१ कोरीन्थी 6 - ल्होमीखम्ज्यु मत् ज्यक् सीर १-११ 1 खीत्रङ् नङ्दु च्यीक्तङ् च्यीक् ठुक्प ॱस्योरे केच्च्य को़न्ज्योक्की मी चङ्म खीत्रङ् घयेक्कीरङ् नङ्दु डीक्न ॱमीत् टो़प्प, घन्डल ढङ्बु मीप्पे ठीम्बो़न् च्याल डोगेन्? 2 जम्बुलीङ्गी मी घयेत्ल त तीङ्ला को़न्ज्योक्की मी चङ्म घयेक्की ठीम् च्यो़क्केन् हीम्ब खीत्ल ॱस्यो़च्च्ये मीप्प ॱनी? ॱनी नुक्म जम्बुलीङ्ल अक् त ठीम् च्यो़क्केन् हीन्न ॱनी, खीत् नुक् झ्यीबे ठीम् च्युङेत्मु च्यीक् च्येत्न डीक्पल ओ़ब मीप्प ॱनी? 3 तेङ् यी़गी भङ्ज्येम्ब घयेत्ल अक् त तीङ्ला हज्यरङ्गी ठीम् च्यो़क्केन् बेत्। खीत्ल हीगो ॱस्यो़च्च्ये मीप्प ॱनी? हीगो हीन्न ॱनी, हुन्दो हीगी लेमी़ ठीम्ज्यो़त् ॱसुम्ब हुले ले ॱल्हा डीक् छुगेन् हीन्डो न ॱनी। 4 हुन्दुक् झ्यीबे ठुक्प थक्मु झ्युङल खीक्की छ्यो़ छोगी ॱलोल मीप्पे छ्यी मी ठीम्बो़ल्ल तीङ्गेन् सीक्केन्? 5 खीत् हील ङु ॱमीत् छयेक्क? पी़न्ज्या नङ्दु डीक्न तीक्केन्, डीक्च्याब खेबोक्म खीक्की घुङ्न च्यीगी च्यीक् इक् मीप्प ॱनी? 6 खीत्रङ् उन नङ्दु मीत् डीक्प, हुन्दुक् झ्यीन पी़न्ज्या च्यीक्तङ् च्यीक् खम्ज्यु ज्यप्न छ्यी मी छ्य मीत् स्योक्केन् च्याल च्यो़री चीगेन् बेत्। 7 खीत्रङ् नङ्दु हुन्दुक् झ्यीन खम्ज्यु ज्यक्री चीगो़त्न ॱनी, हुगी खीत्रङ्ल च्यो़न् युङ्गेन् बेत्। बोर च्यीक्तङ् च्यीक्की ङीब झ्यीब धङ् स्येन्दोङ् झ्यीब गुर्न देप्प गा मीत् युङेक्क ॱनी? 8 गुर्च्येगी छप्पुल हरुङ् खीत्रङ्गी क ङीब झ्यीक्केन् बेत्। स्येन्दोङ् झ्यीक्केन् बेत्। ॱनी हरुङ्द पी़न्ज्या नङ्दु उक् हुन्दुक् दीरङ् झ्यीक्केन् बेत्। 9 ढङ्ज्ये मीप्प झ्यीक्केन् घयेत्ल को़न्ज्योक्की ज्यागक्की फक् ॱमीत् थोब ले डोगेन् हीम्ब खीत्ल ॱस्यो़च्च्ये मीप्प ॱनी? खीत्रङ् दीम्बे लम्नी ॱमत् छ्यी़ज्यीत्। छ्ये ज्युक्केन्, ॱल्ह धङ् कुल छ्यक् छ्यो़प्प पुगेन्, ॱयोङ्दङ् ङीगेन्, छ्योगो ॱनम्बु दयम् झ्यीक्केन्, 10 की़न्नक्प धङ् लोबीय, च्युक्कोङ, ॱमो़म्बी़त् तोङ्गेन् धङ् झ्यक्पा हुन्दुक् झ्यीब घङ्गोल अक् को़न्ज्योक्की ज्यागक्की फक् ॱमीत् थोब ले डोगेन् बेत्। 