१ कोरीन्थी 7 - ल्होमीछ्योबु छ्युङ्मे ढीक्ल १-२४ 1 ॱनी ङे हीगो खीत्रङ्गी ङल ढीन तङे यीगीगी लेन् दील ढीगो़त्। छ्योगो स्येन् ॱनम ॱमत् ठीक्प देत्न, गा युङेत्। 2 ॱनी हीन्न अक्, दयम् झ्यीच्च्ये मीप्पे ढीक्ल छ्योगो रील छ्युङ्म री धङ् भुमु रील छ्योबु री युङ् गोगेन् बेत्। 3 छ्योगो रोरङ्गी छ्युङ्मदङ्, ॱनी छ्युङ्म रोरङ्गी छ्योबुदङ् दो़प्पे लेगी क दील ॱङीक्कर्की ची गोगेन् बेत्। 4 छ्युङ्मे रोरङ्गी सी़ल रोरङ्गी ॱवङ्ग छ्युवक् मेम्ब, छ्योबी़ ॱवङ्ग आक् डोगेन् बेत्। ॱनी हीगो डस्सी छ्योबी़ रोरङ्गी सी़ल रोरङ्गी ॱवङ्ग छ्युवक् मेम्ब, छ्युङ्मे ॱवङ्ग आक् डोगेन् बेत्। 5 हीगी ढीक्ल छ्योबु छ्युङ्म ॱङीक्कर्की च्यीक्तङ् च्यीक्की ॱवङ्ग दील नेन् गोगेन् बेत्। ॱनी यङ् ॱसुव तोबे ढीक्ल धोबा च्यीक्की धी़ च्यीक् थुक् ॱसीम् दीरङ् ॱसुव तोबल तङ्न दो़त् छुबल ॱङीक्कर् थी़न्न ॱनी, छ्योबु छ्युङ्म दो़प्पे ले दी फङ्न स्योक् छुगेन् बेत्। ॱनी हुगो यो़नी, यङ् मुल दो़च्च्यीत्। स्येन् छ्येगी लेमु क च्यो़त् ॱमत् छुब, शैतान्गी ॱङीङ्ल सीङ्गेन् बेत्। 6 ॱनी हीगो म दी मत् युङ् के दी बेत् सीन्न ङे खेरक् तोङ्गेन् मेन्। 7 झ्युङ्न ॱनी, मी कुरीक् ङ डस्सी देत्न, गा युङेत् ॱनो़गुक्। ॱनी हीन्न अक्, मी ॱसोस्सोरङ्ल को़न्ज्योक्की थुज्यीगी कबप् री री ॱनङ्न यो़क्केन् बेत्। 8 ॱनी भालीन् मत् झ्यीबे छ्योगो भुमु घयेत् धङ् मोरेङ्मु घयेत्ल ङ हीगो सीक्केन्। हुब ङ डस्सी भालीन् मत् झ्यीब देत्न, स्येन् गस्सी युङेत् ॱनो़गुक्। 9 ॱनी दो़त् ॱमत् थुप्न ॱनी, हुब भालीन् झ्यीज्यीत्। घन्ड हीन् सीन्न गन्दीक्म छ्ये लङ्गीन् दो़प्पले त भालीन् झ्यीब गच्च्यङ् युङ्गेन् बेत्। 10 ॱनी यङ् भालीन् झ्यी छर घयेत्ल ङ हीगी क हीगो टो़क्केन्। हीगो म दी ङे मेम्ब, चोव ज्यीन्दक्की क बेत्। छ्युङ्मे रोरङ्गी छ्योबु ॱलो़ तङ्न घीज्ये मीत् युङ्गेन् बेत्। 11 पीन घीब हीन्न ॱनी, झ्युङ्न रोरङ्गी छ्योबु दीदङ्रङ् जोम्न डीक्न दो़त् गोगेन् बेत्। ॱनी हीगो मीत् युङ्न ॱनी, ॱयोङ्ल ॱमत् फीम्ब दो़त् गोगेन् बेत्। ॱनी यङ् छ्योगो़ रोरङ्गी छ्युङ्म ॱलो़ तङ्न घीज्ये मीत् युङ्गेन् बेत्। 12 ॱनी ॱयोङ्म घयेत्ल यङ् हीन्दुक् सीक्केन्। हीगो चोव ज्यीन्दक्की मेम्ब, ङे केच्च्य बेत्। पी़न्ज्या ॱसुल छ्य मीत् स्योक्केङ्गी छ्युङ्म यो़दङ् हुगो रोरङ्गी छ्योबु दीदङ्रङ् मीत् घीब दो़क्केन् सीन्न ॱनी, छ्योबु दीगी हुगो ॱलो़ तोङ्ज्ये मीत् युङ्गेन् बेत्। 