१ युहन्ना 2 - ल्होमी1 ङे भीजसो, हीगो ङे खीत्रङ्ल दीक्प झ्यीच्च्ये मीप्पे ढीक्ल ढीन तोङ्गो़त्। मी ॱसी़ पीन दीक्प झ्यीन युङ्न अक्, हुगी ढीक्ल इगीदु यप्की ढुङ्दु हज्यरङ्गी ढीक्ल ढङ्बु यो़क्केन्, येशु ख्रीष्ट् खबाल लोङ्न स्युदेन् ज्यक्केन् बेत्। 2 ॱनी खोङ् हज्यरङ्गी दीक्पे ढीक्ल ॱस्याबल खोङ्गी रोरङ्गी ॱरोक् दीरङ् च्येब बेत्। ॱनी हुगो हज्यरङ्गी ढीक्ल छ्युवक् मेम्ब, जम्बुलीङ्गी मी कुरीक्की दीक्पे ढीक्ल अक् बेत्। को़न्ज्योक्की कल चीगेङ्गी मी ३-६ 3 खोङ्गी क धङ् धम्ल हज्यरङ् ॱसी़ चीन युङ्गुक्क हुगी खोङ् गन्दीय ङु ॱस्यीगुक् ॱनो़ब हज्यरङ् कुरीक्की ॱह घोगेन् बेत्। 4 ॱनी यङ् ॱसी़ रोरङ्गी ख दीगी खोङ् ङु ॱस्यीगो़त् सीक्केन्, ॱनी म दी खोङ्गी क धङ् धम्ल यङ् हुगी ॱमीत् चीगो़त्न, हुगो ॱएजङ हुगी ॱसीम्ल दीम्बे केच्च्य मीप्प युङ्गेन् बेत्। 5-6 खोङ्गी क धङ् धम्ल चीन युङ्गेङ्गी मी ॱसीम् दील हस्सो़त् को़न्ज्योक्ल दीम्बरङ्गी झ्यम्ब छङ यो़प्प युङ्गेन् बेत्। ॱनी यङ् हज्यरङ् खोङ्दङ् मत् ढेब यो़त् सीक्केन् दीगी छ्यलु दी येशुगी लेमु डस्सी युङ् गोगेन् बेत्। हुनी क हुगो को़न्ज्योक्तङ् मत् ढेब यो़प्प हीम्ब दी हज्यरङ्गी ॱह घो छुगेन् बेत्। ख्रीष्ट्की क ७-११ 7 झ्यम्बे दगुसो, खीत्रङ्ल ङे ढीगेङ्गी यीगी हीगो क ॱसम्ब मेम्बेत्। हीगो खीत्रङ्गी गोमनीरङ् ॱह घोन यो़क्केन्, ॱस्यो़च्च्ये च्येम्मे केच्च्य क ॱङीङ्ब दीरङ् बेत्। 8 ॱनी हीन्न अक्, म दी खीत्रङ्ल ङे ढीगेङ्गी क हीगो ॱसम्ब डस्सीरङ् बेत्। हीगो खोङ् धङ् खीत्रङ्गी मीजील दीम्बरङ् झ्युङ बेत्। घन्ड हीन् सीन्न मेन्नक् ये छर्न, ह म दीरङ् मेङ्ग ॱङो़न्ने दी ॱस्यर् छर बेत्। 9 ॱनी मी ॱसी़ ङ मेङ्गल यो़त् सीगुक्क हुगी यङ् रोरङ्गी पी़न्ज्याल ड झ्यीक्को़त्न, हुगो मेङ्गल मेम्ब, मेन्नक्ल यो़क्केङ्गी मी बेत्। 10 ॱनी मी ॱसी़ पी़न्ज्या नङ्गी पी़ल्ल झ्यम्ब झ्यीगुक्क हुगो मेङ्गल यो़प्पे मी दी बेत्। हुल दुगेन् घन्ड अक् मीत् युङ्गेन् बेत्। 