१ कोरीन्थी 9 - ल्होमीठीक्नलल ॱल थोप्केङ्गी ॱहक् १-२७ 1 ङल रङ्मो़ मीप्प बेक्कक् ॱनी? ङ घन्ड ठीक्नल मेम्बेक्क ॱनी? हज्यरङ्गी चोव ज्यीन्दक् येशु ङे थोङ् ॱमत् ॱनोङ बेक्क ॱनी? चोव ज्यीन्दक्तङ् मत् ढेबल झ्यीबे ङे लेगी डेबु दी खीत्रङ् मेम्बेक्क ॱनी? 2 ॱयोङ्मा घयेक्की ढीक्ल ङ ठीक्नल मेन्न अक्, खीत्रङ् घयेक्की ढीक्ल त ङ ठीक्नल हीन्। ॱनी ङ ठीक्नल हीन् धङ् मेल्ल हीगी थीजी दी चोव ज्यीन्दक्तङ् मत् ढेबल यो़क्केन् खीत्रङ् घयेत् बेत्। 3 ङे गोल थो़न्न च्यो़न्स्यो़त् ॱस्यो़क्केन् घयेत्ल ङे लेम्बु दी हीगो यो़त्। 4 सय धङ् थुङे ढीक्ल ङीत्ल लीन्ज्येमे ॱहक् मीप्प बेक्कक् ॱनी? 5 ठीक्नल ॱयोङ्मा धङ् चोव ज्यीन्दक्की पी़न् ॱङो़म घयेत् धङ् पत्रुस्की डस्सी ङीत्ल अक् नङ्जङ् छ्य स्योक्केन् ठीक्न गीर्च्येमे ॱहक् मीप्प बेक्कक् ॱनी? 6 ङ धङ् बार्नाबास् छ्युवक्रङ् ढोप्प ॱसोये ले दी इक् झ्यीत् गो़ ॱस्यर्केन् बेक्क ॱनी? 7 ॱमक्मी ॱसु दीगी रोरङ्गी खर्च झ्यीन ॱमक्मीगी ले झ्यीक्को़प्प बेक्क? गोङ्गोङ्गी ॱसप्ले ज्यप्नी, हुल छ्याबे डलु मीत् सगेङ्गी दक्पु दी ॱसु दी यो़प्प बेक्क? लुक् ॱसो़नी, लुक्की होम थुङ्ज्येमे ॱहक् मीप्पे लुक्चीब दी ॱसु यो़प्प बेक्क? 8 हीगो ङे कोलीमी लुसल छ्युवक् युङ्गेन् बेत् सीक्केन् मेम्बेत्। छ्यो़डीम्ल आक् हीन्दुक् दीरङ् यो़क्केन् बेत्। 9 हीगी ढीक्ल मोशागी ढीबे छ्यो़डीम्ल हीन्दुक् सीर थो़ङ्गेन् बेत्। ॱलङ्ल ॱङीम ॱमुर्तु ची़प्पे यङ्ल खच्ची ॱमत् को़न्ज्यीत् सीर यो़क्केन् बेत्। (ठीम्लु २५:४) ॱनी हीगो को़न्ज्योक्की ॱलङ्गी ढीक्लरङ् ॱसुङ बेक्क ॱनी? 10 हुगो हज्यरङ् मी घयेक्की ढीक्ल ॱसुङ बेत्। हीगो झ्यीनी हज्यरङ्गी ढीक्ल हीन्दुक् सीर ढीन यो़क्केन् बेत्। ॱमो़ ॱमो़क्केन् धङ् तो़न्दोक् दी़क्केङ्गी रोरङ्गी थोप्को़ दी हुनी युङ्गो़त् ॱनो़बे रीगो खुर्न झ्यीत् गोगेन् बेत्। 11 धम्बे थुनी झ्युङे ॱसो़न् ङीक्की खीत्रङ्गी घुङ्दु तबेन्। हीगो झ्यीनी ङीक्की सी़ल फेम्बे खोज्येत् ङीत्ल थोप्को़ यो़प्पे तो़न्दोक् हुगो खीत्रङ् च्यानी ङीक्की दी़न अक्, स्येन् मत् ओ़ब त मीत् युङ यो़त्। 