13 ॱनी यङ् भुमु ॱसुल छ्य मीत् स्योक्केङ्गी छ्योबु यो़दङ् हुगो रोरङ्गी छ्युङ्म दीदङ् मीत् घीब दो़क्केन् सीन्न ॱनी, छ्युङ्म दीगी हुगो ॱलो़ तोङ्ज्ये मीत् युङ्गेन् बेत्। 14 घन्ड हीन् सीन्न छ्य मीत् स्योक्केन् छ्योगो हुगो रोरङ्गी छ्युङ्मे लम् दीनी को़न्ज्योक्की छ्यक्ल ॱमीन यो़प्पे मी हीम्बल डोगेन् बेत्। ॱनी छ्य मीत् स्योक्केङ्गी छ्युङ्म आक् हुगो रोरङ्गी छ्य स्योक्केङ्गी छ्योबी़ लम् दीनी को़न्ज्योक्की छ्यक्ल ॱमीन यो़प्पे मी हीम्बल डोगेन् बेत्। हुगो डस्सी मत् युङ्न ॱनी, खीत्रङ् हुन्दुक् झ्यीबे भीज घयेत् धक्च्ये मीप्पे मील डोगेन् बेत्। हीम्ब त हुब धक्पर् हीम्बे मीरङ् बेत्। 15 छ्य मीत् स्योक्केन् दीगी छ्य स्योक्केन् दील ङ रङ्दङ् घीगेन् सीन्न ॱनी, घीन अक् डीक्केन् बेत्। हीगी ढीक्ल छ्य स्योक्केङ्गी मी छ्योगो हीन्, भुमु हीन्न अक्, हुल कर् घन्ड अक् ॱमीत् खीगेन् बेत्। को़न्ज्योक्की हज्यरङ् भो़च्च्ये दी इक् छुङ्बोक्म झ्युङ्न स्यीव युङ्ज्येल भो़ब बेत्। 16 मीत् घीब दो़क्केन् सीन्न ॱनी, भुमु खोक्की रङ्गी छ्योबु थर्वे लम्ल ठीक् छुब धङ् ॱमीत् छुब खो़त्ल घन्दुक् झ्यीन ॱस्यो़च्च्ये युङ्गेन्? ॱनी यङ् छ्योगो खोक्की रङ्गी छ्युङ्म थर्वे लम्ल ठीक् छुब धङ् ॱमीत् छुब खो़त्ल घन्दुक् झ्यीन ॱस्यो़च्च्ये युङ्गेन्? 17 को़न्ज्योक्की मी रीदङ् री भो़बे यङ्ल चोव ज्यीन्दक्की मी ॱसोस्सोरङ्ल घन्दुक् झ्यीबे ॱसोदी को़ यो़दङ् हुगो हुन्दुक् दीरङ् दो़त् गोगेन् बेत्। ङे हीगी ॱलोप्स हीगो छ्यो़ छो कुरीक्ल ज्यक्केन् हीनो। 18 यहुदीगी दक् ज्यबे मी को़न्ज्योक्की भो़ब हीन्न ॱनी, हुगी रोरङ् दक् मत् ज्यबे मी डस्सी झ्यीच्च्ये मीत् युङ्गेन् बेत्। ॱनी यङ् यहुदीगी दक् मत् ज्यबे मी को़न्ज्योक्की भो़ब हीन्न ॱनी, हुगो हुन्दुक् दीरङ् दक् मत् ज्यब दीरङ् दो़त् गोगेन् बेत्। 19 दक् ज्यप्नी, घन्ड। मत् ज्यप्नी, घन्ड। हुगो घन्ड अक् मेम्बेत्। गो़स्योल को़न्ज्योक्की छ्यो़डीम्गी कल चीगेङ्गी लेमु हुगो बेत्। 20 हज्यरङ् कुरीक् को़न्ज्योक्की भो़बे यङ्ल घन्दुक् झ्यीबे ॱसोदी यो़दङ् हुन्दुक् झ्यीब यो़प्प दीरङ् दो़त् गोगेन् बेत्। 