11 ॱनी यङ् ॱसी़ पी़न्ज्या नङ्दु ड झ्यीगुक्क हुगो मेन्नक्ल गीर्केङ्गी मी बेत्। हुगो मेन्नक्ल यो़क्केन् झ्यीनी, लम् ॱमीत् ॱङीब, घल हीन्न हीन् डोगेन् बेत्। फम, भीज धङ् स्यो़म्ब घयेत्ल १२-१४ 12 भीजसो, ङे यीगी हीगो खोङ्गी छेङ्गी लम्नी दीक्प धक् छर खीत्रङ् घयेक्की ढीक्ल ढीगो़त्। 13 फम गेम्बासो, ॱङो़न् धङ्बुनीरङ् यो़क्केन्, खोङ् ङु ॱस्यीगेन् खीत्रङ् घयेक्की ढीक्लरङ् ङे हीगो ढीगो़त्। स्यो़म्बसो, दी़त्ङेन् हुगोले ज्यला थो़न्न युङ खीत्रङ् घयेक्की ढीक्लरङ् ङे हीगो ढीगो़त्। 14 भीजसो, यप् ङु ॱस्यीगेन् खीत्रङ् घयेक्की ढीक्लरङ् ङे हीगो ढीगो़त्। फम गेम्बासो, ॱङो़न् धङ्बुनीरङ् यो़क्केन् खोङ् ङु ॱस्यीगेन् खीत्रङ् घयेक्की ढीक्लरङ् ङे हीगो ढीगो़त्। स्यो़म्बसो, को़न्ज्योक्की केच्च्य ॱसीम्ल स्यक्न यो़क्केन्, खीत्रङ् ॱलोप्स्यीक् च्येम्म, दी़त्ङेन् हुगोले ज्यला थो़न्न युङ खीत्रङ् घयेक्की ढीक्लरङ् ङे हीगो ढीगो़त्। जम्बुलीङ्ल ॱसीम् छ्याब मत् झ्यीज्यीत् १५-१७ 15 जम्बुलीङ् धङ् जम्बुलीङ्गी ढङ् घयेत्ल ॱसीम् छ्याब मत् झ्यीज्यीत्। ॱनी ॱसी़ जम्बुलीङ्ल ॱसीम् छ्याब झ्यीगुक्क हुगी ॱसीम्बे यप्ल झ्यम्ब मीत् युङ्गेन् बेत्। 16 जम्बुलीङ्न यो़क्केङ्गी ढङ् कोलीमीगी ॱसीम्ल युङ्गेन् धेत्मो़ ङेम्ब, ॱमीक्ल फोक्पे धेच्च्यो धङ् नोर् यो़प्पे तम्दो़त् हीन्दुक् झ्यीबे ढङ् घयेत् यप् च्यानी मेम्ब, जम्बुलीङ्नी युङ्गेन् बेत्। 17 जम्बुलीङ् धङ् जम्बुलीङ्न यो़क्केन् धेत्मो़ हुन्दुक् झ्यीबे ढङ् घयेत् कुरीक् ये डोगेन् बेत्। ॱनी को़न्ज्योक्की थुल यो़प्प झ्यीक्केन् घयेत् दीरङ् क मीत् येब, धी़ ज्यी़न्दु दो़क्केन् बेत्। ख्रीष्ट्की ड १८-२७ 18 भीजसो, ह हीगो स्युक् थमे धी़ बेगो। हीगी कप्ल ख्रीष्ट्की ड च्यीक् थो़ङ्गेन् बेत् सीन्न खीत्रङ्गी एल्लानी ॱह घोन यो़क्केन् बेत्। हुन्दोनीरङ् ख्रीष्ट्की ड ॱयोङ्मा गज्येन् थो़न् छर बेत्। हुगो झ्यीनी ह थमे धी़ ॱलीस्सोङ् ॱनो़ब हज्यरङ्गी ॱह घोगेन् बेत्। 19 हुगी ड हुब एल्ला हज्यरङ्दङ् कङ्ज्यीक्ल देप्प बेत्। ॱनी हुब हज्यरङ् ङो़गी मेम्बल हुन्दो हुब भीन टप्सोङ्। हुब गन्दीय हज्यरङ् ङो़गी हीन्न ॱनी, हज्यरङ्दङ् दल दो़प्पेत् क ॱनी। हुब हुन्दुक् झ्यीन ॱसोङे ले हुगी हुब हज्यरङ् ङो़गी च्यीगी च्यीक् मेम्बेत् ॱनो़ब हज्यरङ्गी ॱह घोगेन् बेत्। 