ्गेन् दी खोङ्दङ् मत् ढेब युङ्गेन् बेत्। ॱनी खोङ् हुगोदङ् मत् ढेब युङ्गेन् बेत्। ॱनी खोङ् हज्यरङ्दङ् मत् ढेब यो़प्प दी खोङ्गी हज्यरङ्ल ॱनङ्न यो़प्पे धम्बे थुगी लम्नी ॱह घो छुगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.