१ युहन्ना 1 - ल्होमी1 ॱङो़न् धङ्बुनीरङ् यो़क्केन्, छीये ढीक्की केच्च्य ङीक्की ॱस्यो़क्को़त्। ॱनी हीगी ढीक्ल ङीक्की ॱह घोज्युङ्। ॱमीक्की थोङ्ज्युङ्। ॱनी तेबेन्। हुनी लक्पे एक् सीम्बेन्। 2 ॱनी हुगी छीये खुङ् दी थो़न्न युङ्न, ङीक्की हुगो थोङ्नी हीगी ढीक्ल ङीत् पङ्बुल थो़न्न ॱस्यो़क्केन्। एल्ला हीगी छीये खुङ् हीगो यप्तङ् कङ्ज्यीक्ल यो़क्केन् बेत्। ॱनी हुन्दो ङीत् च्याल थो़न्न युङ्नी, हीगी ढीक्ल खीत्रङ्ल ॱस्यो़क्केन् हीन्। 3 यप् धङ् खोङ्गी ॱरेबु येशु ख्रीष्ट्तङ् ङीत् कङ्ज्यीक्प हीन्। ॱनी हीगो डस्सी खीत्रङ्दङ् ङीत् कङ्ज्यीक्प युङे ढीक्ल ङीक्की घङ् थोङ धङ् घङ् घोवे केच्च्य हुगो खीत्रङ्ल ॱस्यो़क्केन् हीन्। 4 हज्यरङ् कुरीक्ल गेस छ्यीम्मु युङ्ज्ये यो़प्पे ढीक्ल हीगो ङीक्की ढीन तोङ्गो़त्। को़न्ज्योक् मेङ्ग हीम्ब ५-१० 5 ङीक्की खोङ् च्यानी ॱह घोवे केच्च्य खीत्रङ्ल ॱस्यो़च्च्येम दी हीगो हीन्। को़न्ज्योक् मेङ्ग बेत्। खोङ्ल मेन्नक्की ज्यी़त् मीप्प बेत्। 6 हज्यरङ्गी ख दीगी ङीत् खोङ्दङ् कङ्ज्यीक्पल डोगो़त् सीक्केन्। ॱनी म दी रोरङ्गी छ्यलु दी मेन्नक्की लम्ल डोगो़त्न ॱनी, हुगो मीत् धक्प, ॱएलमल डोगेन् बेत्। 7 को़न्ज्योक् मेङ्ग झ्यीनी ॱनी, हज्यरङ् अङ् मेङ्गल डोगो़त्न ॱनी, हज्यरङ् च्यीक्तङ् च्यीक् इक् कङ्ज्यीक्प युङ्गेन् बेत्। हुनी खोङ्गी ॱरेबु येशुगी ठक्की हज्यरङ्गी दीक्प घयेत् टी़न धक्तु ची़क्केन् बेत्। 8 हज्यरङ् ॱसी़ ङल दीक्प घन्ड अक् मीत् सीगुक्क हुगी रोरङ्गी रोरङ्ल गो़गोर् तोङ्गेन् बेत्। हुगी ॱसीम्ल दीम्बे केच्च्य मीत् युङ्गेन् बेत्। 9 ॱनी यङ् हज्यरङ् मी रोरङ्गी दीक्पे ढीक्ल को़न्ज्योक्ल ॱस्युस्स्या पुन ॱनी, खोङ् ज्युरुव मीप्प, तेम्बर् धङ् ढङ्बु यो़क्केन् झ्यीनी, हज्यरङ्गी झ्यीबे दीक्प घयेत् दी खोङ्गी धक्तु ची़त्न हज्यरङ्गी ङीबे ढङ् घयेत् दी टी़न धक्तु ची़क्केन् बेत्। 10 ॱनी यङ् हज्यरङ् ॱसी़ ङे दीक्प घन्ड अक् मत् झ्ये सीन्न सीगुक्क हुगी ॱसीम्ल को़न्ज्योक्की केच्च्य स्युन मीप्पल हुगी को़न्ज्योक् ॱएजङल सोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.