20 खीत्रङ् हुब डस्सी मेम्बेत्। धक्पर् यो़प्प च्येम्मे खीत्रङ्ल गोल ॱनुम् ॱही़म्ब डस्सी धम्बे थु ॱनङ बेत्। हुनी क खीत्रङ् घयेक्की दीम्ब दी ॱह घोगेल्ल झ्युङ्न यो़क्केन् बेत्। 21 ङे हीगो खीत्रङ्गी दीम्ब ॱह मीत् घोगो़ट्टो ॱनो़न ढीब मेन्। दीम्ब ॱस्यो़च्च्येरङ् यो़त्न अक्, दीम्बल ॱएलमे ज्यी़त् घन्ड अक् मीप्प हीम्ब ॱस्यो़च्च्येरङ् यो़त्न अक्, ङे हीगो ढीगो़त्। 22 येशुल को़न्ज्योक्की को़बे च्यप्को़न् ख्रीष्ट् मेम्बेत् सीन्न ॱसी़ सीगुक्क हुले ज्यीक्पागी ॱएजङ घर मीत् युङ्गेन् बेत्। यप्ल अक् मेम्बेत् सीक्केन्, ॱरेबुल आक् मेम्बेत् सीक्केन् हुन्दुक् झ्यीब हुगो ख्रीष्ट्की ड बेत्। 23 ॱरेबुल ॱसी़ मेम्बेत् सीन्न सीगुक्क हुगोदङ् यप् ढेन युङ्गेन् बेत्। ॱनी ॱरेबुल ॱसी़ दीम्बरङ् बेत् सीन्न सीगुक्क हुगोदङ् यप् मत् ढेब युङ्गेन् बेत्। 24 खीत्रङ्गी गोमनी ॱह घोवे केच्च्य घयेत् दी खीत्रङ्गी ॱसीम्ल सील्ल स्योक्च्यीत्। हुनी क हस्सो़त् खीत्रङ् घयेत् ॱरेबु धङ् यप्की दनी मत् ढेब युङ्गेन् बेत्। 25 हुनी क खोङ्गी हज्यरङ्ल ॱनङे छ्यो़त्तुम् जेप्पे फु तक्पे छी दी युङ्गेन् बेत्। 26 हीगो खीत्रङ् घयेत्ल ॱयोङ्गोर् ज्यक्केन् हुबे ॱयोङ्गोर्ल खीत्रङ् छ्यी़ज्ये मीप्पे ढीक्ल ढीब हीन्। 27 गोल ॱनुम् ॱही़म्ब डस्सी खीत्रङ्ल धम्बे थु ॱनङ हुगो खीत्रङ्दङ् दल फुगी मत् ढेब स्युगेन् बेत्। हुगो झ्यीनी खीत्रङ्ल ॱसी़ इक् ॱलोप्स ज्यक् मीत् गो़ब, धम्बे थुगी खीत्रङ्ल कुरीक् तो़न्न ॱलोप्केन् बेत्। ॱनी खोङ्ल ॱएलमे ज्यी़त् मीप्प, दीम्ब च्यङ्ज्यङ् यो़क्केन् झ्यीनी, खोङ्गी ॱलबल नेन्न ख्रीष्ट्तङ् मत् ढेब थीरी दो़च्च्यीत्। 28 भीजसो, खोङ् फीच्च्य इगीनी मल्ल झ्यो़म्बे यङ्ल खीत्रङ् खे ॱमीत् छ्यङ ज्यीब मीप्प, थो़न् छुज्ये यो़प्पल हुन्दोनीरङ् खोङ्दङ् मत् ढेब थीरी दो़च्च्यीत्। 29 खोङ् ढङ्बु हीम्ब खीत्रङ्ल ॱस्यो़च्च्ये यो़क्केन् बेत्। हुगो झ्यीनी हुनी को़न्ज्योक् गुवे ले ढङ्बु ॱसी़ झ्यीगुक्क हुगो खोङ् च्यानी छ्येप्पे मी बेत् ॱनो़ब खीत्रङ्गी ॱह घो छुगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.