21 रङ् रङ्मो़ मीप्पे ॱयोक्पु हीम्बे यङ्ल को़न्ज्योक्की भो़ब हीन्न ॱनी, ॱसीम्दुक् मीप्प दो़च्च्यीत्। ॱनी हीन्न अक्, रङ्मो़ल थो़न्ज्ये ॱनोङ्न ॱनी, थो़न्ज्यीत्। 22 घन्ड हीन् सीन्न चोव ज्यीन्दक्की भो़बे यङ्नी रङ्मो़ मीप्पे ॱयोक्पु हुगो चोव ज्यीन्दक्तङ् मत् ढेबल रङ्मो़ल थो़न् छर हीम्ब युङ्गेन् बेत्। ॱनी यङ् रङ्वङ् च्येम्मे मी चोव ज्यीन्दक्की भो़बे यङ्नी हुगो ख्रीष्ट्की रङ्मो़ मीप्पे ॱयोक्पु हीम्बल डोगेन् बेत्। 23 को़न्ज्योक्की रीन् टेत्न खीत्रङ् नो़ब बेत्। हुगो झ्यीनी खीत्रङ् कोलीमीगी खयोक्ल मेम्ब, ख्रीष्ट्की ॱयोक्पु हीम्ब झ्यीज्यीत्। 24 पी़न्ज्यासो, मी कुरीक् को़न्ज्योक्की भो़बे यङ्ल घन्दुक् झ्यीबे ॱसोदी यो़दङ् हुन्दुक् दीरङ् को़न्ज्योक् ङो़ल दो़च्च्यीत्। भुमु नज्युङ्म धङ् छ्योबु मीप्पे भुमी़ ढीक्ल २५-४० 25 ॱनी यङ् भुमु नज्युङ्म घयेक्की ढीक्ल चोव ज्यीन्दक्की ङल घन्डे क आक् ॱनङ्मोङ्। ॱनी हीन्न अक्, चोव ज्यीन्दक्की थुज्यीगी लम्नी खोङ्गी छ्यप्स्यक् खीबे मी ङ झ्यीनी, ङ केच्च्य हीगो ॱस्यो़क्केन्। 26 हुन्दो नोङ्गेङ्गी दुक्प हुल तेन ॱनी, ङे ॱनो़बल मी रीदङ् रीगी हन्देङ्गी मीजी दी घन्दुक् झ्यीब यो़दङ् हुगो डस्सी दीरङ् देप्प गा युङेत् ॱनो़गुक्। 27 रङ् ॱनम ठीक् छरे मी हीन्न ॱनी, मत् घीब दो़च्च्यीत्। ॱनी यङ् ॱनम ॱमत् ठीक्पे मी हीन्न ॱनी, ॱनम ठीक्च्यी़गी लेमु मत् झ्यीज्यीत्। 28 ॱनी म दी रङ्गी ॱनम ठीक्न आक्, हुगो दीक्पल त मीत् डोगेन् बेत्। ॱनी भुमु नज्युङ्म ॱनमल ॱसोङ्न आक्, हुगो दीक्पल मीत् डोगेन् बेत्। ॱनी भालीन् झ्यी छर घयेत्ल सज्यी़ डोज्यी़गी च्युगा गज्येन् युङ्गेन् बेत्। ॱनी हुगी च्युगा दी अच्च्येत् च्युङा युङ्ज्येल ङे हीगो सीक्को़त्। 29 पी़न्ज्यासो, ङे सीक्केङ्गी तम्गी धो़न् दी म दी हीगो बेत्। थमे धी़ ॱस्यच्चल ॱलीत् छर बेत्। हुगो झ्यीनी खीत्रङ्गी ॱसीम्ब दी ॱनव च्यीक्ल तङ्न हुनी छ्युङ्म यो़प्प च्येम्म घयेत् हीनी झ्यीनी मीप्प डस्सी झ्यीन युङ् गोगेन् बेत्। 30 ॱनी ङुगेन् घयेत् ॱसीम्दुक् मीप्प डस्सी झ्यीन युङ् गोगेन् बेत्। ॱनी गेस झ्यीक्केन् घयेत् गेस मीप्प डस्सी झ्यीन युङ् गोगेन् बेत्। ॱनी नोगेन् घयेक्की नो़बे यप्च्य दील नन्दक्की फङ मीप्प झ्यीन युङ् गोगेन् बेत्। 