12 ॱयोङ्मा घयेत्ल अक् त खीत्रङ् च्यानी लीन्न सज्येमे ॱहक् दुक् सीन्न ॱनी, ङीत्ल ॱसुम्ब हुले ॱल्हक्मागी ॱहक् मीप्प बेक्क ॱनी? ॱनी हीन्न अक्, ख्रीष्ट्की केच्च्य ॱनेम्बुल भर्च्येत् युङ्ज्ये मीप्पल ङीक्की हुगो मत् लीम्ब, बोर दुक्प घन्ड झ्युङ्न अक्, गुर्न देप्पेन्। 13 छ्यो़गङ्दु छ्यो़प्पो़ङ्गी ले झ्यीक्केन् घयेत्ल हुनीरङ् सज्ये थुङ्ज्ये थोप्केन् हीम्ब खीत्ल ॱस्यो़च्च्ये मीप्प ॱनी? छ्यो़गङ्दु छ्यो़प्प पुगेङ्गी छ्यो़प्पो़न् घयेत्ल हुदु छ्यो़प्प पुदु युङे छ्यो़प्प दीनीरङ् सज्येमे फक् थोप्केन् हीम्ब खीत्ल ॱस्यो़च्च्ये मीप्प ॱनी? 14 ॱनी हुगो डस्सी केच्च्य ॱनेम्बु ॱस्यो़क्केन् घयेत्ल अक् हुगी ले दीनीरङ् सज्ये धङ् थुङ्ज्ये थोप् गोगेन् बेत् सीरे क चोव ज्यीन्दक्की ॱनङ्न यो़क्केन् बेत्। 15 ॱनी हुगो डस्सी लीन्ज्येमे ॱहक् ङल यो़त्। ॱनी यो़त्न अक्, ङे घन्ड अक् मत् लीन्। ॱनी हुन्दो यङ् खीत्रङ्गी ङल हुगो टो़क्को़ट्टो ॱनो़बे रीगो झ्यीन यीगी हीगो ढीब अक् मेन्। ॱनी ङे मत् लीम्बे ङोम्ज्येत् हीगो ॱसी़ घन्डरङ् झ्यीन अक्, येदु ची़त् ॱमीत् छुगेन् बेत्। हुगो येबले त बोर ङ ॱस्यीन, गा युङेत्। 16 ॱनी हीन्न अक्, यङ् केच्च्य ॱनेम्बु ॱस्यो़प्पे लेगी ढीक्ल ङल घन्डे ङोम्ज्येत् एत् मीत्। हीगो ङे घन्दुक् झ्यीन हीन्न अक्, ॱस्यो़त् गो़ ॱस्यर्केङ्गी केच्च्य हीन्। ङे ॱमत् ॱस्येप्प देत्न ॱनी, ङ घन्डे दुक्प। 17 हीगो ङे ङरङ्गी ॱलो़लङ्गी झ्यीक्को़त्न ॱनी, हीगी ॱल दी ङल थोप् ॱस्यीगेन् बेत्। ॱनी हुगो मेम्ब, हीगी ले हीगो को़न्ज्योक्की ङल ॱलो खीन को़नी, हीगी गेन् दी ङे खुर्न झ्यीक्को़त्। 18 हीगो हीन्न ॱनी, ङे ॱल दी घन ॱनी? केच्च्य ॱनेम्बु ॱस्येत्नी, हीगी ढीक्ल ङल ॱल लीम्बे ॱहक् त यो़त्। ॱनी यो़त्न अक्, हुगो मत् लीम्ब स्यक्नी, हीन्दुक्रङ्ल बुल मीप्पल केच्च्य ॱनेम्बु ॱस्यो़त् छुब हुगो हस्सो़त् ङे ॱल दी हीन् ॱनो़ब ॱसम्गो़त्। 