11 एल्ला खीत्रङ् यरी हुगो डस्सी झ्यीक्केन् यो़क्केन् बेत्। ॱनी हीन्न अक्, ह खीत्रङ् चोव ज्यीन्दक् येशु ख्रीष्ट्की छेन्नी धङ् हज्यरङ्गी को़न्ज्योक्की थुगी चङ्मल टी़न धक्पर्ल सो़न ॱनम्बर् धक्पल तो़न्न यो़क्केन् बेत्। छ्ये ज्युक्च्ये मीत् युङे ढीक्ल १२-२० 12 खीत्रङ् यरीगी घन्ड झ्यीन अक् डीक्केन् बेत् सीगुक्। ॱनी हीन्न अक्, हुगो कुरीक्की हज्यरङ्ल फेन् ॱमीत् थोगेन् बेत्। यरीगी घन्ड झ्यीन अक् डीक्केन् बेत् त सीगुक्। ॱनी हीन्न अक्, म दी हुगी ॱवङ्गी होक्ल हज्यरङ् ॱस्योर्च्ये मीत् युङ्गेन् बेत्। 13 ॱनी यरीगी यङ् सम ढोप्पे ढीक्ल धङ् ढोप्प समे ढीक्ल बेत् सीक्केन् बेत्। हीम्ब त हुगो बेत्। ॱनी हीन्न अक्, हुगो ॱङीक्कर् को़न्ज्योक्की मीप्पल तङ् तोङ्गेन् बेत्। हज्यरङ्गी सी़ हीगो छ्ये ज्युक्पे ढीक्ल मेम्ब, चोव ज्यीन्दक्ल घो छ्यो़प्प युङे ढीक्ल बेत्। हज्यरङ्गी सी़ दी इक् चङ्म युङे ढीक्ल चोव ज्यीन्दक् झ्यो़म्ब बेत्। 14 को़न्ज्योक्की ॱस्यीक्की चोव ज्यीन्दक् ढोङ्नरनी ॱसोम्बुल ॱलोङ हीम्ब डस्सी खोङ्गी हज्यरङ्गी सी़ हीगो ओक् ॱसोम्बुल ॱलोङ्गेन् बेत्। 15 खीत्रङ्गी ॱसोस्सोरङ्गी सी़ हुगो ख्रीष्ट्की सी़गी यल्लक् हीम्ब खीत्ल ॱस्यो़च्च्ये मीप्प ॱनी? ॱनी ख्रीष्ट्की यल्लक् हीन्न ॱनी, खीत् घन्दुक् झ्यीन छ्येमुदङ् च्यीक्प युङ्ज्येल डोगेन्? हीगो ॱस्युली मीत् युङ्गेन् बेत्। 16 ॱसु छ्येमुदङ् मुल दो़क्कुक्क हुब ॱङीबु सी़ दी इक् च्यीक्प हीम्बल डोगेन् बेत्। खीत्ल हीगो ॱस्यो़च्च्ये मीप्प ॱनी? घन्ड हीन् सीन्न हीगी ढीक्ल ॱसुङ्रप्ल हुन्दुक् झ्यीब हुब ॱङीबी़ ली़ दी च्यीक् हीम्बल डोगेन् बेत् सीर थो़ङ्गेन् बेत्। (छ्यारप् २:२४) 17 ॱनी यङ् ॱसु चोव ज्यीन्दक्तङ् च्यीक् डस्सी झ्यीन दो़क्कुक्क हुगो खोङ्दङ् ॱसीम् च्यीक् हीम्बल डोगेन् बेत्। 18 छ्येगी लेमु घयेत् हुगो फङ्न हुगोदङ् ढेन दो़च्च्यीत्। दीक्प ॱयोङ्मा घन्ड झ्यीन अक्, हुगो सी़ल झ्यीबल मीत् डोगेन् बेत्। ॱनी छ्ये ज्युबे दीक्प हुगो रोरङ्गी सी़ल झ्यीबे दीक्पल डोगेन् बेत्। 19 खीत्रङ्गी सी़ हुगो को़न्ज्योक्की ॱनङे धम्बे थु स्युसे छ्यो़गङ् बेत्। खीत्ल हीगो ॱस्यो़च्च्ये मीप्प ॱनी? खीत्रङ्गी सी़ हुगो खीत्रङ्गी मेम्बेत्। 20 खीत्रङ् को़न्ज्योक्की रीन् टेत्न नो़बे मी बेत्। हीगो झ्यीनी खीत्रङ्गी सी़नी को़न्ज्योक्ल तो़प्प युङ झ्यीज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.