31 ॱनी जम्बुलीङ् हीदु मी मीजील घन्ड लालोक् झ्यीन खो़गो़दङ् हुल नन्दक्की फङ मीप्प डस्सी झ्यीन युङ् गोगेन् बेत्। घन्ड हीन् सीन्न हन्देङ्गी जम्बुलीङ् हीगी छ्यक्लुङ् लेलुङ् घयेत् कुरीक् ये डोगेन् बेत्। 32 खीत्रङ्ल च्युगा मीप्प झ्युङ्न ॱनी, ङ अक् गुगुक्। ॱनी छ्युङ्म मीप्पे मी चोव ज्यीन्दक्ल घन्दुक् झ्यीन गुदु ची़च्च्ये ब अक्? ॱनो़न चोव ज्यीन्दक्की ढीक्ल च्युगा खुर्केन् बेत्। 33 छ्युङ्म यो़प्प च्येम्मे मी यङ् रोरङ्गी छ्युङ्म घन्दुक् झ्यीन गुदु ची़च्च्ये ब अक्? ॱनो़न सज्यी़ डोज्यी़गी ढीक्ल च्युगा खुर्केन् बेत्। 34 हुगी ॱसीम् दी छ्योद ॱङील तोङ् गो़ ॱस्यर्केन् बेत्। ॱनी छ्योबु मीप्पे भुमु धङ् भुमु नज्युङ्मे रोरङ्गी ली़ धङ् ॱसीम् छङ्मे चोव ज्यीन्दक्ल धेस्सीम् खुर्न खोङ्गी ढीक्ल च्युगा झ्यीक्केन् बेत्। ॱनी यङ् छ्योबु यो़प्प च्येम्मे भुमी़ रोरङ्गी छ्योबु घन्दुक् झ्यीन गुदु ची़च्च्ये ब अक्? ॱनो़न सज्यी़ डोज्यी़गी ढीक्ल च्युगा खुर्केन् बेत्। 35 ङे हीगो खीत्रङ् कीङ्न स्योक्च्येल मेम्ब, खीत्रङ्ल फेन् थोब धङ् खीत्रङ्गी मीजीगी छ्यलु दी गङ्ज्येन् युङल धङ् ॱसीम् दी चोव ज्यीन्दक् ङो़ल ॱनग च्यीक्ल युङ् छुज्ये यो़प्पल सीन्न ॱस्येप्पेन्। 36 खीत्रङ् ॱसी़ रोरङ्गी ढीक्ल धर् तान यो़प्पे भुमु दी नज्युङ्मे येम् यो़ज्येमल ॱलीस्सोङ्। ह ङ हुगो ॱनमल ठीक्च्ये ॱनो़बे ॱसम्ल झ्युङ्न ॱनी, हुगो रङ्गी ॱनो़ब दी डस्सीरङ् ॱनमल ठीक्न आक्, युङ्गेन् बेत्। हुगो ॱनमल ठीक्पल दीक्प मीत् युङ्गेन् बेत्। 37 ॱनी यङ् धर् तान यो़प्पे भुमु दी ॱनमल ॱमीत् ठीक् ॱनो़बे ॱसम्ल खुर्न यो़त्न, हुल ॱयोङ्मागी खेरक् ॱमत् तङ, रङ्गी ॱनो़ब दी डस्सीरङ् ॱनमल ॱमत् ठीक्प थीरीय दो़त् छुन ॱनी, हुगो ओक् गङ्ज्येर्रङ् बेत्। 38 हुगी धर् ताबे भुमु दी ॱनमल ठीक्न आक्, गङ्ज्येर्रङ् बेत्। ॱमत् ठीक्न ॱसुम्ब हरुङ् हुले गा झ्यीबल डोगेन् बेत्। 39 भुमु रोरङ्गी छ्योबु यो़स्स्यीङ् भोर्ल मत् घीब दो़त् गोगेन् बेत्। छ्योबु ॱस्यीन खुर्न ॱनी, चोव ज्यीन्दक्तङ् मत् ढेब दो़क्केङ्गी मी ॱसी़ ॱनमल ठीक्को़दङ् हुल डो छुगेन् बेत्। 40 ॱनी हीन्न अक्, ङे ॱनो़बल त हुन्दुक् दीरङ् देप्प दी ॱसोदी छ्यीया युङेत् ॱनो़गुक्। ङल अक् को़न्ज्योक्की थु यो़त् ॱनो़नी, हीगो सीक्को़त्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.