19 ङ रङ्मो़ च्येम्मे मी हीन्। मी ॱसी़ ॱयोक्ल ॱस्योर आक् मीत्। ॱनी हीन्न अक्, हरुङ् मी गज्येन् थर्वे लम्ल कुक् छुज्ये यो़प्पल ङ रङ्मो़ मीप्पे मी डस्सी मी कुरीक्की ॱयोक्पु हीम्ब झ्यीक्को़त्। 20 यहुदी घयेत् कुक् छुज्ये यो़प्पल ङ अक् यहुदी डस्सीरङ् झ्यीक्को़त्। ॱनी यङ् छ्यो़डीम्गी होक्ल दो़क्केन् घयेत् कुक् छुज्ये यो़प्पल ङ छ्यो़डीम्गी होक्ल मीत्न अक्, छ्यो़डीम्गी होक्ल यो़प्प डस्सीरङ् झ्यीक्को़त्। 21 छ्यो़डीम्गी नङ्ल मीप्पे ज्यी़त् ॱयोङ् ॱयोङ्गी मी घयेत् कुक् छुज्ये यो़प्पल ङ अक् छ्यो़डीम्गी नङ्ल मीप्प डस्सीरङ् झ्यीक्को़त्। हीम्ब त ङ को़न्ज्योक्की छ्यो़डीम्ल ॱमीत् चीगेन् मेन्। ख्रीष्ट्की कट्टीम्गी होक्ल दो़क्केन् हीन्। 22 छ्य योक्या च्येम्म घयेत् कुक् छुज्ये यो़प्पल ङ अक् छ्य योक्या यो़प्प डस्सीरङ् झ्यीक्को़त्। मी ॱनजो गुजो थर्वे लम्ल कुक् छुज्ये यो़प्पल ङ अक् हुब घयेत् डस्सीरङ् ॱनजो गुजो झ्यीन घङ् ॱअल छ छ झ्यीक्को़त्। 23 ॱयोङ्म घयेत्तङ् दल ङल अक् केच्च्य ॱनेम्बी़ ॱमेल्लम् थोप्च्ये यो़प्पल हुन्दुक् झ्यीन ङे केच्च्य ॱनेम्बु गीर्न ॱस्यो़क्को़त्। 24 ज्युक्रील दुर्री चीये यङ्ल ज्युक्प त कुरीक् ज्युक्केन् बेत्। ॱनी च्यीक्रङ् क ज्यला थो़न्न, हुलरङ् ज्ये दी थोप्केन् बेत्। हीगो कुरीक्ल ॱस्यो़च्च्ये यो़ट्टो। ॱनी हीगो डस्सीरङ् खीत्रङ् ॱअङ् ज्युन ज्ये थोप् छुब झ्यीज्यीत्। 25 ज्युक्रील दुर्री चीगेन् घयेक्की हुगी लेमी़ ॱवङ्ल तङ्न ॱस्योज्योङ् झ्यीक्केन् बेत्। हुगो फु ॱमीत् तक्केङ्गी थोप् छ्यीम्मी़ स्यमुङ् थोबे ढीक्लरङ् बेत्। ॱनी हज्यरङ् हुगो डस्सी मेम्ब, हज्यरङ्ल फु तक्केङ्गी थोप् छ्यीम्मी़ स्यमुङ् थोबे ढीक्ल बेत्। 26 हुगो झ्यीनी ङ नुक्रङ् टुङ्ग मीप्प ज्युक्केन् डस्सी मेन्। मुर्चोक् बेन्नी थेक्कङ्ल ॱमत् फोक्प डस्सी मेन्। 27 ङे ङरङ्गी सी़बु ङरङ्गी ॱवङ्गी होक्ल सुङ्न स्योक् छुबल ङरङ्गी ङरङ्ल दुङ डस्सी झ्यीन छर्की च्यो़क्को़त्। स्येन् ङ ॱयोङ्ल केच्च्य ॱस्यो़क्केन् हीन् सीक्केन्। ॱनी यङ् ङरङ् कल ङीन, ज्ये ॱमीत् थोब लेगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.